Ieqfu Sħaħ U b’Konvinzjoni Soda

Għajnuna liż-​Żgħażagħ Permezz taʼ Istruzzjoni f’Waqtha

EPAFRA kien Kristjan taʼ l-​ewwel seklu li telaq lejn Ruma. Madankollu, kellu raġuni tajba biex jibqaʼ jiftakar f’Kolossi, belt fl-​Asja Minuri. Hemmhekk kien ippriedka l-​aħbar tajba u bla dubju kien għen lil xi Kolossin isiru dixxipli taʼ Ġesù Kristu. (Kolossin 1:7) Epafra kien interessat ħafna fi sħabu fit-​twemmin f’Kolossi. Fil-​fatt minn Ruma l-​appostlu Pawlu kitbilhom: “Epafra . . . jibagħtilkom it-​tislijiet tiegħu, dejjem jistinka għan-​nom tagħkom fit-​talb tiegħu, biex intom tistgħu fl-​aħħarnett tieqfu sħaħ u b’konvinzjoni soda fir-​rieda kollha t’Alla.”—Kolossin 4:​12, NW.

Bl-istess mod, il-​missirijiet u l-​ommijiet Kristjani taʼ llum jitolbu bi ħrara kbira biex it-​tfal tagħhom ikunu b’saħħithom spiritwalment. Dawn il-​ġenituri jistinkaw biex jiżirgħu f’qalb iċ-​ċkejknin tagħhom imħabba għal Alla sabiex b’hekk isiru sodi fil-​fidi.

Ħafna żgħażagħ Kristjani talbu għall-​għajnuna biex jegħlbu d-​diffikultajiet li jħabbtu wiċċhom magħhom fl-​iskola u postijiet oħrajn. Tfajla taʼ 15-il sena qalet: “Il-​problemi tagħna sejrin mill-​ħażin għall-​agħar. Il-​ħajja hija verament tal-​biżaʼ. Għandna bżonn min jgħinna!” Intlaqaʼ t-​talb taʼ dawn iż-​żgħażagħ u taʼ dawn il-​ġenituri li għandhom il-​biżaʼ t’Alla? Iva! Istruzzjoni bbażata fuq il-​Bibbja ġiet provduta permezz taʼ “l-​ilsir leali u diskret.” (Mattew 24:​45, NW) Dan l-​artiklu jsemmi xi letteratura li għenet lil mijiet t’eluf taʼ żgħażagħ biex ‘jieqfu sħaħ u b’konvinzjoni soda.’ Ejja nikkunsidraw xi ftit minn dawn il-​pubblikazzjonijiet.

“Ara . . . 15,000 Xhud Ġdid!”

F’Awissu taʼ l-​1941, madwar 115,000 inġabru f’St. Louis, il-​Missouri, l-​Istati Uniti taʼ l-​Amerika, għall-​akbar konvenzjoni li qatt kellhom ix-​Xhieda taʼ Jehovah sa dak iż-​żmien. Fl-​aħħar ġurnata tal-​konvenzjoni—“Il-​Ġurnata tat-​Tfal”—xi 15,000 tifel u tifla li kienu bil-​qiegħda viċin il-​platform semgħu b’attenzjoni kbira hekk kif Joseph F. Rutherford tkellem dwar is-​suġġett “Tfal tas-​Sultan.” Lejn it-​tmiem tat-​taħdita tiegħu, Rutherford, li kellu 71 sena, qal hekk b’ton taʼ missier:

“Intom it-​tfal kollha . . . li aċċettajtu . . . li tobdu lil Alla u lis-​Sultan tiegħu, jekk jogħġobkom qumu bil-​wieqfa.” It-​tfal qamu kollha f’daqqa. “Ara,” esklama Ħuna Rutherford, “iktar minn 15,000 xhud ġdid tas-​Saltna!” Kulħadd infexx f’ċapċipa kbira. Il-​kelliemi kompla: “Intom kollha li se tagħmlu dak kollu li tistgħu biex tgħidu lil oħrajn dwar is-​saltna t’Alla . . . , jekk jogħġobkom għidu Iva.” It-​tfal wieġbu b’għajta qawwija, “Iva!” Imbagħad hu wera l-​ktieb il-​ġdid Children (Tfal), li ntlaqaʼ b’ċapċipa twila.

Wara din it-​taħdita li tqanqal, sarbut twil taʼ tfal u żgħażagħ telgħu fuq il-​platform fejn Ħuna Rutherford tahom kopja tal-​ktieb il-​ġdid bħala rigal. L-​udjenza tant tqanqlet b’din ix-​xena li qabżilha d-​dmugħ minn għajnejha. Wieħed li kien preżenti qal: “Ried ikollok qalb tal-​ġebel biex ma titqanqalx meta tara ż-​żgħażagħ [juru] fiduċja u fidi sħiħa f’Alla tagħhom, Jehovah.”

