L-​Istaġun tal-​Festi—Se Jkun Kif Tixtieq Int?

“Pietru [il-Kbir] ordna li fil-​knejjes kollha jsiru ċerimonji speċjali għas-​Sena l-​Ġdida fl-​1 taʼ Jannar. Iktar minn hekk, hu ordna li z-​zkuk tas-​siġar tar-​ruvlu jintużaw biex iżejnu l-​ġnub tal-​bibien ġewwa d-​djar, u kkmanda li ċ-​ċittadini kollha taʼ Moska kellhom ‘juru l-​hena tagħhom billi jgħajtu l-​isbaħ xewqat’ lil xulxin fis-​Sena l-​Ġdida.” —Peter the Great—His Life and World.

LEJN xiex qed tħares ’il quddiem matul dak li ħafna jsejħulu l-​istaġun tal-​festi? In-​nies madwar id-​dinja jgħidu li l-​istaġun jiffoka fuq il-​Milied, il-​jum tradizzjonali tat-​twelid taʼ Kristu, imma jinkludi wkoll iċ-​ċelebrazzjoni tas-​Sena l-​Ġdida. Allura dan hu perijodu mtawwal taʼ ffesteġġjar. Kemm il-​ġenituri u kemm it-​tfal għandhom mnejn ikunu bil-​vaganzi f’dan iż-​żmien, u allura jistaʼ jidher bħala okkażjoni ideali għall-​familji biex iqattgħu l-​ħin flimkien. Oħrajn, però, jirreferu għal dan l-​istaġun bħala “l-​istaġun tal-​Milied,” ladarba huma jixtiequ jonoraw lil Kristu f’dan iż-​żmien tas-​sena. Forsi int ukoll tħoss li dan hu l-​iktar aspett importanti taʼ l-​istaġun.

Kemm jekk biex jonoraw lil Kristu u kemm jekk biex igawdu l-​familja tagħhom, jew it-​tnejn, miljuni taʼ rġiel u nisa miżżewġin u tfal madwar id-​dinja jistennew dan iż-​żmien b’ħerqa kbira. Xi ngħidu għal din is-​sena? Se jkun dan żmien speċjali għall-​familja, u huwa dan żmien speċjali għal Alla? Jekk il-​familja tinġabar flimkien, se jmur kollox kif tixtieq int, jew se tispiċċa diżappuntat?

Ħafna li jħarsu lejn l-​aspett reliġjuż jinnotaw li kemm il-​Milied u kemm is-​Sena l-​Ġdida spiss jiġu ċelebrati b’kollox minbarra bl-​ispirtu taʼ Kristu. Minflok, l-​istaġun tal-​festi jsir sempliċi żmien biex jaqilgħu r-​rigali, skuża biex issir festa li tistaʼ tinkludi mġiba li ma ġġibx unur lil Kristu, jew raġuni ewlenija biex il-​familja tiltaqaʼ flimkien. Ħafna drabi, dawn il-​laqgħat jitħassru minħabba xi membru jew tnejn li jieklu jew jixorbu żżejjed, u jispiċċaw jaqilgħu l-​argumenti li spiss iqanqlu l-​vjolenza domestika. Jistaʼ jkun li nnotajt dawn l-​affarijiet, jew forsi għaddejt minnhom int stess.

Jekk inhu hekk, forsi tħoss li ftit li xejn saru bidliet minn żmien il-​Kżar Russu Pietru l-​Kbir, li ddeskrivejna fil-​bidu. Minħabba li jħossuhom imdejqin bid-​drawwa komuni, ħafna jixtiequ li l-​istaġun tal-​festi jkun żmien taʼ meditazzjoni reliġjuża profonda u sħubija li tibni mal-​familja. Xi wħud saħansitra jaħdmu iebes biex iġibu bidla, u jużaw frażijiet bħal, Ġesù hu r-​raġun taʼ l-​istaġun. Imma jistaʼ jsir xi tibdil? U dan tassew li jġib unur lil Kristu? Għandek għalfejn ikollok ħarsa differenti lejn l-​istaġun tal-​festi?

Biex insibu tweġibiet sodisfaċenti, ejja naraw is-​sitwazzjoni mill-​ħarsa tan-​nies taʼ ġens wieħed li għandhom ikollhom raġuni speċjali biex japprezzaw dan iż-​żmien tas-​sena.