X’Jistenna Jehovah Minna Llum?

“Minn ġos-​sħaba nstemaʼ leħen jgħid: ‘Dan hu Ibni l-​għażiż, li fih sibt l-​għaxqa tiegħi: isimgħu lilu.’”—MATTEW 17:5.

1. Il-​Liġi meta wettqet l-​iskop tagħha?

JEHOVAH ta l-​Liġi, bid-​diversi fatturi tagħha, lill-​ġens taʼ Iżrael. Rigward dawn il-​fatturi, l-​appostlu Pawlu kiteb: “Huma għandhom x’jaqsmu biss maʼ . . . liġijiet li jolqtu l-​ġisem, mogħtija sa ma jasal żmien it-​tiġdid.” (Lhud 9:10) Meta l-​Liġi wasslet lil fdal taʼ Iżraeliti biex jaċċettaw lil Ġesù bħala l-​Messija, jew Kristu, din kienet wettqet l-​iskop tagħha. B’hekk, Pawlu ddikjara: “L-​iskop tal-​Liġi hu Kristu.”—Rumani 10:4; Galatin 3:19-25; 4:4, 5.

2. Min kien taħt il-​Liġi, u dawn meta nħelsu minnha?

² Ifisser dan li llum m’aħniex marbutin bil-​Liġi? Fil-​fatt, il-​maġġuranza taʼ l-​umanità qatt ma kienet taħt il-​Liġi, bħalma spjega s-​salmista: “[Jehovah] jxandar kelmtu lil Ġakobb, il-​liġijiet u d-​digrieti tiegħu lil Iżrael. Ma għamel hekk maʼ ebda poplu; lil ħadd ma għarraf id-​digrieti tiegħu.” (Salm 147:19, 20) Meta Alla stabbilixxa l-​patt il-​ġdid fuq il-​bażi tas-​sagrifiċċju taʼ Ġesù, saħansitra l-​ġens taʼ Iżrael ma baqax taħt l-​obbligu li jobdi l-​Liġi. (Galatin 3:13; Efesin 2:14, 15 [Efesin 2:15, NW]; Kolossin 2:13, 14, 16) Jekk, mela, m’għadniex marbutin bil-​Liġi, x’jistenna Jehovah minn dawk li jixtiequ jaqduh illum?

Dak li Jistenna Jehovah

3, 4. (a) Bażikament x’jistenna Jehovah minna llum? (b) Għala għandna nsegwu l-​passi taʼ Ġesù mill-​qrib?

³ Matul l-​aħħar sena tal-​ministeru taʼ Ġesù, l-​appostli tiegħu Pietru, Ġakbu, u Ġwanni akkumpanjawh fuq muntanja għolja, x’aktarx xi parti li kienet testendi mill-​Muntanja Ħermon. Hemmhekk huma raw viżjoni profetika taʼ Ġesù fi glorja manjifika u semgħu leħen Alla stess jiddikjara: “Dan hu Ibni l-​għażiż, li fih sibt l-​għaxqa tiegħi: isimgħu lilu.” (Mattew 17:1-5) Bażikament, dan hu li Jehovah qed jistenna minna​—li nisimgħu minn Ibnu u nsegwu l-​eżempju u t-​tagħlim tiegħu. (Mattew 16:24) B’hekk, l-​appostlu Pietru kiteb: “Kristu wkoll bata għalikom u ħallielkom eżempju biex timxu fuq il-​passi tiegħu.”—1 Pietru 2:21.

⁴ Għala għandna nsegwu l-​passi taʼ Ġesù mill-​qrib? Għax billi nimitaw lilu, inkunu qed nimitaw lil Alla Jehovah. Ġesù kien jaf lil Missieru b’mod intimu, billi qattaʼ biljuni bla għadd taʼ snin miegħu fis-​sema qabel ma ġie fuq l-​art. (Proverbji 8:22-31; Ġwann 8:23; 17:5; Kolossin 1:15-17) Waqt li kien fuq l-​art, Ġesù rrappreżenta lealment lil Missieru. Hu spjega: “Li nitkellem [hu] skond ma għallimni l-​Missier.” Fil-​fatt, Ġesù imita lil Jehovah b’mod tant eżatt li setaʼ jgħid: “Min ra lili ra lill-​Missier.”—Ġwann 8:28; 14:9.

