“Jeħtieġ li Aħna Nobdu lil Alla Bħala Ħakkiem Iktar milli lill-​Bnedmin”

“[Ġeħova] Għalija Sar is-​Salvazzjoni”

IL-​POPLU taʼ Ġeħova ried jagħmel għażla. Kien se jobdi lill-​ħakkiem mill-​agħar taʼ l-​Eġittu tal-​qedem? Jew kien se jobdi lil Alla Ġeħova, iħalli l-​post tal-​jasar, u jmur joqgħod fl-​Art Imwiegħda?

Minħabba li l-​Fargħun taʼ l-​Eġittu sfida lil Ġeħova u ma riedx jeħles lill-​poplu Tiegħu, Alla bagħat l-​Għaxar Kastigi fuq il-​pajjiż. Kemm wera l-​qawwa tiegħu b’dan! L-​allat taʼ l-​Eġizzjani ma setgħu jagħmlu xejn biex iwaqqfu dawn il-​kastigi.

Meta lill-​Fargħun intqallu biex iħalli lill-​poplu t’Alla jitlaq, hu b’disprezz qal: “Min hu [“Ġeħova,” NW], biex jien nismaʼ minn kliemu u nħalli lil Iżrael jitlaq? [“Ġeħova,” NW] ma nafx min hu, u ’l Iżrael ma nħallihx jitlaq.” (Eżodu 5:2) B’riżultat taʼ dan, l-​Eġittu ġarrab dawn il-​kastigi: (1) l-​ilma sar demm, (2) iż-​żrinġijiet, (3) in-​nemus, (4) id-​dubbien, (5) il-​pesta fuq l-​imrieħel, (6) l-​infafet fuq in-​nies u l-​annimali, (7) is-​silġ, (8) il-​ġradijiet, (9) id-​dlam, u (10) il-​mewt taʼ l-​ewwel imwieled taʼ l-​Eġizzjani, fosthom bin il-​Fargħun. Fl-​aħħar, il-​Fargħun mhux biss ħalla lill-​Ebrej jitilqu, imma saħansitra ħeġġiġhom biex jitilqu!​—Eżodu 12:​31, 32.

Xi tliet miljun ruħ​—irġiel, nisa, u tfal Iżraelin kif ukoll kotra kbira taʼ nies oħra​—telqu malajr. (Eżodu 12:​37, 38) Madankollu, il-​Fargħun ma damx ma mar għal warajhom bl-​eżerċtu tal-​biżaʼ tiegħu. L-​Iżraelin dehru li kienu maqbudin bejn il-​Baħar l-​Aħmar, id-​deżert kiefer, u l-​armata tal-​Fargħun. Madankollu, Mosè qal lin-​nies: “La tibżgħux! Żommu sħiħ, u taraw is-​salvazzjoni [tal-Mulej].”​—Eżodu 14:​8-​14.

Ġeħova fired l-​ilmijiet tal-​Baħar l-​Aħmar b’mod mirakoluż sabiex l-​Iżraelin ikunu jistgħu jaħarbu. Imma meta l-​Eġizzjani marru għal warajhom, Alla ġiegħel l-​ilmijiet jerġgħu lura. “L-​imriekeb tal-​Fargħun u qawwietu [Ġeħova] tefagħhom fil-​baħar.” (Eżodu 14:​26-28; 15:4) It-​tmiem diżastruż tal-​Fargħun kburi ġie fuqu minħabba li rrifjuta li jonora lil Ġeħova.

