Il-​Kristjani Jirriflettu l-​Glorja taʼ Ġeħova

“Henjin għajnejkom għax jaraw, u widnejkom għax jisimgħu.”​ —MATTEW 13:16.

1. Liema mistoqsija tqum rigward ir-​reazzjoni taʼ l-​Iżraelin għal Mosè ħdejn il-​Muntanja Sinaj?

L-​IŻRAELIN li kienu miġburin ħdejn il-​Muntanja Sinaj kellhom kull raġun biex jersqu qrib lejn Ġeħova. Wara kollox, hu kien ħelishom mill-​Eġittu b’id setgħana. Hu ħa ħsieb il-​bżonnijiet tagħhom, ipprovdielhom ikel u ilma fix-​xagħri. Imbagħad, tahom rebħa fuq l-​armata taʼ l-​Għamalekin li kienu qed jattakkawhom. (Eżodu 14:​26-​31; 16:2–​17:13) Hekk kif ikkampjaw fit-​tined fix-​xagħri ħdejn il-​Muntanja Sinaj, in-​nies tant kienu beżgħanin minħabba r-​ragħad u s-​sajjetti li bdew jirtogħdu bil-​biżaʼ. Iktar tard, raw lil Mosè nieżel mill-​Muntanja Sinaj b’wiċċu jirrifletti l-​glorja taʼ Ġeħova. Madankollu, minflok ma wieġbu bi stagħġib u apprezzament, huma tbiegħdu. “Beżgħu jersqu [lejn Mosè].” (Eżodu 19:​1-​19; 34:30) Għala beżgħu jaraw din ir-​riflessjoni tal-​glorja taʼ Ġeħova, il-​wieħed li kien għamel tant għalihom?

2. X’għandha mnejn kienet ir-​raġuni għala l-​Iżraelin beżgħu meta raw il-​glorja t’Alla li rrifletta Mosè?

² X’aktarx, ħafna mill-​biżaʼ taʼ l-​Iżraelin f’din l-​okkażjoni kellu x’jaqsam maʼ dak li ġara qabel. Meta minn jeddhom kienu diżubbidjenti lejn Ġeħova billi għamlu għoġol tad-​deheb, hu ddixxiplinahom. (Eżodu 32:​4, 35) Tgħallmu u apprezzaw huma d-​dixxiplina taʼ Ġeħova? Il-​maġġuranza minnhom le. Lejn tmiem ħajtu, Mosè fakkarhom dwar il-​ġrajja taʼ l-​għoġol tad-​deheb flimkien m’okkażjonijiet oħra fejn l-​Iżraelin urew diżubbidjenza. Hu qal lill-​poplu: “Intom merejtu l-​kelma tal-​Mulej, Alla tagħkom, u ma fdajtuhx, u ma smajtux minn kliemu. Kontu dejjem stinati mal-​Mulej, sa minn mindu għaraftkom.”​—Dewteronomju 9:​15-​24.

3. Mosè meta kien jilbes il-​velu u meta kien ineħħih?

³ Ikkunsidra kif irreaġixxa Mosè għall-​biżaʼ li wrew l-​Iżraelin. Ir-​rakkont jgħid: “Meta Mosè temm jitkellem magħhom, għatta wiċċu b’velu. Imma meta kien jidħol quddiem il-​Mulej [fit-tabernaklu] biex jitkellem miegħu, Mosè kien ineħħi l-​velu sa ma kien joħroġ. Meta mbagħad kien joħroġ, kien jgħid lil ulied Iżrael kull ma kien ordnalu l-​Mulej. Meta wlied Iżrael kienu jħarsu lejn Mosè, kienu jarawlu l-​ġilda taʼ wiċċu tiddi, u Mosè kien jerġaʼ jqiegħed il-​velu fuq wiċċu sa ma jerġaʼ jidħol jitkellem [maʼ Ġeħova].” (Eżodu 34:​33-​35) Mosè għala kultant għatta wiċċu b’velu? X’nistgħu nitgħallmu minn dan? It-​tweġibiet għal dawn il-​mistoqsijiet jistgħu jgħinuna neżaminaw ir-​relazzjoni tagħna maʼ Ġeħova.

