Il-​Ħajja Kontrollata mis-​Superstizzjoni

ĦIEREĠ mill-​bieb tad-​dar u tiġi wiċċ imbwiċċ maʼ xi ħadd. Taħbat sebgħek maʼ xi ġebla. Tismaʼ għajta t’għasfur partikulari bil-​lejl. Toħlom dejjem l-​istess ħolma. Għal ħafna dawn huma ġrajjiet sempliċi li ma jfissru xejn. Imma ċerti nies fil-​Punent taʼ l-​Afrika jistgħu jiħduhom bħala sinjali, teħbir, jew messaġġi mill-​qasam taʼ l-​ispirti. Jekk dawn iġibux riżq jew deni jiddependi minn xi jkun is-​sinjal u l-​interpretazzjoni tiegħu.

M’għandniex xi ngħidu, is-​superstizzjonijiet jemmnu bihom ukoll f’pajjiżi oħra minbarra l-​Afrika. Minkejja li n-​numru kbir taʼ nies li jgħixu fiċ-​Ċina u fir-​repubbliki taʼ dik li kienet l-​Unjoni Sovjetika ilhom iħaddnu l-​ateiżmu għal bosta snin bħala t-​twemmin uffiċjali tagħhom, huma xorta għadhom jemmnu bis-​superstizzjonijiet. Fid-​dinja tal-​Punent, ħafna nies iħobbu jaraw x’jgħid l-​oroskopju, jibżgħu meta t-​13 tax-​xahar jaħbat il-​Ġimgħa, u jevitaw il-​qtates suwed. Xi nies li jgħixu fl-​Emisfera tat-​Tramuntana jqisu l-​aurora borealis (faxex taʼ dwal kuluriti fis-​sema) bħala tbassira taʼ gwerer u pesti. Fl-​Indja, l-​AIDS qed tinxtered mis-​sewwieqa tat-​trakkijiet minħabba li dawn jemmnu li jekk ikollhom relazzjonijiet sesswali jkunu jistgħu jżommu friski fil-​ġranet sħan. Fil-​Ġappun, ħaddiema li jaħdmu fil-​mini jemmnu li jekk mara tidħol fil-​mina qabel ma jlestuha, din iġġibilhom riżq ħażin. Anki fl-​isports professjonali hemm ħafna min jemmen bis-​superstizzjonijiet. Wieħed li jilgħab il-​volleyball saħansitra qal li kien qed jirbaħ daqshekk għax kien qed jilbes il-​kalzetti s-​suwed minflok il-​bojod. Il-​lista ma tispiċċa qatt.

Xi ngħidu dwarek? Għandek int xi biżaʼ moħbi li ma tistax tispjegah? Effettwat int minn xi ‘idea, prattika, eċċetra msejsa fuq it-​twemmin li xi ġrajjiet ma jistgħux jitfissru bir-​raġuni’? It-​tweġiba tiegħek tistaʼ tgħid jekk intix superstizzjuż jew le, għaliex skond dizzjunarju wieħed din hi t-​tifsira tal-​kelma “superstizzjoni.”

Individwu li jħalli s-​superstizzjonijiet jeffettwawlu d-​deċiżjonijiet u r-​rutina tiegħu taʼ kuljum qed iħalli lilu nnifsu jiġi dominat minn xi ħaġa li lanqas biss jifhimha. Huwa dan għaqli? Għandna aħna nissottomettu ruħna lejn din l-​influwenza li hija dubjuża u li x’aktarx hija ħażina? Hija s-​superstizzjoni dgħjufija insinifikanti jew theddida perikoluża?