Mibgħudin Għalxejn

“Fuq xejn bagħduni.”—ĠWANNI 15:25.

1, 2. (a) Xi wħud għala ma jistgħux jifhmu għalfejn jintqalu affarijiet kontra l-​Kristjani, imma għala ma niħduhiex bi kbira li jsir dan id-​diskors? (b) Liema tifsira tal-​kelma “mibegħda” se nikkunsidraw f’dan l-​artiklu? (Ara n-​nota taʼ taħt.)

IX-​XHIEDA TAʼ JEHOVAH jistinkaw biex jgħixu skond il-​prinċipji fil-​Kelma t’Alla. Minħabba f’hekk, huma għandhom reputazzjoni mill-​aħjar f’ħafna pajjiżi. Madankollu, xi drabi ngħatat idea ħażina dwarhom. Per eżempju, uffiċjal tal-​gvern fil-​belt taʼ San Pietruburgu, ir-​Russja, ftakar: “Konna ngħatajna l-​idea li x-​Xhieda taʼ Jehovah huma xi setta sigrieta li taħdem bil-​moħbi u li l-​membri tagħha joqtlu lit-​tfal u lilhom infushom.” Imma wara li ħadem max-​Xhieda taʼ Jehovah minħabba konvenzjoni internazzjonali, l-​istess uffiċjal osserva: “Issa nara nies normali u daħqana . . . Huma paċifiċi u kalmi, u jħobbu ħafna lil xulxin.” Hu żied: “Ma nistax nifhem għala n-​nies jigdbu daqshekk fuqhom.”—1 Pietru 3:16.

² Il-​qaddejja t’Alla xejn ma jieħdu gost jiġu malafamati bħala nies ħżiena, imma ma jiħduhiex bi kbira meta n-​nies jgħidu kontrihom. Lis-​segwaċi tiegħu, Ġesù kien wissiehom minn qabel: “Jekk id-​dinja tobgħodkom, kunu afu li lili bagħditni qabel ma bagħdet lilkom. . . . Dan ġara biex isseħħ il-​kelma li hemm fil-​Liġi tagħhom, ‘Fuq xejn bagħduni.’”a (Ġwanni 15:18-20, 25; Salm 35:19; 69:5 [69:4, NW]) Ftit qabel kien qal lid-​dixxipli tiegħu: “Jekk lil sid id-​dar tawh il-​laqam taʼ Begħelżebul, kemm aktar lin-​nies taʼ daru!” (Mattew 10:25) Il-​Kristjani jifhmu li l-​fatt li jissaportu dan it-​tmaqdir huwa parti miz-​“zokk tat-​tortura” li aċċettaw meta saru segwaċi taʼ Kristu.—Mattew 16:24, NW.

3. Kemm kienet mifruxa l-​persekuzzjoni tal-​qaddejja veri?

³ Il-​persekuzzjoni taʼ l-​aduraturi veri ilha teżisti żmien twil, u bdiet lura fi żmien “Abel il-​ġust.” (Mattew 23:34, 35) Ma kinitx biss xi ħaġa taʼ darba kultant. Ġesù qal lis-​segwaċi tiegħu li ‘kulħadd kien se jsir jobgħodhom’ minħabba f’ismu. (Mattew 10:22, korsiv tagħna.) Iktar minn hekk, l-​appostlu Pawlu kiteb li l-​qaddejja kollha t’Alla—inkluż kull wieħed u waħda minna—għandhom jistennew li jiġu persegwitati. (2 Timotju 3:12) X’inhi r-​raġuni għal dan?

