Il-​Ġudizzju taʼ Ġeħova Ġej Kontra l-​Ħżiena

“Ħejji ruħek, biex tiltaqaʼ maʼ Alla tiegħek.”—Għamos 4:12.

1, 2. Għala nistgħu nkunu fiduċjużi li Alla se jtemm il-​ħażen?

SEJJER Ġeħova xi darba jtemm il-​ħażen u s-​sofferenza li hawn fuq l-​art? Hekk kif ninsabu fil-​bidu tas-​seklu 21, din hija mistoqsija tassew f’waqtha. Donnu li kulfejn indawru wiċċna, naraw bnedmin li qed jaġixxu bla qalb maʼ bnedmin oħra. Kemm nixtiequ li jkun hawn dinja ħielsa mill-​vjolenza, mit-​terroriżmu, u mill-​korruzzjoni!

² L-​aħbar tajba hi li aħna jistaʼ jkollna fiduċja sħiħa li Ġeħova se jtemm il-​ħażen. Il-​kwalitajiet t’Alla jassigurawna li hu se jieħu azzjoni kontra l-​ħżiena. Ġeħova hu ġust u sewwa. F’Salm 33:5, il-​Kelma tiegħu tgħidilna: “Hu jħobb id-​dritt u s-​sewwa.” Salm ieħor jgħid: “[Ġeħova] jobgħod ’il min iħobb id-​dnewwa.” (Salm 11:5) Żgur li Ġeħova, li hu Alla mimli qawwa, li jħobb id-​dritt u s-​sewwa, m’huwiex se jittollera għal dejjem dak li jobgħod hu.

3. X’se jiġi enfasizzat aħna u nkomplu nikkunsidraw il-​profezija t’Għamos?

³ Ikkunsidra raġuni oħra għala nistgħu nkunu ċerti li Ġeħova se jneħħi l-​ħażen. Il-​mod kif hu aġixxa fil-​passat huwa garanzija taʼ dan. Eżempji impressjonanti taʼ kif Ġeħova aġixxa dejjem bl-​istess mod maʼ wħud ħżiena jinsabu fil-​ktieb Bibliku t’Għamos. Jekk inkomplu nikkunsidraw il-​profezija t’Għamos, se jiġu enfasizzati tliet affarijiet dwar il-​ġudizzju divin. L-​ewwel, dan huwa dejjem mistħoqq. It-​tieni, ħadd ma jistaʼ jaħrab minnu. U t-​tielet, huwa selettiv, għaliex Ġeħova jagħmel ġudizzju mill-​ħżiena imma juri ħniena maʼ dawk li jindmu u li għandhom attitudni xierqa.—Rumani 9:17-26.

Il-​Ġudizzju Divin Dejjem Mistħoqq

4. Ġeħova fejn bagħat lil Għamos u għal liema skop?

⁴ Fi żmien Għamos, l-​Iżraelin kienu diġà maqsumin f’żewġ saltniet. Waħda kienet is-​saltna taʼ Ġuda b’żewġ tribujiet fin-​nofsinhar. L-​oħra kienet is-​saltna taʼ Iżrael b’għaxar tribujiet fit-​tramuntana. Ġeħova inkariga lil Għamos biex jaqdi bħala profeta u minn daru f’Ġuda bagħtu f’Iżrael. Hemmhekk, Għamos kellu jintuża minn Alla biex ixandar ġudizzju divin.

5. Għall-​ewwel, Għamos kontra liema ġnus ipprofetizza, u x’kienet raġuni waħda għala kien jistħoqqilhom ġudizzju divin kontrihom?

⁵ Għamos ma bediex xogħlu billi ħabbar il-​ġudizzju taʼ Ġeħova kontra s-​saltna ribelluża taʼ Iżrael fit-​tramuntana. Minflok, hu beda billi ddikjara l-​ġudizzju divin li kien ġej kontra sitt iġnus fil-​qrib. Dawn kienu s-​Sirja, il-​Filistja, Tir, Edom, Għammon, u Mowab. Imma dawn il-​ġnus tassew kien jistħoqqilhom il-​ġudizzju t’Alla kontrihom? Dażgur li kien! Raġuni waħda hi li huma kienu għedewwa ħorox tal-​poplu taʼ Ġeħova.

