Dalwaqt—Dinja Mingħajr Gwerer!

FL-​24 TAʼ DIĊEMBRU, 1914, suldat żagħżugħ Britanniku li jismu Jim Prince qasam għan-​naħa l-​oħra billi għadda minn post newtrali sabiex ikellem lil suldat Ġermaniż taʼ l-​infanterija. “Jiena Sassonu u int Anglo-Sassonu. Għala qegħdin niġġieldu?” staqsieh il-​Ġermaniż. Snin wara, Prince ammetta: “Għadni ma nafx it-​tweġiba għal dik il-​mistoqsija.”

Għal ġimgħa waħda straordinarja fl-​1914, is-​suldati taʼ l-​armati Britanniċi u Ġermaniżi kienu qishom aħwa, lagħbu l-​futbol, u saħansitra taw rigali tal-​Milied lil xulxin. Dak il-​ftehim taʼ waqfien mill-​ġlied kien, naturalment, wieħed mhux uffiċċjali. Il-​ġenerali ma ridux li t-​truppi tagħhom jiskopru li l-​“għadu” ma kienx il-​monstru feroċi impinġi mill-​propaganda tal-​gwerra. Is-​suldat Britanniku Albert Moren iktar tard ftakar: “Li kieku l-​waqfien mill-​ġlied dam sejjer għal ġimgħa oħra, kieku kien ikun iebes ferm biex il-​gwerra terġaʼ tibda.”

Dak il-​waqfien mill-​ġlied spontanju jissuġġerixxi li saħansitra ħafna mis-​suldati imħarrġin għall-​gwerra jixxennqu għall-​paċi iktar milli għall-​gwerra. Il-​biċċa l-​kbira tas-​suldati li raw b’għajnejhom l-​affarijiet orribbli tal-​battalja jaqblu mal-​qawl Spanjol: “Ħalli jmur għall-​gwerra dak li ma jafx il-​gwerra x’inhi.” Bla dubju stħarriġ mad-​dinja kollha fost il-​poplu inġenerali jirrivela li l-​maġġoranza l-​kbira tippreferi l-​paċi milli l-​gwerra. Imma kif tistaʼ din ix-​xewqa universali għall-​paċi tiġi tradotta għal ġo dinja bla gwerra?

Qabel ma l-​gwerra tistaʼ titneħħa għalkollox, l-​attitudnijiet iridu jinbiddlu. Il-​kostituzzjoni taʼ l-​Organizzazzjoni Edukazzjonali, Xjentifika, u Kulturali tal-​ĠM tistqarr: “Ladarba l-​gwerer jibdew fl-​imħuħ tal-​bnedmin, huwa fl-​imħuħ tal-​bnedmin li d-​difiża tal-​paċi trid tiġi kostruwita.” Madankollu s-​soċjetà tal-​lum, li fiha qegħdin jiżdiedu n-​nuqqas taʼ fiduċja u l-​mibgħeda, qiegħda ssir iktar vjolenti, mhux iktar paċifika.

Minkejja dan, Alla nnifsu wiegħed li xi darba l-​paċi se tkun impressa fuq l-​imħuħ taʼ nies li huma disposti b’mod taʼ tjieba. Permezz tal-​profeta Isaija, hu qal: “Hu [Alla] ċertament li se jagħmel ħaqq fost il-​ġnus u se jiddritta l-​affarijiet rigward ħafna popli. U huma se jkollhom jaħdmu sjufhom f’sikek tal-​moħriet u l-​lanez tagħhom f’imqassijiet taż-​żabra. Ġens mhux se jerfaʼ sejf kontra ġens, lanqas ma se jitgħallmu l-​gwerra iktar.”—Isaija 2:4.

Il-​Paċi Promossa Fil-​Moħħ

Tistaʼ bidla taʼ l-​għaġeb bħal din fil-​mod taʼ ħsieb isseħħ? Qatt xi darba n-​nies se jitgħallmu jissalvagwardjaw il-​paċi minflok ma jigglorifikaw il-​gwerra? Ikkunsidra l-​eżempju taʼ Wolfgang Kusserow. Fl-​1942 in-​Nażi qatgħu ras dan iż-​żagħżugħ Ġermaniż taʼ 20 sena għaliex ‘ma riedx jitgħallem il-​gwerra.’ Għala għażel li jmut? Fi stqarrija miktuba, hu kkwota prinċipji Skritturali bħal, “Trid tħobb lil ġarek bħalek innifsek” u, “Dawk kollha li jieħdu s-​sejf se jgħibu bis-​sejf.” (Mattew 22:39; 26:52) Hu mbagħad b’mod speċifiku staqsa: “Jaqaw il-​Ħallieq tagħna kiteb dan kollu għas-​siġar?”