Is-​Sors tal-​Mibegħda Inġusta

4. Il-​Bibbja kif turi x’inhu s-​sors taʼ kull mibegħda inġusta?

⁴ Il-​Kelma t’Alla tirrivela li mill-​bidu kien hemm xewwiexi li ma jidhirx. Ikkunsidra l-​qtil krudil taʼ l-​ewwel bniedem taʼ fidi, Abel. Il-​Bibbja tgħid li ħuh il-​qattiel, Kajjin, “kien mill-​Ħażin,” Satana x-​Xitan. (1 Ġwanni 3:12) Kajjin wera l-​attitudni taʼ Satana, u x-​Xitan użah biex iwettaq il-​pjanijiet mill-​agħar tiegħu. Il-​Bibbja titfaʼ dawl ukoll fuq is-​sehem li kellu Satana fl-​attakki ħorox kontra Ġob u Ġesù Kristu. (Ġob 1:12; 2:6, 7; Ġwanni 8:37, 44; 13:27) Il-​ktieb taʼ l-​Apokalissi ma jħalli l-​ebda dubju x’inhu s-​sors tal-​persekuzzjoni tas-​segwaċi taʼ Ġesù, għax jgħid: “Id-​Demonju se jixħet ’il xi wħud minnkom fil-​ħabs biex iġarrabkom.” (Apokalissi 2:10, korsiv tagħna.) Iva, Satana huwa s-​sors taʼ kull mibegħda inġusta li tintwera man-​nies t’Alla.

5. Satana għala jobgħodhom lill-​aduraturi veri?

⁵ Satana għala jobgħodhom lill-​aduraturi veri? F’komplott li jindika l-​kburija esaġerata li għandu, Satana ħadha kontra s-​“Sultan taʼ dejjem,” Alla Jehovah. (1 Timotju 1:17; 3:6) Hu jsostni li Alla huwa restrittiv iżżejjed bil-​mod kif jaħkem fuq il-​ħlejjaq tiegħu u li ħadd ma jaqdi lil Jehovah b’motiv pur, imma biss għal interessi egoistiċi. Satana jinsisti li jekk jitħalla jġarrab lill-​bnedmin, hu jistaʼ jwaqqafhom ilkoll milli jaqdu lil Alla. (Ġenesi 3:1-6; Ġob 1:6-12; 2:1-7) Billi jimmalafama lil Jehovah bħala tirann, giddieb, u wieħed li jfalli f’kulma jagħmel, Satana jipprova jagħmel lilu nnifsu ħakkiem li għandu dritt daqs Jehovah li jkun is-​sovran taʼ l-​univers. Għalhekk, ir-​rabja tiegħu kontra l-​qaddejja t’Alla hija mqanqla mill-​kilba li għandu biex jiġi meqjum.—Mattew 4:8, 9.

6. (a) Kif aħna involuti personalment fil-​kwistjoni tas-​sovranità taʼ Jehovah? (b) Il-​fatt li nifhmu din il-​kwistjoni kif se jgħinna nżommu l-​integrità tagħna? (Ara l-​kaxxa, paġna 16.)

⁶ Qed tifhem kif din il-​kwistjoni teffettwalek ħajtek? Bħala qaddej taʼ Jehovah, int x’aktarx sibt li għalkemm jeħtieġ sforz kbir biex tagħmel ir-​rieda t’Alla, il-​benefiċċji li jiġu milli tagħmel dan huma ferm akbar. Xi ngħidu, iżda, jekk minħabba ċ-​ċirkustanzi f’ħajtek issibha diffiċli, saħansitra taʼ wġigħ, li tkompli timxi fi qbil mal-​liġijiet u l-​prinċipji taʼ Jehovah? U xi ngħidu jekk donnu ma tkun qed tirċievi l-​ebda benefiċċju minn dan? Se tikkonkludi li ma jaqbillikx tibqaʼ taqdi lil Jehovah? Jew inkella l-​imħabba għal Jehovah u l-​apprezzament profond għall-​kwalitajiet grandjużi tiegħu jqanqluk tibqaʼ miexi fit-​triqat kollha tiegħu? (Dewteronomju 10:12, 13) Billi jħalli lil Satana jġib ċerta tbatija fuqna, Jehovah jagħti lil kull wieħed minna ċ-​ċans li nagħtu risposta personalment għall-​isfida taʼ Satana.—Proverbji 27:11.

