Bijografija

Ferħana li Qdejt fix-​Xogħol Globali t’Edukazzjoni mill-​Bibbja

KIF RAKKONTATA MINN ANNA MATHEAKIS

Il-​vapur kien qed jaqbad. Jekk jegħreq, dan il-​vapur enormi twil 171 metru kien se jiġbidni miegħu u jidfinni taħt l-​ilma. Bdejt ngħum b’kemm għandi saħħa biex insalva, niġġieled kontra l-​kurrent qalil. L-​uniku mod kif stajt nibqaʼ fil-​wiċċ kien li nżomm maʼ ġakketta tas-​salvataġġ li kienet liebsa mara oħra. Tlabt lil Alla għas-​saħħa u l-​kuraġġ. Ma stajt nagħmel xejn iktar.

KIENET is-​sena 1971, u kont fi triqti lura lejn it-​tielet inkarigu missjunarju li kelli, l-​Italja. F’dak in-​nawfraġju tlift kważi kulma kelli. Imma ma tliftx l-​iktar affarijiet importanti​—ħajti, il-​fratellanza Kristjana taʼ mħabba, u l-​privileġġ li naqdi lil Ġeħova. Dan il-​privileġġ kien diġà ħadni fi tliet kontinenti differenti, u n-​nawfraġju kien biss inċident wieħed f’ħajja mimlija ġrajjiet drammatiċi.

Jien twilidt fl-​1922. Il-​familja tiegħi kienet tgħix f’Rām Allāh, madwar għaxar mili ’l fuq minn Ġerusalemm. Il-​ġenituri tiegħi kienu t-​tnejn mill-​gżira taʼ Kreta, imma missieri ġie mrobbi ġo Nazaret. Fost ħuti jien kont l-​iżgħar minn tliet subien u żewġt ibniet. Il-​familja tiegħi kienet mifnija bil-​mewt tat-​tieni wieħed minn ħuti s-​subien, li għereq fix-​Xmara Ġordan f’ħarġa maʼ taʼ l-​iskola. Wara din it-​traġedja ommi ma riditx toqgħod iktar ġo Rām Allāh, u għalhekk meta kelli tliet snin morna noqogħdu Ateni, fil-​Greċja.

Il-​Verità Biblika Tilħaq lill-​Familja Tagħna

Ftit wara li wasalna l-​Greċja, ħija l-​kbir, Nikos, li dak iż-​żmien kellu 22 sena, iltaqaʼ maʼ l-​Istudenti tal-​Bibbja, kif kienu magħrufin ix-​Xhieda taʼ Ġeħova dak iż-​żmien. L-​għarfien mill-​Bibbja li ħa tah ferħ kbir u żelu jaħraq għall-​ministeru Kristjan. Dan inkorla lil missieri, u għalhekk keċċa lil Nikos mid-​dar. Madankollu, meta missieri kien jivvjaġġa lejn il-​Palestina, jien, ommi, u oħti konna mmorru għal-​laqgħat Kristjani maʼ Nikos. Il-​kliem kollu entużjażmu li kienet tgħid ommi dwar l-​affarijiet kollha li tgħallmet għadu jidwi ġo widnejja sa llum. Imma ftit wara, ħakmitha l-​marda tal-​kanċer u mietet fl-​età taʼ 42 sena. Matul dak iż-​żmien diffiċli, oħti, Ariadne, bi mħabba ħadet ħsieb il-​familja tagħna. Għalkemm kienet għadha żgħira, għall-​ħafna snin taʼ wara hi kienet bħal omm għalija.

Missieri dejjem ħadni miegħu l-​Knisja Ortodossa meta kien Ateni, u wara li miet, bqajt immur il-​knisja imma mhux daqshekk spiss. Maż-​żmien, meta rajt li ma kienx hemm traċċa taʼ devozzjoni lejn Alla fil-​knisja, ma bqajtx nattendi iktar.

Wara li miet missieri, irnexxieli nsib xogħol stabbli mal-​ministeru tal-​finanzi. Ħija, però, iddedika ħajtu għax-​xogħol taʼ l-​ippridkar tas-​Saltna, u qeda għal ħafna snin fil-​Greċja. Fl-​1934 mar jgħix Ċipru. Dak iż-​żmien, ma kienx hemm Xhieda taʼ Ġeħova mgħammdin fuq dik il-​gżira, u għalhekk hu kellu l-​privileġġ li jmexxi ’l quddiem ix-​xogħol taʼ l-​ippridkar hemmhekk. Wara li żżewweġ, il-​mara tiegħu Galatia wkoll bdiet taqdi bħala ministru full-time għal ħafna snin.a Nikos spiss kien jibagħtilna kotba u rivisti bbażati fuq il-​Bibbja, imma aħna rari konna niftħuhom. Hu baqaʼ jgħix Ċipru sakemm miet.

