Tikber l-​Urġenza biex Noqogħdu Għassa

“Għalhekk, ibqgħu għassa, għax ma tafux f’liema jum ġej il-​Mulej tagħkom.”​—MATTEW 24:​42, NW.

1, 2. X’juri li qed ngħixu fi tmiem din is-​sistema dinjija preżenti?

“L-​IKTAR ħaġa li kellha influwenza kbira fis-​seklu għoxrin kienet il-​gwerra,” jgħid l-​awtur Bill Emmott. Waqt li ammetta li f’kull żmien taʼ l-​istorja tal-​bniedem inħass l-​effett tal-​gwerer u l-​vjolenza, hu jżid: “Is-​seklu għoxrin ma kienx differenti ħafna mis-​sekli taʼ qabel fit-​tip taʼ gwerer u vjolenza, imma kien differenti fl-​iskala u l-​qilla tagħhom. Kien l-​ewwel seklu li ġab miegħu konflitt globali . . . U, biex bħallikieku jenfasizza l-​punt, ġab miegħu mhux konflitt globali wieħed, imma tnejn.”

² Gwerer li jinvolvu “ġens kontra ġens u saltna kontra saltna” kienu mbassrin minn Ġesù Kristu. Madankollu, dawn huma biss aspett wieħed mis-​‘sinjal tal-​miġja taʼ Kristu u taʼ tmiem id-​dinja.’ F’din il-​profezija kbira, Ġesù semma wkoll il-​ġuħ, il-​mard li jittieħed, u t-​terremoti. (Mattew 24:​3, 7, 8; Luqa 21:​6, 7, 10, 11) B’ħafna modi, dawn id-​diżastri kibru fl-​iskala u fil-​qilla tagħhom. Il-​ħażen tal-​bniedem hu abbundanti, kif jidher mill-​attitudni tiegħu lejn Alla u lejn bnedmin oħra. Il-​kollass morali u ż-​żjieda fil-​kriminalità u l-​vjolenza huma evidenti. Il-​bnedmin saru jħobbu l-​flus minflok lil Alla, ossessjonati bil-​pjaċiri. Dan kollu jagħti prova li qed ngħixu fi “żmien iebes.”​—2 Timotju 3:​1-5.

3. Is-​“sinjali taż-​żminijiet” kif għandhom jeffettwawna?

³ Int kif tħossok dwar il-​mod kif il-​bniedem sejjer dejjem iktar għall-​agħar? Ħafna huma indifferenti, saħansitra webbsu qalbhom, għall-​ġrajjiet kurrenti taʼ niket. In-​nies intelletwali u influwenti tad-​dinja ma jifhmux it-​tifsir tas-​“sinjali taż-​żminijiet,” u l-​mexxejja reliġjużi lanqas taw gwida xierqa f’dan ir-​rigward. (Mattew 16:​1-3) Imma Ġesù wissa lis-​segwaċi tiegħu: “Għalhekk, ibqgħu għassa, għax ma tafux f’liema jum ġej il-​Mulej tagħkom.” (Mattew 24:​42, NW ) Ġesù jinkuraġġina mhux biss biex noqogħdu għassa imma wkoll biex ‘nibqgħu għassa.’ Sabiex nibqgħu għassa rridu nibqgħu attenti u b’għajnejna miftuħin beraħ. Dan jitlob iktar milli sempliċement naċċettaw il-​fatt li qegħdin ngħixu fl-​aħħar jiem, iktar milli sempliċement nirrikonoxxu li ż-​żminijiet huma diffiċli. Għandu jkollna konvinzjoni soda li t-​‘tmiem taʼ kollox hu qrib.’ (1 Pietru 4:7) L-​għassa tagħna b’hekk biss se jkollha sens t’urġenza. Għalhekk, il-​mistoqsija li rridu nirriflettu fuqha hija din: ‘X’se jgħinna nsaħħu l-​konvinzjoni tagħna li t-​tmiem hu qrib?’

4, 5. (a) X’se jsaħħaħ il-​konvinzjoni tagħna li t-​tmiem taʼ din is-​sistema mill-​agħar huwa fil-​qrib, u għala? (b) X’inhu xebh wieħed bejn żmien Noè u l-​preżenza taʼ Bin il-​bniedem?