“Meta Jgħajjrukom”

7. X’inhi tattika waħda li juża x-​Xitan biex jipprova jġagħalna nitilqu lil Jehovah?

⁷ Issa ejja nikkunsidraw iktar fil-​fond waħda mill-​makakkeriji li juża Satana biex jipprova juri li l-​akkużi tiegħu huma veri—it-​tmaqdir mimli gideb. Ġesù sejjaħ lil Satana “missier il-​gideb.” (Ġwanni 8:44) Ix-​Xitan huwa l-​perċimes tal-​kalunnji kontra Alla, il-​kelma tajba tiegħu, u ismu qaddis. Ix-​Xitan juża l-​insinwazzjonijiet, l-​akkużi foloz, u l-​gideb sfaċċat biex jisfida s-​sovranità taʼ Jehovah, u juża dawn l-​istess tattiki biex jimmalafama lill-​qaddejja leali t’Alla. Billi jitfaʼ kemm jiflaħ tmaqdir fuq dawn ix-​Xhieda, hu jistaʼ jagħmilhielhom saħansitra iktar diffiċli biex jissaportu prova li diġà tkun ħarxa.

8. Satana kif ġab tmaqdir fuq Ġob, u dan x’effett kellu?

⁸ Ikkunsidra xi ġralu Ġob, li ismu jfisser “Mira taʼ Mibegħda.” Minbarra li kkaġunalu t-​telfa tal-​mezz t’għajxien, taʼ wliedu, u taʼ saħħtu, Satana ġagħal lil Ġob jidher bħala midneb li kien qed jiġi kastigat minn Alla. Għalkemm qabel kien bniedem rispettat ħafna, Ġob sar disprezzat, saħansitra minn qrabatu u l-​ħbieb tal-​qalb. (Ġob 19:13-19; 29:1, 2, 7-11) Iktar minn hekk, Satana ra kif ‘jagħsar lil Ġob bil-​kliem’ permezz taʼ farraġa foloz, l-​ewwel billi dawn insinwaw li hu bilfors għamel xi dnub serju u mbagħad billi kkundannawh direttament bħala midneb. (Ġob 4:6-9; 19:2; 22:5-10) Min jaf kemm kien skuraġġanti dan għal Ġob!

9.Ġesù kif ġie mġiegħel jidher bħala midneb?

⁹ Bħala l-​iktar wieħed li appoġġa s-​sovranità taʼ Jehovah, l-​Iben t’Alla sar il-​mira ewlenija tal-​mibegħda taʼ Satana. Meta Ġesù ġie fuq l-​art, Satana pprova jtebbagħlu r-​reputazzjoni spiritwali tiegħu, bħalma pprova jagħmel lil Ġob, billi jġiegħel lil Ġesù jidher bħala midneb. (Isaija 53:2-4; Ġwanni 9:24) In-​nies sejħulu sakranazz u wikkiel, u qalu li ‘kellu fih xitan.’ (Mattew 11:18, 19; Ġwanni 7:20; 8:48; 10:20) Ġie akkużat b’mod falz li dagħa. (Mattew 9:2, 3; 26:63-66; Ġwanni 10:33-36) Dan sewwidlu qalbu lil Ġesù, għax kien jaf li kien se jġib tmaqdir inġust fuq Missieru. (Luqa 22:41-44) Fl-​aħħar, Ġesù ġie mdendel fuq zokk bħala kriminal misħut. (Mattew 27:38-44) Biex iżomm integrità perfetta, Ġesù kellu jissaporti ħafna ‘oppożizzjoni min-​naħa tal-​midinbin.’—Lhud 12:2, 3.