6. Alla għala kien se jġib gwaj fuq is-​Sirja, il-​Filistja, u Tir?

⁶ Per eżempju, Ġeħova kkundanna lis-​Sirjani “għax dirsu lil Gilgħad.” (Għamos 1:3) Is-​Sirjani ħadu territorju minn Gilgħad—reġjun taʼ Iżrael fil-​lvant tax-​Xmara Ġordan—u hemmhekk għamlu ħsara kbira lill-​poplu t’Alla. Xi ngħidu għall-​Filistja u Tir? Il-​Filistin kienu ħatja li ħadu eżiljati, jew priġunieri, Iżraelin, u bigħuhom lill-​Edumin, u xi Iżraelin ġew f’idejn negozjanti minn Tir li kienu jbigħu l-​ilsiera. (Għamos 1:6, 9) X’għarukaża—bigħu lin-​nies t’Alla bħala lsiera! Mela, mhux taʼ b’xejn li Ġeħova kien se jġib gwaj kbir fuq is-​Sirja, il-​Filistja, u Tir.

7. Edom, Għammon, u Mowab x’kellhom komuni maʼ Iżrael, imma kif ittrattaw lill-​Iżraelin?

⁷ Edom, Għammon, u Mowab kellhom xi ħaġa komuni bejniethom u maʼ Iżrael. It-​tlieta li huma kienu qraba taʼ l-​Iżraelin. L-​Edumin kienu dixxendenti t’Abraham permezz t’Għesaw, it-​tewmi taʼ Ġakobb. Allura, f’ċertu sens, huma kienu ħut Iżrael. L-​Għammonin u l-​Mowabin kienu dixxendenti taʼ Lot, in-​neputi t’Abraham. Madankollu, ittrattawhom bħal aħwa l-​Edumin, l-​Għammonin, u l-​Mowabin lil qrabathom l-​Iżraelin? Lanqas xejn! Edom uża bla ħniena s-​sejf kontra “ħuh,” u l-​Għammonin kienu sadisti bil-​mod kif ittrattaw lill-​priġunieri Iżraelin. (Għamos 1:11, 13) Għalkemm Għamos ma jsemmix b’mod dirett kif Mowab ittratta b’mod ħażin lill-​poplu t’Alla, il-​Mowabin kienu ilhom żmien twil jopponu lil Iżrael. Il-​kastig għal dawn it-​tlett iġnus qraba kien se jkun wieħed aħrax. Ġeħova kien se jibgħat fuqhom qerda taħraq.

Ħadd Ma Jistaʼ Jaħrab mill-​Ġudizzju Divin

8. Is-​sitt iġnus madwar Iżrael għala ma setgħux jaħarbu mill-​ġudizzji t’Alla?

⁸ Mingħajr ebda dubju, is-​sitt iġnus li jissemmew iktar kmieni fil-​profezija t’Għamos kien jistħoqqilhom ġudizzju divin kontrihom. Iktar minn hekk, ma setgħu jaħarbu minnu b’ebda mod. Minn Għamos kapitlu 1, vers 3 sa kapitlu 2, vers 1, Ġeħova sitt darbiet jgħid: “Ma nreġġax lura kelmti.” Hu żamm kelmtu u ma qagħadx lura milli jwettaq il-​ġudizzju tiegħu kontra dawk il-​ġnus. Huwa fatt storiku li iktar tard kull wieħed minn dawn il-​ġnus sofra gwaj kbir. Biss biss, minn taʼ l-​inqas erbgħa minnhom—il-​Filistja, Mowab, Għammon, u Edom—eventwalment lanqas baqgħu jeżistu!

