Kif Jehovah Qed Imexxina

“Mexxini minn mogħdija dritta.”​—SALM 27:11.

1, 2. (a) Jehovah kif qed imexxi lill-​poplu tiegħu llum? (b) X’inhu involut f’li nieħdu vantaġġ bis-​sħiħ mil-​laqgħat?

JEHOVAH hu s-​Sors tad-​dawl u tal-​verità, bħalma tgħallimna fl-​artiklu taʼ qabel. Il-​Kelma tiegħu ddawwal it-​triq tagħna waqt li nivvjaġġaw fil-​mogħdija d-​dritta. Jehovah jmexxina billi jistruwina fit-​triqat tiegħu. (Salm 119:105) Bħas-​salmista tal-​qedem, aħna nwieġbu bi gratitudni għad-​direzzjoni t’Alla u nitolbu: “Urini, Mulej, it-​triq tiegħek, mexxini minn mogħdija dritta.”​—Salm 27:11.

² Mod wieħed li bih Jehovah jipprovdi struzzjoni llum huwa permezz tal-​laqgħat Kristjani. Qed nieħdu vantaġġ bis-​sħiħ minn dan il-​provvediment taʼ mħabba billi (1) nattendu regolarment, (2) nisimgħu l-​programm bl-​attenzjoni, u (3) nipparteċipaw mill-​qalb f’partijiet li jinvolvu l-​udjenza? Barra minn hekk, inwieġbu bi gratitudni meta nirċievu suġġerimenti li jgħinuna nibqgħu ‘fil-​mogħdija d-​dritta’?

Kif Inhi l-​Attendenza Tiegħek għal-​Laqgħat?

3. Waħda li taqdi full-time kif żviluppat id-​drawwa tajba li tattendi l-​laqgħat regolarment?

³ Xi pubblikaturi tas-​Saltna ilhom jattendu l-​laqgħat regolarment minn tfulithom. “Meta jien u ħuti konna qed nikbru fis-​snin tletin,” tiftakar waħda li hi ministru full-time tax-​Xhieda taʼ Jehovah, “ma kellniex għalfejn nistaqsu lill-​ġenituri tagħna jekk konniex sejrin għal-​laqgħa. Konna nafu li sejrin la ma konniex morda. Il-​familja tagħna qatt ma kienet tfalli l-​laqgħat.” Bħall-​profetessa Anna, din l-​oħt ‘ma titwarrab qatt’ mill-​post taʼ qima lejn Jehovah.​—Luqa 2:​36, 37.

4-6.(a) Xi pubblikaturi tas-​Saltna għala jfallu l-​laqgħat? (b) Għala huwa kritiku li nattendu l-​laqgħat?

⁴ Int fost dawk li jattendu l-​laqgħat Kristjani regolarment, jew sirt irregolari f’dan ir-​rigward? Xi Kristjani li ħasbu li kienu sejrin tajjeb iddeċidew li jkunu ċerti. Għal ftit ġimgħat, ħadu nota taʼ kull laqgħa li attendew. Meta rrevedew dak li kienu niżżlu fit-​tmiem tal-​perijodu stipulat, baqgħu skantati dwar kemm–il darba kienu tilfu l-​laqgħat.

⁵ Xi ħadd jistaʼ jgħid, ‘Jien ma niskantax. Illum in-​nies tant jinsabu taħt pressjoni li mhux faċli għalihom li jattendu l-​laqgħat regolarment.’ Ċertament li veru qed ngħixu fi żminijiet stressanti, u kif sejrin l-​affarijiet, il-​pressjoni bla dubju se tiżdied. (2 Timotju 3:13) Imma ma jagħmlux dan iżjed kritiku li nattendu l-​laqgħat regolarment? Mingħajr ammont kontinwu taʼ ikel spiritwali bnin biex isostnina, ma nistgħux nittamaw li nikkumbattu kontra l-​pressjoni li din is-​sistema ġġib fuqna. Iva, mingħajr sħubija regulari nistgħu niġu ttantati nabbandunaw għalkollox “triq it-​tajbin”! (Proverbji 4:18) Veru, meta naslu d-​dar wara ġurnata xogħol, forsi mhux dejjem ikollna aptit nattendu l-​laqgħa. Madankollu, meta nattendu minkejja li nkunu għajjenin, nibbenefikaw aħna u ninkuraġġixxu lill-​Kristjani sħabna fis-​Sala tas-​Saltna.

