Fi Tfittxija Għal Tbassiriet taʼ Min Jafdahom

FTIT wara li s-​sultan tal-​Maċedonja, li sar magħruf bħala Alessandru l-​Kbir, telaʼ fuq it-​tron fis-​sena 336 Q.E.K., hu mar iżur l-​oraklu taʼ Delfi, fiċ-​ċentru tal-​Greċja. Il-​pjanijiet ambizzjużi tiegħu għall-​futur kienu li jiġri x’jiġri jikkonkwista l-​biċċa l-​kbira tad-​dinja taʼ dak iż-​żmien. Imma hu xtaq assiguranza divina li l-​impriżi tremendi tiegħu kien se jkollhom suċċess. Skond il-​leġġenda, f’dak il-​jum li fih żar Delfi, ma kienx permess li jikkonsulta lill-​oraklu. Billi ma riedx jitlaq mingħajr tweġiba, Alessandru insista, waqt li ġiegħel lis-​saċerdotessa tagħtih tbassira. Bi frustrazzjoni hi għajtet: “Oh, żagħżugħ, int invinċibbli!” Is-​sultan żagħżugħ ħadha bħala tbassira favorevoli​—waħda li tawgura kampanja militari vittorjuża.

Madankollu, Alessandru kien ikun informat wisq aħjar dwar ir-​riżultat tal-​kampanja tiegħu kieku eżamina l-​profeziji misjubin fil-​ktieb Bibliku taʼ Danjel. B’eżattezza rimarkevoli, dawn bassru l-​konkwisti li għamel b’ħeffa kbira. Skond it-​tradizzjoni, Alessandru eventwalment ġietu l-​opportunità li jara dak li Danjel kien iddokumenta dwaru. Skond l-​istorjografu Lhudi Ġużeppi Flavju, meta s-​sultan tal-​Maċedonja daħal Ġerusalemm, ġie muri l-​profezija taʼ Danjel​—x’aktarx kapitlu 8 taʼ dak il-​ktieb. (Danjel 8:5-8, 20, 21) Jingħad li minħabba dan, il-​belt ħelsitha mill-​armati distruttivi t’Alessandru.

Bżonn Inerenti tal-​Bniedem

Kemm jekk sultan u kemm jekk wieħed komuni, antik jew modern​—il-​bniedem għadu jħoss il-​bżonn għal tbassiriet taʼ min jafdahom rigward il-​futur. Bħala ħlejjaq intelliġenti, aħna l-​bnedmin nistudjaw il-​passat, aħna konxji tal-​preżent, u aħna interessati speċjalment fil-​futur. Sewwa jgħid dan il-​proverbju Ċiniż: “Min jistaʼ jbassar x’se jiġri minn tlett ijiem qabel ikun sinjur għal eluf taʼ snin.”

Matul iż-​żminijiet, miljuni taʼ nies ipprovaw jitkixxfu x’hemm fil-​futur billi jikkonsultaw maʼ dak li kienu jqisuh bħala divin. Ħu bħala eżempju l-​Griegi tal-​qedem. Huma kellhom partita orakli sagri, bħal dawk taʼ Delfi, Delo, u Dodona, fejn kienu jmorru jistaqsu lill-​allat tagħhom rigward żviluppi politiċi jew militari kif ukoll dwar affarijiet privati bħal vjaġġi, żwieġ, u tfal. Mhux is-​slaten u l-​mexxejja militari biss imma tribujiet sħaħ u stati taʼ bliet ukoll kienu jfittxu gwida mill-​qasam taʼ l-​ispirti permezz taʼ dawn l-​orakli.

Skond wieħed professur, issa hemm “żjieda f’daqqa waħda taʼ organizzazzjonijiet dedikati għall-​istudju dwar il-​futur.” Madankollu, ħafna jippreferu jinjoraw l-​uniku sors eżatt tal-​profeziji​—il-​Bibbja. Dawn b’enfasi jwarrbu kwalunkwe possibbiltà li l-​profeziji tal-​Bibbja fihom dak it-​tagħrif li qed ifittxu huma. Xi studjużi saħansitra jaslu biex iqabblu l-​profeziji tal-​Bibbja mat-​tbassiriet mogħtijin mill-​orakli tal-​qedem. U normalment, ix-​xettiċi taʼ żmienna huma preġudikati kontra l-​profeziji tal-​Bibbja.

Aħna nistidnuk tiċċekkja x’hemm miktub għalik innifsek. X’jirrivela jekk tipparaguna t-​tbassiriet tal-​Bibbja maʼ l-​orakli tal-​bniedem? Il-​profeziji tal-​Bibbja tistaʼ tafdahom iktar mill-​orakli tal-​qedem? U tistaʼ b’fiduċja tagħmel il-​profeziji tal-​Bibbja l-​ewwel ħaġa f’ħajtek?

[Stampa f’paġna 3]

Il-​Bibbja bassret il-​konkwisti li Alessandru għamel b’ħeffa kbira

[Sors]

Cortesía del Museo del Prado, ġewwa Madrid, fi Spanja

[Stampa f’paġna 4]

Alessandru l-​Kbir

[Sors]

Musei Capitolini, Roma

[Sors taʼ l-​Istampa f’paġna 2]

QOXRA: Il-​Ġeneral Titu u Alessandru l-​Kbir: Musei Capitolini, Roma