“Tibżgħux, Titwerwrux”

“Tibżgħux, titwerwrux . . . il-​Mulej ikun magħkom.”​—2 KRONAKI 20:17.

1. It-​terroriżmu x’effett għandu fuq in-​nies, u għala għandhom għalxiex jibżgħu?

IT-​TERRORIŻMU! Il-​kelma biss tqanqal biżaʼ kbir, u ġġiegħel lil dak li jkun iħossu bla sigurtà u bla ħila. Tqanqal taħlita t’emozzjonijiet bħal twerwir, niket, u rabja. U din il-​kelma tiddeskrivi dak li ħafna nies qed jibżgħu li se jifni lill-​umanità fil-​futur. Il-​fatt li xi pajjiżi ilhom għaxriet taʼ snin jiġġieldu kontra t-​terroriżmu fil-​ħafna forom tiegħu u għadhom ma rnexxilhomx jeqirduh għalkollox huwa biżżejjed biex jikkonvinċihom li għandhom għalxiex jibżgħu.

2. Ix-​Xhieda taʼ Jehovah kif jirreaġixxu għall-​problema tat-​terroriżmu, u dan x’mistoqsijiet iqajjem?

² Madankollu, hemm raġuni soda għal tama. Ix-​Xhieda taʼ Jehovah, li qed iħabirku fl-​ippridkar f’234 pajjiż u territorju madwar id-​dinja, huma verament ottimisti. Huma ma jibżgħux li t-​terroriżmu qatt ma se jispiċċa, anzi huma fiduċjużi li dalwaqt se jiġi eliminat. Huwa realistiku li nkunu ottimisti bħalhom? Min jistaʼ jirnexxilu jeħles lid-​dinja minn din il-​pjaga, u dan kif se jiġri? Ladarba lkoll xi darba jew oħra ġarrabna xi tip jew ieħor taʼ vjolenza, nagħmlu tajjeb li neżaminaw x’bażi hemm għal dan l-​ottimiżmu.

3. Liema raġunijiet hemm li jistgħu jġagħluna nibżgħu, u x’inhu mbassar dwar żmienna?

³ Illum, in-​nies jibżgħu u jitwerwru minħabba diversi raġunijiet. Aħseb ftit dwar dawk in-​nies kollha li m’għadhomx kapaċi jieħdu ħsieb tagħhom infushom minħabba x-​xjuħija, dawk li dejjem sejrin lura minħabba xi marda li m’hemmx fejqan għaliha, jew dwar familji li dejjem jissieltu biex jaraw kif jagħmlu biex ilaħħqu mal-​ħajja. Infatti, aħseb ftit dwar kemm hi inċerta l-​ħajja nfisha! Minn mument għall-​ieħor tistenna li tiġri xi diżgrazzja jew diżastru li jġib il-​mewt fuqek ħabta u sabta u titlef dak kollu li jkun għażiż għalik. Dan il-​biżaʼ u l-​ansjetà, flimkien maʼ diversi konflitti u diżappunti persunali, urew kemm żmienna hu preċiż bħalma ddeskrivieh l-​appostlu Pawlu: “Dan għandek tkun taf: li l-​aħħar tad-​dinja jkun żmien iebes. Il-​bnedmin jingħataw għall-​imħabba tagħhom infushom . . . bla qalb, bla ħniena, lablaba, bla rażan; kiefra, bla mħabba għat-​tajjeb.”—2 Timotju 3:​1-3.

4. Liema aspett pożittiv hemm fl-​istampa xejn sabiħa li tingħata fit-​2 Timotju 3:​1-3?

⁴ Għalkemm din l-​iskrittura ma tantx tagħti stampa sabiħa, xorta waħda turina li hemm tama. Innota li dawn iż-​żminijiet kritiċi kellhom jeżistu fl-​“aħħar tad-​dinja” preżenti u mill-​agħar taʼ Satana. Dan ifisser li s-​serħan jinsab fil-​qrib u li minflok din id-​dinja mill-​agħar dalwaqt se jkun hawn il-​ħakma perfetta tas-​Saltna t’Alla, li Ġesù għallem lis-​segwaċi tiegħu biex jitolbu għaliha. (Mattew 6:​9, 10) Din is-​Saltna hija l-​gvern tas-​sema t’Alla, li “ma tinqered qatt,” jgħid il-​profeta Danjel, imma din se “ttemm is-​saltniet [umani] l-​oħra kollha, waqt li hi tibqaʼ wieqfa għal dejjem.”​—Danjel 2:44.