Il-kelma t’Alla, miktuba fil-​Bibbja, “teżerċita qawwa” u qanqlet lil dan ix-​Xhud żagħżugħ taʼ Jehovah biex jiġri wara l-​paċi, kienu x’kienu l-​konsegwenzi. (Ebrej 4:12; 1 Pietru 3:11) Imma Wolfgang Kusserow ma kienx l-​uniku wieħed li ġera wara l-​paċi b’dan il-​mod. Fil-​ktieb The Nazi Persecution of the Churches 1933-45, J. S. Conway jikkwota mill-​arkivji tan-​Nażi li jixhdu li x-​Xhieda taʼ Jehovah bħala grupp irrifjutaw li jaqbdu l-​armi. Kif jindika Conway, waqfa kuraġġuża bħal din kienet bħal li kieku qegħdin jiffirmaw il-​kundanna tal-​mewt tagħhom stess.

Ix-Xhieda taʼ Jehovah illum ikomplu jiġru wara l-​paċi, hi x’inhi r-​razza jew in-​nazzjonalità tagħhom. Għala? Għaliex huma tgħallmu mill-​Bibbja li l-​qaddejja veri t’Alla jridu jaħdmu sjufhom f’sikek tal-​moħriet. Alejandro, żagħżugħ mill-​Arġentina li kien emigra lejn l-​Iżrael fl-​1987, jistaʼ jixhed personalment għal dan il-​fatt.

Għal tliet snin Alejandro għex f’kibbutz waqt li kien qiegħed jistudja f’università u jaħdem f’diversi lukandi u restoranti. Matul dan iż-​żmien, hu beda jaqra l-​Bibbja u beda jfittex għal skop fil-​ħajja. Fuq kollox, hu xxennaq għal dinja fejn in-​nies jistgħu jgħixu fil-​paċi u l-​ġustizzja. Alejandro​—Lhudi—​kien jaħdem maʼ Lhud u maʼ Għarab imma pprefera li ma jiffavorixxi lill-​ebda naħa.

Fl-1990 ħabib li kien qiegħed jistudja l-​Bibbja max-​Xhieda taʼ Jehovah stieden lil Alejandro għal assemblea taʼ ġurnata waħda f’Ħajfa. Billi baqaʼ mistagħġeb li jara 600 Lhudi u Għarbi jassoċjaw henjin flimkien fl-​assemblea, hu qal bejnu u bejn ruħu, ‘Dan hu l-​mod xieraq kif għandhom igħixu n-​nies.’ Fi żmien sitt xhur, hu nnifsu sar Xhud u issa jiddedika l-​biċċa l-​kbira tal-​ħin tiegħu f’li jippriedka l-​messaġġ taʼ paċi tal-​Bibbja.

Kif Alla Se Jġib Il-​Paċi

Huma kemm huma kommoventi dawn l-​eżempji, huma biss l-​eċċezzjoni fid-​dinja tal-​lum. Għalkemm is-​sistema preżenti bil-​kliem tgħid li trid il-​paċi, hi tinkuraġġixxi l-​gwerra. Kieku int tieħu gost li toqgħod fi triq fejn ir-​residenti jonfqu bejn 7 u 16 fil-​mija tal-​paga tagħhom fuq armi tan-​nar u protezzjoni għad-​djar tagħhom? Fil-​fatt, dak hu li ilhom jagħmlu l-​ġnus permezz taʼ l-​infiq militari fi snin riċenti. Mhux taʼ b’xejn li l-​profezija taʼ Isaija tirrivela li l-​bnedmin inġenerali qatt ma se jaħdmu sjufhom f’sikek tal-​moħriet sakemm Alla “jiddritta l-​affarijiet rigward ħafna popli.” Kif se jagħmlu hu dan?

Il-mezz prinċipali li bih jiġu ddrittati l-​affarijiet huwa s-​Saltna t’Alla Jehovah. Il-​profeta Danjel bassar li ‘dak Alla tas-​sema kellu jwaqqaf saltna li qatt ma kellha tinġieb f’rovina.’ Din is-​Saltna, hu jżid, “se tfarrak u ġġib fi tmiem lil dawn is-​saltniet kollha [gvernijiet tad-​dinja], u hija nfisha se tieqaf għal żminijiet indefiniti.” (Danjel 2:44) Dawn il-​kelmiet jirrivelaw li s-​Saltna t’Alla se tistabbilixxi fis-​sod il-​kontroll tagħha fuq l-​art kollha. Billi telimina l-​fruntieri nazzjonali, is-​Saltna se ġġib fix-​xejn ir-​rivalità. Barra minn hekk, ladarba s-​sudditi tagħha se jkunu “persuni mgħallmin minn Jehovah,” il-​paċi tagħhom “se tkun abbundanti.” (Isaija 54:13) Mhux taʼ b’xejn li Ġesù qalilna biex nitolbu lil Alla: “Ħa tiġi saltnatek”!—Mattew 6:10.

