Ieqfu Sħaħ b’Konvinzjoni Soda

“[Hu] dejjem jistinka għan-​nom tagħkom fit-​talb tiegħu, biex intom tistgħu fl-​aħħarnett tieqfu sħaħ u b’konvinzjoni soda fir-​rieda kollha t’Alla.”—KOLOSSIN 4:​12, NW.

1, 2. (a) Uħud li ma kinux taʼ l-​istess twemmin x’innotaw dwar il-​Kristjani bikrin? (b) Il-​ktieb tal-​Kolossin kif jirrifletti interess b’imħabba?

IS-​SEGWAĊI taʼ Ġesù kienu interessati ferm fi sħabhom fit-​twemmin. Tertuljanu (kittieb tat-​tieni u t-​tielet seklu E.K.) tkellem dwar il-​qalb tajba li wrew maʼ l-​orfni, il-​foqra, u dawk imdaħħlin fiż-​żmien. Din l-​imħabba murija ċar bl-​azzjoni tant impressjonat lil dawk li ma kinux jemmnu li xi wħud minnhom qalu dwar il-​Kristjani, ‘Ara kemm iħobbu lil xulxin.’

² Il-​ktieb tal-​Kolossin jirrifletti dan it-​tip taʼ interess b’imħabba li l-​appostlu Pawlu u sieħbu Epafra wrew għall-​aħwa f’Kolossi. Pawlu kitbilhom: Epafra “dejjem jistinka għan-​nom tagħkom fit-​talb tiegħu, biex intom tistgħu fl-​aħħarnett tieqfu sħaħ u b’konvinzjoni soda fir-​rieda kollha t’Alla.” Matul is-​sena 2001, ix-​Xhieda taʼ Jehovah se jkollhom dan il-​kliem taʼ Kolossin 4:12 (NW) bħala l-​iskrittura għas-​sena: ‘Ieqfu sħaħ u b’konvinzjoni soda fir-​rieda kollha t’Alla.’

3. Epafra talab għal liema żewġ affarijiet?

³ Innota li t-​talb t’Epafra għall-​maħbubin tiegħu kellu żewġ aspetti: (1) li huma ‘fl-​aħħarnett jieqfu sħaħ’ u (2) li jieqfu “b’konvinzjoni soda fir-​rieda kollha t’Alla.” Dan it-​tagħrif kien inkluż fl-​Iskrittura għall-​benefiċċju tagħna. Għalhekk staqsi lilek innifsek, ‘X’irrid nagħmel personalment biex fl-​aħħarnett nieqaf sħiħ u b’konvinzjoni soda fir-​rieda kollha t’Alla? U meta nagħmel hekk, x’se jkun ir-​riżultat?’ Ejja naraw.

Stinka biex ‘Tieqaf Sħiħ’

4. Il-​Kolossin f’liema sens riedu jkunu “sħaħ”?

⁴ Epafra xtaq minn qalbu li ħutu spiritwali f’Kolossi ‘fl-​aħħarnett jieqfu sħaħ.’ It-​terminu wżat minn Pawlu, tradott hawnhekk bħala “sħaħ,” jistaʼ jfisser perfett, kiber għalkollox, jew matur. (Mattew 19:21; Lhud 5:14; Ġakbu 1:​4, 25) X’aktarx li int taf li għalkemm tkun Xhud mgħammed taʼ Jehovah ma jfissirx bilfors li int kbirt għalkollox bħala Kristjan. Pawlu kiteb lill-​Efesin, li kienu jgħixu lejn il-​punent taʼ Kolossi, li r-​rgħajja u l-​għalliema jipprovaw jgħinu lil kulħadd “biex insiru ħaġa waħda fil-​fidi u fl-​għarfien taʼ l-​Iben taʼ Alla; nsiru raġel magħmul, fl-​aħjar taʼ żmienu. U hekk isseħħ il-​milja taʼ Kristu.” Xi mkien ieħor Pawlu ħeġġeġ lill-​Kristjani biex isiru ‘rġiel magħmula fi ħsibijiethom.’—Korsiv tagħna; Efesin 4:​8-13; 1 Korintin 14:20.