Ħdejn il-​Baħar l-​Aħmar, Ġeħova wera li kien “gwerrier.” (Eżodu 15:3) “Ra Iżrael kull ma għamel il-​Mulej lill-​Eġizzjani bil-​qawwa taʼ driegħu,” jgħid ir-​rakkont ispirat, “u beżaʼ l-​poplu mill-​Mulej, u emmen fil-​Mulej.” (Eżodu 14:31; Salm 136:​10-15) Huma esprimew il-​gratitudni tagħhom lil Alla minn qalbhom hekk kif l-​irġiel ngħaqdu maʼ Mosè f’għanja tar-​rebħa, u oħtu Mirjam idderiġiet lin-​nisa biex jiżfnu.a

Ġeħova Għadu Ħellies

Il-​qaddejja taʼ Ġeħova llum jistgħu jisiltu tagħlim li jsaħħaħ il-​fidi minn dan il-​ħelsien tant speċjali minn Alla. Tagħlima waħda hi li Ġeħova għandu qawwa bla limitu u jistaʼ jagħti appoġġ totali lill-​poplu tiegħu. Fl-​għanja tar-​rebħa tagħhom, Mosè u l-​Iżraelin kantaw b’vittorja: “Lemintek, Mulej, issebbħet fil-​qawwa, lemintek, Mulej, tfarrak il-​għadu.”​—Eżodu 15:6.

Tagħlima oħra hi li Dak li jistaʼ kollox minn qalbu jixtieq li jipproteġi lill-​poplu tiegħu. L-​Iżraelin kantaw: “Qawwieti u għanjieti l-​Mulej: għalija sar is-​salvazzjoni. Dan hu Alla tiegħi, u lilu nfaħħar.” Jerġaʼ tagħlima oħra hi li ħadd ma jistaʼ jirnexxilu jopponi r-​rieda t’Alla Ġeħova. Fl-​għanja tar-​rebħa tiegħu, il-​poplu meħlus t’Alla kanta: “Min hu bħalek, Mulej, fost l-​allat? Min hu bħalek? Int kbir fil-​qdusija, tal-​biżaʼ fit-​tifħir, int li tagħmel l-​għeġubijiet.”—Eżodu 15:​2, 11.

Bħall-Fargħun taʼ l-​Eġittu tal-​qedem, il-​ħakkiema fid-​dinja taʼ żmienna jippersegwitaw lill-​poplu taʼ Ġeħova. Mexxejja arroganti għandhom mnejn ‘jgħidu kliem kontra Alla l-​Għoli biex jifnu lill-​qaddisin taʼ l-​Għoli.’ (Danjel 7:25; 11:36) Imma Ġeħova jiżgura lill-​poplu tiegħu: “Ebda arma magħmula kontrik ma tiswa, u kull ilsien li jħaqqaq kontrik toħorġu b’ħati. Din hi x-​xorti tal-​qaddejja tal-​Mulej.”—Isaija 54:17.

Min jopponi lil Alla se jfallilu, eżatt bħalma fallielhom il-​Fargħun u l-​armata tiegħu. L-​atti taʼ ħelsien li jwettaq Ġeħova, bħall-​Eżodu mill-​Eġittu, jagħtu evidenza li jkun tajjeb li nsegwu l-​prinċipju li stqarrew l-​appostli taʼ Ġesù meta qalu: “Jeħtieġ li aħna nobdu lil Alla bħala ħakkiem iktar milli lill-​bnedmin.”—Atti 5:29.

[Nota taʼ taħt]

[Kaxxa/Stampa f’paġna 9]

KONT TAF?

• Ġeħova qajjem riħ qawwi matul il-​lejl kollu sabiex Iżrael ikun jistaʼ jaqsam il-​Baħar l-​Aħmar fuq art niexfa.—Eżodu 14:​21, 22

• Kien hemm bżonn triq wiesgħa kilometru u nofs jew iktar sabiex il-​miljuni taʼ Iżraelin setgħu jgħaddu minn ġol-​Baħar l-​Aħmar f’ħin daqshekk qasir.

[Stampi f’paġna 9]

L-​allat foloz taʼ l-​Eġittu ma setgħux iwaqqfu l-​Għaxar Kastigi minn Ġeħova

[Sors]

It-​tliet figurini: Photograph taken by courtesy of the British Museum