Il-​Verità Ssir Parti minn Ħajti

Fl-​1940, George Douras, Xhud żeluż f’Ateni li kien ħabib taʼ Nikos, ġie jżurna u stidinna biex ningħaqdu maʼ grupp żgħir għal studju tal-​Bibbja f’daru. Aħna aċċettajna l-​istedina minn qalbna. Ma domniex ma bdejna naqsmu dak li konna qed nitgħallmu maʼ oħrajn. L-​għarfien mill-​Bibbja li bdejna nieħdu qanqal lili u lil oħti biex niddedikaw ħajjitna lil Ġeħova. Ariadne tgħammdet fl-​1942, u jien fl-​1943.

Meta spiċċat it-​tieni gwerra dinjija, Nikos stidinna biex immorru Ċipru, u għalhekk fl-​1945 morna noqogħdu Nikosija. Kuntrarju għall-​Greċja, ix-​xogħol taʼ l-​ippridkar ġewwa Ċipru ma kienx projbit. Fil-​ministeru, mhux biss konna mmorru minn bieb għal bieb, imma konna nagħtu xiehda fit-​toroq ukoll.

Sentejn wara, Ariadne kellha tmur lura l-​Greċja. Hemmhekk iltaqgħet mar-​raġel futur tagħha, li kien aduratur taʼ Ġeħova, u għalhekk baqgħet tgħix f’Ateni. Ftit wara, oħti u r-​raġel tagħha ħeġġewni biex immur lura l-​Greċja u naqdi fil-​ministeru full-time fil-​belt kapitali. Ladarba minn dejjem xtaqt naqdi bħala pijuniera, jien mort lura l-​Greċja, fejn kien hemm iktar bżonn.

Jinfetħu Bibien Ġodda t’Opportunitajiet

Fl-​1 taʼ Novembru, 1947, bdejt naqdi bħala pijuniera, u kont inqattaʼ 150 siegħa kull xahar fix-​xogħol taʼ l-​ippridkar. It-​territorju tal-​kongregazzjoni tagħna kien mifrux ħafna, u kien ikolli nimxi ħafna. Madankollu, gawdejt ħafna barkiet. Spiss, meta l-​pulizija kienu jsibu xi Xhieda jippridkaw jew jattendu l-​laqgħat kienu jarrestawhom. Fil-​fatt, ma tantx damu biex arrestaw lili wkoll.

Ġejt akkużata bil-​proselitiżmu, li dak iż-​żmien kien offiża serja. Inqatgħetli sentenza għal xahrejn f’ħabs tan-​nisa f’Averof ġewwa Ateni. Hemmhekk, diġà kien hemm Xhud oħra, u flimkien gawdejna sħubija Kristjana tassew sabiħa u inkuraġġanti minkejja li konna maqfulin. Wara li għaddejt is-​sentenza, bil-​ferħ komplejt ix-​xogħol taʼ pijuniera. Ħafna minn dawk li studjajt il-​Bibbja magħhom dak iż-​żmien għadhom qaddejja leali taʼ Ġeħova sa llum, u dan iġibli ferħ kbir.

Fl-1949, irċivejt stedina biex nattendi s-​16-il klassi taʼ l-​Iskola taʼ Gilgħad (Watchtower Bible School of Gilead) ġewwa l-​Istati Uniti, fejn dawk li jaqdu fis-​servizz full-time jitħarrġu għax-​xogħol missjunarju. Jien u qrabati konna se ntiru bil-​ferħ. Ippjanajt biex fis-​sajf taʼ l-​1950 nattendi konvenzjoni internazzjonali fi New York City, u mbagħad nidħol Gilgħad.

Wara li wasalt l-​Istati Uniti, kelli l-​privileġġ li naqdi għal ftit xhur fix-​xogħol tat-​tindif fil-​kwartieri ġenerali tax-​Xhieda taʼ Ġeħova fi New York City. L-​ambjent hemmhekk kien nadif, pjaċevoli, u inkuraġġanti, u kont imdawra b’aħwa rġiel u nisa li dejjem kellhom tbissima fuq wiċċhom. Dejjem se nibqaʼ ngħożż it-​tifkira tas-​sitt xhur li qattajt hemmhekk. Imbagħad, wasal iż-​żmien biex nattendi l-​Iskola taʼ Gilgħad, u l-​ħames xhur taʼ studju intensiv u tagħlim li qattajt hemm taru qishom riħ. Aħna l-​istudenti rrealizzajna kemm l-​għarfien Skritturali huwa prezzjuż u sabiħ, u dan żidilna l-​ferħ u x-​xewqa tagħna biex naqsmu maʼ oħrajn l-​għarfien tal-​verità li jagħti l-​ħajja.