5. Kif nistgħu nagħmlu l-​maturità bħala l-​mira ewlenija tagħna?

⁵ Għal dawk f’Kolossi li kienu għadhom ma kibrux għalkollox spiritwalment, jew li kienu għadhom ma sarux maturi, din kellha tkun il-​mira tagħhom. M’għandux dan japplika għal-​lum ukoll? Sew jekk konna mgħammdin għaxriet taʼ snin ilu jew reċentement, nistgħu aħna naraw biċ-​ċar kemm għamilna progress fl-​abbiltà tagħna taʼ kif nirraġunaw kif ukoll fl-​opinjonijiet tagħna? Nagħtu kas tal-​prinċipji Bibliċi qabel ma nieħdu xi deċiżjoni? Għandhom il-​kwistjonijiet marbutin maʼ l-​interessi t’Alla u tal-​kongregazzjoni parti dejjem iktar importanti f’ħajjitna, jew inkella niħduhom kif jiġu? F’dan l-​artiklu ma nistgħux nagħtu eżempju taʼ kull mod li bih aħna nistgħu nuru li kbirna għalkollox u sirna sħaħ, imma kkunsidra żewġ eżempji.

6. Wieħed f’liema aspett jistaʼ jagħmel progress biex ikun perfett, bħalma hu Jehovah?

⁶ Ejja nieħdu l-​ewwel eżempju. Nagħtu kas li trabbejna f’ambjent li fih iddominaw il-​preġudizzju jew il-​mibegħda lejn nies li ġejjin minn xi razza, nazzjonalità, jew reġjun differenti. Issa nafu li Alla m’huwiex parzjali u allura lanqas aħna ma rridu nkunu. (Atti 10:​14, 15, 34, 35) Fil-​kongregazzjoni jew fis-​circuit tagħna, hemm xi individwi li ġejjin minn dak l-​isfond, u għalhekk nitħalltu magħhom. Madankollu, għad għandna sentimenti negattivi jew suspetti f’qalbna għal nies taʼ dak l-​isfond? Għandna tant għalihom li mill-​ewwel naqbdu naħsbu ħażin jekk xi ħadd li ġej minn dak l-​isfond jiżbalja jew jonqosna f’xi ħaġa żgħira? Staqsi lilek innifsek, ‘Għandi bżonn nagħmel iktar progress biex ikolli l-​istess ħarsa imparzjali bħal dik t’Alla?’

7. Li nsiru sħaħ bħala Kristjani x’jistaʼ jinvolvi fil-​mod taʼ kif inħarsu lejn oħrajn?

⁷ Ejja ngħaddu għat-​tieni eżempju. Skond Filippin 2:​3, aħna m’għandna ‘nagħmlu xejn b’pika taʼ partit, anqas għall-​ftaħir fieragħ; imma nkunu umli u kull wieħed minna jqis lill-​ieħor aħjar minnu.’ Kif sejrin f’dan l-​aspett? Kulħadd għandu d-​dgħjufijiet u l-​kwalitajiet tajbin tiegħu. Jekk fil-​passat konna ħfief biex naraw id-​dgħjufijiet taʼ ħaddieħor, kemm għamilna progress, biex b’hekk ma nistennewx il-​‘perfezzjoni’ mingħandhom? (Ġakbu 3:2) Issa, iktar minn qatt qabel, kapaċi naraw jew saħansitra nfittxu modi li jagħmlu lil oħrajn aħjar minna? ‘Irrid nammetti li t-​tali oħt hi aħjar minni f’dik li hi paċenzja.’ ‘Dak juri fidi iktar pożittiva.’ ‘Biex ngħid is-​sew, dak jaf jgħallem aħjar minni.’ ‘Dik aħjar minni biex iżżomm kalma.’ Forsi xi Kolossin kellhom bżonn jagħmlu progress f’dan ir-​rigward. Aħna wkoll?

8, 9. (a) Epafra f’liema sens talab għall-​Kolossin biex ‘jieqfu’ sħaħ? (b) ‘Li jieqfu sħaħ’ x’kien ifisser għall-​futur?

⁸ Epafra talab li l-​Kolossin ‘jieqfu sħaħ.’ Jidher ċar li Epafra kien qed jitlob ’l Alla biex skond kemm il-​Kolossin ikunu sħaħ, maturi, u kibru għalkollox bħala Kristjani, huma ‘jieqfu,’ jew inkella jibqgħu hekk.

