Kif Tiżviluppa Mħabba Ġenwina

“L-​imħabba hija l-​eliżir tal-​ħajja; l-​imħabba hija l-​ħajja.”​—Living to Purpose, miktub minn Joseph Johnson, fl-​1871.

BNIEDEM kif jitgħallem iħobb? Billi jistudja l-​psikoloġija? Billi jaqra kotba li jgħinuh itejjeb lilu nnifsu? Billi jara films romantiċi? Żgur li le. L-​ewwelnett, il-​bnedmin jitgħallmu jħobbu mill-​eżempju u t-​taħriġ tal-​ġenituri tagħhom. It-​tfal se jitgħallmu xi tfisser l-​imħabba jekk, f’ambjent kollu affezzjoni tenera, jaraw lill-​ġenituri jitimgħuhom u jipproteġuhom, jikkomunikaw magħhom, u jieħdu interess persunali kbir fihom. Ukoll, jitgħallmu jħobbu meta l-​ġenituri tagħhom jgħallmuhom josservaw prinċipji għaqlin dwar dak li hu tajjeb u ħażin.

L-imħabba ġenwina hija iktar minn sempliċi affezzjoni jew sentiment. Din dejjem taġixxi fl-​aħjar interessi t’oħrajn, anki jekk ma japprezzawhiex bis-​sħiħ dak il-​ħin, li spiss huwa l-​każ mat-​tfal meta jiġu dixxiplinati bl-​imħabba. Eżempju perfett taʼ wieħed li juri mħabba mhux egoista huwa l-​Ħallieq innifsu. L-​appostlu Pawlu kiteb: “Ibni, la twarrabx it-​twiddib tal-​Mulej, u la taqtax qalbek meta jċanfrek; għax il-​Mulej iwiddeb lil min iħobb, jolqot lil kull min jilqaʼ b’ibnu.”—Lhud 12:​5, 6.

Ġenituri, kif tistgħu timitaw lil Jehovah f’li turu l-​imħabba mal-​familja tagħkom? U kemm huwa importanti l-​eżempju li tagħtu intom fir-​relazzjoni tagħkom maʼ xulxin bħala raġel u mara miżżewġin?

Għallmu l-​Imħabba bl-​Eżempju

Jekk int ir-​raġel, tistmaha, jew tqisha bħala prezzjuża lil martek u tonoraha u tirrispettaha? Jekk int il-​mara, turih imħabba u tappoġġah lil żewġek? Il-​Bibbja tgħid li l-​miżżewġin għandhom iħobbu u jirrispettaw lil xulxin. (Efesin 5:28; Titu 2:4) Meta jagħmlu dan, uliedhom jaraw l-​imħabba Kristjana fl-​azzjoni f’darhom stess. X’lezzjoni effettiva u taʼ valur tistaʼ tkun din!

Ukoll, il-​ġenituri jippromwovu l-​imħabba fid-​dar meta jżommu livelli għoljin għall-​familja fejn jidħlu d-​divertiment, il-​moralità, il-​miri, u l-​prijoritajiet. Madwar id-​dinja, in-​nies sabu li l-​Bibbja tgħinhom ħafna biex jagħmlu livelli bħal dawn għall-​familja, u b’hekk, jipprovdu evidenza li l-​Bibbja verament “hija mnebbħa minn Alla, u tiswa biex wieħed jgħallem, iċanfar, iwiddeb u jrawwem fis-​sewwa.” (2 Timotju 3:16) Tabilħaqq, ħafna wħud iqisu l-​prinċipji morali u l-​gwida għall-​ħajja li nsibu fil-​Priedka taʼ fuq il-​Muntanja bħala li qatt ma kien hawn bħalhom.​—Mattew, kapitli 5 sa 7.

Meta l-​familja kollha kemm hi tħares lejn Alla għall-​gwida u żżomm mal-​livelli tiegħu, kull individwu se jħossu iktar fis-​sigurtà u t-​tfal x’aktarx li iktar se jsiru jħobbu u jirrispettaw lill-​ġenituri tagħhom. Għall-​kuntrarju, f’dar fejn hemm livelli difettużi, laxki, jew taʼ sikkatura, it-​tfal forsi jsiru mdejqin, irrabjati, u ribellużi.—Rumani 2:21; Kolossin 3:21.