10. Il-​fdal tal-​midlukin kif kienu l-​mira taʼ Satana fi żminijiet reċenti?

¹⁰ Fi żminijiet reċenti, il-​fdal tas-​segwaċi midlukin taʼ Kristu bl-​istess mod saru l-​mira tal-​mibegħda tax-​Xitan. Satana jiġi deskritt bħala “dak li jixli ’l ħutna [ħut Kristu], li lejl u nhar jixlihom quddiem Alla tagħna.” (Apokalissi 12:9, 10) Minn mindu tkeċċa mis-​sema u tħalla joqgħod biss viċin l-​art, Satana żied l-​isforzi tiegħu biex iġiegħel lil ħut Kristu jidhru bħala nies li għandhom jiġu disprezzati mis-​soċjetà. (1 Korintin 4:13) F’xi pajjiżi, huma ġew malafamati billi ssejħu setta perikoluża, bħalma kienu jissejħu l-​Kristjani taʼ l-​ewwel seklu. (Atti 24:5, 14; 28:22) Bħalma ssemma fil-​bidu, huma ġew malafamati permezz taʼ propaganda falza. Madankollu, ‘fil-​ġieħ u fl-​għajb, kemm jekk intqal il-​ħażin u kemm jekk intqal it-​tajjeb fuqhom,’ ħut Kristu l-​midlukin, appoġġati minn sħabhom in-​“nagħaġ oħra,” bl-​umiltà stinkaw biex iħarsu l-​preċetti t’Alla u jagħmlu x-​xogħol li jixhdu dwar Ġesù.—2 Korintin 6:8; Ġwanni 10:16; Apokalissi 12:17.

11, 12. (a) X’jistaʼ jkun il-​kaġun taʼ ċertu tmaqdir li jirċievu l-​Kristjani? (b) Kristjan b’liema mod għandu mnejn ibati inġustament minħabba l-​fidi tiegħu?

¹¹ M’għandniex xi ngħidu, mhux it-​tmaqdir kollu li jirċievu l-​qaddejja individwali t’Alla jiġi “minħabba s-​sewwa.” (Mattew 5:10) Xi problemi jistgħu jiġu minħabba l-​imperfezzjonijiet tagħna stess. M’hemm l-​ebda mertu speċjali jekk ‘nieħdu bis-​sabar is-​swat meta nkunu għamilna l-​ħażen.’ Madankollu, jekk Kristjan ‘ibati bla ħtija għal Alla, u jieħu bis-​sabar it-​tbatija, din tkun grazzja’ f’għajnejn Jehovah. (1 Pietru 2:19, 20) Dan meta jistaʼ jkun il-​każ?

¹² Xi wħud ġew maltrattati minħabba li rrifjutaw li jieħdu sehem fi drawwiet mhux skritturali konnessi mal-​funerali. (Dewteronomju 14:1) Xhieda żgħażagħ qalgħu ħafna tagħjir minħabba li żammew mal-​livelli morali taʼ Jehovah. (1 Pietru 4:4) Xi ġenituri Kristjani ġew mixlijin b’mod żbaljat li huma “traskurati” jew “abbużivi” għax fittxew kura medika mingħajr demm għal uliedhom. (Atti 15:29) Il-​Kristjani ġew imwarrbin mill-​qraba u mill-​ġirien sempliċement għax saru qaddejja taʼ Jehovah. (Mattew 10:34-37) Dawn l-​uħud kollha qed isegwu l-​eżempju li ħallew il-​profeti u Ġesù nnifsu meta batew inġustament.—Mattew 5:11, 12; Ġakbu 5:10; 1 Pietru 2:21.

