X’Inhu Verament l-​Infern?

HI X’INHI l-​istampa li l-​kelma “infern” iġġiblek quddiem għajnejk, l-​infern ġeneralment huwa maħsub li hu post fejn jingħata l-​kastig għad-​dnub. Dwar id-​dnub u l-​effett tiegħu, il-​Bibbja tgħid: “Kien permezz taʼ bniedem wieħed li fid-​dinja daħal id-​dnub, u permezz tad-​dnub il-​mewt, u hekk il-​mewt laħqet il-​bnedmin kollha, għax kollha dinbu.” (Rumani 5:12) L-​Iskrittura tistqarr ukoll: “Il-​ħlas tad-​dnub hu l-​mewt.” (Rumani 6:23) Peress li l-​kastig għad-​dnub hu l-​mewt, il-​mistoqsija fundamentali li tiddetermina xi jfisser verament l-​infern hi: X’jiġrilna meta mmutu?

Wara l-​mewt, tkompli l-​ħajja b’xi mod ieħor jew f’xi forma oħra? X’inhu l-​infern, u liema tip taʼ nies imorru fih? Hemm xi tama għal dawk li jinsabu fl-​infern? Il-​Bibbja tagħti tweġibiet veri u sodisfaċenti għal dawn il-​mistoqsijiet.

Ħajja wara l-​Mewt?

Hemm xi ħaġa fina, bħal ruħ jew spirtu, li tibqaʼ ħajja wara li jmut il-​ġisem? Ikkunsidra kif l-​ewwel bniedem, Adam, beda jgħix. Il-​Bibbja tistqarr: “Il-​Mulej Alla sawwar il-​bniedem mit-​trab taʼ l-​art u nefaħlu fi mnifsejh nifs il-​ħajja.” (Ġenesi 2:7) Għalkemm in-​nifs sostnielu ħajtu, li “nifs il-​ħajja” jitqiegħed fi mnifsejh kien jinvolvi ħafna iktar milli sempliċement jonfoħlu l-​arja fil-​pulmuni. Dan kien ifisser li Alla jitfaʼ fil-​ġisem bla ħajja taʼ Adam ix-​xrara tal-​ħajja—“nifs il-​ħajja [“il-​forza tal-​ħajja,” NW],” li hija attiva fil-​ħlejjaq kollha taʼ l-​art. (Ġenesi 6:17; 7:22) Il-​Bibbja tirreferi għal din il-​forza li tagħti l-​ħajja bħala “spirtu.” (Ġakbu 2:​26, Karm Żammit) Dan l-​ispirtu jistaʼ jitqabbel mal-​kurrent elettriku li jħaddem magna jew apparat, u b’hekk jgħinu jagħmel il-​funzjoni tiegħu. L-​istess bħalma l-​kurrent qatt ma jieħu l-​karatteristiċi taʼ l-​apparat li jħaddem, il-​forza tal-​ħajja ma tiħux il-​karatteristiċi tal-​ħlejjaq li lilhom tagħti l-​ħajja. M’għandhiex personalità u mhix kapaċi taħseb.

X’jiġrilu l-​ispirtu meta jmut individwu? Salm 146:4 jgħid: “Malli toħroġ ruħu [“l-​ispirtu,” NW], lejn l-​art jerġaʼ jmur; jintemmu dakinhar ħsibijietu.” Meta jmut individwu, l-​ispirtu impersonali tiegħu ma jkomplix jgħix f’xi qasam ieħor bħala ħlejqa spirtu. Dan “jitlaq lejn Alla, minn fejn ġie.” (Koħèlet 12:7) Dan ifisser li kwalunkwe tama li dan l-​individwu jerġaʼ jgħix fil-​futur qiegħda kompletament f’idejn Alla.