⁹ Mhux bilfors li kulmin isir Kristjan, anki jekk ikun wieħed matur, se jibqaʼ Kristjan. Ġesù qal li wieħed mill-​ulied anġeliċi t’Alla “qatt ma żamm mal-​verità.” (Ġwann 8:44) U Pawlu fakkar lill-​Korintin dwar xi wħud fil-​passat li għamlu xi żmien jaqdu lil Jehovah imma mbagħad ma baqgħux. Hu wissa lill-​aħwa midlukin bl-​ispirtu: “Min jidhirlu li hu wieqaf, joqgħod attent li ma jaqax.” (1 Korintin 10:12) Dan ikompli jagħti qawwa lit-​talba biex il-​Kolossin ‘fl-​aħħarnett jieqfu sħaħ.’ Ladarba huma jsiru sħaħ, jew jikbru għalkollox, iridu jkomplu, ma jaqtgħux qalbhom, jgħejjew, jew imajnaw. (Lhud 2:1; 3:​12, 6:6; 10:39; 12:25) B’hekk, huma jkunu “sħaħ” fil-​jum meta jiġu spezzjonati u approvati għall-​aħħar darba.—2 Korintin 5:10; 1 Pietru 2:12.

10, 11. (a) Epafra liema mudell tana rigward it-​talb? (b) Fi qbil maʼ dak li għamel Epafra, x’riżoluzzjoni tixtieq tagħmel?

¹⁰ Diġà ddiskutejna kemm hu importanti li titlob għal oħrajn b’isimhom, li tkun speċifiku meta titlob lil Jehovah biex jgħinhom, ifarraġhom, iberikhom, u jagħtihom l-​ispirtu qaddis. It-​talb t’Epafra għall-​Kolossin kien taʼ dan it-​tip. F’dan il-​kliem nistgħu, u fil-​fatt hekk għandna nagħmlu, insibu suġġerimenti siewja dwar dak li nistgħu nitolbu lil Jehovah għalina nfusna. Mingħajr dubju, għandna nitolbuh jgħinna biex individwalment nibqgħu ‘weqfin sħaħ’ sa l-​aħħar. Tagħmel hekk int?

¹¹ Għala ma ssemmix is-​sitwazzjoni tiegħek fit-​talb? Għid lil Alla kemm tkun għamilt progress biex issir ‘sħiħ,’ matur, wieħed li kiber għalkollox. Itolbu bil-​ħniena biex jgħinek tagħraf fejn għad għandek bżonn tikber spiritwalment. (Salm 17:3; 139:​23, 24) Żgur li għandek fejn taħdem. Allura, flok tħossok skuraġġit minħabba f’hekk, itlob minn qalbek u b’mod ċar lil Alla biex jgħinek tagħmel progress. Agħmel dan iktar minn darba. Fil-​fatt, għala ma tagħmilx riżoluzzjoni li fil-​ġimgħa li ġejja titlob għal xi ħin sabiex ‘fl-​aħħarnett tieqaf sħiħ’? U hekk kif tikkunsidra l-​iskrittura għas-​sena ppjana biex tagħmel dan iktar minn darba. Meta tkun qed titlob, iffoka fuq it-​tendenzi li jistgħu jġagħluk taqtaʼ qalbek, tegħja, jew titbiegħed milli taqdi ’l Alla u kif tistaʼ tevita li tagħmel dan.—Efesin 6:​11, 13, 14, 18.

Itlob għal Konvinzjoni Soda

12. Il-​Kolossin għala kellhom bżonn b’mod speċjali li jkollhom “konvinzjoni soda”?

¹² Epafra talab ukoll għal xi ħaġa oħra li kienet vitali jekk il-​Kolossin riedu li fl-​aħħarnett jinstabu weqfin u aċċettati minn Alla. U din għandha l-​istess importanza għalina. X’kienet? Hu talab biex huma jieqfu “b’konvinzjoni soda fir-​rieda kollha t’Alla.” Huma kienu mdawrin bl-​ereżija u b’filosofiji qerrieda, li xi ftit minnhom ħadu d-​dehra qarrieqa taʼ qima vera. Per eżempju, huma kienu taħt pressjoni biex josservaw ġranet speċjali billi jsumu jew jiffesteġġaw, bħalma kien meħtieġ darba mill-​qima Lhudija. Xi għalliema foloz iffokaw fuq l-​anġli, dawk l-​ispirti qawwija li ntużaw biex iwasslu l-​Liġi lil Mosè. Immaġina kif stajt tħossok taħt pressjoni bħal din, b’għadd taʼ ideat differenti li jmorru kontra xulxin!—Galatin 3:19; Kolossin 2:​8, 16-18.