⁴ Ikkunsidra l-​kundizzjonijiet li kienu jeżistu fi żmien il-​ġrajja unika fl-​istorja tal-​bniedem—id-​Dilluvju l-​kbir taʼ żmien Noè. In-​nies tant kienu ħżiena li Jehovah “sogħob bih.” Hu ddikjara: “Nqaċċat minn wiċċ l-​art il-​bniedem li jien ħlaqt.” (Ġenesi 6:​6, 7) U fil-​fatt hekk għamel. Ġesù kien qed jagħmel parallel bejn dak iż-​żmien u issa, meta qal: “Bħal fi żmien Noè, hekk tkun il-​miġja taʼ Bin il-​bniedem.”​—Mattew 24:37.

⁵ Huwa raġunevoli li nassumu li Jehovah iħossu dwar id-​dinja taʼ llum bħalma ħassu dwar dik taʼ qabel id-​Dilluvju. Ladarba ġab fi tmiem lid-​dinja diżubbidjenti lejn Alla taʼ żmien Noè, hu żgur li se jeqred lid-​dinja mill-​agħar taʼ llum. Jekk nifhmu ċar il-​parallel bejn dak iż-​żmien u llum se nsaħħu l-​konvinzjoni tagħna li t-​tmiem taʼ din id-​dinja preżenti hu qrib. Mela x’inhu dan ix-​xebh? Mill-​inqas hemm ħames affarijiet li jixxiebhu. L-​ewwel waħda hi li t-​twissija tal-​qerda li ġejja hija enfasizzata b’mod speċifiku.

Mgħarrfin dwar “Ħwejjeġ li Kienu Għadhom Ma Jidhrux”

6. Fi żmien Noè, Jehovah xi ddeċieda li jagħmel?

⁶ Fi żmien Noè, Jehovah iddikjara: “L-​ispirtu tiegħi ma jdumx għal dejjem jitħabat mal-​bniedem, għax hu laħam ukoll: iżda jiemu jkunu mija u għoxrin sena.” (Ġenesi 6:​3, Karm Żammit) Il-​ħruġ taʼ dan id-​digriet fis-​sena 2490 Q.E.K. mmarka l-​bidu taʼ tmiem dik id-​dinja diżubbidjenti lejn Alla. Immaġina ftit dan x’kien ifisser għal dawk li kienu jgħixu dak iż-​żmien! Fi żmien 120 sena, Jehovah kien se jġib ‘dilluvju ilma fuq l-​art biex jeqred kull ħliqa li fiha nifs il-​ħajja taħt is-​smewwiet u kull ma jinsab fl-​art jinqered.’​—Ġenesi 6:17.

7. (a) Noè kif wieġeb għat-​twissija dwar id-​Dilluvju? (b) Aħna kif għandna nwieġbu għat-​twissijiet dwar tmiem din is-​sistema?

⁷ Noè rċieva t-​twissija dwar il-​katastrofu li kien ġej għaxriet taʼ snin qabel ma seħħ, u hu uża l-​ħin b’mod għaqli biex jipprepara għas-​salvazzjoni tiegħu. Wara li ġie “mgħarraf minn Alla dwar ħwejjeġ li kienu għadhom ma jidhrux,” jgħid l-​appostlu Pawlu, “mimli b’biżaʼ qaddis [Noè] bena arka biex isalva l-​familja tiegħu.” (Lhud 11:7) Xi ngħidu għalina? Għaddew madwar 90 sena mindu bdew l-​aħħar jiem taʼ din is-​sistema fl-​1914. Aħna żgur li qegħdin fiż-​“żmien taʼ l-​aħħar.” (Danjel 12:4) Kif għandna nirreaġixxu għat-​twissijiet li ngħatajna? “Min jagħmel ir-​rieda taʼ Alla jibqaʼ għal dejjem.” (1 Ġwanni 2:17) Għalhekk, issa huwa ż-​żmien li nagħmlu r-​rieda taʼ Jehovah b’sens kbir t’urġenza.

8, 9. Liema twissijiet qed jingħataw fi żmienna, u dawn kif qed jiġu dikjarati?