5. Il-​Kristjani taħt liema liġi qegħdin, u din il-​liġi meta bdiet topera?

⁵ X’inhu involut f’li nisimgħu minn Ġesù u nimitawh? Ifisser dan li nkunu taħt xi liġi? Pawlu kiteb: “Jien . . . m’iniex taħt il-​Liġi.” Hawn kien qed jirreferi għall-​“Patt il-​Qadim,” il-​patt tal-​Liġi magħmul maʼ Iżrael. Pawlu rrikonoxxa li ‘Kristu kien il-​liġi tiegħu.’ (1 Korintin 9:20, 21; 2 Korintin 3:14) Mat-​tmiem tal-​patt tal-​Liġi l-​qadim, beda jopera “patt ġdid” bil-​“liġi taʼ Kristu” li l-​qaddejja kollha taʼ Jehovah llum huma obbligati jobduha.—Luqa 22:20; Galatin 6:2; Lhud 8:7-13.

6. Kif tistaʼ tiġi deskritta “l-​liġi taʼ Kristu,” u kif nobduha?

⁶ Jehovah ma poġġiex il-​“liġi taʼ Kristu” f’għamla taʼ kodiċi billi organizzaha f’diversi kategoriji, bħalma sar fil-​patt tal-​Liġi l-​qadim. Din il-​liġi ġdida għas-​segwaċi taʼ Kristu ma tinkludix lista estensiva taʼ regolamenti dettaljati. Madankollu, fil-​Kelma tiegħu Jehovah ppreserva erbaʼ rakkonti komprensivi dwar il-​ħajja u t-​tagħlim taʼ Ibnu. Iktar minn hekk, Alla nebbaħ lil xi wħud mis-​segwaċi bikrin taʼ Ġesù biex jipprovdu istruzzjonijiet bil-​miktub rigward imġiba persunali, kwistjonijiet tal-​kongregazzjoni, kondotta ġol-​familja, u affarijiet oħrajn. (1 Korintin 6:18; 14:26-35; Efesin 5:21-33; Lhud 10:24, 25) Meta nikkonformaw il-​ħajja tagħna maʼ l-​eżempju u t-​tagħlim taʼ Ġesù Kristu u nagħtu kas tal-​pariri mogħtija mill-​kittieba mnebbħa tal-​Bibbja fl-​ewwel seklu, inkunu qed nobdu “l-​liġi taʼ Kristu.” Dan hu li jistenna Jehovah mill-​qaddejja tiegħu llum.

L-​Importanza taʼ l-​Imħabba

7. Ġesù kif enfasizza s-​sustanza tal-​liġi tiegħu matul l-​aħħar Qbiż maʼ l-​appostli tiegħu?

⁷ Filwaqt li l-​imħabba kienet importanti taħt il-​Liġi, din hija t-​tifsira nfisha, jew l-​essenza, tal-​liġi taʼ Kristu. Dan il-​fatt ġie enfasizzat minn Ġesù meta ltaqaʼ maʼ l-​appostli tiegħu biex jiċċelebra l-​Qbiż tas-​sena 33 E.K. Fis-​sommarju tiegħu dwar x’ġara f’dik il-​lejla, l-​appostlu Ġwanni jgħidilna li Ġesù, waqt li tkellem mill-​fond taʼ qalbu, għamel 28 referenza għall-​imħabba. Dan enfasizza lill-​appostli tiegħu s-​sustanza, jew spirtu, tal-​liġi tiegħu. Huwa sinjifikanti li Ġwanni introduċa r-​rapport tiegħu dwar x’seħħ f’dik il-​lejla hekk importanti billi qal: “Qabel il-​festa taʼ l-​Għid, billi kien jaf Ġesù li waslet is-​siegħa tiegħu biex jgħaddi minn din id-​dinja għal għand il-​Missier, hu, li kien ħabb lil tiegħu li kienu fid-​dinja, ħabbhom għall-​aħħar.”—Ġwann 13:1.

8. (a) X’indikazzjoni kien hemm t’argument kontinwu bejn l-​appostli? (b) Ġesù kif għallem lill-​appostli tiegħu lezzjoni fl-​umiltà?

