Għandhom il-Kristjani Jkunu Għajjurin?

L-​GĦIRA—hija din kwalità li l-​Kristjani għandhom jikkultivaw? Bħala Kristjani, aħna niġu inkuraġġiti biex ‘infittxu l-​imħabba,’ u jintqalilna li “l-​imħabba m’hijiex għajjura.” (1 Korintin 13:4; 14:1) Mill-​banda l-​oħra, jintqalilna wkoll li “l-​Mulej . . . Alla għajjur hu” u niġu kmandati biex ‘inkunu nixbhu lil Alla.’ (Eżodu 34:14; Efesin 5:1) Għala hemm din li donnha hi kontradizzjoni?

Għaliex il-​kliem Ebrajk u Grieg tradott “għira” fil-​Bibbja għandu bosta tifsiriet. Jistaʼ jkollu tifsira pożittiva jew negattiva, skond kif jintuża l-​kliem. Per eżempju, il-​kelma Ebrajka tradotta “għira” tistaʼ tfisser “li wieħed jinsisti għal devozzjoni esklużiva; li ma jittollera ebda rivalità; żelu; ħrara; għira [ġusta jew midinba]; invidja.” Il-​kelma Griega li taqbel magħha għandha tifsira simili. Dan il-​kliem jistaʼ jirreferi għal emozzjoni mgħawġa u żbilanċjata lejn xi ħadd meqjus bħala rival jew suspettat bħala li qed igawdi vantaġġ. (Proverbji 14:30) Jistaʼ jirreferi wkoll għal espressjoni pożittiva taʼ kwalità mogħtija minn Alla—xewqa biex wieħed jipproteġi mill-​ħsara lil xi ħadd maħbub.—2 Korintin 11:2.

L-​Aqwa Eżempju

Jehovah jagħti l-​aqwa eżempju fl-​eżerċitar t’għira xierqa. Il-​motivi tiegħu huma safja u nodfa għax huma mqanqlin mix-​xewqa li jħares lill-​poplu tiegħu mill-​korruzzjoni spiritwali u morali. Dwar il-​poplu tiegħu tal-​qedem, li b’mod figurattiv jissejjaħ Sijon, hu qal: “Jien għajjur fuq li għajjur għal Sijon, għajjur għaliha b’korla li ma bħalha.” (Żakkarija 8:2) Sewwa sew bħalma missier li jħobb ikun dejjem attent biex jipproteġi lil uliedu mill-​ħsara, Jehovah hu attent biex jipproteġi lill-​qaddejja tiegħu minn periklu fiżiku u spiritwali.

Biex iħares lin-​nies tiegħu, Jehovah ipprovda l-​Kelma tiegħu, il-​Bibbja. Din fiha ħafna inkuraġġiment għalihom biex jimxu bil-​għaqal, u fiha ħafna u ħafna eżempji taʼ dawk li mxew tajjeb. F’Isaija 48:​17, naqraw: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi.” Kemm hu taʼ faraġ li nkunu nafu li l-​għira tiegħu tqanqlu biex jieħu ħsiebna u jgħasses fuqna! Kieku ma kienx għajjur b’dan il-​mod tajjeb, konna nsofru kull tip taʼ ħsara minħabba n-​nuqqas t’esperjenza tagħna. L-​espressjonijiet t’għira minn Jehovah bl-​ebda mod m’huma egoistiċi.

Mela, allura, x’differenza hemm bejn l-​għira bħal t’Alla u l-​għira mhix xierqa? Biex inkunu nafu, ejja nikkunsidraw l-​eżempju taʼ Mirjam u dak taʼ Fineħas. Innota x’qanqalhom.

Mirjam u Fineħas

Mirjam kienet akbar minn ħutha Mosè u Aron, li kienu l-​mexxejja taʼ l-​Iżraelin matul l-​Eżodu. Waqt li l-​Iżraelin kienu fid-​deżert, Mirjam bdiet tgħir għal ħuha Mosè. Ir-​rakkont Bibliku jgħidilna: “Mirjam u Aron gergru kontra Mosè minħabba l-​mara minn Kus, [li] kien ħa b’martu . . . U huma qalu: ‘Jaqaw il-​Mulej lil Mosè biss kellem? Ma kellimx lilna wkoll?’” Milli jidher, Mirjam kienet minn taʼ quddiem f’din l-​azzjoni kontra Mosè, għax Jehovah iddixxiplina lilha, mhux lil Aron, bil-​ġdiem li dam fuqha ġimgħa minħabba l-​kondotta tagħha li kienet nieqsa mir-​rispett.—Numri 12:​1-15.