⁸ Fi żmienna, studenti sinċiera tal-​Bibbja tgħallmu mill-​Iskrittura ispirata li din is-​sistema hija kundannata għall-​qerda. Nemmnuh aħna dan? Innota x’qal b’mod ċar Ġesù Kristu: “Għax imbagħad ikun hawn diqa kbira li mill-​bidu tad-​dinja sa issa għadu qatt ma kien hawn bħalha u anqas ikun hawn.” (Mattew 24:21) Ġesù qal ukoll li hu kellu jiġi bħala l-​Imħallef maħtur minn Alla u kellu jifred lin-​nies bħalma ragħaj jifred in-​nagħaġ mill-​mogħoż. Dawk li jinstabu li ma jistħoqqilhomx “se jitilqu fil-​qtugħ taʼ dejjem, imma l-​uħud twajbin fil-​ħajja taʼ dejjem.”​—Mattew 25:​31-​33, 46, NW.

⁹ Jehovah żamm dawn it-​twissijiet quddiem għajnejn in-​nies tiegħu billi tahom tfakkiriet f’waqthom permezz taʼ l-​ikel spiritwali provdut mill-​“ilsir leali u diskret.” (Mattew 24:​45-​47, NW ) Iktar minn hekk, kull nazzjon, tribù, ilsien, u poplu huma mitlubin biex ‘jibżgħu minn Alla u jagħtuh glorja, għax ġiet is-​siegħa tal-​ħaqq tiegħu.’ (Apokalissi 14:​6, 7) Parti integrali mill-​messaġġ tas-​Saltna pridkat maʼ l-​art kollha mix-​Xhieda taʼ Jehovah hija t-​twissija li s-​Saltna t’Alla dalwaqt se tneħħi l-​ħakma mill-​bniedem. (Danjel 2:44) Din it-​twissija m’għandhiex tittieħed ħafif ħafif. Alla li jistaʼ kollox dejjem iżomm kelmtu. (Isaija 55:​10, 11) Żamm kelmtu fi żmien Noè, u hekk se jagħmel fi żmienna.​—2 Pietru 3:​3-7.

L-​Immoralità Sesswali Toktor Ħafna

10. X’jistaʼ jingħad dwar l-​immoralità sesswali fi żmien Noè?

¹⁰ Iż-​żmien tagħna jixbah lil żmien Noè f’aspett ieħor. Jehovah kien ikkmanda lill-​ewwel raġel u mara biex ‘jimlew l-​art’ bil-​bnedmin, billi jużaw il-​qawwiet sesswali li tahom Alla b’mod onorabbli fl-​arranġament taż-​żwieġ. (Ġenesi 1:​28) Fi żmien Noè, l-​anġli diżubbidjenti niġġsu lill-​umanità b’sess pervers. Huma niżlu fuq l-​art, ħadu iġsma materjali, u marru jgħixu maʼ nisa sbieħ, u b’hekk ipproduċew nisel li kien nofs bniedem, nofs demonju​—in-​Nefilim. (Ġenesi 6:​2, 4) Id-​dnub taʼ dawn l-​anġli żienja huwa mxebbah mal-​perverżjonijiet taʼ Sodoma u Gomorra. (Ġuda 6, 7) B’konsegwenza taʼ dan, l-​immoralità sesswali nfirxet f’dak iż-​żmien.

11. X’sitwazzjoni morali qed tagħmel lil żmienna jixbah lil żmien Noè?

¹¹ Xi ngħidu għas-​sitwazzjoni morali taʼ llum? F’dawn l-​aħħar jiem, il-​ħajjiet taʼ ħafna nies jiċċentraw madwar is-​sess. Pawlu b’mod tassew ħaj jiddeskrivi lil dawn l-​uħud bħala li “tilfu kull sentiment” morali, u li ħafna “ntelqu għal ħajja bla rażan, għal kull xorta taʼ żína bla xabaʼ.” (Efesin 4:19) Il-​pornografija, is-​sess qabel iż-​żwieġ, l-​abbuż sesswali fuq it-​tfal, u l-​omosesswalità huma komuni ħafna. Xi wħud diġà qed “jirċievu fihom infushom il-​ħlas li ħaqqhom ħtijiethom” fil-​forma taʼ mard trasmess sesswalment, tkissir taʼ familji, u problemi soċjali oħrajn.​—Rumani 1:​26, 27.