In-​Newtralità Kristjana b’Kuntrast mat-​Terroriżmu

5. Dan l-​aħħar, il-​ġnus kif wieġbu għat-​theddida tat-​terroriżmu?

⁵ It-​terroriżmu ilu għaxriet taʼ snin jieħu l-​ħajjiet t’eluf taʼ nies. Wara l-​attakki tal-​11 taʼ Settembru, 2001, fuq il-​Belt taʼ New York u Washington, D.C., id-​dinja kollha saret ferm iktar konxja taʼ dan il-​periklu minħabba t-​terroriżmu. Il-​ġnus madwar id-​dinja ma damux ma ngħaqdu flimkien biex jikkumbattu t-​terroriżmu meta rawh qed jiżdied u jinfirex daqshekk mal-​globu kollu. Per eżempju, fl-​4 taʼ Diċembru, 2001, skond rapporti taʼ l-​aħbarijiet, xi “ministri barranin minn 55 pajjiż Ewropew, mill-​Amerika taʼ Fuq u mill-​Asja Ċentrali adottaw unanimament pjan” bl-​għan li jingħaqdu flimkien fl-​isforzi tagħhom. Uffiċjal għoli taʼ l-​Istati Uniti faħħar din l-​azzjoni u qal li din qed tagħti “livell ġdid t’enerġija” lill-​isforzi biex jikkumbattu t-​terroriżmu. F’daqqa waħda, mijiet taʼ miljuni taʼ nies ġew involuti f’dak li skond The New York Times Magazine hu “l-​bidu taʼ battalja kbira li se tibqaʼ tissemma.” Kemm se jkollhom suċċess dawn l-​isforzi għad irridu naraw. Madankollu, l-​effetti li ħalliet warajha din il-​gwerra kontra t-​terrur qanqlu biżaʼ u ansjetà f’ħafna nies, imma mhux f’dawk li jafdaw f’Jehovah.

6. (a) Xi wħud għala jistgħu xi drabi jsibuha diffiċli li jaċċettaw il-​waqfa tan-​newtralità Kristjana li jieħdu x-​Xhieda taʼ Jehovah? (b) Ġesù liema eżempju ħalla għas-​segwaċi tiegħu fejn jidħlu l-​attivitajiet politiċi?

⁶ Ix-​Xhieda taʼ Jehovah huma magħrufin sew għan-​newtralità tagħhom fil-​politika. Filwaqt li ħafna nies huma lesti li jaċċettaw il-​waqfa tagħhom fi żmien taʼ paċi, f’ċirkustanzi straordinarji dawn l-​istess nies isiru inqas tolleranti. Taʼ spiss, il-​biżaʼ u l-​inċertezza kaġunati mill-​gwerra jqanqlu sentimenti profondi taʼ nazzjonaliżmu. Dan għandu mnejn jagħmilha diffiċli biex xi wħud jifhmu għala jistaʼ jkun hemm xi ħadd li joqgħod lura milli jappoġġa l-​kampanji popolari nazzjonalistiċi. Minkejja dan, il-​Kristjani veri jafu li huma jridu jobdu l-​kmand taʼ Ġesù biex ma ‘jkunux tad-​dinja.’ (Ġwann 15:19; 17:14-​16; 18:36; Ġakbu 4:4) Dan jirrikjedi li jżommu n-​newtralità fi kwistjonijiet soċjali u politiċi. Ġesù nnifsu ħallielna l-​eżempju xieraq. Peress li kellu għerf perfett u abbiltajiet straordinarji hu setaʼ, kieku ried, solva ħafna mill-​kwistjonijiet li kienu jeżistu fi żmienu. Iżda hu żamm lura milli jinvolvi ruħu fil-​politika. Fil-​bidu tal-​ministeru tiegħu, hu rrifjuta b’mod sod meta Satana offrielu l-​ħakma fuq is-​saltniet kollha tad-​dinja. Iktar tard, meta riedu jġagħluh jaċċetta ħatra politika hu rrifjuta b’mod deċiż.​—Mattew 4:​8-10; Ġwann 6:​14, 15.

