Il-​Bibbja Tistaʼ Tgħin iż-​Żwieġ Tiegħek

IŻ-​ŻWIEĠ​—lil xi wħud, din il-​kelma ġġibilhom ħsibijiet sbieħ. Lil oħrajn tqabbadhom uġigħ taʼ qalb. “Emozzjonalment inħossni divorzjata,” tilmenta waħda mara miżżewġa. “Inħossni injorata u waħdi l-​ħin kollu.”

Xi jġiegħel lil tnejn min-​nies li darba wiegħdu li jħobbu u jgħożżu lil xulxin jitbiegħdu daqshekk? Fattur wieħed huwa n-​nuqqas t’edukazzjoni dwar x’jinvolvi ż-​żwieġ. “Aħna nidħlu għaż-​żwieġ mingħajr ebda taħriġ,” josserva wieħed ġurnalist li jikteb dwar affarijiet mediċi.

Minn studju li sar minn The National Marriage Project, proġett taʼ riċerka mill-​Università taʼ Rutgers fi New Jersey, l-​Istati Uniti, sar magħruf li ftit huma dawk li għandhom għarfien dwar x’verament jinvolvi ż-​żwieġ. “Ħafna nies mistħarrġa f’dan l-​istudju kibru ġo familji b’ġenituri li ma kinux kuntenti fiż-​żwieġ jew li kienu divorzjati,” jiktbu d-​diretturi tal-​proġett. “Huma jafu eżatt x’inhu żwieġ diżastruż, imma m’humiex daqshekk ċerti dwar kif għandu jkun żwieġ b’saħħtu. Ftit minnhom jistgħu biss jiddeskrivu żwieġ b’saħħtu bħala ‘l-​oppost tal-​ġenituri tiegħi.’”

Huma l-​Kristjani ħielsa mill-​problemi fiż-​żwieġ? Le. Fil-​fatt, xi Kristjani fl-​ewwel seklu kellhom bżonn pariri speċifiċi biex ma ‘jfittxux li jinħallu’ miż-​żwieġ tagħhom. (1 Korintin 7:27) Bla dubju, kull żwieġ bejn żewġ persuni imperfetti se jkollu l-​problemi tiegħu, imma aħna għandna l-​għajnuna. L-​irġiel u n-​nisa miżżewġin jistgħu jtejbu r-​relazzjoni tagħhom billi japplikaw prinċipji Bibliċi.

Veru, il-​Bibbja m’hijiex xi ktieb taʼ istruzzjoni dwar iż-​żwieġ. Però, billi hija ispirata mill-​Wieħed li oriġina l-​arranġament taż-​żwieġ, nistgħu nistennew li l-​prinċipji tagħha jkunu t’għajnuna. Permezz tal-​profeta Isaija, Alla Jehovah stqarr: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi. Li kieku tajt widen għall-​kmandamenti tiegħi, kien ikun bħal xmara sliemek, u sedqek bħal mewġ tal-​baħar.”—Isaija 48:​17, 18.

Bdiet l-​imħabba li darba kien hemm bejnietkom tmajna bil-​mod il-​mod? Tħoss int li nqbadt fi żwieġ bla mħabba? Mara li ilha miżżewġa għal 26 sena qalet: “L-​uġigħ li tħoss meta jkollok relazzjoni bħal din ma tantx jistaʼ jiġi deskritt. Huwa kontinwu u ma jaqtaʼ xejn.” Minflok ma tirrassennja ruħek għal żwieġ li ma jagħmlekx kuntent, għalfejn ma tipprovax tara x’tistaʼ tagħmel dwaru? L-​artiklu li jmiss se juri lill-​irġiel u lin-​nisa miżżewġin kif il-​prinċipji tal-​Bibbja jistgħu jgħinu ż-​żwieġ tagħhom f’aspett partikulari​—dak taʼ l-​impenn.