12. Għala għandna nikkultivaw mibegħda għal dak li hu ħażin?

¹² Fi żmien Noè, Jehovah ġab id-​Dilluvju l-​kbir u qered lil dik id-​dinja miġnuna fuq is-​sess. Aħna qatt ma rridu ninsew il-​fatt li dawn il-​jiem huma tassew bħal dawk taʼ żmien Noè. Id-​“diqa,” jew it-​tribulazzjoni l-​kbira, li ġejja se tnaddaf l-​art minn nies ‘żienja, adulteri, irġiel miżmumin għal skopijiet m’humiex naturali, u rġiel li jimteddu maʼ rġiel.’ (Mattew 24:21; 1 Korintin 6:​9, 10, NW; Apokalissi 21:8) Kemm huwa urġenti li nikkultivaw mibegħda għal dak li huwa ħażin u nwarrbu minn ċirkustanzi li jistgħu jwassluna għall-​immoralità!—Salm 97:10; 1 Korintin 6:​18.

L-​Art “Imtliet bil-​Vjolenza”

13. Fi żmien Noè, l-​art għalfejn “imtliet bil-​vjolenza”?

¹³ Filwaqt li tipponta lejn karatteristika oħra taʼ żmien Noè, il-​Bibbja tistqarr: “U l-​art tħassret quddiem Alla u mtliet bil-​vjolenza.” (Ġenesi 6:11) Il-​vjolenza fil-​fatt ma kinitx xi ħaġa ġdida. Kajjin, bin Adam, qatel lil ħuh li kien ġust. (Ġenesi 4:8) Lamek irrifletta l-​ispirtu vjolenti taʼ dak iż-​żmien billi kkompona poeżija li tiftaħar dwar kif, skond hu, qatel raġel żagħżugħ biex jiddefendi ruħu. (Ġenesi 4:​23, 24) Dak li kien ġdid fi żmien Noè kien l-​iskala tal-​vjolenza. Hekk kif xi wlied anġeliċi t’Alla żżewġu nisa fuq l-​art u pproduċew nisel taʼ nies​—in-​Nefilim​—il-​vjolenza żdiedet sa livell li ma kienx magħruf qabel. In-​New World Translation turi li l-​kelma oriġinali bl-​Ebrajk li tirreferi għal dawn il-​ġganti vjolenti tfisser ‘uħud li jwaqqgħu lil ħaddieħor.’ (Ġenesi 6:4) Bħala riżultat, l-​art “imtliet bil-​vjolenza.” (Ġenesi 6:​13) Immaġina l-​problemi li Noè bilfors kellu jiffaċċja hu u jieħu ħsieb il-​familja tiegħu f’ambjent bħal dan! Madankollu, Noè ta prova li kien ‘ġust fost in-​nies taʼ żmienu.’​—Ġenesi 7:1.

14. Id-​dinja taʼ llum kif “imtliet bil-​vjolenza”?

¹⁴ Il-​vjolenza ilha teżisti tul l-​istorja kollha tal-​bniedem. Imma, bħalma ġara fi żmien Noè, fi żmienna wkoll qed naraw il-​vjolenza fuq skala li qatt ma kien hawn bħalha. Aħna nisimgħu regolarment bi vjolenza domestika, atti taʼ terroriżmu, kampanji taʼ ġenoċidji, u qtil tal-​massa minn nies li jisparaw fuq ħaddieħor għal xejn b’xejn. Barra minn hekk, hemm ukoll id-​demm imxerred fil-​gwerer. L-​art għal darb’oħra reġgħet imtliet bil-​vjolenza. Għala? Din iż-​żjieda kif ġiet? It-​tweġiba turi xebh ieħor maʼ żmien Noè.

15. (a) X’għen biex il-​vjolenza tkompli tiżdied f’dawn l-​aħħar jiem? (b) Dwar liema riżultat nistgħu nkunu ċerti?