⁶ Lhud 10:25 jissuġġerixxi raġuni importanti oħra għala għandna nkunu regulari fl-​attendenza għal-​laqgħat. Hemm l-​appostlu Pawlu jħeġġeġ lill-​Kristjani sħabu biex jiltaqgħu flimkien ‘iktar ma jaraw li qiegħed joqrob il-​jum.’ Iva, ma rridux ninsew il-​fatt li ‘jum Jehovah’ hu qrib. (2 Pietru 3:12) Jekk naslu li nikkonkludu li tmiem din is-​sistema għadu ’l bogħod ħafna, nistgħu nibdew inħallu l-​interessi persunali jieħdu post l-​attivitajiet spiritwali neċessarji, bħall-​attendenza għal-​laqgħat. Imbagħad, bħalma wissa Ġesù, ‘nistgħu nsibu dak il-​jum fuqna għal għarrieda.’—Luqa 21:34.

Kun Semmiegħ Tajjeb

7. Għala huwa importanti li t-​tfal joqogħdu attenti fil-​laqgħat?

⁷ Mhux biżżejjed li sempliċement nattendu l-​laqgħat. Irridu nagħtu widen bir-​reqqa, billi noqogħdu attenti għal kulma jingħad hemmhekk. (Proverbji 7:24) Dan jinkludi lil uliedna. Meta tifel imur l-​iskola, hu mistenni minnu li joqgħod attent għall-​għalliem, anki meta xi suġġett partikulari ma jinteressahx jew donnu li ma jistax jifhmu. L-​għalliem jaf li jekk it-​tifel jipprova joqgħod attent, se jikseb xi benefiċċju mil-​lezzjoni. Allura, m’huwiex raġunevoli li tfal li jmorru l-​iskola għandhom joqogħdu attenti għall-​istruzzjoni provduta fil-​laqgħat tal-​kongregazzjoni minflok ma jitħallew jorqdu hekk kif tibda l-​laqgħa? Veru, fost il-​veritajiet prezzjużi li fiha l-​Iskrittura hemm xi “ħwejjeġ tqal biex wieħed jifhimhom.” (2 Pietru 3:16) Imma qatt m’għandna naħsbu li t-​tfal m’humiex kapaċi jdaħħlu f’moħħhom. Alla ma jaħsibhiex hekk. Fi żminijiet Bibliċi, hu kkmanda lill-​qaddejja ċkejknin tiegħu ‘biex jisimgħu u jitgħallmu, u jibżgħu minn Jehovah, u jqisu li jagħmlu l-​kliem kollu taʼ din il-​liġi,’ li xi ftit minnu kien bla dubju tqil biex jifhmuh it-​tfal. (Dewteronomju 31:12; qabbel Levitiku 18:​1-30.) Jistenna Jehovah inqas minn hekk mit-​tfal illum?

8. Xi ġenituri liema passi jieħdu biex jgħinu lit-​tfal tagħhom joqogħdu attenti fil-​laqgħat?

⁸ Il-ġenituri Kristjani jirrealizzaw li l-​ħtiġijiet spiritwali taʼ wliedhom jiġu parzjalment sodisfati permezz taʼ dak li jitgħallmu fil-​laqgħat. Għaldaqstant, xi ġenituri jieħdu ħsieb li wliedhom jorqdu ftit qabel il-​laqgħa, u b’hekk dawn imorru s-​Sala tas-​Saltna mistriħin u lesti biex jitgħallmu. Xi ġenituri jillimitaw strettament jew saħansitra jipprojbixxu b’mod għaqli lil uliedhom milli jaraw it-​televixin meta jkollhom il-​laqgħa. (Efesin 5:​15, 16) U dawn il-​ġenituri ma jħallux lit-​tfal jiġu distratti b’affarijiet oħrajn, billi skond l-​età u l-​abbiltà tagħhom jinkuraġġuhom jagħtu widen u jitgħallmu.—Proverbji 8:​32.