L-​Ewwel Inkarigu Missjunarju Tiegħi

Fl-​iskola taʼ Gilgħad stajna nagħżlu lil min jakkumpanjana fl-​inkarigu missjunarju tagħna qabel ma nirċivuh. Ruth Hemmig (issa Bosshard), oħt mill-​aqwa, kienet is-​sieħba tiegħi. Jien u Ruth tgħidx kemm fraħna meta rċivejna l-​inkarigu tagħna f’Istanbul, it-​Turkija​—f’salib it-​toroq bejn l-​Asja u l-​Ewropa! Konna diġà nafu li x-​xogħol taʼ l-​ippridkar kien għadu projbit f’dak il-​pajjiż, imma konna ċerti li Ġeħova kien se jappoġġana.

Istanbul hija belt sabiħa b’ħafna razez u kulturi differenti. Hemmhekk sibna viżibilju taʼ swieq Torok li jbigħu minn kollox, l-​aħjar ikel minn madwar id-​dinja kollha, mużewijiet interessanti, postijiet mill-​isbaħ, u xatt il-​baħar li jsaħħrek. Iktar importanti minn hekk, sibna nies sinċieri li riedu jitgħallmu dwar Alla. Il-​grupp żgħir taʼ Xhieda f’Istanbul kien magħmul l-​iktar minn nies Armenjani, Griegi, u Lhud. Madankollu kien hemm ħafna iktar nazzjonalitajiet, u sibna li kien utli li nkunu familjari maʼ diversi lingwi, fosthom it-​Tork. Konna nieħdu pjaċir ħafna niltaqgħu maʼ nies minn nazzjonalitajiet differenti li kienu bil-​għatx għall-​verità. Ħafna minn dawn għadhom jaqdu lil Ġeħova lealment.

Sfortunatament, Ruth ma setgħetx iġġedded il-​permess biex toqgħod fil-​pajjiż, u għalhekk ma kellhiex għażla oħra ħlief li titlaq. Hi għadha taqdi fis-​servizz full-time ġewwa l-​Isvizzera. Wara dawn is-​snin kollha, għadni nimmissja l-​kumpanija pjaċevoli u inkuraġġanti tagħha.

Immur f’Parti Oħra tad-​Dinja

Fl-​1963, il-​permess tiegħi biex noqgħod it-​Turkija ma ġġeddidx. Sibtha diffiċli biex inħalli warajja lil sħabi Kristjani li kont rajthom jagħmlu progress spiritwali huma u jitħabtu maʼ ħafna diffikultajiet. Sabiex iferrħuni ftit, qrabati bil-​ġenerożità kollha ħallsuli l-​passaġġ għal New York City biex inkun nistaʼ nattendi l-​konvenzjoni hemmhekk. Sadattant, kont għadni ma rċivejtx l-​inkarigu li kien imiss.

Wara l-​konvenzjoni, ngħatajt inkarigu f’Lima, il-​Perù. Flimkien maʼ oħt żagħżugħa, li kienet se takkumpanjani, minn New York mort dritt għall-​inkarigu l-​ġdid tiegħi. Tgħallimt l-​Ispanjol u kont noqgħod fid-​dar missjunarja li kienet tinsab fuq l-​uffiċċji tal-​fergħa tax-​Xhieda taʼ Ġeħova. Kienet esperjenza sabiħa ħafna li nippriedka f’dak il-​post u li nsir naf lill-​aħwa rġiel u nisa lokali.

Inkarigu Ieħor, Lingwa Oħra

Hekk kif gerbeb iż-​żmien, qrabati fil-​Greċja bdew iħossu l-​effetti tax-​xjuħija u tan-​nuqqas taʼ saħħa. Huma qatt ma ħeġġewni biex nieqaf mis-​servizz full-time u mmur lura għall-​‘ħajja normali’ sabiex ngħinhom. Però, wara ħafna ħsieb u talb, irrealizzajt li jkun aħjar jekk immur naqdi xi mkien iktar qrib il-​familja. L-​aħwa responsabbli bi mħabba qablu maʼ dan u tawni inkarigu fl-​Italja, u qrabati offrew li jħallsuli l-​ispejjeż biex immur hemm. Ġara li anki fl-​Italja kien hemm bżonn kbir għal evanġelizzaturi.

