Mistoqsijiet mill-​Qarrejja

It-​Torri taʼ l-​Għassa taʼ l-​1 t’April, 2002, f’paġna 11, paragrafu 7, għala stqarr li l-​magħmudija fl-​ilma tal-​Lhud li ħaddnu t-​twemmin f’Pentekoste tas-​sena 33 E.K. kienet b’simbolu tad-​“dedikazzjoni persunali tagħhom lil Alla permezz taʼ Kristu,” meta l-​ħarsa taʼ qabel kienet li l-​magħmudija tal-​Lhud mis-​sena 33 E.K. sas-​36 E.K. ma kinitx tirrikjedi dedikazzjoni persunali bħal din?

Fis-​sena 1513 Q.E.K., Alla Jehovah ta opportunità lill-​Iżraelin biex isiru għalih ġens qaddis bil-​kundizzjoni li huma ‘jisimgħu leħnu u jżommu l-​patt tiegħu.’ Huma wieġbu: “Kull ma qalilna l-​Mulej nagħmluh.”—Eżodu 19:​3-8; 24:​1-8.

Meta l-​Iżraelin qablu li jżommu l-​patt tal-​Liġi Mosajka, huma kienu qed jiddedikaw lilhom infushom lil Alla. Il-​ġenerazzjonijiet taʼ Lhud li ġew warajhom twieldu f’dan il-​ġens dedikat. Madankollu, il-​magħmudija tal-​Lhud li saru segwaċi taʼ Ġesù Kristu minn Pentekoste tas-​sena 33 E.K. ’l quddiem kienet tinvolvi iktar milli sempliċement jippreżentaw lilhom infushom lil Alla bħala membri taʼ ġens dedikat. Din kienet tissimbolizza d-​dedikazzjoni tagħhom lil Alla Jehovah f’relazzjoni ġdida miegħu permezz taʼ Ġesù Kristu. Dan kif?

Wara li l-​ispirtu qaddis niżel fuq madwar 120 dixxiplu li kienu miġburin f’kamra taʼ fuq f’Ġerusalemm nhar Pentekoste tas-​sena 33 E.K., l-​appostlu Pietru qam bil-​wieqfa u beda jippriedka lil għadd kbir taʼ Lhud u proseliti li kienu nġemgħu biex jaraw x’kien ġara. Wara li tahom xiehda kif imiss, hu qal lil-​Lhud li messithom il-​kuxjenza: “Indmu, u jitgħammed kull wieħed minnkom fl-​isem taʼ Ġesù Kristu għall-​maħfra taʼ dnubietkom.” Bi tweġiba għal dak li kompla jgħidilhom Pietru, “dawk li laqgħu kliemu tgħammdu u dak in-​nhar ingħaqdu mad-​dixxipli madwar tlitt elef ruħ.”—Atti 2:​1-​41.

Dawk il-​Lhud li tgħammdu wara li semgħu t-​twissija taʼ Pietru, mhux diġà kienu membri taʼ ġens dedikat? Mhux diġà kienu jgawdu relazzjoni dedikata m’Alla? Le. L-​appostlu Pawlu kiteb li ‘Alla neħħa l-​Liġi min-​nofs u sammarha [“maz-​zokk tat-​tortura,” NW].’ (Kolossin 2:​14) Permezz tal-​mewt taʼ Kristu fis-​sena 33 E.K., Alla Jehovah neħħa l-​patt tal-​Liġi​—dik l-​istess bażi li ġabet lill-​Iżraelin f’relazzjoni dedikata Miegħu. Il-​ġens li ċaħad lill-​Iben t’Alla kien issa qed jiġi miċħud minn Alla nnifsu. “Iżrael skond il-​ġisem” ma setaʼ qatt jgħid li hu ġens dedikat lil Alla.​—1 Korintin 10:18; Mattew 21:43.

Il-​patt tal-​Liġi tneħħa fis-​sena 33 E.K., imma l-​perijodu li fih Alla wera favur u attenzjoni speċjali lil-​Lhud ma spiċċax dakinhar.a Dak il-​perijodu kellu jibqaʼ sejjer sas-​sena 36 E.K., meta Pietru ppriedka lil Kornelju, li kien Taljan devot, u lin-​nies taʼ daru kif ukoll lil xi Ġentili oħrajn. (Atti 10:​1-​48) Fuq liema bażi ġie estiż dan il-​favur?

“[Il-Messija] jidħol f’patt sħiħ maʼ ħafna għal tul taʼ ġimgħa waħda,” jistqarr Danjel 9:27. Il-​patt li baqaʼ jgħodd għal sebaʼ snin, jew “ġimgħa waħda,” mill-​magħmudija taʼ Ġesù u l-​bidu tal-​ministeru pubbliku tal-​Messija fis-​sena 29 E.K. kien il-​patt Abrahamiku. Biex wieħed ikun parti minn dan il-​patt, ried sempliċement ikun dixxendent t’Abraham. Dan il-​patt min-​naħa taʼ parti waħda ma setax jipprovdi bażi biex individwu jkollu relazzjoni dedikata maʼ Jehovah. Għaldaqstant, dawk il-​Lhud li emmnu u tgħammdu wara d-​diskors li għamel Pietru f’Pentekoste tas-​sena 33 E.K., għalkemm irċivew attenzjoni speċjali bħala Lhud naturali, ma kellhomx jedd għal relazzjoni dedikata m’Alla ladarba l-​patt tal-​Liġi kien tneħħa. Huma kellhom bżonn personalment jiddedikaw lilhom infushom lil Alla.

Dedikazzjoni persunali min-​naħa tal-​Lhud u l-​proseliti li ppreżentaw lilhom infushom biex jitgħammdu fil-​jum taʼ Pentekoste tas-​sena 33 E.K. kienet essenzjali minħabba raġuni oħra. Lappostlu Pietru wissa lis-​semmiegħa tiegħu biex jindmu u jitgħammdu f’isem Ġesù. Biex jagħmlu dan kien jeħtiġilhom jabbandunaw il-​modi tad-​dinja u jirrikonoxxu lil Ġesù bħala l-​Mulej u l-​Messija, bħala l-​Qassis il-​Kbir, u bħala l-​wieħed li qiegħed bil-​qiegħda fil-​leminija t’Alla fis-​sema. Kien jeħtiġilhom isejħu isem Alla Jehovah biex isalvaw permezz taʼ Ġesù Kristu, u dan kien jinvolvi li jeżerċitaw fidi fi Kristu u jirrikonoxxuh bħala l-​Mexxej tagħhom. Il-​bażi kollha sabiex wieħed ikollu relazzjoni m’Alla u jikseb il-​maħfra tad-​dnubiet issa kienet inbidlet għalkollox. Bħala individwi, il-​Lhud li emmnu kien jeħtiġilhom jaċċettaw dan l-​arranġament ġdid. Kif? Billi jagħmlu dedikazzjoni lil Alla u jipproklamaw din id-​dedikazzjoni quddiem kulħadd billi jiġu mgħaddsin kompletament fl-​ilma f’isem Ġesù Kristu. Il-​magħmudija taʼ l-​ilma kienet simbolu tad-​dedikazzjoni tagħhom lil Alla, u din wasslithom għal relazzjoni ġdida miegħu permezz taʼ Ġesù Kristu.​—Atti 2:​21, 33-36; 3:​19-23.

[Nota taʼ taħt]