⁸ Ġesù kien iħobbhom lill-​appostli tiegħu, avolja l-​isforzi tiegħu biex jgħinhom jegħlbu x-​xewqa eċċessiva tagħhom għall-​poter u l-​pożizzjoni kienu qishom għalxejn. Xi ftit tax-​xhur qabel waslu Ġerusalemm, “kienu qagħdu jitħaddtu bejniethom fuq min kien l-​akbar.” U ftit qabel ma waslu l-​belt għall-​Qbiż, reġaʼ qam l-​argument dwar il-​pożizzjoni. (Mark 9:33-37; 10:35-45) Li din kienet problema kontinwa huwa indikat minn dak li ġara ftit wara li l-​appostli daħlu fil-​kamra taʼ fuq biex jipparteċipaw f’dak li kellu jkun l-​aħħar Qbiż flimkien. Dak il-​ħin ħadd ma ħataf l-​opportunità biex jimxi maʼ l-​użanza, u jkun ospitabbli billi jaħsel saqajn l-​oħrajn. Biex jgħallimhom lezzjoni fl-​umiltà, Ġesù stess ħaslilhom saqajhom.—Ġwann 13:2-15; 1 Timotju 5:9, 10.

9. Ġesù kif ittratta s-​sitwazzjoni li seħħet wara l-​aħħar Qbiż?

⁹ Minkejja din il-​lezzjoni, wara li osservaw il-​Qbiż u Ġesù istitwixxa l-​Mafkar taʼ mewtu li kienet riesqa, innota x’reġaʼ seħħ. Jgħid ir-​rakkont taʼ l-​Evanġelju taʼ Luqa: “Nqalgħet ukoll kwistjoni bejniethom dwar min minnhom kellu jinżamm bħala l-​akbar wieħed.” Minflok ma rrabja maʼ l-​appostli u ċanfarhom, Ġesù wissiehom bil-​ħlewwa dwar il-​ħtieġa li jkunu differenti mill-​ħakkiema tad-​dinja li huma għatxana għall-​poter. (Luqa 22:24-27) Imbagħad hu pprovda dak li nistgħu nsejħulu l-​pedament tal-​liġi taʼ Kristu, billi qal: “Nagħtikom kmandament ġdid, li tħobbu lil xulxin. Bħalma ħabbejtkom jien, hekk ukoll ħobbu intom lil xulxin.”—Ġwann 13:34.

10. Ġesù liema kmandament ta lid-​dixxipli tiegħu, u dan x’kien jinvolvi?

¹⁰ Iktar tard dik il-​lejla Ġesù indika sa liema punt għandha twassal l-​imħabba bħal taʼ Kristu. Qalilhom: “Dan hu l-​kmandament tiegħi: li tħobbu lil xulxin kif ħabbejtkom jien. Ħadd ma għandu mħabba akbar minn din: li wieħed jagħti ħajtu għal ħbiebu.” (Ġwann 15:12, 13) Kien Ġesù qed jgħid li s-​segwaċi tiegħu għandhom ikunu lesti li jmutu għal kredenti sħabhom jekk ikun hemm bżonn? Hekk fehem Ġwanni, li kien preżenti f’din l-​okkażjoni, għax iktar tard kiteb: “B’dan naslu biex nagħrfu x’inhi l-​imħabba: li Ġesù Kristu ta ħajtu għalina. Aħna wkoll mela għandna nagħtu ħajjitna għall-​aħwa.”—1 Ġwann 3:16.

11. (a) Kif inwettquha l-​liġi taʼ Kristu? (b) Ġesù liema eżempju pprovda?

¹¹ Mela, allura ma nkunux qed inwettqu l-​liġi taʼ Kristu sempliċement billi ngħallmu lil oħrajn dwaru. Irridu wkoll ngħixu u naġixxu bħal Ġesù. Veru, Ġesù uża kliem sabiħ u mirqum fit-​taħditiet tiegħu. Iżda hu għallem ukoll bl-​eżempju. Avolja Ġesù kien spirtu setgħan fis-​sema, hu ħataf l-​opportunità biex jaqdi l-​interessi taʼ Missieru fuq l-​art u biex jurina kif għandna ngħixu. Kien umli, qalbu tajba, u konsiderevoli, waqt li għen lill-​imtaqqlin u lill-​oppressi. (Mattew 11:28-30; 20:28; Filippin 2:5-8; 1 Ġwann 3:8) U Ġesù ħeġġeġ lis-​segwaċi tiegħu biex iħobbu lil xulxin, sewwa sew bħalma ħabbhom hu.