7, 8. (a) Il-​fatt li x-​Xhieda taʼ Jehovah jibqgħu newtrali fil-politika x’ma jfissirx, u għala? (b) L-​iskrittura f’Rumani 13:​1, 2 kif ma tħalli ebda dubju dwar li huma ma jieħdu sehem f’ebda attività vjolenti li ssir kontra l-​gvernijiet?

⁷ Il-​waqfa newtrali li jieħdu x-​Xhieda taʼ Jehovah m’għandhiex tiġi interpretata ħażin bħala li huma jappoġġaw jew jagħlqu għajnejhom għall-​vjolenza. Kieku jagħmlu dan ikunu qed jikkontradixxu dak li huma stess isostnu, jiġifieri, li Alla tagħhom hu “Alla taʼ l-​imħabba u s-​sliem.” (2 Korintin 13:11) Huma saru jafu kif iħossu Jehovah dwar il-​vjolenza. Is-​salmista kiteb: “Jgħarbel il-​Mulej il-​ġust u l-​ħażin; hu jobgħod ’il min iħobb id-​dnewwa.” (Salm 11:5) Huma konxji wkoll taʼ dak li Ġesù qal lill-​appostlu Pietru: “Erġaʼ daħħal sejfek f’postu għax kull min jaqbad is-​sejf, bis-​sejf jinqered.”—Mattew 26:52.

⁸ Għalkemm l-​istorja turi ċar li l-​Kristjani taʼ l-​isem spiss użaw “is-​sejf,” dan m’huwiex minnu dwar ix-​Xhieda taʼ Jehovah. Huma ma jieħdu sehem f’ebda attività bħal din. Ix-​Xhieda jobdu fedelment il-​kmand li nsibu f’Rumani 13:​1, 2: “Kull bniedem għandu jobdi lill-​awtorità taʼ fuqu [il-ħakkiema governattivi]. Ma hemmx awtorità jekk m’hix ġejja minn Alla; u l-​awtoritajiet li hemm, qegħdin hemm bl-​ordni taʼ Alla. Għalhekk, dawk li jeħduha kontra l-​awtorità jkunu qegħdin jeħduha kontra l-​ordni mwaqqaf minn Alla; u dawk li jeħduha kontra Alla, ikunu qegħdin jiġbdu l-​kundanna fuqhom infushom.”

9. Ix-​Xhieda taʼ Jehovah b’liema żewġ modi qed jikkumbattu t-​terroriżmu?

⁹ Madankollu, ladarba t-​terroriżmu hu daqshekk ħażin, m’għandhomx ix-​Xhieda taʼ Jehovah jagħmlu xi ħaġa biex jikkumbattuh? Iva, hekk suppost jagħmlu, u hekk qed jagħmlu. L-​ewwelnett, huma nfushom ma jiħdux sehem f’attivitajiet bħal dawn. It-​tieni, huma jgħallmu lin-​nies il-​prinċipji Kristjani, li meta japplikawhom f’ħajjithom iġagħluhom jeliminaw kull xorta taʼ vjolenza.a Is-​sena l-​oħra, ix-​Xhieda qattgħu 1,202,381,302 sigħat jgħinu lin-​nies jitgħallmu kif jgħixu ħajja Kristjana. Dan ma kienx ħin mitluf, għaliex ir-​riżultat taʼ din l-​attività wassal biex 265,469 persuna tgħammdu bħala Xhieda taʼ Jehovah, u b’hekk urew pubblikament li huma kienu qed jiċħdu l-​vjolenza kompletament.