Inkunu Lesti li Nissaportu t-​Tmaqdir

13. X’jistaʼ jgħinna nżommu l-​bilanċ spiritwali tagħna meta niġu mmaqdrin bl-​aħrax?

¹³ Meta niġu mmaqdrin bl-​aħrax minħabba l-​fidi tagħna, forsi nħossuna skuraġġiti, bħalma ħassu l-​profeta Ġeremija, u naħsbu li ma nistgħux nibqgħu naqdu lil Alla. (Ġeremija 20:7-9) X’jistaʼ jgħinna nżommu l-​bilanċ spiritwali tagħna? Ipprova ara l-​kwistjoni mill-​ħarsa taʼ Jehovah. Lil dawk li jibqgħu leali meta jgħaddu minn prova, hu jqishom bħala rebbieħa, mhux bħala vittmi. (Rumani 8:37) Ipprova ġib f’moħħok lil dawk li appoġġaw is-​sovranità taʼ Jehovah minkejja l-​umiljazzjoni kollha li felaħ iġib fuqhom ix-​Xitan—irġiel u nisa bħal Abel, Ġob, Marija omm Ġesù, u wħud leali oħra minn żmien il-​qedem, kif ukoll sħabna fit-​twemmin fi żmienna. (Lhud 11:35-37; 12:1) Immedita fuq l-​integrità li wrew tul ħajjithom. Dik is-​sħaba kbira taʼ wħud leali tistidinna ningħaqdu magħhom fuq il-​palk tar-​rebbieħa riservat għal dawk li bil-​fidi tagħhom jirbħu lid-​dinja.—1 Ġwanni 5:4.

14.It-talb bil-​ħrara kif jistaʼ jsaħħaħna biex nibqgħu leali?

¹⁴ Jekk ‘joktor l-​hemm ġo qalbna,’ nistgħu nduru lejn Jehovah b’talb bil-​ħrara, u hu jfarraġna u jsaħħaħna. (Salm 50:15; 94:19) Se jagħtina l-​għerf li neħtieġu biex inkampaw mal-​prova u jgħinna nibqgħu ffokati fuq il-​kwistjoni kbira, is-​sovranità taʼ Jehovah, li hija l-​kaġun tal-​mibegħda inġusta li jesperjenzaw il-​qaddejja leali tiegħu. (Ġakbu 1:5) Jehovah jistaʼ jagħtina wkoll “is-​sliem taʼ Alla, sliem li jgħaddi kull ma l-​moħħ jistaʼ jifhem.” (Filippin 4:6, 7) Permezz taʼ din it-​trankwillità mogħtija minn Alla nkunu nistgħu nibqgħu kalmi u determinati meta niffaċċjaw pressjoni estrema, billi ma nċedux għad-​dubji jew il-​biżaʼ. Permezz taʼ l-​ispirtu tiegħu, Jehovah jistaʼ jgħinna nissaportu dak kollu li jippermetti li ngħaddu minnu.—1 Korintin 10:13.

15.X’jistaʼ jgħinna nevitaw li nimtlew bl-​imrar meta ngħaddu minn xi tbatija?

¹⁵ X’jistaʼ jgħinna ma nimtlewx bl-​imrar għal dawk li jobogħduna għalxejn? Tinsiex li l-​għedewwa prinċipali tagħna huma Satana u d-​demonji. (Efesin 6:12) Filwaqt li xi nies jippersegwitawna minn jeddhom u apposta, ħafna minn dawk li jopponu lin-​nies t’Alla jagħmlu dan minħabba l-​injoranza jew għax jiġu manipulati minn oħrajn. (Danjel 6:5-17 [6:4-16, NW]; 1 Timotju 1:12, 13) Jehovah jixtieq li “l-​bnedmin kollha” jkollhom l-​opportunità li “jsalvaw u jaslu biex jagħrfu l-​verità.” (1 Timotju 2:4) Fil-​fatt, xi wħud li qabel kienu jopponuna issa huma ħutna Kristjani minħabba li osservaw l-​imġiba tajba tagħna. (1 Pietru 2:12) Barra minn hekk, nistgħu nisiltu tagħlima mill-​eżempju taʼ Ġużeppi, bin Ġakobb. Għalkemm Ġużeppi bata ferm minħabba ħutu mill-​missier, hu ma żammx f’qalbu dak li għamlulu. Għala le? Għax ra li id Jehovah kienet mexxiet l-​affarijiet sabiex iwettaq l-​iskop Tiegħu. (Ġenesi 45:4-8) Jehovah bl-​istess mod jistaʼ jikkaġuna kwalunkwe tbatija inġusta li ngħaddu minnha biex taħdem għall-​glorja taʼ ismu.—1 Pietru 4:16.