Xi ngħidu dwar ġenituri li huma waħedhom? Għandhom xi żvantaġġ kbir meta jiġu biex jgħallmu l-​imħabba liċ-​ċkejknin tagħhom? Mhux bilfors. Għalkemm ma tistaʼ tpartat xejn maʼ tim tajjeb t’omm u missier, l-​esperjenza turi li l-​kwalità tar-​relazzjonijiet tal-​familja tistaʼ tpatti, sa ċertu punt, għall-​ġenitur li jkun nieqes. Jekk int ġenitur waħdek, agħmel ħiltek kollha biex tapplika l-​prinċipji tal-​Bibbja f’darek. Iva, proverbju wieħed jgħidilna: “Ittama fil-​Mulej b’qalbek kollha, u tafdax fl-​għaqal tiegħek. Fih aħseb f’kull ma tagħmel, u hu jwittilek triqatek”—inkluż fit-​trobbija tat-​tfal.​—Proverbji 3:​5, 6; Ġakbu 1:5.

Ħafna żgħażagħ mill-​aħjar trabbew f’ambjent b’ġenitur wieħed u issa jinsabu jaqdu lil Alla lealment fl-​eluf taʼ kongregazzjonijiet Kristjani tax-​Xhieda taʼ Jehovah madwar id-​dinja. Din hija evidenza li l-​ġenituri li huma waħedhom ukoll jistaʼ jirnexxilhom jgħallmu lil uliedhom dwar l-​imħabba.

Kif Kulħadd Jistaʼ Jikkultiva l-​Imħabba

Il-​Bibbja bassret li fl-​“aħħar tad-​dinja” kien se jkun hawn nuqqas t’“affezzjoni naturali” (NW), jiġifieri, nuqqas taʼ ġibda naturali li l-​membri taʼ familja ġeneralment ikollhom lejn xulxin. (2 Timotju 3:​1, 3) Madankollu, anki dawk li trabbew f’ambjent nieqes mill-​affezzjoni jistgħu jitgħallmu jikkultivaw l-​imħabba. Kif? Billi jitgħallmu minn Jehovah, li hu s-​sors taʼ l-​imħabba u li juri l-​imħabba u l-​affezzjoni maʼ dawk kollha li jduru lejh b’qalbhom kollha. (1 Ġwanni 4:​7, 8) Wieħed mis-​salmisti qal: “Għalkemm telquni missieri u ommi, il-​Mulej jilqagħni għandu.”—Salm 27:10.

Jehovah jesprimi l-​imħabba tiegħu għalina b’diversi modi. Dawn jinkludu l-​gwida bħal dik taʼ missier permezz tal-​Bibbja, l-​għajnuna taʼ l-​ispirtu qaddis, u l-​appoġġ kollu mħabba tal-​fratellanza Kristjana. (Salm 119:​97-105; Luqa 11:13; Lhud 10:​24, 25) Ikkunsidra kif dawn it-​tliet provvedimenti jistgħu jgħinuk tkabbar l-​imħabba tiegħek għal Alla u għal għajrek.

Gwida Ispirata bħal taʼ Missier

Biex nikkultivaw rabta kollha mħabba maʼ xi ħadd, l-​ewwel irridu nsiru nafu lill-​individwu sew. Billi jirrivela lilu nnifsu permezz tal-​paġni tal-​Bibbja, Jehovah jistidinna nersqu qrib tiegħu. Madankollu, mhux biżżejjed li naqraw il-​Bibbja. Irridu napplikaw it-​tagħlim li fiha u nesperjenzaw il-​benefiċċji li dan iġib miegħu. (Salm 19:​8-11 [19:​7-10, NW]) Isaija 48:17 jgħid: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi.” Iva, Jehovah, il-​personifikazzjoni vera taʼ l-​imħabba, jgħallimna għall-​benefiċċju tagħna​—mhux għax irid jillimita l-​libertà tagħna b’regoli u regolamenti mhux bżonnjużi.

Għarfien eżatt mill-​Bibbja jgħinna wkoll biex inkabbru l-​imħabba tagħna għal sħabna l-​bnedmin. Dan għaliex il-​verità tal-​Bibbja tgħallimna kif Alla jħares lejn il-​bnedmin u turina x’inhuma l-​prinċipji li għandhom imexxuna fil-​mod kif nittrattaw lil xulxin. B’informazzjoni bħal din, għandna bażi soda biex nikkultivaw l-​imħabba għal għajrna. L-​appostlu Pawlu qal: “U jien dan nitlob: li l-​imħabba tagħkom tikber u toktor dejjem iżjed bl-​għerf [“bl-​għarfien eżatt,” “NW”] u b’kull dehen.”—Korsiv tagħna; Filippin 1:9.

