Sirakuża—Waqfa Qasira Matul il-​Vjaġġ taʼ Pawlu

MADWAR is-​sena 59 E.K., ġifen baħħar mill-​gżira Mediterranja taʼ Malta lejn l-​Italja. Fil-​pruwa l-​ġifen kellu s-​simbolu taʼ “Wlied Żews,” l-​allat meqjusin bħala l-​protetturi tal-​baħħara. Il-​kittieb Bibliku Luqa jirrakkonta li l-​vapur daħal “fil-​port taʼ Sirakuża” fil-​kosta tax-​xlokk taʼ Sqallija u ‘baqaʼ hemm tlett ijiem.’ (Atti 28:​11, 12) Abbord maʼ Luqa kien hemm Aristarku u l-​appostlu Pawlu, li kien qed jiġi meħud Ruma biex jidher quddiem il-​qorti.​—Atti 27:2.

Ma nafux jekk Pawlu tħalliex jinżel minn fuq il-​ġifen f’Sirakuża. Jekk hu jew dawk li kienu qed jivvjaġġaw miegħu niżlu, x’setgħu raw?

Fi żmien il-​Griegi u r-​Rumani, Sirakuża kienet importanti kważi daqs Ateni u Ruma. Skond it-​tradizzjoni, din instabet mill-​Korintin fis-​sena 734 Q.E.K. Sirakuża kellha perijodi taʼ glorja u kienet art twelid xi persunaġġi famużi miż-​żminijiet tal-​qedem, bħall-​kittieb tad-​drammi Epikarmu u l-​matematiku Arkimede. Fis-​sena 212 Q.E.K., ir-​Rumani għelbu lil Sirakuża.

Żjara fil-​belt moderna tistaʼ tagħtik ftit ħjiel taʼ kif kienet Sirakuża fi żmien Pawlu. Il-​belt kienet maqsuma f’żewġ partijiet​—waħda fuq il-​gżira żgħira t’Ortiġja, li x’aktarx kienet fejn waqaf il-​vapur taʼ Pawlu, u l-​oħra fuq il-​gżira prinċipali.

Illum, fuq il-​gżira tistaʼ ssib il-​fdalijiet taʼ l-​eqdem tempju fi Sqallija bl-​arkitettura Griega li kienet sempliċi u klassika​—it-​tempju t’Apollo, li jmur lura għas-​sitt seklu Q.E.K. Hemm ukoll kolonni taʼ tempju dedikat lil Atena, li jmur lura għall-​ħames seklu Q.E.K., imma dawn saru parti mill-​katidral.

Iċ-ċentru tal-​belt moderna jinsab fuq il-​gżira prinċipali, fejn tistaʼ żżur il-​park arkeoloġiku taʼ Neapoli. Viċin id-​dħul tiegħu hemm it-​teatru Grieg. Dan jirrappreżenta wieħed mill-​iktar eżempji impressjonanti t’arkitettura Griega fit-​teatri li għadhom jeżistu. Minħabba li jinsab faċċata tal-​baħar, dan ħoloq ambjent spettakolari għall-​preżentazzjonijiet tat-​teatru. Fit-​tarfnett tal-​park fin-​nofsinhar hemm l-​anfiteatru Ruman tat-​tielet seklu E.K. Huwa ovali, twil 140 metru u wiesaʼ 119-il metru, u huwa t-​tielet l-​akbar fl-​Italja.

Jekk ikollok l-​opportunità li żżur Sirakuża, tistaʼ tpoġġi bil-​qiegħda fuq wieħed mill-​bankijiet faċċata tal-​baħar f’Ortiġja, iftaħ il-​Bibbja tiegħek f’Atti 28:​12, u immaġina lill-​appostlu Pawlu abbord il-​vapur hekk kif daħal fil-​port hawnhekk.

[Tabella/Mappa f’paġna 30]

(Għall-formazzjoni sħiħa tat-test, ara pubblikazzjoni)

Malta

Sqallija

Sirakuża

ITALJA

Reġġju

Putijoli

Ruma

[Stampa f’paġna 30]

Fdalijiet taʼ teatru Grieg f’Sirakuża