16, 17. Għala m’għandniex inkunu ansjużi jekk dawk li jopponuna jipprovaw ifixklu x-​xogħol taʼ l-​ippridkar?

¹⁶ M’għandniex għalfejn ninkwetaw iżżejjed jekk għal xi żmien dawk li jopponuna jidhru li qed jirnexxilhom ifixklu l-​progress taʼ l-​aħbar tajba. Jehovah issa qed iqanqal il-​ġnus kollha permezz tax-​xiehda globali li qed tingħata, u qed jinġabar il-​ġid kollu. (Ħaggaj 2:7) Kristu Ġesù, ir-​Ragħaj it-​Tajjeb, qal: “In-​nagħaġ tiegħi jisimgħu leħni, u jiena nagħrafhom, u huma jimxu warajja. U jiena nagħtihom il-​ħajja taʼ dejjem; . . . u minn idejja ma jaħtafhomli ħadd.” (Ġwanni 10:27-29, korsiv tagħna.) Hemm ukoll l-​anġli qaddisa involuti fil-​ħsad spiritwali kbir. (Mattew 13:39, 41; Apokalissi 14:​6, 7) Għalhekk, xejn minn dak li jgħidu jew jagħmlu dawk li jopponuna m’hu se jfixkel l-​iskop t’Alla.​—Isaija 54:17; Atti 5:​38, 39.

¹⁷ Spiss, l-​isforzi li jagħmlu dawk li jopponuna jirriżultaw il-​kontra taʼ li jkunu xtaqu. F’komunità Afrikana, kien inxtered ħafna gideb terribbli dwar ix-​Xhieda taʼ Jehovah, inkluż li huma jqimu lix-​Xitan. Minħabba f’hekk, kulmeta x-​Xhieda kienu jżuru lil Grace, din kienet taħrab wara d-​dar tagħha u tinħeba sakemm jitilqu. Darba minnhom il-​kappillan tal-​knisja tagħha qabad waħda mill-​pubblikazzjonijiet tagħna, urieha lil dawk kollha li kienu preżenti, u qalilhom biex ma jaqrawhiex għax inkella kienu jispiċċaw jiċħdu t-​twemmin tagħhom. Dan qajmilha l-​kurżità lil Grace. Meta x-​Xhieda reġaʼ messhom imorru għandha, minflok ma nħbiet, hi qabdet konversazzjoni magħhom u ngħatat il-​kopja persunali tagħha tal-​pubblikazzjoni. Inbeda studju tal-​Bibbja, u fl-​1996 tgħammdet. Grace issa tuża l-​ħin tagħha biex tfittex lil oħrajn li forsi ġew informati ħażin dwar ix-​Xhieda taʼ Jehovah.

Saħħaħ il-​Fidi Tiegħek Issa

18. Għala hemm bżonn li nsaħħu l-​fidi tagħna qabel ma jinqalgħu provi ħorox, u kif nistgħu nagħmlu dan?

¹⁸ Ladarba Satana x’ħin ifettillu jistaʼ jattakkana b’mibegħda inġusta, huwa vitali li nsaħħu l-​fidi tagħna issa. Dan kif nistgħu nagħmluh? Rapport minn pajjiż fejn in-​nies taʼ Jehovah kienu ġew persegwitati nnota: “Ħaġa waħda saret evidenti ħafna: Dawk li għandhom drawwiet spiritwali tajbin u apprezzament profond għall-​verità tal-​Bibbja m’għandhom l-​ebda problema biex iżommu sod meta jiġu l-​provi. Imma dawk li fi ‘żmien favorevoli’ jitilfu l-​laqgħat, ma jkunux regulari fis-​servizz taʼ l-​għalqa, u jagħmlu kompromess f’affarijiet żgħar, taʼ spiss jaqgħu meta tiġi prova ‘tan-​nar’.” (2 Timotju 4:2, NW) Jekk tara xi aspetti li għandek bżonn titjieb fihom, stinka biex tagħmel dan illum qabel għada.—Salm 119:60.

