Tmiem għall-​Gwerra

‘Aħna għandna 12-il sena biss. Ma nistgħux ninfluwenzaw il-​politika u l-​gwerra, imma rridu ngħixu! Aħna qed nistennew il-​paċi. Se jirnexxilna narawha kemm indumu ħajjin?’—Klassi taʼ tfal taʼ l-​iskola

‘Aħna rridu mmorru l-​iskola u nżuru lill-​ħbieb u lill-​familja tagħna mingħajr ma nibżgħu li xi ħadd se jaħtafna u jisraqna. Nittama li l-​gvern jagħti kas. Irridu ħajja aħjar. Irridu l-​paċi.’—Alhaji, 14-il sena

DAN IL-​KLIEM li jmisslek qalbek juri ttama sinċiera li għandhom iż-​żgħażagħ li ilhom isofru għal snin sħaħ minħabba ġlied ċivili. L-​unika xewqa tagħhom hi li jgħixu ħajja normali. Imma li tbiddel it-​tama f’realtà m’huwiex faċli. Qatt se naraw dinja mingħajr gwerer?

Fi snin reċenti, kien hemm sforzi internazzjonali biex jintemmu xi gwerer ċivili billi saret pressjoni liż-​żewġ naħat taʼ kontra xulxin ħalli jiffirmaw trattat taʼ paċi. Xi pajjiżi pprovdew forzi għaż-​żamma tal-​paċi sabiex iżommu maʼ dan il-​ftehim. Imma ftit huma dawk in-​nazzjonijiet li għandhom il-​flus jew ix-​xewqa li jżommu taħt għajnejhom lil pajjiżi fil-​bogħod fejn il-​mibegħda u d-​dubji li huma miżgħudin bihom faċilment iġibu fix-​xejn kwalunkwe ftehim bejn gruppi li jkunu qed jiġġieldu. Spiss, il-​ġlied jerġaʼ jiżbroffa ftit ġimgħat jew xhur wara li jkunu ffirmaw trattat biex jieqfu mill-​ġlied. Bħalma jinnota l-​Istitut taʼ Stokkolma għar-​Riċerka tal-​Paċi Internazzjonali, “huwa diffiċli li tilħaq il-​paċi meta min ikun qed jiġġieled ikun irid u huwa kapaċi jkompli jiġġieled.”

Fl-istess ħin, dawn il-​konflitti li ma jistgħux jitranġaw u li jitturmentaw ħafna partijiet tad-​dinja jfakkru lill-​Kristjani fi profezija tal-​Bibbja. Il-​ktieb taʼ l-​Apokalissi jitkellem dwar perijodu kritiku fl-​istorja fejn rikkieb taʼ żiemel simboliku “jeqred il-​paċi minn fuq wiċċ l-​art.” (Apokalissi 6:4) Din l-​istampa taʼ gwerra kontinwa mbassra hija parti minn sinjal magħmul minn ħafna affarijiet li jindika li issa qed ngħixu fi żmien deskritt fil-​Bibbja bħala “l-​aħħar tad-​dinja.”a (2 Timotju 3:1) Madankollu, il-​Kelma t’Alla tassigurana li l-​aħħar tad-​dinja, jew l-​aħħar jiem, iwassal għall-​paċi.

F’Salm 46:9 l-​Bibbja tispjega li sabiex ikun hawn paċi vera hemm bżonn taʼ tmiem għall-​gwerra, mhux biss f’post wieħed fid-​dinja, imma fid-​dinja kollha. Barra minn hekk, l-​istess salm isemmi speċifikament il-​qerda taʼ l-​armi fi żmien Bibliku—il-​qaws u l-​lanza. L-​armi taʼ llum ukoll għandhom jinqerdu sabiex l-​umanità tkun tistaʼ tgħix fil-​paċi.

Però, fl-​aħħar mill-​aħħar, huma l-​mibegħda u r-​regħba u mhux il-​balal u l-​ixkubetti li jkebbsu l-​gwerra. Ix-​xenqa, jew ir-​regħba hija kaġun fundamentali għall-​gwerra, u l-​mibegħda spiss twassal għall-​vjolenza. Sabiex ineħħu dawn is-​sentimenti distruttivi, in-​nies għandhom bżonn ibiddlu l-​mod taʼ kif jaħsbuha. Iridu jiġu edukati kif jgħixu fil-​paċi. B’hekk, il-​profeta Isaija tal-​qedem jistqarr b’mod realistiku li l-​gwerra tieqaf biss meta n-​nies ‘ma jitgħallmux il-​gwerra iżjed.’​—Isaija 2:4.

Madankollu, fil-​preżent qed ngħixu f’dinja li tgħallem lill-​adulti u lit-​tfal il-​glorja tal-​gwerra u mhux il-​valur tal-​paċi. B’dispjaċir, anki t-​tfal qed jiġu mħarrġin biex joqtlu.