9. X’jistaʼ jgħinna niżviluppaw l-​abbiltà li nagħtu widen?

⁹ Ġesù kien qed ikellem lill-​adulti meta qal: “Mela oqogħdu attenti kif tisimgħu.” (Luqa 8:​18) Illum, dan iktar faċli tgħidu milli tagħmlu. Irridu nammettu li huwa diffiċli li wieħed verament jagħti widen, imma din l-​abbiltà tistaʼ tiġi żviluppata. Waqt li tkun qed tismaʼ xi taħdita bbażata fuq il-​Bibbja jew xi parti mil-​laqgħa, ipprova ddistingwi l-​ideat prinċipali. Antiċipa x’ikun se jgħid il-​kelliemi. Fittex xi punti li tistaʼ tuża fil-​ministeru jew li tistaʼ tapplika f’ħajtek. Irrevedi mentalment il-​punti hekk kif jiġu preżentati. Ħu noti qosra.

10, 11. Xi ġenituri kif għenu lil uliedhom isiru semmiegħa aħjar, u int liema metodi sibthom t’għajnuna?

¹⁰ Drawwiet tajbin rigward li nagħtu widen nitgħallmuhom l-​aħjar taʼ età żgħira. Saħansitra qabel ma jitgħallmu jaqraw u jiktbu, xi tfal li jkunu għadhom ma jmorrux l-​iskola jiġu inkuraġġiti mill-​ġenituri tagħhom biex jieħdu xi “noti” matul il-​laqgħat. Huma jagħmlu marka fuq biċċa karta kulmeta jintuża xi kliem familjari bħal “Jehovah,” “Ġesù,” jew “Saltna.” B’dan il-​mod, it-​tfal jistgħu jitgħallmu jikkonċentraw fuq dak li jkun qed jingħad minn fuq il-​platform.

¹¹ Anki tfal taʼ età akbar xi drabi jeħtieġu l-​inkuraġġiment biex joqogħdu attenti. Billi nnota li ibnu, li kellu 11-il sena, kien qed jiċċassa matul konvenzjoni Kristjana, wieħed kap taʼ familja newwel Bibbja lill-​ġuvnott u qallu biex ifittex l-​iskritturi li jiġu msemmijin mill-​kelliema. Il-​missier, li kien qed jieħu n-​noti, ħares lejn ibnu hekk kif dan żamm il-​Bibbja. Wara dan, it-​tifel segwa l-​programm tal-​konvenzjoni b’iktar entużjażmu.

Ħalli Leħnek Jinstemaʼ

12, 13. Għala huwa importanti li nieħdu sehem fil-​kant mal-​kongregazzjoni?

¹² Is-Sultan David kanta: “U ndur madwar l-​artal tiegħek, Mulej, biex ngħannilek ir-​radd taʼ ħajr.” (Salm 26:​6, 7) Il-​laqgħat tax-​Xhieda taʼ Jehovah jipprovdulna opportunitajiet eċċellenti biex nesprimu l-​fidi tagħna b’leħen għoli. Mod wieħed kif nistgħu nagħmlu dan hu billi nieħdu sehem fil-​kant mal-​kongregazzjoni. Dan hu aspett importanti tal-​qima tagħna, imma jistaʼ faċilment jiġi injorat.