13. Il-​fatt li jirrikonoxxu liema fattur setaʼ jgħin lill-​Kolossin, u dan kif jistaʼ jgħin lilna?

¹³ Pawlu rribatta billi enfasizza l-​irwol taʼ Ġesù Kristu. “Intom ilqajtu lil Kristu Ġesù l-​Mulej; għixu mela magħqudin miegħu; niżżlu għeruqkom fih, u ibnu l-​ħajja tagħkom fuqu; issaħħu fil-​fidi, kif tgħallimtu.” Iva, bħall-​Kolossin, għandna bżonn li jkollna konvinzjoni sħiħa dwar l-​irwol taʼ Kristu fl-​iskop t’Alla u f’ħajjitna. Pawlu spjega: “Fih hemm tgħammar il-​milja sħiħa tad-​divinità fil-​ġisem; u intom, magħqudin kif intom miegħu, għandkom sehem mill-​milja tiegħu, hu li hu r-​ras tal-​Prinċipati u tas-​Setgħat kollha.”—Kolossin 2:​6-10.

14. It-​tama għala kienet xi ħaġa reali għal dawk f’Kolossi?

¹⁴ Il-​Kolossin kienu Kristjani midlukin bl-​ispirtu. Huma kellhom it-​tama ċara taʼ ħajja fis-​sema, u kellhom kull raġun biex iżommu din it-​tama ħajja. (Kolossin 1:5) Kienet ‘ir-​rieda t’Alla’ li huma jkollhom konvinzjoni soda dwar iċ-​ċertezza tat-​tama tagħhom. Kellu għalfejn xi ħadd minnhom ikollu dubju dwarha? Lanqas xejn! Għandu għalfejn ikun differenti llum għal dawk kollha li għandhom il-​prospett mingħand Alla li jgħixu f’ġenna taʼ l-​art? Le, tabilħaqq! Jidher ċar li din it-​tama valida hija parti mir-​‘rieda t’Alla.’ Issa kkunsidra dawn il-​mistoqsijiet: Jekk qed tħabrek biex tkun wieħed mill-​“kotra kbira” li se tgħaddi mit-​tribulazzjoni l-​kbira u tibqaʼ ħaj, kemm hi reali t-​tama tiegħek? (Apokalissi 7:9, 14) Hija parti mill-​‘konvinzjoni soda tiegħek fir-​rieda kollha t’Alla’?

15. Pawlu ta liema serje taʼ punti li inkludiet it-​tama?

¹⁵ Meta ngħidu “tama” ma rridux infissru sempliċi xewqa vojta jew ħolma. Dan nistgħu narawh mis-​serje taʼ punti li Pawlu kien ta lir-​Rumani. F’din is-​serje, kull ħaġa li tissemma twassal għal dik taʼ warajha jew hija marbuta magħha. Innota fejn ipoġġiha Pawlu t-​“tama” fir-​raġunar tiegħu: “Niftaħru wkoll bis-​sofferenzi, għax nafu li s-​sofferenza ġġib is-​sabar, is-​sabar . . . [‘iġib kundizzjoni approvata; il-​kundizzjoni approvata ġġib,’ NW] t-​tama. U din it-​tama ma tqarraqx bina, għax l-​imħabba taʼ Alla ssawwbet fi qlubna permezz taʼ l-​Ispirtu s-​Santu.”—Rumani 5:​3-5.

16. X’tama ksibt, hekk kif tgħallimt il-​verità Biblika?

¹⁶ Għandu mnejn li meta x-​Xhieda taʼ Jehovah tawk għall-​ewwel darba l-​messaġġ tas-​Saltna, kien hemm xi verità partikulari li laqtitek, bħalma hi l-​kundizzjoni tal-​mejtin jew l-​irxoxt. Għal ħafna, l-​iktar ħaġa ġdida u importanti li għarfu kienet il-​possibbiltà bbażata fuq il-​Bibbja taʼ ħajja f’ġenna taʼ l-​art. Ftakar meta smajt għall-​ewwel darba dwar dan it-​tagħlim. X’tama meraviljuża—il-​mard u x-​xjuħija se jispiċċaw, int tistaʼ tibqaʼ tgħix biex tgawdi l-​frott tal-​ħidma tiegħek, u se jkun hemm il-​paċi maʼ l-​annimali! (Koħèlet 9:5, 10; Isaija 65:​17-25; Ġwann 5:​28, 29; Apokalissi 21:​3, 4) Int ksibt tama mill-​isbaħ!

