X’Sar Minnu n-​Nar taʼ l-​Infern?

LIEMA stampa ġġiblek f’moħħok il-​kelma “infern”? Tara l-​infern bħala post letterali bin-​nar u l-​kubrit, post taʼ tbatija u turment li ma jispiċċa qatt? Jew forsi l-​infern huwa deskrizzjoni simbolika taʼ kundizzjoni, jew sitwazzjoni?

Għal sekli sħaħ, il-​mexxejja reliġjużi tal-​Kristjaneżmu taw stampa taʼ infern bin-​nar b’turmenti taʼ wġigħ kbir bħala l-​post fejn żgur se jispiċċaw il-​midinbin. Din l-​idea għadha popolari fost ħafna gruppi reliġjużi oħra. “Forsi veru li l-​Kristjanità għamlet l-​infern kelma magħrufa sew,” jgħid il-​U.S.News & World Report, “iżda m’għandhiex il-​monopolju fuq din id-​duttrina. It-​theddida taʼ tpattija bl-​uġigħ fil-​ħajja wara l-​mewt għandha l-​pariġġ fi kważi kull reliġjon ewlenija fid-​dinja u anki f’xi wħud li huma iżgħar.” Il-​Ħindu, il-​Buddiżmu, l-​Islam, il-​Ġajniżmu, u t-​Taoiżmu għandhom twemmin taʼ xi tip taʼ infern.

Madankollu, in-​nies illum għandhom ħarsa differenti lejn it-​tifsira taʼ l-​infern. “Filwaqt li l-​istampa tradizzjonali taʼ l-​infern għad hemm min jemminha,” tistqarr ir-​rivista li ssemmiet qabel, “opinjonijiet moderni tal-​kundanna għal dejjem bħala post partikolarment mhux pjaċevoli fejn l-​individwu jkun maqful waħdu, qed jibdew jidħlu fix-​xena, u dawn jissuġġerixxu li l-​infern jistaʼ jkun li ma jaħraqx daqshekk wara kollox.”

Il-​ġurnal Ġiżwita La Civiltà Cattolica osserva: “Tistaʼ tiġi mqarraq . . . meta taħseb li Alla, permezz tad-​demonji, jaħqar lil dawk kundannati b’turmenti tal-​biżaʼ bħal dak tan-​nar.” U żied: “L-​infern ma jeżistix bħala post iżda bħala sitwazzjoni li tiġi fiha, mod t’eżistenza taʼ individwu li jbati mill-​uġigħ li jiġi għaliex ikun mifrud minn Alla.” Fl-​1999, il-​Papa Ġwanni Pawlu II qal: “Minflok ma huwa post, l-​infern jindika l-​qagħda taʼ dawk li deliberatament u b’mod definit jisseparaw ruħhom minn Alla, is-​sors tal-​ħajja u l-​ferħ kollu.” Rigward l-​istampi taʼ l-​infern bħala post bin-​nar, hu qal: “Dawn juru d-​dwejjaq totali u l-​ħajja vojta u bla skop taʼ dawk li m’għandhomx lil Alla.” Kieku l-​papa ddeskriva l-​infern bħala post bil-​“fjammi u xitan liebes bl-​aħmar u bil-​furkettun f’idu, in-​nies ma kinux jiħduh bis-​serjetà,” qal Martin Marty, studjuż taʼ l-​istorja tal-​knisja.

Bidliet bħal dawn qed iseħħu wkoll f’organizzazzjonijiet reliġjużi oħrajn. Rapport mill-​kummissjoni duttrinali taċ-​Church of England qal: “L-​infern m’huwiex it-​turment etern, iżda huwa l-​għażla aħħarija, li ma tistax titraġġaʼ lura, taʼ dak li jmur kontra Alla b’mod tant komplet u totali li l-​uniku tmiem għalih ikun li assolutament ma jibqax jeżisti.”