12. Għala jistaʼ jingħad li l-​liġi taʼ Kristu ma tnaqqasx il-​ħtieġa li nħobbu lil Jehovah?

¹² Liema post għandha l-​imħabba għal Jehovah​—l-​akbar kmandament tal-​Liġi—​fil-liġi taʼ Kristu? (Mattew 22:37, 38; Galatin 6:2) It-​tieni post? Dażgur li le! L-​imħabba għal Jehovah u l-​imħabba għal Kristjani sħabna ma tistax tisseparahom minn xulxin. Ma tistax verament tħobb lil Jehovah mingħajr ma tħobb lil ħuk ukoll, għax l-​appostlu Ġwanni nnota: “Jekk xi ħadd jgħid: ‘Jiena nħobb ’l Alla’, u jobgħod lil ħuh, dan ikun giddieb. Għax min ma jħobbx lil ħuh li jara, kif jistaʼ jħobb lil Alla li hu qatt ma rah?”—1 Ġwann 4:20; qabbel l-1 Ġwann 3:17, 18.

13. X’effett kellha l-​ubbidjenza tad-​dixxipli għall-​kmandament il-​ġdid taʼ Ġesù?

¹³ Meta Ġesù ta lid-​dixxipli tiegħu l-​kmandament il-​ġdid li jħobbu lil xulxin sewwa sew bħalma ħabbhom hu, iddeskriva l-​effett li dan kien se jkollu. “Minn dan jagħraf kulħadd li intom dixxipli tiegħi,” hu qal, “jiġifieri, jekk ikollkom l-​imħabba bejnietkom.” (Ġwann 13:35) Skond Tertuljanu, li għex iktar minn mitt sena wara l-​mewt taʼ Ġesù, l-​imħabba taʼ l-​aħwa bejn il-​Kristjani bikrin kellha preċiż dan l-​effett. Tertuljanu kkwota lil nies mhux Kristjani li kienu jgħidu dwar is-​segwaċi taʼ Kristu: ‘Ara kemm iħobbu lil xulxin u kif inhuma lesti saħansitra li jmutu għal xulxin.’ Aħna nistgħu nistaqsu lilna nfusna, ‘Nuri jien imħabba bħal din għal Kristjani sħabi, li tagħti prova li jien wieħed mid-​dixxipli taʼ Ġesù?’

Kif Nagħtu Prova taʼ Mħabbitna

14, 15. X’jistaʼ jagħmilha diffiċli li nobdu l-​liġi taʼ Kristu, iżda x’jistaʼ jgħinna nagħmlu dan?

¹⁴ Huwa vitali għall-​qaddejja taʼ Jehovah li juru mħabba bħal taʼ Kristu. Imma ssibha iebsa li tħobb lil xi Kristjani sħabek li juru karatteristiċi egoistiċi? Iva, bħalma rajna, saħansitra l-​appostli argumentaw bejniethom u pprovaw jippromwovu l-​interessi tagħhom stess. (Mattew 20:20-24) Il-​Galatin ukoll tlewmu bejniethom. Wara li ġibed għall-​attenzjoni li l-​imħabba għall-​proxxmu twettaq il-​Liġi, Pawlu wissiehom: “Jekk intom tgiddmu u tieklu lil xulxin, oqogħdu attenti li ma tikkunsmawx lil xulxin.” Wara li għamel kuntrast bejn l-​għemejjel tal-​ġisem u l-​frott taʼ l-​ispirtu t’Alla, Pawlu żied it-​twiddiba: “Ma nkunux minn dawk li jfittxu l-​ftaħir fieragħ; ma nġarrbux lil xulxin; ma ngħirux għal xulxin.” Imbagħad l-​appostlu ħeġġeġ: “Erfgħu t-​tagħbija taʼ xulxin, u hekk tkunu qegħdin tħarsu l-​liġi taʼ Kristu.”—Galatin 5:14–6:2.

