Mistoqsijiet mill-​Qarrejja

Xi nies isostnu li Pawlu ma kienx nawfragat fuq il-​gżira taʼ Malta, fin-​nofsinhar taʼ Sqallija, imma fuq gżira oħra. Fejn kien nawfragat?

Din il-​mistoqsija tirreferi għall-​proposta reċenti li l-​appostlu Pawlu ma kienx nawfragat fuq il-​gżira taʼ Malta imma fuq Cephalonia (jew, Kefallinía) ħdejn Korfù fil-​Baħar Jonju, qrib il-​kosta tal-​punent tal-​Greċja. Il-​kitba ispirata tgħid li Pawlu telaq bil-​baħar minn Ċesarija bħala priġunier fdat f’idejn Ġulju, ċenturjun Ruman. Magħhom kien hemm ukoll xi suldati oħra u sħab Pawlu. Kif turi l-​mappa, salpaw lejn Sidon u Mira. Minn hemmhekk qabdu vapur ieħor, li kien ġifen kbir tal-​qamħ ġej minn Lixandra, l-​Eġittu, u telqu lejn Knidu fuq in-​naħa tal-​punent. Ma setgħux iżommu mar-​rotta pjanata biex jaqsmu l-​Baħar Eġew u jgħaddu minn mal-​ponta tal-​Greċja u jibqgħu sejrin dritt għal Ruma. Irjieħ qawwijin ġarrewhom lejn Kreta, fin-​nofsinhar, għall-​kenn tax-​xtajtiet tagħha. Hemmhekk, waqfu fil-​Portijiet is-​Sbieħ. Meta ‘telaq minn Kreta,’ il-​ġifen ‘inqabad’ minn “riefnu qawwi, jgħidulu grigal.” Il-​ġifen, imtaqqal bit-​tagħbija tal-​qamħ, ġie ‘mitfugħ ’l hawn u ’l hinn fil-​baħar’ sa l-​erbatax-il lejl. Fl-​aħħar, il-​276 persuna kollha kienu nawfragati fuq gżira msejħa Melite fit-​test Grieg taʼ l-​Iskrittura Mqaddsa.—Atti 27:1–28:1.

Matul is-​snin, saru diversi suġġerimenti dwar l-​identità taʼ din il-​gżira, Melite. Xi wħud ħasbu li kienet il-​gżira Melite Illyrica, issa magħrufa bħala Mljet, fil-​Baħar Adrijatiku lil hinn mill-​kosta tal-​Kroazja. Iżda dan ma jidhirx li kien il-​każ, peress li Mljet tinsab wisq lejn it-​tramuntana biex tikkorrispondi mal-​postijiet li wara waqaf fihom Pawlu fil-​vjaġġ tiegħu, jiġifieri Sirakuża, fi Sqallija, u mbagħad il-​kosta tal-​punent taʼ l-​Italja.—Atti 28:11-13.

II-biċċa l-​kbira mit-​tradutturi tal-​Bibbja kkonkludew li Melite tirreferi għall-​gżira Melite Africanus, issa magħrufa bħala Malta. L-​aħħar post li daħal fih il-​ġifen li kien qed iġorr lil Pawlu kien il-​Portijiet is-​Sbieħ, fi Kreta. Imbagħad riefnu qawwi ġarr il-​ġifen lejn Kawda fil-​punent. Ir-​riħ baqaʼ jimbotta l-​ġifen għal bosta ġranet. Huwa raġunevoli għall-​aħħar li l-​ġifen li nġarr mir-​riefnu baqaʼ sejjer lejn il-​punent u wasal Malta.

Rigward ir-​riħ li kien qed jonfoħ u “d-​direzzjoni u s-​saħħa li biha kien qed jitkaxkar il-​ġifen,” Conybeare u Howson qalu fil-​ktieb tagħhom The Life and Epistles of St. Paul: “Id-​distanza bejn Klawda [jew, Kawda] u Malta hija xi ftit inqas minn 770 kilometru. Il-​koinċidenza tant hi kbira li ma tantx hu possibbli li wieħed jemmen li l-​art, li l-​baħrin waslu qribha fl-​erbatax-il lejl, setgħet kienet xi post ieħor għajr Malta. Il-​probabbiltà hija kbira wisq.”

Filwaqt li jistgħu jiġu offruti suġġerimenti dwar postijiet oħra, nawfraġju f’Malta kif muri fil-​mappa inkluża f’dan l-​artiklu jidher li jaqbel mar-​rakkont li hemm imniżżel fil-​Bibbja.

[Mappa/Stampa f’paġna 31]

Ġerusalemm

Ċesarija

Sidon

Mira

Knidu

KRETA

KAWDA

MALTA

SQALLIJA

Sirakuża

Ruma

MLJET

GREĊJA

CEPHALONIA