Mistoqsijiet mill-​Qarrejja

Fejn kien Danjel meta t-​tliet Ebrej iffaċċjaw dik il-​prova quddiem l-​istatwa enormi li Nabukodonosor kien waqqaf fil-​wita taʼ Dura?

Il-​Bibbja ma tgħidilniex, u għalhekk illum ħadd ma jistaʼ jgħid fiċ-​ċert fejn kien Danjel waqt dik il-​prova.

Xi wħud issuġġerew li Danjel kien imlaħħaq iktar jew kien iktar midħla taʼ Nabukodonosor milli kienu Sidrak, Mesak, u Għabednegu, u b’hekk ma kienx mitlub li jmur fil-​wita taʼ Dura. Veru li Danjel 2:49 jindika li għal xi żmien hu kellu pożizzjoni iktar għolja minn dik taʼ ħbiebu. Imma m’hemmx provi li dan kien biżżejjed biex jiskużah milli jmur maʼ l-​oħrajn quddiem l-​istatwa.

Oħrajn, biex jipprovaw jispjegaw għala Danjel ma kienx maʼ sħabu, qalu li x’aktarx kellu jmur xi mkien fuq xi inkarigu uffiċjali jew li kien marid, u b’hekk ma setax jattendi. Madankollu, il-​Bibbja ma tgħidx hekk. Kien x’kien il-​każ, Danjel ma kien għamel xejn li għalih setaʼ jiġi kritikat minn dawk taʼ madwaru, għax kieku l-​ewwel li kienu jixluh kienu jkunu dawk l-​uffiċjali Babiloniżi li tant kienu jgħiru għalih. (Danjel 3:8) Kemm qabel ma seħħ dan l-​episodju u kemm wara, Danjel dejjem wera li kien bniedem taʼ integrità, leali lejn Alla minkejja kull sfida li setaʼ jiffaċċja. (Danjel 1:8; 5:17; 6:​5, 11, 12 [6:​4, 10, 11, NW]) Mela, avolja l-​Bibbja ma tgħidx għala Danjel ma kienx preżenti fil-​wita taʼ Dura, nistgħu nkunu fiduċjużi li hu ma kkompromettiex il-​lealtà tiegħu lejn Alla Jehovah.—Eżekjel 14:14; Lhud 11:33.