X’qanqal lil Mirjam biex taġixxi kontra Mosè? Kien l-​interess li kellha għall-​qima vera u x-​xewqa biex tipproteġi lil sħabha l-​Iżraelin mill-​ħsara? Jidher ċar li dan ma kienx il-​każ. Donnu jidher li Mirjam kienet ħalliet tinbet ġo qalbha xewqa mhix xierqa għal iktar prestiġju u awtorità. Bħala profetessa f’Iżrael, hi gawdiet rispett kbir min-​nies, b’mod partikulari min-​nisa. Hi ggwidathom f’dik li hi mużika u kant wara s-​salvazzjoni mirakoluża taʼ Iżrael ħdejn il-​Baħar l-​Aħmar. Iżda, issa, Mirjam forsi bdiet tinkwieta żżejjed dwar il-​fatt li se tiħdilha mill-​prominenza tagħha waħda li kienet tqisha bħala r-​rival tagħha, il-​mara taʼ Mosè. Imqanqla minn għira egoistika, hi qanqlet l-​inkwiet kontra Mosè, dak li kien maħtur minn Jehovah.—Eżodu 15:​1, 20, 21.

Mill-​banda l-​oħra, l-​aġir taʼ Fineħas kien imqanqal minn motiv differenti. Ftit qabel ma l-​Iżraelin daħlu fl-​Art Imwiegħda, meta kienu kkampjati fil-​wita taʼ Mowab, nisa Mowabin u Midjanin ħajru lil ħafna rġiel Iżraelin għall-​immoralità u l-​idolatrija. Biex inaddfu l-​kamp u jreġġgħu lura l-​qilla taħraq taʼ Jehovah, l-​imħallfin taʼ Iżrael intqalilhom biex joqtlu lill-​irġiel kollha li kienu dinbu b’dan il-​mod. Għal skopijiet immorali, Żimri, il-​prinċep mit-​tribù taʼ Simgħon, bil-​wiċċ tost kollu ġab lill-​mara Midjanija Kożbi ġewwa l-​kamp “quddiem għajnejn il-​ġemgħa kollha taʼ wlied Iżrael.” Fineħas aġixxa b’mod deċiżiv. Imqanqal minn sentimenti taʼ għira, jew ħeġġa, għall-​qima taʼ Jehovah u xewqa li jżomm is-​safa morali tal-​kamp, hu qatel liż-​żinjin fit-​tinda tagħhom. Hu ġie mfaħħar għar-​“rabja għajjura” tiegħu, u għax “ma ttollera assolutament ebda rivalità” lejn Jehovah. L-​azzjoni fil-​pront li ħa Fineħas waqqfet il-​flaġell b’kastig li kien diġà ħa l-​ħajja taʼ 24,000 ruħ, u Jehovah ippremjah b’patt għas-​saċerdozju li kellu jibqaʼ fil-​linja tiegħu għal żmien indefinit.—Numri 25:​4-13; The New English Bible.

X’kienet id-​differenza bejn dawn iż-​żewġ espressjonijiet t’għira? Mirjam aġixxiet kontra ħuha għax kellha għira egoistika, filwaqt li Fineħas esegwixxa l-​ħaqq ibbażat fuq l-​għira bħal t’Alla. Ikun hemm drabi meta aħna, bħal Fineħas, għandna nħossuna mġagħlin niftħu fommna jew nieħdu xi azzjoni biex niddefendu l-​isem taʼ Jehovah, il-​qima tiegħu, u l-​poplu tiegħu.