Għal darb’oħra kelli nitgħallem lingwa ġdida​—it-​Taljan. L-​ewwel inkarigu tiegħi kien fil-​belt taʼ Foggia. Imbagħad intbgħatt Napli, fejn kien hemm iktar bżonn. It-​territorju tiegħi kien Posilipo, wieħed mill-​isbaħ postijiet f’Napli. Kien vast ħafna, u kien hemm pubblikatur tas-​Saltna wieħed biss. Kont tassew nieħu pjaċir fix-​xogħol, u Ġeħova għenni nibda ħafna studji tal-​Bibbja. Maż-​żmien, żviluppat kongregazzjoni kbira f’dawk l-​inħawi.

Fost l-​ewwel nies lokali li studjajt il-​Bibbja magħhom kien hemm omm u l-​erbat itfal tagħha. Hi u ż-​żewġt ibniet tagħha għadhom jaqdu bħala Xhieda taʼ Ġeħova. Studjajt ukoll maʼ koppja miżżewġa li kellha tifla żgħira. Il-​membri tal-​familja kollha għamlu progress fil-​verità u lkoll issimbolizzaw id-​dedikazzjoni tagħhom bil-​magħmudija fl-​ilma. Issa, it-​tifla hija miżżewġa lil ħu li hu qaddej leali taʼ Ġeħova, u flimkien qegħdin jaqdu lil Ġeħova biż-​żelu. Meta kont nistudja maʼ familja numeruża oħra, bqajt tassew impressjonata bil-​qawwa tal-​Kelma t’Alla. Meta qrajna diversi skritturi li juru li Alla ma japprovax il-​qima permezz tax-​xbihat, l-​omm lanqas biss qagħdet tistenna li jispiċċa l-​istudju. Ħabta u sabta qamet u ħelset mix-​xbihat kollha li kellha fid-​dar!

F’Perikli fil-​Baħar

Meta kont nivvjaġġa bejn l-​Italja u l-​Greċja, dejjem kont immur bil-​vapur. Normalment il-​vjaġġ kien ikun sabiħ ħafna. Imma vjaġġ minnhom, fis-​sajf taʼ l-​1971, kien differenti. Kont qed nivvjaġġa lura lejn l-​Italja fuq vapur tal-​passiġġieri bl-​isem Heleanna. Kmieni fl-​għodwa tat-​28 t’Awissu, il-​kċina tal-​vapur ħadet in-​nar. In-​nar beda jinfirex, u l-​paniku fost il-​passiġġieri kiber ukoll. In-​nisa bdew iħossuhom ħażin, it-​tfal bdew jibku, u l-​irġiel bdew jilmentaw u jheddu bl-​aħrax. In-​nies bdew jiġru lejn kull naħa tal-​vapur għad-​dgħajjes tas-​salvataġġ. Madankollu, ma kienx hemm biżżejjed ġkieket tas-​salvataġġ, u l-​mekkaniżmu li jniżżel id-​dgħajjes fil-​baħar ma ħadimx sew. Jien ma kellix ġakketta tas-​salvataġġ, imma l-​fjammi bdew dejjem jogħlew, u għalhekk l-​unika ħaġa prattika li stajt nagħmel kienet li naqbeż il-​baħar.

Hekk kif sibt ruħi fl-​ilma, ilmaħt mara liebsa ġakketta tas-​salvataġġ iżżomm fil-​wiċċ ħdejja. Milli jidher ma kinitx taf tgħum, u għalhekk qbadtha minn idha biex niġbidha ’l bogħod mill-​vapur li kien qed jegħreq. Il-​baħar beda dejjem jitqanqal iktar, u l-​ġlieda biex nibqaʼ fil-​wiċċ bdiet tegħjini ħafna. Is-​sitwazzjoni kienet tidher bla tama, imma jien bqajt nitlob bil-​ħniena lil Ġeħova għall-​kuraġġ, u dan tani s-​saħħa. Ma stajtx ma niftakarx fin-​nawfraġju li għadda minnu l-​appostlu Pawlu.​—Atti, kapitlu 27.

