Mistoqsijiet mill-​Qarrejja

Huwa għaqli li Kristjan veru jattendi funeral jew tieġ fil-​knisja?

Jehovah ma jiħux gost li aħna nieħdu sehem fi kwalunkwe tip taʼ reliġjon falza, u dan irid jiġi evitat. (2 Korintin 6:​14-17; Apokalissi 18:4) Funeral fil-​knisja huwa ċerimonja reliġjuża li x’aktarx tinvolvi priedka b’ideat mhux skritturali bħalma huma l-​immortalità tar-​ruħ u l-​premju fis-​sema għan-​nies tajbin kollha. Jistaʼ jinkludi wkoll prattiċi bħal li wieħed irodd is-​salib u jitlob mal-​qassis. It-​talb u xi drawwiet reliġjużi oħra li jmorru kontra t-​tagħlim tal-​Bibbja jistgħu wkoll ikunu parti minn ċerimonja reliġjuża taʼ tieġ li ssir fil-​knisja jew xi mkien ieħor. Peress li jkun imdawwar minn nies li lkoll ikunu qed jieħdu sehem f’att reliġjuż falz, il-​Kristjan forsi jsibha diffiċli li jiflaħ għall-​pressjoni biex jieħu sehem hu wkoll. Kemm ma jkunx għaqli li wieħed jesponi ruħu għal pressjoni bħal din!

Xi ngħidu jekk Kristjan iħossu obbligat li jattendi funeral jew tieġ fil-​knisja? Per eżempju, raġel li m’huwiex Xhud jistaʼ jħeġġeġ lil martu li hija Kristjana biex tmur miegħu f’okkażjoni bħal din. Tistaʼ tmur u toqgħod tosserva biss mingħajr ma tieħu sehem? Biex tirrispetta x-​xewqat taʼ żewġha, il-​mara forsi tiddeċiedi li tmur miegħu, u tkun determinata li ma tieħu sehem f’ebda ċerimonja reliġjuża. Mill-​banda l-​oħra, forsi tiddeċiedi li ma tmurx, għax tirraġuna li f’dawn iċ-​ċirkustanzi tistaʼ ma tkunx tiflaħ għall-​pressjoni emozzjonali, u din forsi tistaʼ ġġagħalha tikkomprometti xi prinċipju divin. Id-​deċiżjoni hi trid tiħodha. Hi ċertament trid tkun konvinta li d-​deċiżjoni li tieħu tkun il-​waħda t-​tajba, u b’hekk ikollha kuxjenza nadifa.—1 Timotju 1:19.

Tagħmel x’tagħmel, ikun aħjar għaliha jekk tispjega lil żewġha li l-​kuxjenza tagħha ma tħallihiex tieħu sehem fi kwalunkwe ċerimonja reliġjuża jew tkanta magħhom jew tbaxxi rasha meta jingħad xi talb. B’dan f’moħħu, żewġha jistaʼ forsi jikkonkludi li l-​preżenza tagħha għandha mnejn toħloq sitwazzjoni li tistaʼ tkun imbarazzanti għalih. Jistaʼ forsi jagħżel li jmur waħdu għax ikun iħobb lil martu u jirrispetta t-​twemmin tagħha, jew inkella għaliex ma jixtieqx li jimbarazza ruħu. Imma jekk jinsisti li hi għandha tmur miegħu, tistaʼ tmur u sempliċement toqgħod tosserva biss mingħajr ma tieħu sehem.

Ma rridux ninsew ukoll l-​effett li jistaʼ jkollu fuq sħabna l-​Kristjani l-​fatt li nattendu xi ċerimonja f’bini reliġjuż. Jistaʼ dan iweġġaʼ l-​kuxjenza taʼ xi ħadd minnhom? Jistaʼ dan idgħajjef ir-​reżistenza tagħhom biex jevitaw li jieħdu sehem fl-​idolatrija? ‘Kunu żguri mill-​affarijiet iktar importanti,’ wissa l-​appostlu Pawlu, ‘sabiex tistgħu tkunu bla difett u ma tkunux qegħdin tfixklu lil oħrajn sa jum Kristu.’—Filippin 1:​10, NW.

Jekk l-​okkażjoni tkun tinvolvi lil xi ħadd li jkun jiġi mill-​Kristjan mill-​qrib, jistaʼ jkun hemm pressjonijiet oħra mill-​familja. Fi kwalunkwe sitwazzjoni, il-​Kristjan irid jiżen sew il-​fatturi kollha involuti. F’ċerti ċirkustanzi l-​individwu involut għandu mnejn jikkonkludi li ma se jkun hemm ebda diffikultà jekk jattendi għall-​funeral jew tieġ fil-​knisja, basta ma jiħux sehem. Madankollu, jistaʼ jiġri li billi jattendi jkun hemm ċans li jweġġaʼ l-​kuxjenza tiegħu jew dik t’oħrajn, u dan se jirriżulta f’iktar deni milli ġid. Tkun xi tkun is-​sitwazzjoni, il-​Kristjan għandu jaċċerta ruħu li bid-​deċiżjoni li jieħu se jibqaʼ jżomm kuxjenza tajba quddiem Alla u l-​bnedmin.