“Ersqu Lejn Alla, U Hu Jersaq Lejkom”

Qabel u Wara​—Minn Fama Ħażina għal Reputazzjoni Tajba

“IL-​KELMA taʼ Alla hi ħajja u qawwija, taqtaʼ aktar minn xabla b’żewġt ixfar; hija tinfed sa tifred minn xulxin ir-​ruħ u l-​ispirtu u l-​ġogi u l-​mudullun; u tgħarbel il-​ħsibijiet u l-​fehmiet tal-​qalb.” (Lhud 4:12) L-​appostlu Pawlu hekk qal dwar il-​qawwa li tinfed tal-​messaġġ t’Alla. L-​abbiltà li għandha biex tilħaq il-​qalb spikkat speċjalment fl-​ewwel seklu E.K. Minkejja l-​influwenza ħażina li kien hemm f’dawk iż-​żminijiet, dawk li saru Kristjani libsu l-​personalità ġdida.—Rumani 1:​28, 29; Kolossin 3:​8-10.

Bħalma hu mniżżel fil-​Bibbja, il-​qawwa li tbiddel il-​ħajjiet li għandha l-​kelma t’Alla hija evidenti llum ukoll. Per eżempju, ikkunsidra lil Richard, raġel twil u b’saħħtu. Richard kien jiġġieled għal kull ħaġa taʼ xejn għax kien jitlagħlu malajr. Ħajtu kienet irvinata bil-​vjolenza. Richard saħansitra sar membru taʼ klabb tal-​boxing. Hu ħadem iebes biex jitgħallem u sar champion tal-​boxing fil-​Westphalia, il-​Ġermanja. Richard kien ukoll jixrob ħafna u spiss kien jiġi involut f’xi frattarija. F’okkażjoni minnhom, xi ħadd ġie maqtul u Richard għal naqra ma spiċċax il-​ħabs.

Xi ngħidu għaż-​żwieġ taʼ Richard? Richard jirrakkonta: “Qabel ma bdejna nistudjaw il-​Bibbja, jiena u Heike kellna ħajjiet indipendenti minn xulxin. Heike kienet tqattaʼ ħafna ħin maʼ sħabha, waqt li jiena gawdejt il-​passatempi tiegħi—l-​iktar il-​boxing, surfing, u kont immur nogħdos.”

Meta Richard u Heike bdew jistudjaw il-​Bibbja max-​Xhieda taʼ Jehovah, Richard kien għoddu qataʼ qalbu mill-​ħsieb li jinbidel. Dan għaliex kien jidher impossibbli għalih li jġib ħajtu fi qbil mal-​livelli għoljin li hemm fil-​Kelma t’Alla. Madankollu, meta sar jaf aħjar lil Alla Jehovah, Richard żviluppa xewqa kbira biex jogħġbu. Induna li Alla ma japprovax lil dawk li jħobbu l-​vjolenza jew lil dawk li jużawha biex jiddevertu. Hu tgħallem li, “[Jehovah] jobgħod ’il min iħobb id-​dnewwa.”—Salm 11:5.

Iktar minn hekk, it-​tama taʼ li jgħixu għal dejjem f’ġenna fuq l-​art affaxxinat kemm lil Richard kif ukoll lil Heike. Riedu jkunu fiha flimkien! (Isaija 65:​21-23) L-​istedina “ersqu lejn Alla, u hu jersaq lejkom” messitlu qalbu profondament. (Ġakbu 4:8) Hu ra kemm hu taʼ valur li jagħti kas il-​parir ispirat: “Tgħirx għall-​bniedem vjolenti, u titħajjarx timxi fuq xi mġiba tiegħu; għax min jimxi bl-​imgħawweġ jistkerrhu l-​Mulej, imma f’idejh huma dawk li jimxu bis-​sewwa.”—Proverbji 3:​31, 32.

Minkejja x-​xewqa kbira li kellu biex ibiddel il-​mod taʼ ħajja tiegħu, Richard irrealizza li hu ma setax jagħmel dan bis-​saħħa tiegħu stess. Hu ra l-​bżonn li jistaqsi lil Alla għall-​għajnuna permezz tat-​talb. Hu b’hekk mexa fi qbil mal-​kliem li Ġesù qal lill-​appostli Tiegħu: “Ishru u itolbu biex ma tidħlux fit-​tiġrib. L-​ispirtu, iva, irid; imma l-​ġisem dgħajjef.”—Mattew 26:41.

Wara li tgħallem kif Jehovah iħares lejn il-​vjolenza u l-​korla, Richard ma kien għad baqagħlu l-​ebda dubju li l-​boxing m’huwiex sport aċċettabbli. Bl-​għajnuna taʼ Jehovah u l-​inkuraġġiment taʼ dawk li studjaw il-​Bibbja miegħu, Richard ma baqax jieħu sehem f’attivitajiet vjolenti. Ma kompliex fil-​boxing u l-​ġlied u ddeċieda li jtejjeb il-​ħajja tal-​familja tiegħu. “Il-​fatt li tgħallimt il-​verità mill-​Bibbja għenni nieqaf naħseb qabel ma naġixxi,” jgħid Richard, li issa hu indokratur ġwejjed f’waħda mill-​kongregazzjonijiet tax-​Xhieda taʼ Jehovah. Hu jżid: “Il-​prinċipji taʼ l-​imħabba u r-​rispett issa qed jiggwidawni fir-​relazzjoni tiegħi maʼ marti u wliedi. Bħala riżultat, il-​familja tagħna saret iktar magħquda.”

In-nies li m’għandhomx informazzjoni korretta kultant akkużaw lix-​Xhieda taʼ Jehovah li jkissru l-​familji. Madankollu, l-​eżempji taʼ individwi bħal Richard juru li l-​akkuża tagħhom hi falza. Fir-​realtà, il-​veritajiet tal-​Bibbja jistgħu jagħtu stabbiltà domestika u reputazzjoni tajba lil dawk li qabel kellhom fama ħażina.—Ġeremija 29:11.

[Kumment f’paġna 9]

“It-​tama t’art magħmula ġenna qanqlitni biex ninbidel”

[Kaxxa fuq paġna 9]

Il-​Prinċipji tal-​Bibbja Jagħmlu Xogħolhom ▸

Il-​Bibbja tistaʼ ħalli effett qawwi fil-​ħajjiet tan-​nies. Dawn huma xi prinċipji Skritturali li għenu lil xi individwi vjolenti biex jinbidlu:

“Min għandu s-​sabar aħjar mill-​qalbieni, min jitrażżan aħjar mir-​rebbieħ taʼ belt.” (Proverbji 16:32) Ir-​rabja bla kontroll hija sinjal taʼ dgħjufija, mhux taʼ ħila.

“Bniedem bil-​għaqal idum ma jagħdab.” (Proverbji 19:11) Id-​dehen u l-​fehma dwar xi sitwazzjoni jgħinu lil dak li jkun biex jara x’inhi eżattament ir-​raġuni taʼ l-​argument u dan ma jħallix li jitlagħlu malajr.

‘Tkunx ħabib taʼ min jinkorla biex ma tidrax tagħmel bħalu.’ (Proverbji 22:​24, 25) Il-​Kristjani, bl-​għaqal kollu jevitaw sħubija maʼ dawk li huma magħrufin għar-​rabja tagħhom.