¹³ Xi tfal żgħar li għadhom ma jafux jaqraw jitgħallmu bl-​amment il-​kliem taʼ l-​għanjiet tas-​Saltna li jkunu se jintużaw fil-​laqgħat kull ġimgħa. Iħossuhom se jtiru bil-​ferħ li jistgħu jkantaw flimkien mal-​kbar. Madankollu, hekk kif it-​tfal jibdew jikbru xi ftit, forsi ma jibqgħux ħerqanin biex jingħaqdu fil-​kant taʼ l-​għanjiet tas-​Saltna. Xi adulti wkoll iżommu lura milli jkantaw fil-​laqgħat. Iżda, il-​kant huwa parti mill-​qima tagħna, sewwa sew bħalma l-​ministeru taʼ l-​għalqa hu parti mill-​qima tagħna. (Efesin 5:19) Aħna nagħmlu li nistgħu biex infaħħru lil Jehovah fil-​ministeru taʼ l-​għalqa. Ma nistgħux nigglorifikawh ukoll billi ngħollu leħinna—kemm jekk hu melodjuż u kemm jekk m’huwiex—biex inkantawlu tifħir mill-​qalb?—Lhud 13:15.

14. Il-​materjal li nistudjaw fil-​laqgħat tal-​kongregazzjoni għala jixraqlu jiġi mħejji minn qabel bir-​reqqa?

¹⁴ Aħna nġibu wkoll tifħir lil Alla meta nagħtu kummenti li jibnu matul partijiet tal-​laqgħat tagħna li jirrikjedu parteċipazzjoni mill-​udjenza. Dan jitlob preparazzjoni. Jieħu l-​ħin biex tirrifletti fil-​fond dwar l-​aspetti profondi tal-​Kelma t’Alla. L-​appostlu Pawlu, student ħerqan taʼ l-​Iskrittura, dan irrealizzah. Kiteb: “Kemm huma kbar l-​għana, l-​għerf u l-​għaqal taʼ Alla!” (Rumani 11:33) Kapijiet tal-​familja, huwa vitali li tgħinu lil kull membru tal-​familja tagħkom ifittex fl-​għerf t’Alla, kif inhu rivelat fl-​Iskrittura. Warrbu ftit ħin matul l-​istudju tal-​Bibbja bħala familja biex tispjegaw punti diffiċli u biex tgħinu lill-​familja tagħkom tipprepara għal-​laqgħat.

15. Liema suġġerimenti jistgħu jgħinu lil dak li jkun jikkummenta fil-​laqgħat?

¹⁵ Jekk tixtieq tikkummenta iktar spiss fil-​laqgħat, għala ma tħejjix minn qabel xi ħaġa li tixtieq tgħid? M’hemmx għalfejn xi ħaġa elaborata. Vers mill-​Bibbja addattat moqri b’konvinzjoni jew ftit kliem magħżul tajjeb u ħiereġ mill-​qalb ikun apprezzat ferm. Xi pubblikaturi jgħidu lil min ikun se jikkonduċi l-​istudju jekk jistax iqabbad lilhom jagħmlu l-​ewwel kumment fuq xi paragrafu speċifiku, sabiex ma jitilfux l-​opportunità li jesprimu l-​fidi tagħhom.

Min m’Għandux Esperjenza Jsir Għaref

16, 17. Anzjan x’parir tah lil wieħed qaddej ministerjali, u għala kien parir effettiv?

¹⁶ Fil-laqgħat tax-​Xhieda taʼ Jehovah taʼ spiss niġu mfakkrin biex naqraw il-​Kelma t’Alla kuljum. Din hi xi ħaġa rifreskanti li nagħmluha. Dan jgħinna wkoll nieħdu deċiżjonijiet għaqlin, nikkoreġu difetti fil-​personalità, nirreżistu t-​tentazzjonijiet, u niksbu mill-​ġdid il-​bilanċ spiritwali tagħna jekk inkunu ħadna xi pass fid-​direzzjoni żbaljata.—Salm 19:7.