Sokrate u Platun, il-​filosfi Griegi tal-​qedem, kienu jemmnu li r-​ruħ li tinsab ġo l-​individwu tibqaʼ ħajja wara l-​mewt u ma tmut qatt. X’tgħallem il-​Bibbja dwar ir-​ruħ? Adam “sar ruħ ħajja,” jgħid l-​1 Korintin 15:45. Hu ma ngħatax ruħ, hu kien ruħ—individwu kollu kemm hu. L-​Iskrittura titkellem dwar ruħ li taħdem, tixxennaq għall-​ikel, tinħataf, tgħaddi minn nuqqas taʼ rqad, u nibqgħu sejrin. (Levitiku 23:​30, NW; Dewteronomju 12:​20, KŻ; 24:​7, NW; Salm 119:​28, Saydon) Iva, il-​bniedem innifsu huwa ruħ. Meta jmut individwu, din ir-​ruħ tmut.—Eżekjel 18:​4, KŻ.

Mela, allura, x’inhi l-​kundizzjoni tal-​mejtin? Meta lissen kundanna fuq Adam, Jehovah stqarr: “Trab int, u fit-​trab terġaʼ tmur.” (Ġenesi 3:19) Fejn kien Adam qabel ma Alla fformah mit-​trab taʼ l-​art u tah il-​ħajja? Hu sempliċement ma kienx jeżisti! Meta miet, Adam mar lura lejn dik il-​kundizzjoni taʼ ineżistenza kompleta. Il-​kundizzjoni tal-​mejtin tidher biċ-​ċar f’Koħèlet 9:​5, 10, fejn naqraw: “Il-​mejtin ma jafu xejn; . . . ma jkunx hemm ħidma jew ħsieb, xjenza jew għerf, f’Art l-​Imwiet [“fil-​qabar,” New International Version] fejn inti sejjer.” Skond l-​Iskrittura, min ikun mejjet ma jibqax jeżisti. Il-​mejtin ma huma konxji taʼ xejn, ma jħossu xejn, u ma jaħsbu xejn.

Turment li Ma Jispiċċa Qatt jew il-​Qabar Komuni?

Peress li l-​mejtin ma jafux li jeżistu, l-​infern ma jistax ikun post taʼ turment bin-​nar fejn il-​ħżiena jbatu wara li jmutu. Mela, allura, x’inhu l-​infern? Il-​fatt li neżaminaw xi ġralu Ġesù wara li miet se jgħinna nwieġbu din il-​mistoqsija. Luqa, il-​kittieb Bibliku, jirrakkonta: “[Ġesù] la kien mitluq fl-​imwiet [“fl-​infern,” King James Version, jew “Ħades” bil-​Grieg] u lanqas ġismu ma ra t-​taħsir.”a (Atti 2:31) Fejn kien l-​infern li saħansitra Ġesù mar fih? L-​appostlu Pawlu kiteb: “Jien għallimtkom . . . li Kristu miet minħabba dnubietna, skond l-​Iskrittura; difnuh u qam mill-​imwiet fit-​tielet jum, skond l-​Iskrittura.” (1 Korintin 15:​3, 4) Mela Ġesù kien fl-​infern, fil-​qabar, iżda ma kienx abbandunat hemmhekk, għax ġie mqajjem, jew irxoxtat.

Ikkunsidra wkoll dak li ġralu r-​raġel twajjeb Ġob, li bata ħafna. Peress li xtaq jeħles mill-​istat imwiegħer tiegħu, hu talab bil-​ħrara: “M’hux li kont taħbini f’Art l-​Imwiet [“fl-​infern,” Douay Version, jew “Xeol” bil-​Grieg] fejn nistkenn sa ma tibred il-​korla tiegħek u tiffissali żmien li tiftakar fija.”b (Ġob 14:13) Kemm ma jkunx raġunevoli jekk naħsbu li Ġob xtaq imur jistkenn f’post jaħraq bin-​nar! Għal Ġob, l-​“infern” kien sempliċement il-​qabar, fejn it-​tbatija tiegħu kellha tintemm. Allura, l-​infern tal-​Bibbja huwa l-​qabar komuni tal-​bnedmin fejn imorru kemm in-​nies tajbin kif ukoll ħżiena.

In-​Nar taʼ l-​Infern—Jiblaʼ Kollox?