¹⁵ Billi jirrikjedi ubbidjenza lejn il-​liġi taʼ Kristu, qiegħed Jehovah jistenna wisq minna? Għalkemm forsi jkun diffiċli li nuru qalb tajba maʼ dawk li jkunu, fil-​fatt, ħatfuna u weġġgħuna emozzjonalment, aħna obbligati li ‘nixbhu lil Alla, bħala wlied maħbuba, u nimxu fl-​imħabba.’ (Efesin 5:1, 2) Hemm bżonn li nibqgħu nħarsu lejn l-​eżempju t’Alla, li “wriena l-​imħabba tiegħu meta Kristu miet għalina, aħna li konna għadna midinbin.” (Rumani 5:8) Billi nieħdu l-​inizjattiva biex ngħinu lil oħrajn, inkluż dawk li stmawna ħażin, jistaʼ jkollna s-​sodisfazzjon li nafu li qed nimitaw lil Alla u li qed nobdu l-​liġi taʼ Kristu.

16. Kif nagħtu prova taʼ mħabbitna għal Alla u għal Kristu?

¹⁶ Irridu niftakru li aħna nagħtu prova taʼ mħabbitna b’dak li nagħmlu, mhux sempliċement b’dak li ngħidu. Saħansitra Ġesù darba sabha diffiċli li jaċċetta aspett mir-​rieda t’Alla minħabba dak kollu li kien involut. “Missier, jekk inti trid, warrab minni dan il-​kalċi,” talab Ġesù. Madankollu malajr żied: “Iżda tkun magħmula r-​rieda tiegħek, u mhux tiegħi.” (Luqa 22:42) Minkejja dak kollu li sofra, Ġesù għamel ir-​rieda t’Alla. (Lhud 5:7, 8) L-​ubbidjenza hija prova taʼ mħabbitna u turi li aħna nirrikonoxxu li t-​triq t’Alla hija l-​aħjar. “Għax din hi l-​imħabba taʼ Alla,” tgħid il-​Bibbja, “li nżommu l-​kmandamenti tiegħu.” (1 Ġwann 5:3) U Ġesù qal lill-​appostli tiegħu: “Jekk tħobbuni, ħarsu l-​kmandamenti tiegħi.”—Ġwann 14:15.

17. Ġesù liema kmandament speċjali ta lis-​segwaċi tiegħu, u kif nafu li dan japplika għalina llum?

¹⁷ Minbarra li kkmanda lis-​segwaċi tiegħu biex iħobbu lil xulxin, Kristu liema kmandament speċjali tahom? Hu kkmandahom biex jagħmlu x-​xogħol taʼ l-​ippridkar li kien ħarriġhom għalih. Pietru qal: “Lilna ordnalna biex inxandruh lill-​poplu u nixhdu.” (Atti 10:42) Ġesù kien ikkmanda speċifikament: “Morru, mela, agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu, u għallmuhom iħarsu dak kollu li ordnajtilkom jien.” (Mattew 28:19, 20; Atti 1:8) Ġesù rrivela li dawn l-​istruzzjonijiet kellhom japplikaw ukoll għas-​segwaċi tiegħu llum fiż-​“żmien taʼ l-​aħħar,” għax hu qal: “Dan l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.” (Danjel 12:4; Mattew 24:14) M’għandniex xi ngħidu, hija r-​rieda t’Alla li aħna nippridkaw. Madankollu, xi wħud forsi jaħsbu li billi jirrikjedi li aħna nagħmlu dan ix-​xogħol Alla qed jistenna wisq minna. Imma huwa dan tassew il-​każ?

Għala Jistaʼ Jidher Diffiċli

18. X’għandna niftakru meta nsofru għax nagħmlu dak li jistenna minna Jehovah?

¹⁸ Bħalma rajna, Jehovah stenna minn xi nies li jikkonformaw maʼ diversi ħtiġijiet matul l-​istorja tal-​bniedem. U sewwa sew bħalma kienu diversi l-​affarijiet li kienu ordnati li jagħmlu, hekk ukoll kienet in-​natura tal-​provi li ġarrbu. L-​Iben għażiż t’Alla għadda mill-​iktar provi diffiċli, u eventwalment inqatel bl-​iktar manjiera ħarxa talli għamel dak li Alla rrikjeda minnu. Iżda meta nsofru għax nagħmlu dak li Jehovah jistenna minna, għandna niftakru li hu m’huwiex responsabbli għat-​tiġrib tagħna. (Ġwann 15:18-20; Ġakbu 1:13-15) Kien l-​irvell taʼ Satana li daħħal id-​dnub, it-​tbatija, u l-​mewt, u kien hu l-​wieħed li ħoloq iċ-​ċirkustanzi li taʼ spiss għamluha diffiċli ħafna għall-​qaddejja taʼ Jehovah biex jagħmlu dak li jistenna minnhom.—Ġob 1:6-19; 2:1-8.