Opportunitajiet Mitlufin

4. L-​appostlu Pawlu liema tifsir kixef dwar il-​fatt li Mosè libes il-​velu?

⁴ L-​appostlu Pawlu spjega li l-​fatt li Mosè libes il-​velu kellu x’jaqsam maʼ l-​imħuħ u l-​kundizzjoni tal-​qalb taʼ l-​Iżraelin infushom. Pawlu kiteb: “Ulied Iżrael ma setgħux iħarsu fiss lejn wiċċ Mosè minħabba l-​glorja taʼ wiċċu . . . Il-​qawwa mentali tagħhom kienet imdallma.” (2 Korintin 3:​7, 14) X’sitwazzjoni tal-​biki! L-​Iżraelin kienu l-​ġens magħżul taʼ Ġeħova, u hu riedhom jersqu qrib lejh. (Eżodu 19:​4-6) Però, huma żammew lura milli jħarsu bir-​reqqa lejn ir-​riflessjoni tal-​glorja t’Alla. Minflok ma dawru qalbhom u moħħhom lejn Ġeħova f’devozzjoni kollha mħabba, huma f’ċertu sens tawh daharhom.

5, 6. (a) Liema parallel kien hemm bejn il-​Lhud taʼ l-​ewwel seklu u l-​Iżraelin fi żmien Mosè? (b) Liema kuntrast kien hemm bejn dawk li semgħu lil Ġesù u dawk li ma tawx kas?

⁵ F’dan l-​aspett, naraw parallel fl-​ewwel seklu E.K. Sakemm Pawlu kkonverta għall-​Kristjanità, il-​patt tal-​Liġi kien ġie mibdul mal-​patt il-​ġdid, permezz taʼ Ġesù Kristu, Mosè Akbar. Ġesù rrifletta l-​glorja taʼ Ġeħova b’mod perfett kemm fil-​kliem u kemm fl-​għemil. Pawlu kiteb dan dwar Ġesù rxoxtat: “Hu r-​riflessjoni tal-​glorja [t’Alla] u r-​rappreżentazzjoni eżatta taʼ l-​istess natura tiegħu.” (Ebrej 1:3) X’opportunità taʼ l-​għaġeb kellhom il-​Lhud! Huma setgħu jisimgħu l-​kliem tal-​ħajja taʼ dejjem mingħand l-​Iben t’Alla nnifsu! B’dispjaċir, il-​maġġuranza minn dawk li Ġesù ppridkalhom ma tawx kas. Rigward dawn, Ġesù kkwota l-​profezija taʼ Ġeħova permezz taʼ Isaija: “Għax qalb dan il-​poplu bbieset; saru tqal biex jisimgħu b’widnejhom, u għalqu għajnejhom; hekk qatt ma se jaraw b’għajnejhom u jisimgħu b’widnejhom u jifhmu dan bi qlubhom u jduru lura, u jien infejjaqhom.”​—Mattew 13:15; Isaija 6:​9, 10.

⁶ Kien hemm kuntrast kbir bejn il-​Lhud u d-​dixxipli taʼ Ġesù, li dwarhom Ġesù qal: “Henjin għajnejkom għax jaraw, u widnejkom għax jisimgħu.” (Mattew 13:16) Il-​Kristjani veri jixxennqu li jsiru jafu u jaqdu lil Ġeħova. Huma jitgħaxxqu f’li jwettqu r-​rieda tiegħu, kif inhi miktuba fil-​paġni tal-​Bibbja. B’riżultat taʼ dan, il-​Kristjani midlukin jirriflettu l-​glorja taʼ Ġeħova fil-​ministeru tagħhom tal-​patt il-​ġdid, u dawk tan-​nagħaġ oħra jagħmlu l-​istess.​—2 Korintin 3:​6, 18.

Għala l-​Aħbar Tajba Hija Moħbija b’Velu

7. Għala mhix sorpriża li l-​maġġuranza jiċħdu l-​aħbar tajba?

⁷ Bħalma rajna, kemm fi żmien Ġesù u kemm fi żmien Mosè, il-​maġġuranza mill-​Iżraelin ċaħdu l-​opportunità unika li kien hemm quddiemhom. Huwa simili fi żmienna. Il-​maġġuranza min-​nies jiċħdu l-​aħbar tajba li nippridkaw. Dan ma jissorprendiniex. Pawlu kiteb: “Issa, jekk l-​aħbar tajba li nxandru hi tassew moħbija b’velu, hi moħbija għal dawk li qed jinqerdu, li fosthom l-​alla taʼ din is-​sistema għema l-​imħuħ taʼ dawk li ma jemmnux.” (2 Korintin 4:​3, 4) Flimkien maʼ l-​isforzi taʼ Satana biex jaħbi l-​aħbar tajba, ħafna nies jaħbu wiċċhom stess b’velu għaliex ma jridux jaraw.