9. X’kien jistħoqqilhom l-​abitanti taʼ Ġuda, u għala?

⁹ Il-​profezija t’Għamos imbagħad tiffoka fuq is-​sebaʼ ġens—it-​territorju fejn kien jgħix hu, Ġuda. Għandu mnejn li s-​semmiegħa t’Għamos fis-​saltna taʼ Iżrael fit-​tramuntana baqgħu skantati jisimgħuh iħabbar ġudizzju kontra s-​saltna taʼ Ġuda. L-​abitanti taʼ Ġuda għala kien jistħoqqilhom ġudizzju kontrihom? “Għax huma telqu l-​liġi tal-​Mulej,” jgħid Għamos 2:4. Ġeħova ma injorax il-​fatt li huma minn jeddhom ma tawx kas il-​Liġi tiegħu. Skond Għamos 2:5, hu jbassar: “Għalhekk jien nibgħat nar fuq Ġuda, u naħraq il-​palazzi taʼ Ġerusalemm.”

10. Ġuda għala ma setgħetx taħrab mill-​gwaj?

¹⁰ Is-​saltna żleali taʼ Ġuda ma setgħetx taħrab il-​gwaj li kien ġej fuqha. Għas-​sebaʼ darba, Ġeħova qal: “Ma nreġġax lura kelmti.” (Għamos 2:4) Ġuda rċiviet il-​kastig imbassar meta nqerdet mill-​Babiloniżi fis-​sena 607 Q.E.K. Għal darb’oħra naraw li l-​ħżiena ma jistgħux jaħarbu mill-​ġudizzju divin.

11-13. Għamos kontra liema ġens ipprofetizza l-​ewwel, u x’tip taʼ moħqrija kienet qed issir fih?

¹¹ Il-​profeta Għamos kien għadu kif iddikjara l-​ġudizzju taʼ Ġeħova kontra sebat iġnus. Però, kulmin kien qed jaħseb li Għamos kien lesta mill-​profeziji tiegħu, kellu żball. Għamos kien fadallu ħafna x’jgħid! Primarjament, hu kien ġie mqabbad jiddikjara messaġġ aħrax taʼ ġudizzju kontra s-​saltna taʼ Iżrael b’għaxar tribujiet fit-​tramuntana. U Iżrael kien jistħoqqlu ġudizzju divin kontrih għax it-​taħsir morali u spiritwali tal-​ġens kien xi ħaġa tal-​biki.

¹² L-​ipprofetizzar taʼ Għamos kixef il-​moħqrija li kienet saret komuni fis-​saltna taʼ Iżrael. Dwar dan f’Għamos 2:6, 7 naqraw: “Dan jgħid il-​Mulej: ‘Għal tliet dnubiet taʼ Iżrael, erbgħa anzi, ma nreġġax lura kelmti, għax huma biegħu l-​bniedem ġust għall-​fidda, u l-​fqir għal żewġt iqrieq; saħqu ras l-​imsejkna mat-​trab taʼ l-​art, u għawwġu t-​triq taʼ l-​umli.’”

¹³ L-​uħud ġusti kienu qed jinbiegħu “għall-​fidda,” li possibbilment kien ifisser li l-​imħallfin kienu qed jaċċettaw il-​fidda bħala tixħim, u mbagħad jikkastigaw lill-​innoċenti. Il-​kredituri kienu qed ibigħu lill-​fqar fl-​iskjavitù għall-​prezz taʼ “żewġt iqrieq,” forsi biex iħallsu xi dejn żgħir. Nies bla ħniena tant kellhom ħerqa li ‘jisħqu’ u jumiljaw iktar lill-​“imsejkna” li dawn il-​povri nies kienu jitfgħu t-​trab fuq rashom, b’turija taʼ niket, vistu, jew umiljazzjoni. Tant kien hemm korruzzjoni tiġri mas-​saqajn li n-​nies “umli” ma kellhom ebda tama li jsibu ġustizzja.

14. Min kien qed jiġi trattat ħażin fis-​saltna taʼ Iżrael b’għaxar tribujiet?

¹⁴ Innota min kien qed jiġi trattat ħażin. Kienu l-​ġusti, il-​foqra, l-​imsejkna, u l-​umli li kienu jgħixu f’dik l-​art. Il-​patt tal-​Liġi li Ġeħova kien għamel maʼ Iżrael kien jitlob li tintwera mogħdrija maʼ min kien dgħajjef u fil-​bżonn. Madankollu, għal dawn l-​uħud fis-​saltna taʼ Iżrael b’għaxar tribujiet il-​kundizzjonijiet ma setgħux ikunu agħar milli kienu.