Jistaʼ jkun li n-​nar taʼ l-​infern jissimbolizza qerda li hi totali, jew li tiblaʼ kollox? Biex tiddistingwi n-​nar minn Ħades, jew l-​infern, l-​Iskrittura tgħid: “Il-​Mewt u Post il-​Mejtin [“Ħades,” NW] ġew mixħuta fil-​belliegħa [“l-​għadira,” NW] tan-​nar.” “L-​għadira” msemmija hawn hija simbolika, peress li l-​mewt u l-​infern (Ħades) li jiġu mitfugħin fiha ma jistgħux jinħarqu b’mod letterali. “Din l-​għadira tan-​nar hija t-​tieni mewt”—mewt li minnha m’hemmx tama taʼ rxoxt.—Apokalissi 20:14.

L-għadira tan-​nar għandha tifsira simili għal dik tan-​“nar taʼ l-​infern [“Geħenna,” NW]” li tkellem dwaru Ġesù. (Mattew 5:22; Mark 9:​47, 48) Il-​kelma Geħenna tidher 12-il darba fl-​Iskrittura Griega Kristjana, u tirreferi għall-​wied taʼ Ħinnom, barra s-​swar taʼ Ġerusalemm. Meta Ġesù kien fuq l-​art, dan il-​wied kien jintuża bħala post fejn jintrema l-​iskart, “fejn il-​katavri tal-​kriminali, u l-​iġsma mejtin taʼ l-​annimali, u kull tip taʼ ħmieġ ieħor kien jintefaʼ.” (Smith’s Dictionary of the Bible) In-​nirien kienu jinżammu mqabbdin billi jżidu l-​kubrit biex jaħraq l-​iskart. Ġesù uża dak il-​wied bħala simbolu addattat taʼ qerda dejjiema.

Bħal Geħenna, l-​għadira tan-​nar tissimbolizza qerda eterna. Il-​mewt u Ħades jiġu mitfugħin fiha għaliex se jinqerdu meta l-​bnedmin se jinħelsu mid-​dnub u mill-​kundanna tal-​mewt. Midinbin li jidinbu apposta u li ma jiddispjaċihomx ukoll se jkollhom “sehemhom” f’dik l-​għadira. (Apokalissi 21:8) Anki huma se jinqerdu għal dejjem. Mill-​banda l-​oħra, dawk li jinsabu fil-​memorja t’Alla u li qegħdin fl-​infern—il-​qabar komuni tal-​bnedmin—għandhom futur meraviljuż.

L-​Infern Imbattal!

Apokalissi 20:13 jistqarr: “Il-​baħar radd lura l-​mejtin li kien hemm ġo fih, u hekk ukoll il-​Mewt u l-​qiegħ taʼ l-​art [“Ħades,” NW] raddew lura l-​mejtin li kien hemm ġo fihom.” Iva, l-​infern tal-​Bibbja se jitbattal. Bħalma wiegħed Ġesù, “tiġi siegħa meta dawk kollha li jkunu fl-​oqbra jisimgħu leħnu [leħen Ġesù] u joħorġu.” (Ġwann 5:​28, 29) Għalkemm bħalissa m’għadhom jeżistu f’ebda forma, il-​miljuni taʼ mejtin li jinsabu fil-​memorja t’Alla Jehovah se jiġu rxoxtati, jew jerġgħu jingħataw il-​ħajja, f’art magħmula ġenna.—Luqa 23:43; Atti 24:15.

Fid-dinja l-​ġdida li se jagħmel Alla, bnedmin irxoxtati li jgħixu fi qbil mal-​liġijiet ġusti tiegħu qatt ma se jkollhom bżonn jerġgħu jmutu. (Isaija 25:8) Jehovah se “jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed.” Fil-​fatt, se jkunu “għabu l-​ħwejjeġ taʼ qabel.” (Apokalissi 21:4) X’barka hemm lesta għal dawk li jinsabu fl-​infern—“fl-​oqbra” tal-​mafkar! Din il-​barka tassew tagħtina raġuni biżżejjed biex nieħdu iktar għarfien dwar Alla Jehovah u dwar Ibnu, Ġesù Kristu.—Ġwann 17:3.

[Noti taʼ taħt]

[Stampa f’paġna 5]

Ġob talab għall-​protezzjoni fl-​infern

[Stampa f’paġna 6]

Geħenna bin-​nar—simbolu taʼ qerda eterna

[Stampa f’paġna 7]

‘Dawk kollha li jkunu fl-​oqbra [“tal-​mafkar,” “NW”] joħorġu’