8. B’liema mod hemm ħafna għomja bl-​injoranza, u kif nistgħu nevitaw li niġu effettwati bl-​istess mod?

⁸ L-​għajnejn figurattivi taʼ ħafna huma għomja bl-​injoranza. Il-​Bibbja titkellem dwar il-​ġnus bħala li huma “fi dlam mentali u mbegħdin mill-​ħajja li jagħti Alla, minħabba l-​injoranza li tinsab fihom.” (Efesin 4:​18) Qabel ma sar Kristjan, Pawlu, raġel mgħallem fil-​Liġi, tant kien agħma bl-​injoranza li ppersegwita lill-​kongregazzjoni t’Alla. (1 Korintin 15:9) Madankollu, Ġeħova wrieh il-​verità. Pawlu jispjega: “Ir-​raġuni għala ntwerejt ħniena kienet li permezz tiegħi, bħala l-​iktar midneb li jispikka, Kristu Ġesù juri l-​paċenzja kollha tiegħu bħala mudell għal dawk li se jqiegħdu l-​fidi tagħhom fih għall-​ħajja taʼ dejjem.” (1 Timotju 1:​16) Bħal Pawlu, ħafna li darba kienu jopponu l-​verità t’Alla issa qed jaqdu Lilu. Din hija raġuni tajba biex nibqgħu nagħtu xiehda anki lil dawk li jopponuna. Sadanittant, billi nistudjaw il-​Kelma t’Alla regolarment u nifhmuha, aħna niġu protetti milli naġixxu bl-​injoranza b’mod li jġib id-​diżapprovazzjoni taʼ Ġeħova.

9, 10. (a) Il-Lhud taʼ l-​ewwel seklu kif urew li ma kinux lesti jitgħallmu u li kienu riġidi fl-​opinjonijiet tagħhom? (b) Hemm xi xebh fil-​Kristjaneżmu llum? Spjega.

⁹ Ħafna ma jistgħux jifhmu l-​affarijiet spiritwali b’mod ċar minħabba li m’humiex lesti li jitgħallmu u huma riġidi fl-​opinjonijiet tagħhom. Ħafna Lhud ċaħdu lil Ġesù u t-​tagħlim tiegħu minħabba li żammew sod mal-​Liġi Mosajka. M’għandniex xi ngħidu, kien hemm eċċezzjonijiet. Per eżempju, wara li Ġesù ġie rxoxtat, “folla kbira taʼ qassisin bdew jobdu l-​fidi.” (Atti 6:7) Minkejja dan, rigward il-​maġġuranza mil-​Lhud, Pawlu kiteb: “Sa llum, kulmeta jinqara Mosè, ikollhom velu fuq qlubhom.” (2 Korintin 3:​15) Pawlu x’aktarx kien jaf dak li Ġesù kien qal qabel lill-​mexxejja reliġjużi Lhud: “Qed tfittxu fl-​Iskrittura, għax taħsbu li permezz tagħha jkollkom il-​ħajja taʼ dejjem; u din stess tixhed dwari.” (Ġwanni 5:​39) It-​tfittxija tant bir-​reqqa li għamlu fl-​Iskrittura jmissha għenithom jifhmu li Ġesù kien il-​Messija. Però, il-​Lhud kellhom l-​ideat tagħhom, u lanqas l-​Iben t’Alla li għamel tant mirakli ma setaʼ jipperswadihom ibiddlu ħsibijiethom.

¹⁰ L-​istess huwa minnu għal ħafna minn dawk fil-​Kristjaneżmu llum. Bħal-​Lhud taʼ l-​ewwel seklu, “għandhom żelu għal Alla, imma mhux skond l-​għarfien eżatt.” (Rumani 10:2) Għalkemm xi wħud jistudjaw il-​Bibbja, ma jridux jemmnu dak li tgħid. Huma jirrifjutaw li jaċċettaw li Ġeħova jgħallem lill-​poplu tiegħu permezz tal-​klassi taʼ l-​ilsir leali u għaqli taʼ Kristjani midlukin. (Mattew 24:45) Però, aħna nifhmu li Ġeħova qed jgħallem lill-​poplu tiegħu u li l-​fehma tal-​veritajiet t’Alla minn dejjem kienet progressiva. (Proverbji 4:​18) Billi nħallu lilna nfusna niġu mgħallmin minn Ġeħova, aħna niġu mberkin bl-​għarfien tar-​rieda u l-​iskop tiegħu.