Biex nuru kif l-​imħabba tistaʼ tintwera kif suppost bl-​“għarfien eżatt,” ikkunsidra l-​verità fundamentali li hemm f’Atti 10:​34, 35: “Alla ma jħares lejn wiċċ ħadd, imma jilqaʼ lil kull min għandu l-​biżaʼ tiegħu u jagħmel is-​sewwa.” Jekk Alla jistma lill-​bnedmin skond l-​għemejjel tajbin u l-​biżaʼ tagħhom minn Alla, mhux skond in-​nazzjonalità jew ir-​razza tagħhom, m’għandniex aħna nħarsu lejn sħabna l-​bnedmin bl-​istess imparzjalità?—Atti 17:​26, 27; 1 Ġwanni 4:​7-11, 20, 21.

L-​Imħabba ​—Frotta taʼ l-​Ispirtu t’Alla

Sewwasew bħalma xita f’waqtha li tinżel fuq ġnien bis-​siġar tal-​frott tikkontribwixxi għal ħsad tajjeb, l-​ispirtu t’Alla jistaʼ jipproduċi kwalitajiet li l-​Bibbja tiddeskrivihom bħala “l-​frott taʼ l-​Ispirtu” f’individwi li huma inklinati li jaċċettawh. (Galatin 5:​22, 23) L-​iktar importanti hija l-​frotta taʼ l-​imħabba. (1 Korintin 13:13) Imma kif nistgħu niksbu l-​ispirtu t’Alla? Mod vitali hu permezz tat-​talb. Jekk nitolbu għall-​ispirtu t’Alla, hu se jagħtihulna. (Luqa 11:​9-13, NW) Int ‘tibqaʼ’ titlob għall-​ispirtu qaddis? Jekk iva, il-​frott prezzjuż tiegħu, inkluż l-​imħabba, għandu jibda jidher saħansitra iktar f’ħajtek.

Madankollu, hemm tip ieħor taʼ spirtu li jaħdem kontra l-​ispirtu t’Alla. Il-​Bibbja ssejjaħlu “l-​ispirtu taʼ din id-​dinja.” (1 Korintin 2:12; Efesin 2:2) Dan huwa influwenza ħażina, u s-​sors tiegħu m’huwa ħadd ħlief Satana x-​Xitan, “il-​Prinċep taʼ din id-​dinja” taʼ bnedmin li jinsabu ’l bogħod minn Alla. (Ġwanni 12:31) Bħar-​riħ li jqajjem it-​trab u l-​ħmieġ, “l-​ispirtu taʼ din id-​dinja” jqanqal xewqat ħżiena li jeqirdu l-​imħabba u jissodisfaw id-​dgħjufijiet tal-​ġisem.—Galatin 5:​19-21.

In-nies jiġu influwenzati minn dan l-​ispirtu ħażin meta jesponu ruħhom għal attitudnijiet materjalistiċi, egoistiċi, u vjolenti, u għal ħarsa mgħawġa u spiss imħawda taʼ l-​imħabba li hija tant komuni fid-​dinja. Jekk trid tkabbar l-​imħabba ġenwina tiegħek, int trid tieħu waqfa soda kontra l-​ispirtu tad-​dinja. (Ġakbu 4:7) Madankollu, tafdax fis-​saħħa tiegħek; sejjaħ lil Jehovah għall-​għajnuna. L-​ispirtu tiegħu​—l-​iktar forza qawwija fl-​univers​—jistaʼ jqawwik u jgħinek tirnexxi.—Salm 121:2.

Tgħallem l-​Imħabba mill-​Fratellanza Kristjana

Sewwasew bħalma t-​tfal jitgħallmu juru l-​imħabba għaliex jesperjenzawha d-​dar, ilkoll kemm aħna​—kbar u żgħar ​—nistgħu nkabbru l-​imħabba billi nissieħbu maʼ Kristjani oħrajn. (Ġwanni 13:​34, 35) Tabilħaqq, waħda mill-​funzjonijiet fundamentali tal-​kongregazzjoni Kristjana hija li tipprovdi ambjent fejn nistgħu “nħajjru lil xulxin għall-​imħabba u għall-​għemil tajjeb.”—Lhud 10:24.