17, 18. (a) Is-​serje li Pawlu ta lir-​Rumani kif wasslet għat-​tama? (b) Rumani 5:​4, 5 għal liema tip taʼ tama qed jirreferi, u għandek int tama bħal din?

¹⁷ Maż-​żmien, x’aktarx li kellek tħabbat wiċċek maʼ xi oppożizzjoni jew persekuzzjoni. (Mattew 10:​34-39; 24:9) Saħansitra f’dawn l-​aħħar snin, ix-​Xhieda f’diversi pajjiżi spiċċaw biex kellhom id-​djar tagħhom misruqin jew ġew imġagħlin isiru refuġjati. Xi wħud ġew attakkati fiżikament, kellhom il-​letteratura bbażata fuq il-​Bibbja konfiskata, jew sfaw vittmi taʼ rapporti giddibin fuq il-​mezzi tax-​xandir. Kienet x’kienet it-​tip taʼ persekuzzjoni li forsi kellek iġġarrab, int stajt tifraħ bis-​sofferenza bħalma jgħid Rumani 5:​3, u din ġabitlek riżultat mill-​aqwa. Saħansitra bħalma kiteb Pawlu, is-​sofferenza pproduċiet fik is-​sabar. Imbagħad is-​sabar wassal għal kundizzjoni approvata. Int kont taf li qed tagħmel dak li hu tajjeb, li qed tagħmel ir-​rieda t’Alla, u għalhekk kont ċert li kellek l-​approvazzjoni tiegħu. Fi kliem Pawlu, int ħassejt li kont qiegħed f’“kundizzjoni approvata.” Pawlu kompla jikteb li din mill-​banda l-​oħra ġġib it-​tama. Din il-​ħaġa forsi tinstemaʼ kemxejn stramba. Pawlu għala dam daqshekk ma semmieha t-​“tama” f’din is-​serje? M’hijiex it-​tama xi ħaġa li kellek diġà, meta smajt għall-​ewwel darba bl-​aħbar tajba?

¹⁸ Jidher ċar li Pawlu hawnhekk mhux qed jirreferi għat-​tama taʼ ħajja perfetta li kellna fil-​bidu. Dak li qed jirreferi għalih hawnhekk huwa xi ħaġa iktar; iktar profonda, li tqanqlek iżjed. Il-​fatt li aħna nissaportu lealment, u b’hekk nirrealizzaw li għandna l-​approvazzjoni t’Alla, iħalli effett profond fuq it-​tama li kellna fil-​bidu billi jkabbarha u jsaħħaħha. Din it-​tama li kellna issa ssir ferm iktar reali, iktar solida, u iktar persunali. Din it-​tama profonda tiddi ferm iktar. Tiddominalna ħajjitna u l-​personalità tagħna. “U din it-​tama ma tqarraqx bina, għax l-​imħabba taʼ Alla ssawwbet fi qlubna permezz taʼ l-​Ispirtu s-​Santu.”

19. It-​tama tiegħek kif għandha tkun parti mit-​talb regulari tiegħek?

¹⁹ Epafra talab bil-​ħeġġa biex ħutu f’Kolossi jibqgħu mqanqlin u konvinti b’dak li kien hemm jistenniehom, billi jkollhom “konvinzjoni soda fir-​rieda kollha t’Alla.” Ejja lkoll kemm aħna nitkellmu b’dan il-​mod u regolarment m’Alla dwar it-​tama tagħna. Fit-​talb privat tiegħek, inkludi t-​tama li għandek rigward id-​dinja l-​ġdida. Esprimi maʼ Jehovah kemm tixxennaq għaliha, b’konvinzjoni sħiħa li ġejja. Itolbu minn qalbek biex jgħinek tkabbar u ssaħħaħ il-​konvinzjoni tiegħek. Agħmel bħal Epafra li talab biex il-​Kolossin ikollhom “konvinzjoni soda fir-​rieda kollha t’Alla.” Agħmel dan taʼ spiss.