¹⁷ Anzjani taʼ esperjenza fil-​kongregazzjoni huma disponibbli biex jipprovdu pariri Skritturali li huma mfasslin għall-​ħtigijiet tagħna. Kulma rridu nagħmlu hu li ‘noħorġuhom’ billi nfittxu l-​pariri tagħhom ibbażati fuq il-​Bibbja. (Proverbji 20:5) Darba minnhom qaddej ministerjali żagħżugħ u b’ħafna entużjażmu staqsa lil wieħed anzjan għal xi suġġerimenti dwar kif jistaʼ jsir iktar utli fil-​kongregazzjoni. L-​anzjan, li kien jafu sewwa liż-​żagħżugħ, fetaħ il-​Bibbja tiegħu fl-​1 Timotju 3:​3, fejn tgħid li l-​irġiel maħturin għandhom ikunu ‘raġunevoli.’ Urieh bil-​ħlewwa modi fejn iż-​żagħżugħ setaʼ juri r-​raġunevolezza meta jittratta m’oħrajn. Ħassu offiż il-​ħu żagħżugħ bil-​parir sinċier li ngħata? Xejn affattu! “L-​anzjan uża l-​Bibbja,” hu spjega, “għalhekk irrealizzajt li l-​parir kien ġej mingħand Jehovah.” Il-​qaddej ministerjali applika l-​parir bi gratitudni u qed jagħmel progress mill-​aħjar.

18. (a) X’għen lil waħda Kristjana żagħżugħa tirreżisti t-​tentazzjoni fl-​iskola? (b) Liema siltiet mill-​Bibbja jiġuk f’moħħok meta tiffaċċja xi tentazzjoni?

¹⁸ Il-Kelma t’Alla tistaʼ tgħin ukoll liż-​żgħażagħ ‘jaħarbu l-​ġibdiet taż-​żgħożija.’ (2 Timotju 2:22) Xhud taʼ Jehovah żagħżugħa li m’ilhiex li spiċċat l-​iskola sekondarja setgħet tirreżisti t-​tentazzjoni matul is-​snin taʼ studju billi mmeditat fuq ċerti siltiet mill-​Bibbja u applikathom. Hi taʼ spiss ħasbet dwar il-​parir imniżżel fi Proverbji 13:20: “Min jagħmilha maʼ l-​għaref, isir għaref.” Għaldaqstant, qagħdet attenta li tikkultiva ħbiberiji biss maʼ dawk li jirrispettaw profondament il-​prinċipji Skritturali. Irraġunat: “Jien m’iniex aħjar minn ħaddieħor. Jekk ninvolvi ruħi maʼ xi klikka ħażina, inkun irrid nogħġob lil ħbiebi, u dan jistaʼ jġibni fl-​inkwiet.” Il-​parir taʼ Pawlu li nsibu fit-​2 Timotju 1:8 wkoll għenha. Hu kiteb: “Tistħi xejn minħabba fix-​xhieda għal Sidna, . . . imma aqsam miegħi t-​tbatija għall-​Evanġelju.” Fi qbil maʼ dan il-​parir, hi kienet bil-​qlubija kollha u f’kull okkażjoni xierqa, twassal it-​twemmin tagħha bbażat fuq il-​Bibbja lil sħabha tal-​klassi. Kulmeta kienet tiġi mqabbda tippreżenta rapport orali lill-​klassi, kienet tagħżel suġġett li kien jippermettilha biex bit-​tattika tagħti xiehda rigward is-​Saltna t’Alla.

19. Wieħed żagħżugħ għala ma setax jirreżisti l-​pressjonijiet taʼ din id-​dinja, imma x’kien li tah lura s-​saħħa spiritwali?

¹⁹ Jekk jiġri li nitbegħdu minn “triq it-​tajbin,” il-​Kelma t’Alla tistaʼ tgħinna nikkoreġu l-​passi tagħna. (Proverbji 4:18) Raġel żagħżugħ li jgħix fl-​Afrika dan tgħallmu mill-​esperjenza persunali. Meta żaru wieħed mix-​Xhieda taʼ Jehovah, hu aċċetta studju tal-​Bibbja. Ħa pjaċir b’dak li kien qed jitgħallem imma wara ftit involva ruħu fi sħubija ħażina fl-​iskola. Maż-​żmien, waqaʼ fi stil taʼ ħajja immorali. “Il-​kuxjenza tiegħi baqgħet titturmentani, u kelli nieqaf nattendi l-​laqgħat,” hu jammetti. Ftit wara, beda jattendi l-​laqgħat mill-​ġdid. Iż-​żagħżugħ għamel dan il-​kumment li fih x’tixtarr: “Skoprejt li r-​raġuni prinċipali taʼ dan kollu kienet għax kont qed immut bil-​ġuħ spiritwalment. Ma kontx nagħmel studju persunali. Kien għalhekk li ma stajtx nirreżisti t-​tentazzjoni. Imbagħad bdejt naqra It-​Torri taʼ l-​Għassa u Stenbaħ! Bil-​mod il-​mod, ksibt lura s-​saħħa spiritwali tiegħi u naddaft ħajti. Din kienet xiehda tajba għal dawk li nnotaw il-​bidliet li għamilt. Tgħammidt, u issa jien kuntent.” X’kien li ta lil dan iż-​żagħżugħ is-​saħħa biex jegħleb id-​dgħjufijiet karnali tiegħu? Kiseb lura s-​saħħa spiritwali tiegħu permezz taʼ studju persunali u regulari tal-​Bibbja.