“Ħejji Ruħek, biex Tiltaqaʼ maʼ Alla Tiegħek”

15, 16. (a) L-​Iżraelin għala ngħataw it-​twissija: “Ħejji ruħek biex tiltaqaʼ maʼ Alla tiegħek”? (b) Għamos 9: 1, 2 kif juri li l-​ħżiena ma setgħux jaħarbu mill-​ġudizzju divin? (ċ) Xi ġralha s-​saltna taʼ Iżrael b’għaxar tribujiet fis-​sena 740 Q.E.K.?

¹⁵ Peress li l-​immoralità u dnubiet oħra kienu tkattru f’Iżrael, mhux taʼ b’xejn li l-​profeta Għamos wissa lill-​ġens ribelluż: “Ħejji ruħek, biex tiltaqaʼ maʼ Alla tiegħek.” (Għamos 4:12) Iżrael żleali ma setax jaħrab millġudizzju divin li kien ġej fuqu għaliex Ġeħova ddikjara għat-​tmien darba: “Ma nreġġax lura kelmti.” (Għamos 2:6) U għall-​midinbin li forsi jipprovaw jinħbew, Alla qal: “Ħadd minnhom ma jaħrab, ħadd minnhom ma jeħles. Jekk iħaffru f’Qiegħ l-​Art, minn hemm taħtafhom idi; jekk jitilgħu fis-​smewwiet, minn hemm inniżżilhom.”—Għamos 9:1, 2.

¹⁶ Il-​ħżiena ma setgħux jaħarbu mit-​twettiq tal-​ġudizzju taʼ Ġeħova kontrihom billi jħaffru “f’Qiegħ l-​Art,” li b’mod figurattiv ifisser li jipprovaw jinħbew fl-​iktar partijiet baxxi taʼ l-​art. Lanqas ma setgħu jaħarbu mill-​ġudizzju divin billi “jitilgħu fis-​smewwiet,” jiġifieri, li jipprovaw isibu kenn fuq muntanji għoljin. It-​twissija taʼ Ġeħova kienet ċara: M’hemmx moħba li hu ma jistax isib. Il-​ġustizzja divina kienet titlob li s-​saltna taʼ Iżrael tinżamm responsabbli għall-​aġir mill-​agħar tagħha. U dak iż-​żmien wasal tassew. Fis-​sena 740 Q.E.K.—madwar 60 sena wara li Għamos kiteb il-​profezija tiegħu—is-​saltna taʼ Iżrael waqgħet f’idejn l-​Assirjani.

Il-​Ġudizzju Divin Huwa Selettiv

17, 18. Għamos kapitlu 9 x’jikxef dwar il-​ħniena t’Alla?

¹⁷ Il-​profezija t’Għamos għenitna naraw li l-​ġudizzju divin huwa dejjem mistħoqq u ħadd ma jistaʼ jaħrab minnu. Imma l-​ktieb t’Għamos jurina wkoll li l-​ġudizzju taʼ Ġeħova huwa selettiv. Jistaħbew fejn jistaħbew, Alla jistaʼ jsib lill-​ħżiena u jagħmel ġudizzju minnhom. Hu jistaʼ wkoll isib lil uħud niedma u ġusti—dawk li jagħżel li jurihom ħniena. Din il-​lezzjoni tiġi enfasizzata b’mod mill-​isbaħ fl-​aħħar kapitlu t’Għamos.

¹⁸ Skond Għamos kapitlu 9, vers 8, Ġeħova qal: “Ma neqridx għalkollox lil dar Ġakobb.” Bħalma ninnotaw fil-​versi 13 sa 15, Ġeħova wiegħed li hu se ‘jreġġaʼ l-​poplu tiegħu għal li kien.’ Dawn l-​uħud kellhom jintwerew ħniena u jgawdu sigurtà u prosperità. “Min jaħrat jilħaq fuq min jaħsad,” wiegħed Ġeħova. Immaġina ftit—il-​ħsad tant kellu jkun abbundanti li ftit minnu kellu jkun għadu ma nġabarx sa ma jiġi ż-​żmien li jerġgħu jaħartu u jiżirgħu!