20. Jekk ikun hemm xi ftit li jitbegħdu mit-​triq Kristjana, għala m’għandniex għalfejn inħossuna skuraġġiti?

²⁰ M’għandekx tkun aljenat jew skuraġġit bil-​fatt li mhux kulħadd jieqaf sħiħ u għandu konvinzjoni soda. Xi wħud jistaʼ ma jirnexxilhomx jagħmlu dan, jew sempliċement jaqtgħu qalbhom u jċedu. Dan ġara fost dawk li kienu l-​iktar qrib taʼ Ġesù, l-​appostli tiegħu. Iżda meta Ġuda sar traditur, l-​appostli l-​oħra battew jew ħallew kollox warajhom? Dażgur li le! Pietru applika Salm 109:8 biex juri li xi ħaddieħor kellu jieħu post Ġuda. Intgħażel ieħor, u dawk li baqgħu leali lejn Alla komplew b’mod attiv fl-​inkarigu tagħhom taʼ l-​ippridkar. (Atti 1:​15-26) Huma kienu determinati li jieqfu sħaħ b’konvinzjoni soda.

21, 22. Il-​fatt li tieqaf sħiħ u b’konvinzjoni soda f’liema sens se jiġi nnotat?

²¹ Tistaʼ tibqaʼ ċert mija fil-​mija li jekk tieqaf sħiħ u jkollok konvinzjoni soda fir-​rieda kollha t’Alla, dan mhux se jiġi injorat. Se jiġi nnotat u apprezzat. Minn min?

²² Żgur li ħutek li jafuk u jħobbuk se jindunaw. Anki jekk ħafna ma jurux dan bil-​kliem, l-​effett ikun simili għal dak li naqraw fl-​1 Tessalonikin 1:​2-6: “Aħna kull ħin niżżu ħajr lil Alla minħabba fikom ilkoll, u niftakru fikom dejjem meta nitolbu. Niftakru fil-​ħidma li hi ġejja mill-​fidi tagħkom u fit-​taħbit li ħiereġ minn imħabbitkom; niftakru fil-​qawwa tat-​tama tagħkom f’Sidna Ġesù Kristu quddiem Alla Missierna. . . . Għax l-​Evanġelju tagħna lilkom ma kienx biss bil-​kliem, imma wkoll bil-​qawwa, bl-​Ispirtu s-​Santu u b’[konvinzjoni] sħiħa . . . Intom sirtu tixbhu lilna u l-​Mulej.” Il-​Kristjani leali taʼ madwarek se jħossu l-​istess hekk kif jinnotaw li int qed ‘tieqaf sħiħ u b’konvinzjoni soda fir-​rieda kollha t’Alla.’—Kolossin 1:23.

23. Matul din is-​sena, x’għandha tkun id-​determinazzjoni tiegħek?

²³ Mingħajr ebda dubju Missierek tas-​sema se jinnota u se jieħu pjaċir. Jistaʼ jkollok fiduċja f’dan. Għala? Għaliex int wieqaf sħiħ u b’konvinzjoni soda “fir-​rieda kollha t’Alla.” Pawlu kiteb biex jinkuraġġixxi lill-​Kolossin talli kienu qed ‘jimxu sewwa kif jixraq lill-​Mulej u jogħġbuh f’kollox.’ (Kolossin 1:10) Iva, huwa possibbli li bnedmin imperfetti jogħġbu lil Alla f’kollox. Hekk għamlu ħutek f’Kolossi. Il-​Kristjani li hawn madwarek bħalissa qed jagħmlu l-​istess. Int ukoll tistaʼ tagħmel dan! Għaldaqstant, matul din is-​sena li ġejja, ħalli t-​talb taʼ kuljum tiegħek kif ukoll l-​azzjonijiet regulari tiegħek juru li int determinat biex ‘fl-​aħħarnett tieqaf sħiħ u b’konvinzjoni soda fir-​rieda kollha t’Alla.’

Tistaʼ Tiftakar?

• X’inhu involut f’li ‘tieqaf sħiħ’?

• Liema affarijiet dwarek innifsek għandek tinkludi fit-​talb tiegħek?

• Bħalma jissuġġerixxi Rumani 5:​4, 5, liema tip taʼ tama jrid ikollok?

• L-​istudju tagħna liema mira qanqlek biex tagħmel matul din is-​sena?

[Stampa f’paġna 20]

Epafra talab biex ħutu jieqfu sħaħ, b’konvinzjoni soda dwar Kristu u t-​tama tagħhom

[Stampi f’paġna 23]

Hemm miljuni li għandhom tama ċerta u konvinzjoni soda bħal tiegħek