10. Liema prospetti hemm sabiex il-​vjolenza titneħħa darba għal dejjem mid-​dinja taʼ llum?

¹⁰ Barra minn hekk, ix-​Xhieda taʼ Jehovah jagħrfu li huma nfushom qatt ma jistgħu jeħilsu lid-​dinja mill-​ħażen. Huwa għalhekk li jpoġġu l-​fiduċja sħiħa tagħhom f’dak li jistaʼ jagħmel dan—Alla Jehovah. (Salm 83:19 [83:18, NW]) Minkejja l-​isforzi sinċieri kollha li jsiru, il-​bnedmin qatt ma jistgħu jtemmu l-​vjolenza. Il-​kittieb imnebbaħ tal-​Bibbja jwissina bil-​quddiem dwar żmienna, “l-​aħħar tad-​dinja,” u jgħid: “In-​nies il-​ħżiena u l-​uċuħ b’oħra jmorru mill-​ħażin għall-​agħar, iqarrqu u jitqarrqu.” (2 Timotju 3:​1, 13) Meta wieħed iqis dan jinduna li l-​prospetti li l-​bniedem jirbaħ il-​battalja kontra l-​ħażen ma tantx huma favorevoli. Mill-​banda l-​oħra, aħna nistgħu nistrieħu fuq Jehovah sabiex ineħħi l-​vjolenza għalkollox u għal dejjem.—Salm 37:​1, 2, 9-​11; Proverbji 24:​19, 20; Isaija 60:18.

Bla Biżaʼ Minkejja li Dalwaqt Se Jiġu Attakkati

11. Jehovah liema passi diġà ħa biex ineħħi l-vjolenza darba għal dejjem?

¹¹ Ladarba Alla tas-​sliem jobgħod il-​vjolenza, aħna nistgħu nifhmu għala hu beda jieħu passi biex jeqred lil dak li kkaġunaha, Satana x-​Xitan. Fil-​fatt, Hu diġà ġagħal lil Satana jsofri telfa umiljanti permezz taʼ l-​arkanġlu Mikiel—is-​Sultan maħtur ġdid, Ġesù Kristu. Il-​Bibbja tiddeskriviha b’dan il-​mod: “Qamet gwerra fis-​sema: Mikiel u l-​anġli tiegħu jitqabdu mad-​Dragun. U d-​Dragun u l-​anġli tiegħu tqabdu, iżda ma kellhomx ħila jegħlbu, u ma kienx hemm iżjed post għalihom fis-​sema. U kien imwaddab id-​Dragun il-​kbir, is-​Serp tal-​qedem, li hu msejjaħ id-​Demonju u x-​Xitan, il-​qarrieq tad-​dinja kollha, kien imwaddab għal fuq l-​art, u miegħu kienu mwaddba l-​anġli tiegħu.”​—Apokalissi 12​:7-9.

12, 13. (a) X’inhu sinifikanti dwar is-​sena 1914? (b) Il-​profezija t’Eżekjel xi tbassar dwar dawk li joħorġu bi ħġarhom biex jappoġġaw is-​Saltna t’Alla?

¹² Kemm il-​kronoloġija tal-​Bibbja kif ukoll il-​ġrajjiet dinjin jippontaw lejn is-​sena 1914 bħala ż-​żmien li fih seħħet din il-​gwerra fis-​sema. Minn dakinhar ’l hawn, il-​kundizzjonijiet tad-​dinja baqgħu sejrin dejjem għall-​agħar. Apokalissi 12:12 jispjega għala, meta jgħid: “Għalhekk ifirħu, smewwiet, u intom li tgħammru fihom. Ħażin għalikom, art u baħar, għax fikom niżel id-​Demonju, b’korla kbira fuqu, għax jaf li żmien ftit baqagħlu.”

¹³ Wieħed jistaʼ jifhem għala x-​Xitan hu rrabjat primarjament għall-​aduraturi midlukin t’Alla u għal sħabhom in-​“nagħaġ oħra.” (Ġwann 10:16; Apokalissi 12:17) Din l-​oppożizzjoni dalwaqt se tilħaq il-​quċċata tagħha meta x-​Xitan jibda l-​attakk aħrax tiegħu kontra dawk kollha li jappoġġaw is-​Saltna stabbilita t’Alla u dawk li jafdaw fiha. Dan l-​attakk sfrenat hu msemmi f’Eżekjel kapitlu 38 bħala l-​attakk minn ‘Gog taʼ l-​art taʼ Magog.’