Għira Żbaljata

Iżda, huwa possibbli li jkollna sentimenti t’għira żbaljata jew mhix f’postha? Iva, dan hu possibbli. Dan kien il-​każ b’mod ġenerali tal-​Lhud fl-​ewwel seklu. Huma kienu jgħassu b’għira kbira l-​Liġi mogħtija minn Alla u t-​tradizzjonijiet tagħhom. Bi sforz biex jipproteġu l-​Liġi, huma ħolqu regolamenti u restrizzjonijiet dettaljati bla għadd li għabbew lin-​nies b’piż tqil. (Mattew 23:4) Peress li ma setgħux jew ma kinux lesti jirrikonoxxu li Alla issa kien neħħa l-​Liġi Mosajka u flokha poġġa r-​realtà li l-​Liġi kienet iffigurat bil-​quddiem, l-​għira tagħhom qanqlithom b’mod żbaljat biex jesprimu rabja kbira bla kontroll kontra s-​segwaċi taʼ Ġesù Kristu. L-​appostlu Pawlu, li hu nnifsu darba kien leali b’għira żbaljata lejn il-​Liġi, kiteb li n-​nies li kienu qed jiddefendu l-​Liġi kellhom “ħeġġa [għira] għal Alla, iżda din m’hijiex ħeġġa skond l-​għerf veru.”—Rumani 10:2; Galatin 1:14.

Anki ħafna mil-​Lhud li saru Kristjani sabuha diffiċli biex jeħilsu minn din il-​ħeġġa żbaljata għal-​Liġi. Wara t-​tielet vjaġġ missjunarju tiegħu, Pawlu ta rapport lill-​ġemgħa li tiggverna taʼ l-​ewwel seklu dwar il-​konverżjoni tal-​ġnus. Dak iż-​żmien, eluf taʼ Lhud Kristjani kienu “għadhom imħeġġa għal-​Liġi.” (Atti 21:20) Dan kien snin sħaħ wara li l-​ġemgħa li tiggverna kienet iddeċidiet li l-​Kristjani Ġentili ma kellhomx għalfejn jiġu ċirkonċiżi. Kwistjonijiet relatati maʼ l-​osservanza tal-​Liġi kienu qed joħolqu tilwim fil-​kongregazzjoni. (Atti 15:​1, 2, 28, 29; Galatin 4:​9, 10; 5:​7-12) Peress li kienu neqsin minn fehma sħiħa dwar kif Jehovah issa kien qed jittratta mal-​poplu tiegħu, xi Kristjani Lhud insistew fuq l-​opinjonijiet tagħhom stess, waqt li kkritikaw lil oħrajn.—Kolossin 2:17; Lhud 10:1.

Aħna, allura, irridu nevitaw in-​nasba taʼ li nipprovaw b’għira nipproteġu l-​ideat jew il-​modi li jkunu għeżież għalina imma li ma jkunux ibbażati fis-​sod fuq il-​Kelma t’Alla. Nagħmlu tajjeb li naċċettaw id-​dawl li issa qed jiddi fuq il-​Kelma t’Alla permezz taʼ dak il-​mezz li Jehovah qed juża llum.

Kun Għajjur għal Jehovah

Madankollu, l-​għira bħal t’Alla għandha postha fil-​qima vera. Meta tiġina t-​tentazzjoni li nkunu mħassbin bla bżonn dwar ir-​reputazzjoni jew id-​drittijiet tagħna stess, l-​għira bħal t’Alla tiġbdilna l-​attenzjoni lejn Jehovah. Tqanqalna biex infittxu modi kif niddikjaraw il-​verità dwaru, waqt li niddefendu l-​mogħdijiet u n-​nies tiegħu.

Akiko, ministru full-time tax-​Xhieda taʼ Jehovah, ġiet imċanfra bl-​aħrax minn inkwilina li kellha ideat żbaljati dwar il-​liġi t’Alla fuq id-​demm. Akiko ddefendiet il-​Kelma t’Alla bit-​tattika, u saħansitra semmiet il-​komplikazzjonijiet u l-​problemi mediċi assoċjati mat-​trasfużjonijiet tad-​demm. Imqanqla minn xewqa ħerqana biex titkellem dwar Jehovah, hi dawret il-​konversazzjoni lejn dak li fiehmet li kien il-​bażi vera għall-​oġġezzjonijiet li ġabet il-​mara—in-​nuqqas tat-​twemmin tagħha fl-​eżistenza taʼ Ħallieq. Akiko rraġunat maʼ l-​inkwilina dwar kif il-​ħolqien kien jappoġġa t-​twemmin f’Ħallieq. Id-​difiża qalbiena tagħha ma wasslitx biss biex jitneħħew il-​preġudizzji bla bażi imma wkoll biex jinbeda studju tal-​Bibbja fid-​dar maʼ dik il-​mara. Dik li qabel kienet inkwilina mgħaddba llum qed tfaħħar lil Jehovah.