Il-​katekiżmu tal-​Knisja Episkopali taʼ l-​Istati Uniti jispjega l-​infern bħala “l-​mewt għal dejjem talli nkunu rrifjutajna ’l Alla.” Numru li dejjem jiżdied taʼ nies, jgħid il-​U.S.News & World Report, qed ixerrdu l-​idea li “t-​tmiem tal-​ħżiena huwa l-​qerda, mhux it-​tbatija għal dejjem. . . . [Huma] jistqarru li dawk li fl-​aħħar mill-​aħħar jirrifjutaw ’l Alla sempliċement se jitneħħew mill-​eżistenza fin-​‘nar li jiblaʼ’ taʼ l-​infern.”

Għalkemm ix-​xejra taʼ żmienna hija li jwarrbu fil-​ġenb il-​mentalità tan-​nar u l-​kubrit, ħafna għadhom iżommu sod mat-​twemmin li l-​infern hu post letterali taʼ turment. “L-​Iskrittura titkellem ċar dwar l-​infern bħala post fiżiku taʼ turment bin-​nar,” jgħid Albert Mohler tas-​Southern Baptist Theological Seminary f’Louisville, Kentucky, U.S.A. U r-​rapport The Nature of Hell, imħejji mill-​Kummissjoni taʼ l-​Alleanza Evanġelika, jistqarr: “L-​infern huwa l-​esperjenza taʼ li tkun taf li int imwarrab u qed tiġi turmentat.” Iżid: “Fl-​infern hemm livelli taʼ kastigi u tbatija li jingħataw skond kemm ikunu gravi d-​dnubiet li saru fid-​dinja.”

Għal darb’oħra, huwa l-​infern post taʼ turment etern jew taʼ qerda totali? Jew huwa sempliċement stat taʼ firda minn Alla? X’inhu tassew l-​infern?

[Kaxxa/Stampi f’paġna 4]

Storja fil-​Qosor dwar in-​Nar taʼ l-​Infern

DAWK li jsostnu li huma Kristjani meta bdew jemmnu fl-​infern? Ħafna żmien wara li għexu Ġesù u l-​appostli tiegħu. “L-​Apocalypse of Peter (it-2 seklu E.K.) kien l-​ewwel xogħol Kristjan [apokrifali] li ddeskriva l-​kastig u t-​torturi tal-​midinbin fl-​infern,” tistqarr l-​Encyclopædia Universalis Franċiża.

Madankollu, Missirijiet il-​Knisja tal-​bidu ma qablux bejniethom dwar il-​kwistjoni taʼ l-​infern. Ġustinu Martri, Klement taʼ Lixandra, Tertuljanu, u Ċiprijan kienu jemmnu li l-​infern huwa post bin-​nar. Oriġene u t-​teologu Girgor taʼ Nissa kienu jaħsbu li l-​infern huwa post taʼ separazzjoni minn Alla—taʼ tbatija spiritwali. Mill-​banda l-​oħra, Wistin taʼ Ħippo saħaq li t-​tbatija fl-​infern kienet tinħass kemm spiritwalment kif ukoll fiżikament—ħarsa li maż-​żmien saret aċċettata iktar.

“Sal-​ħames seklu d-​duttrina riġida li l-​midinbin mhux se jkollhom ċans ieħor wara din il-​ħajja u li n-​nar li kien se jiblagħhom ma kien se jintefa qatt kienet tispikka maʼ kullimkien,” kiteb il-​Professur J.N.D. Kelly.

Fis-​seklu 16, riformisti Protestanti bħal Martin Luther u John Calvin kienu jifhmu li t-​turment bin-​nar taʼ l-​infern kien ifisser li tqattaʼ eternità mifrud minn Alla. Madankollu, l-​idea taʼ l-​infern bħala post taʼ turment reġgħet tfaċċat fiż-​żewġ sekli taʼ wara. Il-​predikatur Protestant Jonathan Edwards kien inissel biżaʼ fi qlub l-​Amerikani Kolonjali tas-​seklu 18 bi stampi impressjonanti taʼ l-​infern.

Madankollu, ftit wara dan, il-​fjammi taʼ l-​infern bdew iteptpu u jintfew. “Is-​seklu 20 kien kważi l-​mewt taʼ l-​infern,” jistqarr il-​U.S.News & World Report.

[Stampi]

Ġustinu Martri kien jemmen li l-​infern hu post bin-​nar

Wistin taʼ Ħippo għallem li t-​tbatija fl-​infern kienet kemm spiritwali kif ukoll fiżika