20. Żagħżugħ kif jistaʼ jirreżisti l-​attakki taʼ Satana?

²⁰ Żgħażagħ Kristjani, intom tinsabu taħt attakk illum! Jekk tridu tirreżistu l-​attakki taʼ Satana, tridu tieħdu regolarment l-​ikel spiritwali. Is-​salmista, li milli jidher kien żagħżugħ hu stess, dan fehmu. Hu iżża ħajr lil Jehovah talli pprovda l-​Kelma tiegħu, sabiex ‘żagħżugħ jistaʼ jimxi safi fi triqtu.’—Salm 119:9.

Kulfejn Alla Jiggwidana, Aħna Nsegwuh

21, 22. Għala m’għandniex nikkonkludu li t-​triq tal-​verità hija diffiċli wisq?

²¹ Jehovah ħareġ lill-​ġens taʼ Iżrael mill-​Eġittu għal ġo l-​Art Imwegħda. Ir-​rotta li għażel għandha mnejn dehret strapazzanti bla bżonn minn ħarsa umana. Minflok ma ħa r-​rotta li kienet tidher eħfef u iktar diretta minn max-​xatt tal-​Baħar Mediterran, Jehovah mexxa lill-​poplu tiegħu f’rotta diffiċli fid-​deżert. Madankollu, dan kien attwalment att taʼ qalb tajba min-​naħa t’Alla. Għalkemm iqsar, ir-​rotta taʼ mal-​baħar kienet tgħaddi lill-​Iżraelin minn ġo l-​art tal-​Filistin ostili. Billi għażel rotta oħra, Jehovah ħeles lill-​poplu tiegħu minn konfront bikri mal-​Filistin.

²² Bl-istess mod, il-​mogħdija li Jehovah qed imexxina minnha kultant forsi tistaʼ tidher diffiċli. Kull ġimgħa, għandna skeda mimlija taʼ attivitajiet Kristjani, inkluż il-​laqgħat tal-​kongregazzjoni, l-​istudju persunali, u s-​servizz taʼ l-​għalqa. Mogħdijiet oħrajn forsi jidhru eħfef. Imma huwa biss billi nsegwu l-​gwida t’Alla li se naslu fid-​destinazzjoni li tant qed naħdmu iebes biex nilħquha. Għalhekk, ejja nkomplu nieħdu struzzjoni vitali mingħand Jehovah u nibqgħu ‘fil-​mogħdija d-​dritta’ għal dejjem!​—Salm 27:11.

Tistaʼ Tispjega?

• Għala għandna bżonn b’mod speċjali li nattendu l-​laqgħat Kristjani regolarment?

• Il-​ġenituri x’jistgħu jagħmlu biex jgħinu lil uliedhom joqogħdu attenti fil-​laqgħat?

• X’inhu involut f’li tkun semmiegħ tajjeb?

• X’jistaʼ jgħinna nikkummentaw fil-​laqgħat?

[Stampa f’paġna 16]

Li nattendu l-​laqgħat Kristjani jgħinna nżommu f’moħħna jum Jehovah

[Stampi f’paġna 18]

Hemm diversi modi li bihom nistgħu nfaħħru lil Jehovah fil-​laqgħat Kristjani