Il-ħeġġa, jew l-​għira xierqa, għall-​qima vera ġġagħalna noqogħdu attenti u naħtfu kull opportunità li jkollna biex nitkellmu dwar il-​fidi tagħna u niddefenduha fuq ix-​xogħol, fl-​iskola, fejn imorru nixtru, u waqt li nivvjaġġaw. Per eżempju, Midori hi determinata li titkellem dwar il-​fidi tagħha maʼ sħabha tax-​xogħol. Waħda minnhom, li kellha fuq l-​40 sena, qalet li ma riedet li jkollha x’taqsam xejn max-​Xhieda taʼ Jehovah. Iktar tard, waqt konversazzjoni oħra, il-​mara lmentat li bintha kienet qed tiżviluppa xejriet koroh fil-​karattru tagħha. Midori wrietha l-​ktieb Iż-​Żgħażagħ Jistaqsu . . . Tweġibiet Prattiċi għall-​Mistoqsijiet Tagħhom,a u offriet li tistudja l-​ktieb mal-​bint. L-​istudju nbeda, imma l-​omm ma qagħditx magħhom għad-​diskussjoni. Midori ddeċidiet li lill-​mara turiha l-​vidjo Jehovah’s Witnesses—The Organization Behind the Name (Ix-Xhieda taʼ Jehovah—L-​Organizzazzjoni wara l-​Isem).* Dan iċċaralha ħafna mill-​impressjonijiet ħżiena li kellha. Imqanqla minn dak li rat, hi qalet: “Irrid inkun bħax-​Xhieda taʼ Jehovah.” Hi ssieħbet maʼ bintha fl-​istudju tal-​Bibbja.

L-​għira xierqa għandha postha wkoll fil-​kongregazzjoni Kristjana. Din l-​għira tippromwovi spirtu kordjali taʼ mħabba u interess u tqanqalna biex nirreżistu influwenzi li jifirdu u li jagħmlu ħsara lil ħutna spiritwali, bħalma huma t-​tqassis li jagħmel ħsara u l-​ħsieb apostata. L-​għira bħal t’Alla tqanqalna biex nappoġġaw id-​deċiżjonijiet taʼ l-​anzjani, li minn żmien għal żmien isibu li għandhom bżonn iwiddbu lil min jiżbalja. (1 Korintin 5:​11-13; 1 Timotju 5:20) Meta kiteb dwar is-​sentimenti t’għira li kellu għal sħabu fit-​twemmin fil-​kongregazzjoni taʼ Korintu, Pawlu qal: “Jiena għajjur għalikom bl-​istess għira taʼ Alla: għax jiena għarrastkom lil għarus wieħed, bħallikieku kontu xebba safja biex inressaqkom quddiem Kristu.” (2 Korintin 11:2) Hekk, ukoll, l-​għira tagħna tqanqalna biex nagħmlu l-​almu tagħna kollu ħalli nipproteġu s-​safa duttrinali, spiritwali, u morali taʼ kull wieħed u waħda fil-​kongregazzjoni.

Iva, l-​għira b’motiv xieraq—l-​għira bħal t’Alla—għandha influwenza bnina fuq ħaddieħor. Iġġib l-​approvazzjoni taʼ Jehovah u għandha tkun waħda mill-​kwalitajiet osservati fil-​Kristjani llum.—Ġwann 2:17.

[Nota taʼ taħt]

[Stampi f’paġna 29]

L-​aġir taʼ Fineħas kien ibbażat fuq l-​għira bħal t’Alla

[Stampi f’paġna 30]

Evita n-​nasba t’għira żbaljata

[Stampi f’paġna 31]

L-​għira bħal t’Alla tqanqalna biex nitkellmu dwar il-​fidi tagħna m’oħrajn u ngħożżu lil ħutna spiritwali