19. Xi ġralu l-​fdal minn Iżrael u Ġuda?

¹⁹ Nistgħu ngħidu li l-​ġudizzju taʼ Ġeħova kontra l-​ħżiena kemm f’Ġuda u kemm f’Iżrael kien selettiv fil-​mod kif in-​niedma u dawk b’attitudni xierqa ntwerew ħniena. Bħala twettiq taʼ din il-​wegħda taʼ restawr imniżżla f’Għamos kapitlu 9, fdal niedem minn Iżrael u Ġuda eventwalment irritorna mill-​jasar f’Babilonja fis-​sena 537 Q.E.K. Lura f’arthom l-​għażiża, dawn l-​uħud irrestawraw il-​qima pura. Fis-​sigurtà, reġgħu wkoll bnew id-​djar tagħhom u ħawlu dwieli u ġonna.

Ġej il-​Ġudizzju taʼ Ġeħova Kontra l-​Ħżiena!

20. Minn xiex għandna nħossuna ċerti issa li kkunsidrajna l-​messaġġi taʼ ġudizzju dikjarati minn Għamos?

²⁰ Din il-​ħarsa li tajna lejn il-​messaġġi taʼ ġudizzju divin li ħabbar Għamos għandha taċċertana li Ġeħova se jtemm il-​ħażen fi żmienna. Għala nistgħu nemmnuh dan? Lewwelnett, dawn il-​ġrajjiet taʼ kif Alla mexa mal-​ħżiena fil-​passat jindikaw kif se jaġixxi fi żmienna. It-​tieninett, it-​twettiq tal-​ġudizzju divin fuq is-​saltna apostata taʼ Iżrael jiżgurana li Alla se jġib qerda fuq il-​Kristjaneżmu, il-​parti dominanti taʼ “Babilonja l-​Kbira,” l-​imperu dinji taʼ reliġjon falza.—Rivelazzjoni 18:2.

21. Il-​Kristjaneżmu għala jistħoqqlu l-​ġudizzju t’Alla kontrih?

²¹ M’hemmx dubju li l-​Kristjaneżmu jistħoqqlu ġudizzju divin kontrih. Il-​fatti jitkellmu waħedhom meta naraw il-​qagħda reliġjuża u morali tal-​biki li jinsab fiha. Il-​ġudizzju taʼ Ġeħova kontra l-​Kristjaneżmu—u l-​bqija tad-​dinja taʼ Satana—huwa mistħoqq. Ukoll, ħadd ma jistaʼ jaħrab minnu, għax meta jkun il-​waqt li jsir ġudizzju, se jkun jgħodd il-​kliem f’Għamos kapitlu 9, il-​vers 1: “Ħadd minnhom ma jaħrab, ħadd minnhom ma jeħles.” Iva, jistaħbew fejn jistaħbew, Ġeħova se jsibhom.

22. Liema punti dwar il-​ġudizzju divin joħorġu ċar mit-​2 Tessalonikin 1:6-8?

²² Il-​ġudizzju divin huwa dejjem mistħoqq, ħadd ma jistaʼ jaħrab minnu, u huwa selettiv. Dan nistgħu narawh mill-​kliem taʼ l-​appostlu Pawlu: “Hu ġust min-​naħa t’Alla li jpatti bi tribulazzjoni lil dawk li jaqilgħulkom it-​tribulazzjoni, imma lilkom li ssofru t-​tribulazzjoni, serħan flimkien magħna fir-​rivelazzjoni tal-​Mulej Ġesù mis-​sema maʼ l-​anġli setgħana tiegħu f’nar iħeġġeġ, hekk kif iġib vendetta fuq dawk li ma jafux lil Alla u dawk li ma jobdux l-​aħbar tajba dwar il-​Mulej tagħna Ġesù.” (2 Tessalonikin 1:6-8) “Hu ġust min-​naħa t’Alla” li jħallas lil dawk li jistħoqqilhom ġudizzju kontrihom talli ppersegwitaw lill-​midlukin tiegħu. Dan il-​ġudizzju ħadd ma se jkun jistaʼ jaħrab minnu, għaliex il-​ħżiena mhux se jsalvaw mir-​“rivelazzjoni tal-​Mulej Ġesù mis-​sema maʼ l-​anġli setgħana tiegħu f’nar iħeġġeġ.” Il-​ġudizzju divin se jkun ukoll selettiv għaliex Ġesù se jġib vendetta “fuq dawk li ma jafux lil Alla u dawk li ma jobdux l-​aħbar tajba.” U t-​twettiq tal-​ġudizzju divin se jfarraġ lil dawk li għandhom il-​biżaʼ minn Alla u li qed ibatu t-​tribulazzjoni.