Jitneħħew Ostakli Reliġjużi

Alla se jneħħi wkoll l-​ostakli reliġjużi għall-​paċi. Ir-​reliġjon kienet wara l-​itwal konflitt bl-​armi fl-​istorja​—il-​Kruċjati, jew il-​“Gwerer Qaddisin,” li nbdew minn Papa Urbanu II fl-​1095 E.K.a Fis-​seklu tagħna l-​membri tal-​kleru kienu prominenti f’li jtambru għall-​appoġġ tal-​poplu għall-​gwerer, saħansitra dawk taʼ natura totalment sekulari.

Billi rrefera għall-​irwol tal-​knejjes Kristjani nominali matul l-​Ewwel Gwerra Dinjija, il-​kittieb taʼ l-​istorja Paul Johnson kiteb: “Il-​membri tal-​kleru ma kinux kapaċi, u ħafna drabi ma ridux, ipoġġu l-​fidi Kristjana qabel in-​nazzjonalità. Il-​maġġoranza għażlu l-​eħfef triq u ħalltu l-​Kristjanità mal-​patrijottiżmu. Is-​suldati Kristjani tad-​denominazzjonijiet kollha ġew imħeġġin biex joqtlu lil xulxin f’isem is-​Salvatur tagħhom.”

Ir-reliġjon għamlet iktar biex tkebbes il-​gwerra milli biex trawwem il-​paċi. Fil-​fatt, il-​Bibbja tpinġi lir-​reliġjon falza bħala “mara żienja” li titkessaħ mal-​ħakkiema dinjin. (Rivelazzjoni 17:1, 2) Alla jikxifha bħala li hi l-​perċimes prinċipali responsabbli għat-​tixrid tad-​demm taʼ dawk kollha mbiċċrin fuq l-​art. (Rivelazzjoni 18:24) Għaldaqstant, Alla Jehovah se jelimina dan l-​ostaklu għall-​paċi darba għal dejjem.—Rivelazzjoni 18:4, 5, 8.

Saħansitra meta jisparixxu l-​elementi li jifirdu bħalma huma l-​politika u r-​reliġjon falza, il-​paċi qatt ma se tkun assigurata mingħajr it-​tneħħija taʼ l-​akbar difensur tal-​gwerra li qatt eżista​—Satana x-​Xitan. Dik hi l-​aħħar biċċa xogħol li s-​Saltna t’Alla se twettaq fil-​programm tagħha biex iġġib paċi totali fuq l-​art. Il-​ktieb Bibliku taʼ Rivelazzjoni jispjega li Satana se jiġi ‘maħtuf’ u ‘marbut’ u ‘mixħut . . . ġewwa l-​abbiss’ sabiex “ma jkunx jistaʼ jiżżvija iktar lill-​ġnus.” Wara dan hu se jiġi meqrud kompletament.—Rivelazzjoni 20:2, 3, 10.

Il-wegħda tal-​Bibbja tat-​tmiem tal-​gwerra m’hijiex xi ħolma fiergħa. L-​arranġament t’Alla Jehovah għall-​paċi diġà ġie istitwit. Is-​Saltna ġiet stabbilita fis-​smewwiet u hija lesta biex twettaq iktar miżuri ħalli tiggarantixxi l-​paċi globali. Sadattant, miljuni taʼ Xhieda taʼ Jehovah, li jappoġġjaw lil dan il-​gvern tas-​sema, tgħallmu jgħixu fil-​paċi.

B’mod ċar, allura, għandna raġunijiet sodi biex nemmnu li l-​gwerer m’humiex inevitabbli. Anzi, nistgħu nħarsu ’l quddiem lejn il-​jum li huwa qrib meta Jehovah se jġiegħel lill-​gwerer jieqfu għal dejjem. (Salm 46:9) Hu se jara li dalwaqt se jkun hemm dinja mingħajr gwerer.

[Nota taʼ taħt]

[Stampa f’paġna 7]

Int tistaʼ tgħix f’dinja mingħajr gwerer