F’dik l-​assemblea memorabbli tgħammdu 1,300 żagħżugħ u żagħżugħa b’simbolu tad-​dedikazzjoni tagħhom lil Jehovah. Ħafna minnhom baqgħu sodi fil-​verità sa llum. Huma jgħinu fil-​kongregazzjonijiet lokali, jaqdu bħala volontieri f’Betel, jew inkella bħala missjunarji f’pajjiżi barranin. Tabilħaqq, “Il-​Ġurnata tat-​Tfal” u l-​ktieb Children ħallew effett dejjiemi fil-​qlub taʼ ħafna minn dawk iż-​żgħażagħ!

“Donnhom Jiġu Eżatt Meta Jkollok Bżonnhom”

Matul is-​snin 70 tas-​seklu għoxrin, ix-​Xhieda taʼ Jehovah ppubblikaw tliet kotba oħra li laqtu l-​qlub taʼ mijiet t’eluf taʼ żgħażagħ. Dawn kienu Listening to the Great Teacher (Nisimgħu mill-​Għalliem il-​Kbir), Your Youth​—Getting the Best out of It (Iż-Żgħożija—Kif Tgawdiha bl-​Aħjar Mod), u Il-​Ktieb Tiegħi taʼ Stejjer mill-​Bibbja. Fl-​1982, fir-​rivista Stenbaħ! bdiet tidher is-​serje “Iż-​Żgħażagħ Jistaqsu . . . ” Dawn l-​artikli qajmu entużjażmu kbir fil-​qlub kemm taż-​żgħar kif ukoll tal-​kbar. “Kull fil-​għaxija nirringrazzja lil Alla talli qed jiġu pubblikati,” qal żagħżugħ taʼ 14-il sena. “Inħobbhom dawn l-​artikli,” tgħid żagħżugħa taʼ 13-il sena, “donnhom jiġu eżatt meta jkollok bżonnhom.” Il-​ġenituri u l-​anzjani Kristjani maħturin jaqblu li dawn l-​artikli kienu f’waqthom u taʼ benefiċċju.

Sa l-​1989 kienu dehru xi 200 artiklu mis-​serje “Iż-​Żgħażagħ Jistaqsu . . . ” fi Stenbaħ! Fil-​Konvenzjoni Distrettwali “Devozzjoni Lejn Alla” li saret dik is-​sena, ħareġ il-​ktieb Iż-​Żgħażagħ Jistaqsu​—Tweġibiet Prattiċi għall-​Mistoqsijiet Tagħhom. Għenhom dan il-​ktieb liż-​żgħażagħ biex jibqgħu sodi fil-​fidi? Tliet żgħażagħ kitbu: “Dan il-​ktieb kien taʼ siwi kbir għalina biex nifhmu l-​problemi tagħna u nkunu nafu kif nittrattawhom. Grazzi taʼ l-​interess tagħkom fis-​saħħa spiritwali tagħna.” Għadd taʼ qarrejja żgħażagħ madwar id-​dinja kollha jaqblu maʼ dan.

“Jimliena b’Mod Spiritwali”

Fl-​1999, ix-​Xhieda taʼ Jehovah ħarġu b’għamla oħra taʼ istruzzjoni f’waqtha għaż-​żgħażagħ, il-​vidjo Young People Ask​—How Can I Make Real Friends? (Iż-Żgħażagħ Jistaqsu—Kif Jistaʼ Jkolli Ħbieb Veri?) Dan qanqal reazzjoni entużjastika. “Dan il-​vidjo mill-​ewwel laqatni profondament,” qalet żagħżugħa taʼ 14-il sena. “Il-​vidjo se jkun parti regulari mill-​ikel spiritwali tagħna,” stqarret waħda omm mingħajr raġel. “Kemm hu taʼ ferħ li tkun taf li l-​akbar Ħabib tagħna, Jehovah, iħobbhom u jieħu ħsiebhom verament liż-​żgħażagħ fl-​organizzazzjoni tiegħu madwar id-​dinja,” qalet waħda żagħżugħa miżżewġa.

X’wettaq il-​vidjo? Iż-​żgħażagħ jgħidu: “Għenni noqgħod attent maʼ min nagħmilha, nassoċja iktar mal-​kongregazzjoni, u nagħmel lil Jehovah l-​ħabib tiegħi.” “Il-​vidjo għenni niffaċċja bi qlubija lil dawk taʼ mpari.” “Ġagħalni nsaħħaħ id-​determinazzjoni tiegħi li naqdi lil Jehovah mill-​aħjar li nistaʼ.” U koppja miżżewġa kitbet: “Grazzi minn qalbna talli tipprovdulna ‘ikel’ bħal dan. Jimliena b’mod spiritwali.”

“L-​ilsir leali u diskret” midluk, b’lealtà lejn l-​inkarigu tiegħu mogħti minn Alla, ipprovda ikel spiritwali f’waqtu għal kulmin jaċċettah. U x’ferħ meta tara kif din l-​istruzzjoni Skritturali qed tgħin liż-​żgħażagħ illum biex ‘jieqfu sħaħ u b’konvinzjoni soda fir-​rieda kollha t’Alla’!