19. Għala huwa privileġġ li nagħmlu dak li Alla ordnalna permezz taʼ Ibnu?

¹⁹ Permezz taʼ Ibnu, Jehovah ordna li f’dan iż-​żmien tat-​tmiem, il-​qaddejja Tiegħu jipproklamaw maʼ l-​art kollha li l-​unika soluzzjoni għas-​sofferenzi umani kollha hija l-​ħakma tas-​Saltna. Dan il-​gvern t’Alla se jelimina l-​problemi kollha fuq l-​art​—gwerer, kriminalità, faqar, xjuħija, mard, u mewt. Is-​Saltna se ġġib ukoll ġenna taʼ l-​art glorjuża, li fiha saħansitra l-​mejtin se jirxoxtaw. (Mattew 6:9, 10; Luqa 23:43; Atti 24:15; Apokalissi 21:3, 4) Xi privileġġ hu għalina li niddikjaraw l-​aħbar tajba taʼ dawn l-​affarijiet! Mela, jidher ċar li m’hemm ebda problema f’dak li Jehovah jordnalna nagħmlu. Inħabbtu wiċċna maʼ oppożizzjoni, imma Satana x-​Xitan u d-​dinja tiegħu huma responsabbli taʼ dan.

20. Kif nistgħu niffaċċjaw kull sfida li jippreżentalna x-​Xitan?

²⁰ Kif nistgħu niffaċċjaw b’suċċess l-​isfidi li jippreżentalna Satana? Billi nżommu f’moħħna dan il-​kliem: “Kun għaref, ibni, u ferraħli qalbi, biex inkun nistaʼ nwieġeb lil min jgħajjarni.” (Proverbji 27:11) Ġesù pprovda tweġiba lil Jehovah għat-​tgħajjir taʼ Satana billi ħalla s-​sigurtà tal-​ħajja fis-​sema biex jagħmel ir-​rieda taʼ Missieru fuq l-​art. (Isaija 53:12; Lhud 10:7) Bħala bniedem, Ġesù ssaporta kull prova mitfugħa fuqu, saħansitra l-​mewt fuq zokk tat-​tortura. Jekk insegwuh bħala l-​Eżemplar tagħna, aħna wkoll nistgħu nissaportu s-​sofferenzi u nagħmlu dak li Jehovah jistenna minna.—Lhud 12:1-3.

21. Kif tħossok dwar l-​imħabba li wrew Jehovah u Ibnu?

²¹ X’imħabba wrewna Alla u Ibnu! Minħabba s-​sagrifiċċju taʼ Ġesù, l-​umanità ubbidjenti għandha l-​prospett li tgħix għal dejjem fil-​Ġenna taʼ l-​art. Mela ejja ma nħallu xejn iċajprilna t-​tama tagħna. Minflok, ejja personalment indaħħlu f’qalbna dak li Ġesù għamel possibbli, l-​istess bħalma għamel Pawlu, li qal: “[L]-Iben taʼ Alla, li ħabbni u ta lilu nnifsu għalija.” (Korsiv tagħna.) (Galatin 2:20) U jalla nuru gratitudni mill-​qalb lejn Alla tagħna taʼ mħabba, Jehovah, li qatt ma jistenna wisq minna.

Int kif Twieġeb?

◻ Jehovah x’jistenna minna llum?

◻ Matul l-​aħħar lejla li qattaʼ maʼ l-​appostli tiegħu, Kristu kif enfasizza l-​importanza taʼ l-​imħabba?

◻ Kif nistgħu nagħtu prova li nħobbu lil Alla?

◻ Għala huwa privileġġ li nagħmlu dak li Jehovah jistenna minna?

[Stampa f’paġna 23]

Ġesù liema lezzjoni għallem billi ħasel saqajn l-​appostli tiegħu?

[Stampa f’paġna 25]

Minkejja l-​oppożizzjoni, li naqsmu l-​aħbar tajba m’oħrajn huwa privileġġ pjaċevoli