Proklamaturi tas-​Saltna Jirrapportaw

Ix-​Xhieda Jmorru Għand il-​Pubbliku fi Franza

MINN kmieni fil-​għodu tal-​Ġimgħa, 29 taʼ Jannar, 1999, u sa tmiem dik il-​ġimgħa, ix-​Xhieda taʼ Jehovah fi Franza qassmu b’entużjażmu fit-​toroq u iktar tard minn dar għal dar, 12-il miljun kopja taʼ fuljett bl-​isem People of France, You Are Being Deceived! (Nies taʼ Franza, Qed Tiġu Mqarrqa!) Għala saret din il-​kampanja?

Waqt konferenza stampa f’Pariġi f’dak il-​jum tal-​Ġimgħa fil-​għodu, ngħatat ir-​raġuni għaliex kienet se ssir din il-​kampanja. Kelliemi għax-​Xhieda spjega: “Dak li rridu nagħmlu bħalissa hu li nsiru magħrufin għal dak li aħna u nsikktu l-​istqarrijiet infamanti li nxterrdu dwarna. Aħna lesti li naċċettaw il-​kritika, imma mhux se nibqgħu nagħtu widen għall-​gideb u l-​kummenti li qed iħassru r-​reputazzjoni tagħna.”

Għalkemm ix-​Xhieda taʼ Jehovah huma t-​tielet l-​akbar reliġjon Kristjana fi Franza, ħafna tfal tax-​Xhieda ġew insultati u mkiddin fl-​iskola. Xi adulti tilfu x-​xogħol tagħhom u ġew mheddin minħabba r-​reliġjon tagħhom. Ħaġa li ma titwemminx, huma saħansitra ġew intaxxati bis-​60 fil-​mija fuq il-​kontribuzzjonijiet reliġjużi li rċivew. Il-​kampanja x’għamlet dwar din id-​diskriminazzjoni?

Il-fuljett jiddikjara: “Il-​250,000 Xhud taʼ Jehovah u dawk li jassoċjaw magħhom li jgħixu fi Franza JIPPROTESTAW kontra l-​mod diżonest kif ir-​reliġjon Kristjana tagħhom, li fi Franza ilha teżisti mill-​1900, ġiet klassifikata maʼ setet perikolużi mill-​1995. . . . JIPPROTESTAW kontra l-​indħil u ż-​żebliħ li l-​ħin kollu qed isir kontrihom.” L-​akkużi malafamanti kontra x-​Xhieda fi Franza u l-​modi diżonesti li ntużaw minn dawk li mmalafamaw sabiex joħolqu pubbliċità negattiva nħarġu fil-​beraħ. Il-​fuljett jikkonkludi billi jgħid: “Illum, hemm iktar minn żewġ miljun Xhud taʼ Jehovah u dawk li jassoċjaw magħhom jgħixu fl-​Ewropa. Huma jirrispettaw il-​liġijiet taʼ l-​Istati li tagħhom huma ċittadini billi jappoġġaw il-​valuri taʼ l-​Evanġelju. Nies taʼ Franza, dawn huma l-​fatti. Huwa d-​dmir tagħna li nippreżentawhom eżatt kif inhuma!”

Tweġiba Malajr u Pożittiva

Fl-​ewwel ġurnata tqassmu miljuni taʼ fuljetti. F’Pariġi biss, sa nofsinhar ’il fuq minn 7,000 Xhud kienu diġà qassmu iktar minn 1.3 miljun fuljett lin-​nies. Kienet ċertament l-​ewwel darba għan-​nies li jaraw daqshekk Xhieda jqassmu l-​fuljetti fit-​toroq. Il-​mezzi tax-​xandir, inkluż il-​gazzetti nazzjonali u lokali u l-​istazzjonijiet televiżivi, irreaġixxew b’mod favorevoli għal din il-​kampanja taʼ tagħrif. Il-​gazzetta Le Progrès de Lyon innotat: “Din l-​inizjattiva . . . toħroġ fil-​beraħ ċertu nuqqas taʼ ftehim dwar kelma. F’dawn l-​aħħar għaxar snin, il-​kelma ‘setta’ . . . ħadet sens pervers, perikoluż, u taʼ ħsara. . . . Ix-​Xhieda taʼ Jehovah m’humiex taʼ periklu għas-​soċjetà.”

Dawk li jafu lix-​Xhieda taʼ Jehovah japprezzaw in-​natura paċifika tagħhom u r-​rispett profond li għandhom lejn l-​ordni soċjali stabbilita. B’hekk, ħafna li kienu fit-​toroq esprimew l-​apprezzament u l-​appoġġ tagħhom għall-​għaxriet t’eluf taʼ Xhieda li ħadu sehem fil-​kampanja. Telefonati, faxes, u ittri mingħand nies li esprimew ir-​ringrazzjament tagħhom għall-​fuljett bdew jaslu kważi immedjatament. Fuq kollox, uħud sinċieri ngħataw iċ-​ċans li jisimgħu l-​fatti dwar ix-​Xhieda, kuntrarju għal rimarki vvintati u bla sens, u dawk li t-​twemmin tagħhom kien ġie malafamat setgħu juru s-​sentimenti tagħhom għal dak li jgħożżu.