11. Il-​fatt li ħafna jemmnu dak li jridu jemmnu, xi rwol kellu biex il-​verità tibqaʼ moħbija?

¹¹ Oħrajn jagħmew minħabba li jemmnu biss dak li jridu jemmnu. Kien imbassar li xi wħud kienu se jwaqqgħu għaċ-​ċajt lill-​poplu t’Alla u l-​messaġġ li jipproklamaw rigward il-​preżenza taʼ Ġesù. L-​appostlu Pietru kiteb: “Skond ix-​xewqa tagħhom, huma jagħlqu għajnejhom għal dan il-​fatt,” jiġifieri li Alla ġab dilluvju fuq id-​dinja taʼ żmien Noè. (2 Pietru 3:​3-6) B’mod simili, ħafna li jistqarru li huma Kristjani huma lesti biex jirrikonoxxu li Ġeħova juri ħniena, qalb tajba, u maħfra; madankollu, jinjoraw jew jiċħdu l-​fatt li jikkastiga l-​ħażen. (Eżodu 34:​6, 7) Il-​Kristjani veri jagħmlu sforzi sinċieri biex jifhmu dak li tgħallem verament il-​Bibbja.

12. Xi wħud kif saru għomja minħabba t-​tradizzjonijiet?

¹² Ħafna wħud li jmorru l-​knisja huma għomja minħabba t-​tradizzjoni. Lill-​mexxejja reliġjużi fi żmienu, Ġesù qal: “Il-​kelma t’Alla ġibtuha fix-​xejn minħabba t-​tradizzjoni tagħkom.” (Mattew 15:​6) B’żelu, il-​Lhud reġgħu rrestawraw il-​qima pura wara li rritornaw mill-​eżilju f’Babilonja, però l-​qassisin stess saru kburin u ġusti f’għajnejhom stess. Il-​festi reliġjużi bdew isiru għal għajn in-​nies, neqsin minn riverenza ġenwina għal Alla. (Malakija 1:​6-8) Sa żmien Ġesù, l-​iskribi u l-​Fariżej kienu żiedu numru kbir taʼ tradizzjonijiet mal-​Liġi Mosajka. Ġesù espona dawn l-​irġiel minħabba li ma setgħux jagħrfu l-​prinċipji ġusti li l-​Liġi kienet ibbażata fuqhom. (Mattew 23:​23, 24) Il-​Kristjani veri għandhom jagħmlu ċert li ma jħallux tradizzjonijiet reliġjużi li vvintaw il-​bnedmin ifixkluhom mill-​qima pura.

“Qed Jara lil Dak li Hu Inviżibbli”

13. Mosè b’liema żewġ modi ra ftit mill-​glorja t’Alla?

¹³ Mosè staqsa biex jara l-​glorja t’Alla fuq il-​muntanja, u ra r-​raġġi taʼ wara tal-​glorja taʼ Ġeħova. Meta kien jidħol fit-​tabernaklu ma kienx jilbes il-​velu. Mosè kien raġel taʼ fidi kbira li xtaq jagħmel ir-​rieda t’Alla. Għalkemm ġie mbierek billi ra ftit mill-​glorja taʼ Ġeħova b’għajnejh, f’ċertu sens kien diġà ra lil Alla bl-​għajnejn tal-​fidi. Il-​Bibbja tgħid li Mosè “baqaʼ sod bħallikieku qed jara lil Dak li hu inviżibbli.” (Ebrej 11:27; Eżodu 34:​5-7) U hu rrifletta l-​glorja t’Alla mhux biss minn dawk ir-​raġġi li kienu ħerġin minn wiċċu għal xi żmien imma wkoll permezz taʼ l-​isforzi tiegħu biex jassisti lill-​Iżraelin ħalli jsiru jafu u jaqdu lil Ġeħova.

14. Ġesù kif ra l-​glorja t’Alla, u fiex kienet l-​għaxqa tiegħu?

