Uża l-​Fuljetti biex Tibda Konversazzjonijiet

¹ Ma taqbilx int li l-​fatt li tagħti xiehda effettiva jiddependi l-​iktar fuq li tieħu l-​inizjattiva biex tibda konversazzjonijiet? L-​isfida hi li tgħid xi ħaġa li tqanqal l-​interess tal-​persuna u tinvolviha fid-​diskussjoni. Imma dan kif jistaʼ jsir b’mod effettiv?

² Ħafna pubblikaturi sabu li jistgħu jibdew konversazzjonijiet bi ftit kliem magħżul tajjeb u billi joffru wieħed mill-​fuljetti li għandna bbażati fuq il-​Bibbja. It-​titli jattiraw lil dak li jkun, u l-​istampi kollha kuluri jolqtu l-​għajn. Fuljett ma jbeżżagħhiex lill-​persuna, billi jagħtiha l-​impressjoni li hemm ħafna informazzjoni x’taqra. Xorta waħda, il-​messaġġi konċiżi li hemm fil-​fuljetti huma interessanti u jistgħu jintużaw biex iwasslu għal studju tal-​Bibbja.

³ Hekk ħassu personalment wieħed Xhud: “F’din id-​dinja daqshekk mgħaġġla, taʼ spiss in-​nies ma jkunux iridu jaħlu ħafna ħin jaqraw. Il-​fuljetti huma twal biżżejjed biex jagħtu messaġġ importanti imma m’humiex daqshekk twal li jgerrxu lin-​nies saħansitra qabel ma jħarsu lejhom. Jien qrajt ħafna mill-​fuljetti, u eventwalment tgħallimt il-​verità.” Qatt tissottovaluta l-​qawwa tal-​Kelma t’Alla kif inhi spjegata f’dawn il-​messaġġi qosra u stampati.—Lhud 4:12.

⁴ Erbaʼ Passi Faċli: Ħafna gawdew suċċess billi wżaw metodu sempliċi. (1) Uri lill-​persuna ftit mill-​fuljetti u staqsieha liema wieħed minnhom jolqotha. (2) Wara li l-​persuna tagħżel wieħed, staqsieha mistoqsija preparata sew li tenfasizza punt prinċipali fil-​fuljett. (3) Bħala tweġiba għall-​mistoqsija, aqra paragrafu xieraq jew skrittura mill-​fuljett. (4) Jekk ikollok reazzjoni favorevoli, kompli ddiskuti l-​kontenut tal-​fuljett jew irreferi għal xi lezzjoni mill-​browxer X’Jirrikjedi jew xi kapitlu mill-​ktieb Għarfien li jipprovdi iktar kummenti. B’dan il-​mod int tistaʼ tkun kapaċi tidħol mill-​ewwel għal studju tal-​Bibbja. Is-​suġġerimenti li ġejjin se jgħinuk tipprepara x’tgħid billi tuża erbaʼ fuljetti minn dawn.

⁵ It-​titlu tal-​fuljett “Min Tassew Jaħkem lid-​Dinja?” jistaʼ jservi bħala mistoqsija.

◼ Jekk bħala tweġiba l-​persuna maʼ min tkun qed titkellem tgħid “Alla” jew “Ma nafx,” aqra l-​ewwel żewġ sentenzi f’paġna 2 u l-​ewwel paragrafu f’paġna 3. Enfasizza l-​1 Ġwann 5:19 u Apokalissi 12:9. Sew jekk il-​persuna tiddubita l-​eżistenza taʼ Satana x-​Xitan inkella tagħrafx l-​influwenza tiegħu fuq id-​dinja jew le, tistaʼ tkompli l-​konversazzjoni billi ssegwi l-​linja taʼ rraġunar misjuba taħt is-​sottitlu “Ħjiel Mill-​Kundizzjonijiet Tad-​Dinja.” Jekk jintwera interess, offri li tispjega minfejn ġie x-​Xitan, billi tuża l-​punti f’paġni 3 u 4 tal-​fuljett.

⁶ Il-​fuljett “X’Tama Hemm għall-​Maħbubin Mejtin?” jistaʼ jqanqal interess mill-​ewwel. Int tistaʼ tibda konversazzjoni billi tistaqsi:

◼ “Taħseb li qatt xi darba se nerġgħu narawhom lill-​maħbubin mejtin tagħna?” Wara li l-​persuna twieġeb, ipponta lejn it-​tieni paragrafu f’paġna 4 tal-​fuljett u aqra Ġwann 5:​28, 29. Imbagħad spjega li din tgħin biex wieħed jifhem it-​tagħrif li hemm taħt l-​ewwel sottitlu tal-​fuljett. Offri li tiddiskutuh flimkien.

⁷ Il-​fuljett “Gawdi l-​Ħajja tal-​Familja” jinteressa lill-​familji kollha. Meta tużah, tistaʼ tgħid:

◼ “Int għandek mnejn taqbel li llum il-​familja tinsab taħt attakk. X’taħseb li jistaʼ jsir sabiex jissaħħu r-​rabtiet tal-​familja?” Wara li l-​persuna twieġeb, iġbed l-​attenzjoni tagħha lejn il-​punti fl-​ewwel paragrafu f’paġna 6. Agħżel waħda mill-​iskritturi kwotati f’paġni 4 u 5 tal-​fuljett, u spjega xi tfisser. Imbagħad offri studju tal-​Bibbja fid-​dar bla ħlas.

⁸ Il-​fuljett “Għala Tistaʼ Tafda l-​Bibbja” jistaʼ jintuża maʼ din il-​preżentazzjoni:

◼ “Il-​biċċa l-​kbira tan-​nies semgħu bl-​istorja taʼ Kajjin u Abel, li tinsab fl-​ewwel ktieb tal-​Bibbja. Ir-​rakkont f’Ġenesi jirreferi wkoll għall-​mara taʼ Kajjin. Qatt ħsibt minfejn setgħet ġiet din il-​mara?” Uża l-​aħħar paragrafu f’paġna 2 tal-​fuljett biex tagħti t-​tweġiba. Spjega li l-​fuljett jiddiskuti wkoll kummenti importanti fil-​Bibbja dwar dak li hemm merfugħ għalina fil-​futur. Billi tibda bit-​tielet paragrafu f’paġna 5, kompli bid-​diskussjoni, filwaqt li tuża l-​iskritturi addattati.

⁹ It-​tqassim tal-​fuljetti Bibliċi huwa mezz effettiv li ilu jintuża għal żmien twil biex tiġi preżentata l-​aħbar tajba. Peress li huma faċli biex iġġorrhom miegħek kulfejn tmur, int tistaʼ tużahom b’mod effettiv fl-​attività tiegħek minn bieb għal bieb u meta tkun qed tagħti xiehda informali. Il-​fuljetti għandhom irwol importanti f’li nwettqu l-​ministeru tagħna. Kun żgur li ġġorr varjetà minnhom, u li tużahom b’mod ġeneruż biex tibda konversazzjonijiet.—Kol. 4:17.