Imħabba bħal din tiġi apprezzata iktar minn dawk li kienu “mdejjqa u mitluqa” fid-​dinja nieqsa mill-​imħabba taʼ madwarna. (Mattew 9:36) L-​esperjenza wriet li relazzjonijiet kollhom imħabba bejn l-​adulti jistgħu jgħinu biex jingħelbu l-​effetti ħżiena taʼ tfulija nieqsa mill-​imħabba. B’hekk, kemm huwa importanti li l-​Kristjani dedikati kollha jagħtu merħba verament mill-​qalb lill-​ġodda li jibdew jissieħbu magħhom!

“L-​Imħabba Ma Tintemm Qatt”

Il-​Bibbja tgħid li “l-​imħabba ma tintemm qatt.” (1 Korintin 13:8) Dan kif inhu possibbli? L-​appostlu Pawlu jgħidilna: “L-​imħabba taf tistabar u tħenn; l-​imħabba m’hijiex għajjura, ma tintefaħx biha nfisha, ma titkabbarx fuq l-​oħrajn; ma tagħmilx dak li m’hux xieraq; ma tfittixx dak li hu tagħha, xejn ma tinkorla; ma żżommx f’qalbha għad-​deni.” (1 Korintin 13:​4, 5) Jidher ċar li din l-​imħabba m’hijiex xi idea immaġinarja jew xi sentiment superfiċjali. Anzi, bil-​kontra​—dawk li juruha jirrikonoxxu u jaċċettaw id-​diżappunti u t-​tbatijiet tal-​ħajja, imma ma jħalluhomx jeqirdulhom l-​imħabba li għandhom għal għajrhom. Verament, imħabba bħal din hija “l-​qofol tal-​perfezzjoni.”—Kolossin 3:​12-14.

Ikkunsidra l-​eżempju taʼ tfajla Kristjana taʼ 17-il sena fil-​Korea. Meta bdiet taqdi lil Alla Jehovah, il-​familja tagħha ma riduhiex tkompli u kellha titlaq mid-​dar. Madankollu, minflok ma rrabjat, hi talbet dwar il-​kwistjoni, u ħalliet il-​Kelma u l-​ispirtu t’Alla jsawrulha l-​ħsieb tagħha. Minn dakinhar, hi baqgħet tikteb lill-​familja tagħha spiss, u l-​ittri mliethom bi kliem kollu affezzjoni tenera u ġenwina li kienet tħoss għalihom. Ir-​riżultat taʼ dan kien li ħutha s-​subien, li huma akbar minnha, bdew jistudjaw il-​Bibbja u issa huma Kristjani dedikati. Ommha u ħuha ż-​żgħir ukoll aċċettaw il-​verità tal-​Bibbja. Fl-​aħħar missierha, li kien opponieha bl-​aħrax, bidel il-​ħarsa tiegħu. It-​tfajla li hi Xhud kitbet: “Kollha żżewwiġna lil Kristjani sħabna fit-​twemmin, u l-​familja tagħna t’aduraturi magħqudin tammonta għal total taʼ 23 persuna.” X’rebħa għall-​imħabba!

Tixtieq tikkultiva mħabba ġenwina u tgħin lill-​oħrajn jagħmlu l-​istess? Mela dur lejn Jehovah, is-​Sors taʼ din il-​kwalità prezzjuża. Iva, ħu l-​Kelma tiegħu bis-​serjetà, itlob għall-​ispirtu qaddis, u issieħeb mal-​fratellanza Kristjana regolarment. (Isaija 11:9; Mattew 5:5) Kemm iqawwilna qalbna l-​fatt li nafu li dalwaqt il-​ħżiena kollha se jispiċċaw u jibqgħu biss dawk li jipprattikaw l-​imħabba Kristjana ġenwina! Verament, l-​imħabba hija l-​muftieħ għall-​ferħ u l-​ħajja.—Salm 37:​10, 11; 1 Ġwanni 3:14.

[Stampi f’paġna 6]

It-​talb u l-​istudju tal-​Kelma t’Alla se jgħinuna nikkultivaw l-​imħabba ġenwina