2000—Sena Distinta?

GĦANDHA xi ħaġa speċjali s-​sena 2000? In-​nies li jgħixu f’pajjiżi tal-​Punent ġeneralment iqisuha bħala l-​ewwel sena tat-​tielet millennju. Għaddejjin tħejjijiet elaborati sabiex tiġi ċelebrata. Arloġġi elettroniċi enormi qed jitwaħħlu biex jgħoddu s-​sekondi sakemm jisbaħ il-​millennju l-​ġdid. Qed jiġu organizzati ballijiet gala għal lejlet l-​ewwel tas-​sena. Kemm fil-​ħwienet tar-​raħal kif ukoll fiċ-​ċentri kummerċjali fl-​ibliet il-​kbar, qed jinbiegħu flokkijiet bi kliem stampat fuqhom konness mat-​tmiem tal-​millennju.

Il-knejjes, kemm kbar u kemm żgħar, se jingħaqdu fl-​attivitajiet festivi taʼ matul is-​sena. Fil-​bidu tas-​sena d-​dieħla, il-​Papa Ġwanni Pawlu II hu mistenni li jivvjaġġa lejn l-​Iżrael biex imexxi lill-​Kattoliċi Rumani f’dik li ġiet imsejħa “ċ-​ċelebrazzjoni ġubilari tal-​millennju tal-​Knisja Kattolika Rumana.” Huwa stmat li bejn żewġ miljuni u nofs u sitt miljun turist, mid-​devoti sal-​kurjużi, qed jippjanaw li jżuru l-​Iżrael is-​sena d-​dieħla.

Għala daqstant nies qed jippjanaw li jżuru l-​Iżrael? Hu u jitkellem għall-​Papa, Roger Cardinal Etchegaray, uffiċjal tal-​Vatikan, qal: “Is-​sena 2000 hija ċelebrazzjoni taʼ Kristu u taʼ ħajtu f’dan il-​pajjiż. Għaldaqstant huwa ovvju li l-​Papa jiġi hawn.” Is-​sena 2000 kif inhi konnessa maʼ Kristu? Ħafna jirraġunaw li s-​sena 2000 timmarka eżattament 2000 sena mit-​twelid taʼ Kristu. Imma huwa hekk? Se naraw.

Għal membri taʼ ċerti gruppi reliġjużi, is-​sena 2000 hija saħansitra iktar sinjifikanti. Dawn jinsabu konvinti li sas-​sena d-​dieħla jew ftit wara, Ġesù se jirritorna fuq l-​Għolja taż-​Żebbuġ u l-​gwerra taʼ Armageddon, imsemmija fil-​ktieb t’Apokalissi, se tiġi miġġielda fil-​wied taʼ Megiddo. (Apokalissi 16:14-16) Bi stennija għal dawn il-​ġrajjiet, mijiet taʼ residenti Amerikani qed ibigħu d-​djar tagħhom u kważi kull ma għandhom u qed imorru joqogħdu fl-​Iżrael. Għall-​benefiċċju taʼ dawk li ma jistgħux iħallu djarhom, evanġelista Amerikan prominenti jintqal li wiegħed li se jxandar ir-​ritorn taʼ Ġesù fuq it-​televiżjoni​—bil-​kulur!

Fil-pajjiżi tal-​Punent, il-​pjanijiet biex jinawguraw it-​tielet millennju qed jintensifikaw. Madankollu, nies f’pajjiżi oħra għadhom għaddejjin fuq xogħolhom. Dawn in-​nies​—il-​maġġuranza tal-​popolazzjoni tad-​dinja—​ma jemmnux li Ġesù taʼ Nazaret kien il-​Messija. U dawn mhux bilfors jaċċettaw l-​istil taʼ l-​iffissar taʼ dati Q.K.-A.D.a Per eżempju, ħafna Musulmani jużaw il-​kalendarju tagħhom stess, u skond dan, is-​sena d-​dieħla se tkun l-​1420​—mhux l-​2000. Il-​Musulmani jgħoddu s-​snin mid-​data li fiha l-​profeta Muħammad ħarab minn Mekka u mar Medina. B’kollox, in-​nies jużaw xi 40 kalendarju differenti mad-​dinja kollha.

Għandha s-​sena 2000 ikollha xi sinjifikat għall-​Kristjani? Huwa l-​1 taʼ Jannar, 2000 tassew jum taʼ sinjifikat speċjali? Dawn il-​mistoqsijiet se jitwieġbu fl-​artiklu li jmiss.

[Nota taʼ taħt]