¹⁵ Meta s-​Saltna Messjanika t’Alla ġiet stabbilita fis-​sema fl-​1914, Ġesù Kristu, is-​Sultan li tqiegħed fuq it-​tron, ħa azzjoni li ħalliet il-​marka tagħha fl-​istorja. Satana x-​Xitan u d-​demonji tiegħu tkeċċew ’il barra mis-​sema lejn il-​viċinanzi taʼ l-​art. (Apokalissi 12:​9-​12) Qabel id-​Dilluvju, xi anġli diżubbidjenti telqu l-​pożizzjoni li kellhom fis-​sema volontarjament; iżda, fi żmienna huma kellhom jitilqu minn hemm għax ġew imġagħlin. Iktar minn hekk, huma issa m’għadx baqgħalhom l-​abbiltà li jimmaterjalizzaw iġsma umani fuq l-​art sabiex igawdu pjaċiri tal-​ġisem mhux xierqa. Għalhekk, mimlijin bi frustrazzjoni, rabja, u biżaʼ mill-​ġudizzju li ġej fuqhom, huma jinfluwenzaw lil nies u lil organizzazzjonijiet biex iwettqu atti kiefra taʼ kriminalità u vjolenza saħansitra akbar minn dawk taʼ żmien Noè. Jehovah qered id-​dinja taʼ qabel id-​Dilluvju wara li l-​anġli diżubbidjenti u nisilhom imlewha bil-​ħażen. Tistaʼ tibqaʼ ċert li hu se jagħmel l-​istess ħaġa fi żmienna! (Salm 37:10) Madankollu, dawk li joqogħdu għassa llum jafu li l-​ħelsien tagħhom huwa qrib.

Il-​Messaġġ Jixxandar

16, 17. X’inhu r-​rabaʼ xebh bejn żmien Noè u żmienna?

¹⁶ Ir-​rabaʼ punt taʼ xebh bejn żmienna u d-​dinja taʼ qabel id-​Dilluvju jidher fix-​xogħol li Noè kien imqabbad jagħmel. Noè bena arka kbira. Hu kien ukoll “ħabbâr.” (2 Pietru 2:5) X’messaġġ kien iħabbar? Ix-​xandir taʼ Noè milli jidher inkluda sejħa għall-​indiema u twissija dwar il-​qerda li kienet ġejja. Ġesù qal li n-​nies taʼ żmien Noè “b’xejn [‘ma taw kas,’ NW ] sa ma wasal id-​dilluvju u ġarr lil kulħadd.”​—Mattew 24:​38, 39.

¹⁷ Bl-​istess mod, filwaqt li x-​Xhieda taʼ Jehovah iwettqu bir-​reqqa l-​inkarigu tagħhom biex jippridkaw, il-​messaġġ dwar is-​Saltna t’Alla qed jiġi pridkat mad-​dinja kollha. Kważi f’kull parti tal-​globu, in-​nies jistgħu jisimgħu u jaqraw il-​messaġġ tas-​Saltna bil-​lingwa tagħhom stess. Ir-​rivista Torri taʼ l-​Għassa, li tħabbar is-​Saltna taʼ Jehovah, għandha ċirkulazzjoni taʼ iktar minn 25,000,000 kopja u hija stampata b’iktar minn 140 lingwa. Verament, l-​aħbar tajba tas-​Saltna t’Alla qed tiġi mxandra “fid-​dinja kollha, biex il-​ġnus kollha jkollhom xhieda.” Meta Alla jgħid li x-​xogħol tlesta, it-​tmiem jiġi żgur.​—Mattew 24:14.

18. Il-​mod kif ħafna nies iwieġbu għall-​attività taʼ l-​ippridkar tagħna kif jitqabbel maʼ dak taʼ ħafna nies fi żmien Noè?

¹⁸ Meta nikkunsidraw in-​nuqqas taʼ interess u n-​nuqqas taʼ morali fiż-​żmien taʼ qabel id-​Dilluvju, m’huwiex diffiċli nimmaġinaw kif il-​familja taʼ Noè kienet imdawra b’nies li ma kinux jemmnu u li kienu jidħqu bihom, jgħajruhom, u jirridikolawhom. Imma t-​tmiem ġie tassew. Bl-​istess mod, f’dawn l-​aħħar jiem hawn ħafna “nies kollhom tmaqdir u jwaqqgħu kollox għaż-​żufjett.” ‘Jasal, tabilħaqq, jum il-​Mulej bħal ħalliel.’ (2 Pietru 3:​3, 4, 10) Dan żgur se jasal fil-​ħin stabbilit. Mhux se jiddawwar. (Ħabakkuk 2:3) Kemm inkunu għaqlin jekk inkomplu nżommu għassa!

Ftit Biss Isalvaw

19, 20. Liema xebh nistgħu naraw bejn id-​Dilluvju u l-​qerda taʼ din is-​sistema dinjija preżenti?