¹⁴ Fis-​sema, Ġesù ra l-​glorja t’Alla direttament għal żmien twil ħafna, qabel ma ġie maħluq l-​univers. (Proverbji 8:​22, 30) Matul dak iż-​żmien kollu, żviluppat relazzjoni kollha mħabba u affezzjoni. Alla Ġeħova esprima l-​iktar imħabba tenera u affezzjoni għall-​ewwel imwieled tal-​ħolqien kollu. Ġesù esprima lura l-​imħabba kbira u l-​affezzjoni li kellu għal Alla, il-​Wieħed li tah il-​ħajja. (Ġwanni 14:31; 17:24) L-​imħabba tagħhom lejn xulxin kienet imħabba perfetta bejn Missier u Iben. Ġesù, bħal Mosè, tgħaxxaq f’li jirrifletti l-​glorja taʼ Ġeħova f’dak li għallem.

15. Il-​Kristjani b’liema modi jirriflettu l-​glorja t’Alla?

¹⁵ Bħal Mosè u Ġesù, ix-​Xhieda t’Alla llum fuq l-​art huma ħerqanin biex jirriflettu l-​glorja taʼ Ġeħova. Ma tawx daharhom għall-​aħbar tajba glorjuża. L-​appostlu Pawlu kiteb: “Meta jduru lejn Ġeħova [biex jagħmlu r-​rieda tiegħu], il-​velu jitneħħa.” (2 Korintin 3:​16) Aħna nistudjaw l-​Iskrittura għax nixtiequ nagħmlu r-​rieda t’Alla. Nammiraw il-​glorja li hi riflessa f’wiċċ Ġesù Kristu, l-​Iben taʼ Ġeħova u s-​Sultan midluk, u nimitaw l-​eżempju tiegħu. Bħal Mosè u bħal Ġesù, aħna ġejna mberkin b’ministeru, jiġifieri li ngħallmu lil oħrajn dwar l-​Alla glorjuż li aħna nqimu.

16. Għala aħna mberkin mill-​fatt li nafu l-​verità?

¹⁶ Ġesù talab: “Jien infaħħrek quddiem kulħadd, Missier, . . . għax int ħbejt dawn l-​affarijiet mill-​għorrief u l-​intellettwali u kxifthom liċ-​ċkejknin.” (Mattew 11:25) Ġesù jagħti fehma taʼ l-​iskopijiet u l-​personalità tiegħu lil dawk li huma sinċieri u umli f’qalbhom. (1 Korintin 1:​26-​28) Aħna ġejna taħt il-​protezzjoni tiegħu, u hu jgħallimna għall-​ġid tagħna​—biex niksbu l-​aħjar mill-​ħajja. Jalla nieħdu vantaġġ minn kull opportunità biex nersqu qrib lejn Ġeħova, billi napprezzaw il-​ħafna provvedimenti tiegħu biex insiru nafuh b’mod iktar mill-​qrib.

17. Kif nistgħu nsiru nafu l-​kwalitajiet taʼ Ġeħova iktar bis-​sħiħ?

¹⁷ Lill-​Kristjani midlukin Pawlu kiteb: “Waqt li b’wiċċna mingħajr velu nirriflettu bħall-​mirja l-​glorja taʼ Ġeħova [u] nitbiddlu fl-​istess xbieha minn glorja għal glorja.” (2 Korintin 3:​18) Kemm jekk it-​tama tagħna hi għas-​sema u kemm jekk hi għall-​art, iktar kemm insiru nafu lil Ġeħova​—il-​kwalitajiet u l-​personalità tiegħu kif jintwerew fil-​Bibbja—iktar insiru bħalu. Jekk b’apprezzament nistudjaw u naħsbu dwar il-​ħajja, il-​ministeru, u t-​tagħlim taʼ Ġesù Kristu, se nirriflettu l-​kwalitajiet taʼ Ġeħova iktar bis-​sħiħ. Kemm aħna ferħanin li nġibu tifħir lil Alla tagħna u li nipprovaw nirriflettu l-​glorja tiegħu!

X’Tiftakar?

• L-​Iżraelin għala beżgħu jaraw il-​glorja t’Alla li kien qed jirrifletti Mosè?

• L-​aħbar tajba b’liema modi kienet “moħbija b’velu” fl-​ewwel seklu? u fi żmienna?

• Kif nirriflettu l-​glorja t’Alla?

[Stampa f’paġna 19]

L-​Iżraelin ma setgħux iħarsu lejn wiċċ Mosè

[Stampi f’paġna 21]

Bħal Pawlu, ħafna li darba opponew il-​verità t’Alla issa qed jaqdu Lilu

[Stampi f’paġna 23]

Il-​qaddejja taʼ Ġeħova jitgħaxxqu f’li jirriflettu l-​glorja t’Alla