14. Liema sforzi protettivi gawdew ix-​Xhieda taʼ Jehovah fil-​passat, u dejjem hekk se jkun?

¹⁴ Mindu Satana tkeċċa mis-​sema, in-​nies t’Alla xi drabi ġew protetti mill-​attakki taʼ Satana permezz taʼ l-​isforzi li saru minn ċerti elementi politiċi, deskritti b’lingwa simbolika f’Apokalissi 12:15, 16. B’kuntrast, il-​Bibbja tindika li matul l-​attakk finali taʼ Satana, l-​ebda element uman m’hu se jaqbeż għal dawk li jpoġġu l-​fiduċja tagħhom f’Jehovah. Għandu dan iġiegħel lill-​Kristjani jibżgħu jew jitwerwru? Lanqas xejn!

15, 16. (a) Il-​kliem rassiguranti li Jehovah qal lin-​nies tiegħu fi żmien Ġosafat kif jistaʼ jgħin lill-​Kristjani llum ikunu ottimisti? (b) Ġosafat u n-​nies tiegħu liema mudell stabbilew għall-​qaddejja t’Alla taʼ llum?

¹⁵ Alla se jappoġġa lin-​nies tiegħu sewwasew bħalma appoġġa lill-​ġens tipiku tiegħu fi żmien is-​Sultan Ġosafat. Naqraw: “Isimgħuni, intom nies kollha taʼ Ġuda, intom li tgħammru f’Ġerusalemm, u int, o sultan Ġosafat! Dan jgħid il-​Mulej: Tibżgħux! Titwerwrux quddiem din il-​kotra kollha, għaliex it-​taqbida m’hijiex tagħkom, imma taʼ Alla. . . . Intom ma tiġġildux f’din il-​battalja; oqogħdu f’postkom, tiċċaqalqux, u taraw ir-​rebħa [“is-​salvazzjoni,” NW] tal-​Mulej għalikom, o Ġuda u Ġerusalemm. Tibżgħux, titwerwrux; għada oħorġu għalihom, u l-​Mulej ikun magħkom.”​—2 Kronaki 20:15-​17.

¹⁶ In-​nies taʼ Ġuda ġew assigurati li ma kienx se jkollhom bżonn jiġġieldu. Bl-​istess mod, meta n-​nies t’Alla jiġu attakkati minn Gog taʼ Magog, huma m’humiex se jmissu armi b’idejhom biex jiddefendu ruħhom. Minflok, huma se jibqgħu bla ‘ma jiċċaqalqu, u jaraw is-​salvazzjoni tal-​Mulej’ għalihom. M’għandniex xi ngħidu, il-​fatt li ma jiċċaqalqux ma jfissirx li se jwaqqfu kull attività, sewwasew bħalma n-​nies t’Alla fi żmien Ġosafat ma kinux inattivi għalkollox. Naqraw: “Ġosafat niżel wiċċu fl-​art; u Ġuda kollu, u dawk kollha li jgħammru f’Ġerusalemm inxteħtu quddiem il-​Mulej biex jadurawh. . . . Mbagħad, wara li [Ġosafat] ftiehem mal-​poplu, għażel lil dawk li kellhom jgħannu u jfaħħru lill-​Mulej, libsin ilbies sagru, u mixjin quddiem l-​eżerċtu jgħidu: ‘Faħħru lill-​Mulej, għax għal dejjem it-​tjieba tiegħu.’” (2 Kronaki 20:​18-​21) Iva, saħansitra meta kienu qed jiġu attakkati mill-​għadu, in-​nies komplew bil-​ħeġġa kollha jfaħħru lil Jehovah. Dan jistabbilixxi mudell biex ix-​Xhieda taʼ Jehovah jimxu fuqu meta Gog jibda l-​attakk tiegħu kontrihom.

17, 18. (a) Liema attitudni pożittiva għandhom ix-​Xhieda taʼ Jehovah illum rigward l-​attakk taʼ Gog? (b) Liema tfakkira ngħatat dan l-​aħħar liż-​żgħażagħ Kristjani?