Tama għall-​Ġusti

23. Liema tama u faraġ nistgħu niksbu mill-​ktieb t’Għamos?

²³ Il-​profezija t’Għamos fiha messaġġ mill-​isbaħ taʼ faraġ u tama għal dawk li għandhom attitudni xierqa. Bħalma ġie mbassar fil-​ktieb t’Għamos, Ġeħova ma qeridx għalkollox lill-​poplu tiegħu taʼ żmien il-​qedem. Hu eventwalment reġaʼ ġabar lil uħud minn Iżrael u minn Ġuda li kienu nqabdu lsiera, ħadhom lura f’arthom, u berikhom b’sigurtà u bi prosperità abbundanti. Dan xi jfisser għal żmienna? Dan jiżgurana li waqt it-​twettiq tal-​ġudizzju divin, Ġeħova se jsib lill-​ħżiena jistaħbew fejn jistaħbew u se jsib ukoll lil dawk li jħoss li jistħoqqilhom il-​ħniena tiegħu, jgħixu fejn jgħixu fuq din l-​art.

24. Il-​qaddejja taʼ Ġeħova taʼ llum b’liema modi ġew imbierka?

²⁴ Waqt li nistennew il-​mument biex iseħħ il-​ġudizzju taʼ Ġeħova kontra l-​ħżiena, x’qed nesperjenzaw bħala l-​qaddejja leali tiegħu? Iva, Ġeħova qed iberikna bi prosperità spiritwali abbundanti ħafna! Aħna ngawdu mod taʼ qima li huwa ħieles mill-​gideb u t-​tgħawwiġ li ġab miegħu t-​tagħlim falz tal-​Kristjaneżmu. Ġeħova berikna wkoll b’abbundanza taʼ ikel spiritwali. Ftakar iżda li maʼ dawn il-​barkiet abbundanti mingħand Ġeħova taqaʼ responsabbiltà kbira fuqna. Alla jistenna li aħna nwissu lil oħrajn dwar il-​ġudizzju li ġej. Aħna nixtiequ nagħmlu dak kollu li nistgħu biex infittxu lil dawk li għandhom “attitudni xierqa lejn il-​ħajja taʼ dejjem.” (Atti 13:48) Iva, nixtiequ ngħinu lil kemm nistgħu nies biex jibbenefikaw mill-​prosperità spiritwali li qed ingawdu bħalissa. U rriduhom isalvaw fit-​twettiq tal-​ġudizzju divin li ġej fuq il-​ħżiena. M’għandniex xi ngħidu, biex ingawdu dawn il-​barkiet, irid ikollna kundizzjoni xierqa tal-​qalb. Bħalma se naraw fl-​artiklu li jmiss, dan ukoll jiġi enfasizzat fil-​profezija t’Għamos.

Int Kif Twieġeb?

• Il-​profezija t’Għamos kif turi li l-​ġudizzju taʼ Ġeħova jkun dejjem mistħoqq?

• Għamos liema prova jagħti biex juri li ħadd ma jistaʼ jaħrab mill-​ġudizzju divin?

• Il-​ktieb t’Għamos kif juri li l-​qerda mill-​ġudizzju t’Alla hija selettiva?

[Stampa f’paġna 17]

Is-​saltna taʼ Iżrael ma ħarbitx mill-​ġudizzju divin

[Stampa f’paġna 18]

Fis-​sena 537 Q.E.K., fdal minn Iżrael u Ġuda rritorna mill-​jasar f’Babilonja