Tgħallmu Joqtlu

Fl-​età taʼ 14-il sena, Alhaji rtira mis-​servizz militari. Kellu biss għaxar snin meta truppi ribelli qabduh u ħarrġuh biex jiġġieled bi xkubetta AK-47. Wara li ġagħluh isir suldat, hu kien jagħmel attakki għal għarrieda biex jisraq l-​ikel u kien jaħraq id-​djar. Kien ukoll joqtol u jimmanka lin-​nies. Illum, Alhaji jsibha diffiċli biex jinsa l-​gwerra u biex jidra jgħix ħajja bħala pajżan. Abraham, tifel ieħor li kien suldat, ukoll tgħallem joqtol u sabha bi tqila biex jagħti lura l-​arma tiegħu. Hu qal: “Jekk jgħiduli biex nitlaq mingħajr l-​ixkubetta tiegħi, ma nafx x’se nagħmel, kif se nsib x’niekol.”

Iktar minn 300,000 tifel u tifla li huma suldati għadhom qed jiġġieldu u jmutu fil-​konflitti ċivili li ma jispiċċawx u li qed jimpestaw il-​pjaneta tagħna. Wieħed mexxej tar-​ribelli spjega: “Huma jobdu l-​ordni; m’humiex interessati biex jirritornaw lejn in-​nisa jew il-​familja tagħhom; u ma jafux jibżgħu.” Madankollu, dawn it-​tfal iridu u jixirqilhom ħajja aħjar.

F’pajjiżi żviluppati, is-​sitwazzjoni terribbli taʼ tfal li huma suldati tistaʼ tkun diffiċli biex timmaġinaha. Madankollu, ħafna tfal mill-​punent qed jitgħallmu l-​gwerra fil-​kumdità taʼ djarhom. B’liema mod?

Ejja nieħdu l-​eżempju taʼ José min-​naħa t’isfel taʼ Spanja. Hu kien żagħżugħ li kien jieħu pjaċir jipprattika l-​arti marzjali. L-​iktar ħaġa li kellu għal qalbu kienet xabla twila tas-​samuraj li missieru kien xtralu għall-​Milied. Hu kien iħobb ukoll il-​logħob elettroniku, speċjalment dawk vjolenti. Fl-​1 t’April, 2000, hu imita r-​rabja taʼ l-​eroj tiegħu tal-​logħob elettroniku. F’saħna vjolenti, hu qatel lil missieru, lil ommu, u lil oħtu bix-​xabla li missieru stess kien tah. “Ridt inkun waħdi fid-​dinja; ma ridtx il-​ġenituri tiegħi jfittxuni,” spjega hu lill-​pulizija.

Meta kien qed jikkummenta dwar l-​effetti taʼ divertiment vjolenti, Dave Grossman, awtur u uffiċjal militari, innota: “Qed nilħqu dak il-​livell fejn m’hemm sentimenti taʼ xejn, fejn li tweġġaʼ u li ġġiegħel lil xi ħadd isofri sar sors taʼ divertiment: esperjenza taʼ ferħ minflok taʼ stmerrija. Qed nitgħallmu noqtlu, u qed nitgħallmu nieħdu gost b’dan.”

Kemm Alhaji u kemm José tgħallmu joqtlu. Ħadd minnhom ma kien bi ħsiebu jsir qattiel, imma t-​taħriġ b’mod jew ieħor għawweġ il-​ħsieb tagħhom. Dan it-​taħriġ—kemm jekk għat-​tfal jew għall-​adulti—jiżraʼ ż-​żerriegħa tal-​vjolenza u l-​gwerra.

Nitgħallmu l-​Paċi Minflok il-​Gwerra

Paċi dejjiema qatt ma tistaʼ tiġi stabbilita waqt li n-​nies qed jitgħallmu joqtlu. Ħafna sekli ilu l-​profeta Isaija kiteb: “Li kieku tajt widen għall-​kmandamenti tiegħi [t’Alla], kien ikun bħal xmara sliemek.” (Isaija 48:17, 18) Meta n-​nies jiksbu għarfien eżatt dwar il-​Kelma t’Alla u jitgħallmu jħobbu l-​liġi t’Alla, jibdew jistmerru l-​vjolenza u l-​gwerra. Anki issa, il-​ġenituri jistgħu joqogħdu attenti li l-​logħob li jilagħbu wliedhom ma jinkuraġġixxix il-​vjolenza. L-​adulti wkoll jistgħu jegħlbu l-​mibegħda u r-​regħba. Ix-​Xhieda taʼ Jehovah darba wara l-​oħra raw li l-​Kelma t’Alla għandha l-​qawwa li tbiddel il-​personalitajiet.—Lhud 4:12.