¹⁷ Sa dakinhar—u saħansitra wara li jkun beda l-​attakk taʼ Gog—ix-​Xhieda taʼ Jehovah se jkomplu jappoġġaw is-​Saltna t’Alla. Huma se jkomplu jiksbu s-​saħħa u l-​protezzjoni billi jkomplu jissieħbu maʼ l-​94,600 kongregazzjoni madwar id-​dinja. (Isaija 26:20) Issa hu l-​waqt li nfaħħru lil Jehovah bil-​kuraġġ! Le, il-​fatt li qed jistennew li minn mument għall-​ieħor ifaqqaʼ l-​attakk taʼ Gog ma jġagħalhomx jibqgħu lura minħabba l-​biżaʼ. Pjuttost, dan iqanqalhom biex iżidu kemm jifilħu s-​sagrifiċċju taʼ tifħir tagħhom.—Salm 146:2.

¹⁸ Xiehda ċara taʼ din l-​attitudni pożittiva nistgħu narawha mill-​mod kif eluf taʼ żgħażagħ madwar id-​dinja bdew jaqdu fis-​servizz full-time. Fil-​konvenzjonijiet distrettwali tas-​sena 2002 ħareġ fuljett intitolat Żgħażagħ—Kif Se Tużaw Ħajjitkom? li enfasizza l-​vantaġġi li jiġu milli wieħed jagħżel ħajja taʼ servizz full-time. Il-​Kristjani, kemm żgħażagħ kif ukoll xjuħ, huma grati għal dawn it-​tfakkiriet f’waqthom.​—Salm 119:​14, 24, 99, 119, 129, 146.

19, 20. (a) Il-​Kristjani għala m’għandhomx għalfejn jibżgħu jew jitwerwru? (b) L-​artiklu taʼ studju li jmiss x’se jagħmel?

¹⁹ Minkejja l-​kundizzjonijiet tad-​dinja, il-​Kristjani m’għandhomx għalfejn jibżgħu jew jitwerwru. Huma jafu li dalwaqt is-​Saltna taʼ Jehovah se teqred darba għal dejjem kwalunkwe tip taʼ vjolenza. Huma jsibu wkoll faraġ fit-​tama taʼ l-​irxoxt billi jafu li dawk li tilfu ħajjithom minħabba l-​vjolenza se jiġu mqajmin mill-​mewt. Waqt li dan l-​irxoxt se jagħti opportunità lil xi wħud biex għall-​ewwel darba jitgħallmu dwar Jehovah, lil oħrajn se jgħinhom ikomplu fil-​ħajja taʼ servizz dedikat lil Jehovah.—Atti 24:15.

²⁰ Bħala Kristjani veri, aħna napprezzaw il-​ħtieġa li nżommu n-​newtralità Kristjana u hekk aħna determinati li nagħmlu. Irridu li qatt ma nitilfu l-​prospett meraviljuż li nkunu nistgħu ma ‘niċċaqalqux u naraw is-​salvazzjoni tal-​Mulej.’ L-​artiklu li jmiss se jsaħħilna l-​fidi tagħna billi jġagħalna nkunu konxji tal-​ġrajjiet preżenti li qegħdin iktar u iktar jgħinuna nifhmu t-​twettiq tal-​profezija tal-​Bibbja.

[Nota taʼ taħt]

Tistaʼ Tispjega?

• Ħafna nies illum għala huma daqshekk pessimisti?

• Ix-​Xhieda taʼ Jehovah għala huma ottimisti dwar il-​futur?

• Jehovah x’diġà għamel dwar dak li kkaġuna l-​vjolenza kollha?

• Għala m’għandna ebda raġuni għalxiex nibżgħu mill-​attakk taʼ Gog?

[Stampa f’paġna 13]

Ġesù ħallielna l-​eżempju xieraq tan-​newtralità Kristjana

[Stampi f’paġna 16]

Eluf taʼ Xhieda żgħażagħ bdew jaqdu bil-​ferħ fil-​ministeru full-time

[Sors tal-​Istampa f’paġna 12]

RITRATT TAL-​ĠM 186226/M. Grafman