Hekk kif bqajt inżomm maʼ dik il-​mara, iġġilidt mal-​mewġ għal erbaʼ sigħat sħaħ, ngħum x’ħin inkun niflaħ u nitlob lil Ġeħova għall-​għajnuna. Fl-​aħħar, rajt dingi riesaq lejna. Lili salvawni, imma l-​mara li kienet miegħi kienet diġà mietet. Meta wasalna fil-​belt taʼ Bari, l-​Italja, ħaduni fi sptar fejn irċivejt l-​ewwel għajnuna. Kelli nibqaʼ lisptar għal xi ġranet, u ħafna Xhieda ġew iżuruni, u b’qalb tajba pprovdewli dak li kelli bżonn. L-​imħabba Kristjana li wrew miegħi ħalliet impressjoni kbira fuq dawk li kienu fil-​kamra miegħi fl-​isptar.b

Wara li rkuprajt kompletament, ngħatajt inkarigu f’Ruma. Ġejt mitluba naħdem it-​territorju taʼ negozju fiċ-​ċentru tal-​belt, u dan għamiltu għal ħames snin, bl-​għajnuna taʼ Ġeħova. Għal iktar minn 20 sena, gawdejt il-​ministeru fl-​Italja, u sirt inħobb lin-​nies Taljani.

Lura Minfejn Bdejt

Maż-​żmien, is-​saħħa taʼ Ariadne u r-​raġel tagħha qalbet għall-​agħar. Irrealizzajt li jekk immur noqgħod qribhom, stajt b’xi mod inpatti għal dak kollu li huma għamlu għalija b’tant imħabba. Irrid nammetti li kien taʼ qsim il-​qalb għalija biex nitlaq mill-​Italja. Madankollu, l-​aħwa responsabbli taw il-​kunsens tagħhom, u issa ili sa mill-​1985 naqdi bħala pijuniera f’Ateni, fejn kont bdejt is-​servizz full-time tiegħi fl-​1947.

Kont nippriedka fit-​territorju inkarigat lill-​kongregazzjoni tiegħi stess, u jien staqsejt lill-​uffiċċju tal-​fergħa jekk stajtx nippriedka fit-​territorju taʼ negozju fiċ-​ċentru tal-​belt. Dan bqajt nagħmlu għal tliet snin maʼ pijuniera li kienet takkumpanjani. Stajna nagħtu xiehda bir-​reqqa lil nies li rari kont issibhom id-​dar.

Madankollu, iktar ma jgerbeb iż-​żmien, ix-​xewqa tiegħi biex naqdi tibqaʼ dejjem tiġġedded imma s-​saħħa fiżika tiegħi le. Issa r-​raġel t’oħti jinsab rieqed fil-​mewt. Ariadne, li għalija kienet bħallikieku omm, tilfet id-​dawl t’għajnejha. Ngħid għalija, saħħti kienet tajba meta kont fis-​servizz full-time. Iżda dan l-​aħħar waqajt taraġ taʼ l-​irħam u ksirt idi l-​leminija. Imbagħad waqajt u ksirt l-​għadam taʼ ġenbejja. Kelli niġi operata u nibqaʼ fis-​sodda għal żmien twil. Issa ma nistax immur fejn irrid bil-​libertà. Nuża bastun u nistaʼ noħroġ biss jekk xi ħadd jakkumpanjani. Xorta waħda, nagħmel l-​aħjar li nistaʼ filwaqt li nittama li l-​kundizzjoni fiżika tiegħi titjieb. Sa llum, is-​sors primarju għall-​ferħ u s-​sodisfazzjon li nikseb għadu jiġi mis-​sehem tiegħi fix-​xogħol t’edukazzjoni mill-​Bibbja, anki jekk b’mod limitat.

Meta niftakar fis-​snin taʼ ferħ li qattajt fil-​ministeru full-time, qalbi timtela bi gratitudni lejn Ġeħova. Hu, flimkien maʼ l-​organizzazzjoni li għandu fuq l-​art, ipprovda direzzjoni taʼ min joqgħod fuqha u assistenza prezzjuża, u dan għenni biex nuża l-​potenzjal kollu tiegħi hekk kif qattajt ħajti naqdih. Ix-​xewqa taʼ qalbi hija li Ġeħova jsaħħaħni biex inkompli fis-​servizz tiegħu. Jien ferħana għas-​sehem żgħir li tajt fix-​xogħol globali t’edukazzjoni mill-​Bibbja li qiegħed jidderieġi hu.​—Malakija 3:​10.

[Noti taʼ taħt]

[Stampa f’paġna 9]

Maʼ oħti, Ariadne, u żewġha, Michalis, meta kont se nitlaq għal Gilgħad

[Stampa f’paġna 10]

Ruth Hemmig u jien ngħatajna inkarigu f’Istanbul, it-​Turkija

[Stampa f’paġna 11]

Fl-​Italja, fil-​bidu tas-​snin 70

[Stampa f’paġna 12]

Illum, maʼ oħti, Ariadne