¹⁹ Ix-​xebh bejn żmien Noè u żmienna m’huwiex biss fil-​ħażen tan-​nies u l-​qerda tagħhom. Bħalma kien hemm min salva mid-​Dilluvju, hekk ukoll se jkun hemm min isalva fi tmiem din is-​sistema dinjija. Dawk li salvaw mid-​Dilluvju kienu nies ġwejdin li ma kinux jgħixu bħalma kienu jagħmlu n-​nies in ġenerali. Huma semgħu mit-​twissija mingħand Alla u baqgħu separati mid-​dinja mill-​agħar taʼ dak iż-​żmien. “Noè kien raġel sewwa, u bla ħtija, fost in-​nies taʼ żmienu.” (Ġenesi 6:​8, 9, KŻ ) Minn fost l-​umanità kollha, “ftit, jiġifieri tmienja biss, salvaw bis-​saħħa taʼ l-​ilma.” (1 Pietru 3:20) U lilhom Jehovah tahom kmand meta qalilhom: “Nisslu u oktru u imlew l-​art.”​—Ġenesi 9:1.

²⁰ Il-​Kelma t’Alla tiżgurana li “kotra kbira” se ‘tiġi mit-​[“tribulazzjoni l-​kbira,” NW ].’ (Apokalissi 7:​9, 14) Kemm se jkun hemm nies fil-​folla kbira? Ġesù nnifsu qal: “Dejjaq il-​bieb u dejqa t-​triq li tieħu għall-​ħajja, u ftit huma li jsibuha!” (Mattew 7:​13, 14) Meta mqabblin mal-​biljuni taʼ nies li hawn jgħixu fuq l-​art bħalissa, dawk li jibqgħu ħajjin mit-​tribulazzjoni l-​kbira li ġejja se jkunu ftit. Imma jistaʼ jkollhom opportunità bħal dik li ngħatat lil dawk li salvaw mid-​Dilluvju. Jistaʼ jkun li dawk li jibqgħu ħajjin wara t-​tribulazzjoni, għal xi żmien ikun jistaʼ jkollhom it-​tfal bħala parti mis-​soċjetà ġdida fuq l-​art.​—Isaija 65:23.

‘Ibqaʼ Għassa’

21, 22. (a) X’benefiċċju ksibt billi kkunsidrajt ir-​rakkont tad-​Dilluvju? (b) X’inhi l-​iskrittura għas-​sena 2004, u għala għandna nisimgħu mill-​parir li tagħtina?

²¹ Għalkemm id-​dilluvju jidher ’il bogħod ħafna minn żmienna, dan biċ-​ċar jipprovdi twissija li m’għandniex ninjoraw. (Rumani 15:4) Ix-​xebh bejn żmien Noè u żmienna għandu jġibna iktar konxji taʼ x’qiegħed jiġri u jżommna mqajmin għall-​miġja għal għarrieda taʼ Ġesù biex jesegwixxi ġudizzju fuq il-​ħżiena.

²² Illum, Ġesù Kristu qed jidderieġi xogħol tremend taʼ bini spiritwali. Għas-​sigurtà u s-​salvazzjoni taʼ l-​aduraturi veri, teżisti ġenna spiritwali li hi bħall-​arka. (2 Korintin 12:​3, 4) Sabiex insalvaw mit-​tribulazzjoni l-​kbira, irridu nibqgħu f’dik il-​ġenna. Madwar din il-​ġenna spiritwali hemm id-​dinja taʼ Satana, li lesta li tiblaʼ lil kulmin jibda jongħos spiritwalment. Huwa kruċjali li ‘nibqgħu għassa’ u nagħtu prova li aħna lesti għall-​jum taʼ Jehovah.​—Mattew 24:​42, 44, NW.

Tiftakar Int?

• Ġesù liema twissija ta dwar il-​miġja tiegħu?

• Ġesù maʼ xiex iqabbel iż-​żmien tal-​preżenza tiegħu?

• Żmienna b’liema modi jixbah lil żmien Noè?

• Il-​fatt li nirriflettu dwar ix-​xebh bejn żmien Noè u żmienna, kif għandu jeffettwa s-​sens t’urġenza tagħna?

[Kumment f’paġna 18]

L-​iskrittura għas-​sena 2004 se tkun: “Ibqgħu għassa . . . Kunu lesti.”​—Mattew 24:​42, 44, NW.

[Stampa f’paġna 15]

Noè obda t-​twissija t’Alla. Aħna nobdu bl-​istess mod?

[Stampi f’paġna 16]

“Bħal fi żmien Noè, hekk tkun il-​miġja taʼ Bin il-​bniedem”