19. Meta l-​qaddejja t’Alla jiffaċċjaw mibegħda inġusta u jżommu l-​integrità, xi jkunu qed jagħmlu?

¹⁹ Meta l-​aduraturi veri jintlaqtu mill-​flaġell tal-​mibegħda satanika u jżommu l-​integrità, huma jkunu qed jagħtu xiehda ħajja li Jehovah għandu d-​dritt u jistħoqqlu jkun is-​Sovran, u li din hija ħaġa sewwa. Il-​fedeltà tagħhom tferraħ lil qalb Alla. Għalkemm il-​bniedem jistaʼ jitfaʼ t-​tmaqdir fuqhom, dak li d-​dinjità tiegħu hija ogħla mill-​art u s-​smewwiet “ma jistmellx jissejjaħ Alla tagħhom.” Iva, rigward l-​uħud leali kollha bħal dawn jistaʼ jingħad bix-​xieraq: “Id-​dinja ma kienx jixirqilha jkollha nies bħal dawn.”—Lhud 11:16, 38.

[Nota taʼ taħt]

Tistaʼ Tispjega?

• L-​aduraturi veri għala huma mibgħudin inġustament?

• Satana kif uża t-​tmaqdir biex jipprova jkisser l-​integrità taʼ Ġob u Ġesù?

• Jehovah kif isaħħaħna biex inżommu sod meta niffaċċjaw mibegħda satanika?

[Kaxxa/Stampa paġna 16]

Huma Fehmu X’Inhi l-​Kwistjoni Vera

Wieħed mix-​Xhieda taʼ Jehovah fl-​Ukraina, fejn ix-​xogħol taʼ l-​ippridkar tas-​Saltna kien projbit għal iktar minn 50 sena, osserva: “Is-​sitwazzjoni tax-​Xhieda taʼ Jehovah m’għandhiex titqies biss minn kif jittrattawna bnedmin oħra. . . . Il-​biċċa l-​kbira mill-​uffiċjali kienu sempliċement qed jagħmlu xogħolhom. Meta nbidel il-​gvern, l-​uffiċjali saru leali lejh, imma aħna bqajna l-​istess. Irrealizzajna li s-​sors veru taʼ l-​inkwiet tagħna kien intwera fil-​Bibbja.

“Ma konniex inqisu lilna nfusna sempliċement bħala vittmi innoċenti taʼ nies oppressivi. Dak li għenna nissaportu kien fehma ċara tal-​kwistjoni li qamet fil-​ġnien taʼ l-​Għeden—il-​kwistjoni jekk Alla għandux dritt jaħkem. . . . Aħna wrejna ċar fuq liema naħa konna fi kwistjoni li mhux biss hija konnessa maʼ l-​interessi persunali tal-​bnedmin imma wkoll maʼ l-​interessi tas-​Sovran taʼ l-​univers. Stajna nifhmu ħafna aħjar x’kienu l-​kwistjonijiet involuti. Dan saħħaħna u għenna biex inżommu l-​integrità tagħna fl-​iktar ċirkustanzi estremi.”

[Stampa]

Victor Popovych, arrestat fl-​1970

[Stampa f’paġna 13]

Min kien responsabbli għat-​tmaqdir li rċieva Ġesù?

[Stampi f’paġna 15]

Ġob, Marija, u l-​qaddejja t’Alla fi żmienna, bħal Stanley Jones, appoġġaw is-​sovranità taʼ Jehovah