Ikkunsidra l-​eżempju taʼ Hortêncio. Hu kien raġel żagħżugħ meta ddaħħal bħala suldat kontra r-​rieda tiegħu. It-​taħriġ militari ġie disinjat biex “inaqqax ġo fina x-​xewqa li noqtlu lil ħaddieħor u biex ma nibżgħux milli noqtlu,” jispjega hu. Hu ġġieled fi gwerra ċivili fl-​Afrika li damet tkarkar ħafna. “Il-​gwerra effettwat il-​personalità tiegħi,” jammetti hu. “Anki llum għadni niftakar kulma għamilt. Inħossni ħażin ħafna dwar dak li ġejt imġiegħel biex nagħmel.”

Meta suldat ieħor tkellem maʼ Hortêncio dwar il-​Bibbja, din messitlu qalbu. Il-​wegħda t’Alla f’Salm 46:9 li jġib tmiem għal kull tip taʼ gwerra impressjonatu. Iktar ma studja l-​Bibbja, inqas ried jiġġieled. Wara ftit taż-​żmien, hu u tnejn minn sħabu ġew imkeċċijin mill-​armata u ddedikaw ħajjithom lil Alla Jehovah. “Il-​verità tal-​Bibbja għenitni nħobb lill-​għedewwa tiegħi,” jispjega Hortêncio. “Jien rajt li billi niġġieled fil-​gwerra, kont qed nidneb kontra Jehovah, għax Alla jgħid li m’għandniex noqtlu lill-​ġirien tagħna. Biex nuri din l-​imħabba, kelli nbiddel il-​mod taʼ kif naħseb u ma nqisx lin-​nies bħala l-​għedewwa tiegħi.”

Esperjenzi veri bħal dawn juru li l-​edukazzjoni mill-​Bibbja tassew tippromwovi l-​paċi. Dan m’huwiex xi ħaġa taʼ stagħġib. Il-​profeta Isaija stqarr li hemm relazzjoni diretta bejn l-​edukazzjoni divina u l-​paċi. Hu bassar: ‘Uliedek ilkoll ikunu mgħallma mill-​Mulej, kbira għad tkun [“il-​paċi taʼ,” NW] uliedek.’ (Isaija 54:13, korsiv tagħna.) L-​istess profeta ra bil-​quddiem perijodu meta nies minn kull ġens se jersqu lejn il-​qima vera t’Alla Jehovah biex jitgħallmu l-​mogħdijiet tiegħu. B’liema riżultat? “Huma jibdlu x-​xwabel tagħhom f’sikek tal-​moħriet, u l-​lanez tagħhom fi mnieġel. Ebda ġens ma jerfaʼ x-​xabla kontra ġens ieħor, u s-​sengħa tal-​gwerra ma jitgħallmuhiex iżjed.”—Korsiv tagħna; Isaija 2:2-4.

Fi qbil maʼ din il-​profezija, ix-​Xhieda taʼ Jehovah jieħdu sehem f’xogħol edukattiv madwar id-​dinja li diġà għen lil miljuni biex jegħlbu l-​mibegħda li hi l-​għerq tal-​gwerer tal-​bnedmin.

Garanzija għal Paċi Dinjija

Minbarra li jipprovdi edukazzjoni, Alla stabbilixxa gvern, jew “saltna,” li hu kapaċi jżomm il-​paċi dinjija. B’mod sinifikanti, il-​Bibbja tiddeskrivi l-​Mexxej magħżul t’Alla, Ġesù Kristu, bħala l-​“Prinċep tas-​sliem.” Din tkompli tassigurana li “kbira tkun setgħetu, u s-​sliem bla qjies.”—Isaija 9:5, 6 (9:6, 7, NW).

X’garanzija għandna li l-​ħakma taʼ Ġesù se telimina b’suċċess kull tip taʼ gwerra? Il-​profeta Isaija jkompli: “Il-​ħeġġa tal-​Mulej taʼ l-​eżerċti tagħmel dan.” (Isaija 9:6 [9:7, NW]) Alla għandu r-​rieda u l-​mezzi biex iżomm paċi dejjiema. Ġesù għandu kull fiduċja f’din il-​wegħda. Minħabba f’hekk hu għallem lis-​segwaċi tiegħu biex jitolbu sabiex tiġi s-​Saltna t’Alla u biex titwettaq ir-​rieda t’Alla hawn fuq l-​art. (Mattew 6:9, 10) Meta din it-​talba sinċiera titwettaq, il-​gwerra qatt iktar ma se tidher fuq wiċċ l-​art.

[Nota taʼ taħt]

[Stampa f’paġna 7]

L-​edukazzjoni mill-​Bibbja tippromwovi l-​paċi vera