Mistoqsijiet mill-Qarrejja
X’qed iġiegħel “il-ġid kollu tal-popli” biex jiġi fit-“tempju” tal-qima vera?—Ħaggaj 2:7.
Permezz tal-profeta Ħaggaj, Ġeħova bassar: “Nqanqal [jew, ‘nheżżeż’] il-ġnus kollha, u l-ġid kollu tal-popli jiġi kollu hawn, u nimla dan it-tempju bil-glorja.” (Ħaggaj 2:7) Qiegħed dan it-theżżiż tal-“ġnus kollha” jġiegħel lill-“ġid kollu” tal-popli, jiġifieri individwi taʼ qalb onesta, biex iħaddan il-qima vera? It-tweġiba hija le.
Ikkunsidra dak li jqanqal, jew jheżżeż, il-ġnus u dan it-theżżiż għal xiex qed iwassal. Il-Bibbja tgħid li ‘l-ġnus qamu f’rewwixta u l-popli qagħdu jreddnu ħaġa fiergħa.’ (Salm 2:1, NW) Il-“ħaġa fiergħa” li huma jibqgħu “jreddnu” fuqha, jew jimmeditaw dwarha, hi l-mod kif se jippreservaw il-ħakma tagħhom. Xejn ma jheżżiżhom iktar minn xi theddida għall-ħakma tagħhom.
L-ippridkar dwar is-Saltna stabbilita t’Alla li qed isir madwar id-dinja kollha mix-Xhieda taʼ Ġeħova sar proprju theddida taʼ din ix-xorta għall-ġnus. Wara kollox, is-Saltna Messjanika t’Alla f’idejn Ġesù Kristu se ‘tfarrak u ttemm is-saltniet kollha,’ li huma magħmulin mill-bniedem. (Danjel 2:44) Ix-xogħol taʼ l-ippridkar jinkludi l-messaġġ taʼ ġudizzju li qed jheżżeż lill-ġnus. (Isaija 61:2) U dan it-theżżiż qed jiżdied hekk kif ix-xogħol taʼ l-ippridkar qed jinfirex u jiżdied. It-theżżiż imbassar f’Ħaggaj 2:7 huwa sinjal taʼ xiex?
F’Ħaggaj 2:6 naqraw: “Għax hekk jgħid il-Mulej taʼ l-eżerċti: ‘Dalwaqt, ftit ieħor biss, u jiena nheżheż is-smewwiet [u l-art] u l-baħar u l-blat.’” Meta kkwota minn dan il-vers, l-appostlu Pawlu kiteb: “Dak iż-żmien leħnu heżżeż l-art, imma issa wiegħed u qal: ‘Iżda darb’oħra nheżżeż mhux biss l-art imma wkoll is-sema.’ Issa l-espressjoni ‘Iżda darb’oħra’ tindika t-tneħħija taʼ l-affarijiet li qed jitheżżu, jiġifieri, l-affarijiet li ntgħamlu, sabiex jibqgħu l-affarijiet li mhux qed jitheżżu [is-Saltna].” (Ebrej 12:26, 27) Iva, is-sistema dinjija preżenti kollha kemm hi se titheżżeż u mhux se tibqaʼ teżisti iktar, u b’hekk se tagħmel wisaʼ għad-dinja l-ġdida li se jagħmel Alla.
Nies taʼ qalb onesta se jinġibdu lejn il-qima vera imma mhux minħabba li l-ġnus qed jitheżżu. L-għemil li qed jiġbidhom lejn Ġeħova u l-qima tiegħu hu l-istess għemil li qed iġiegħel lill-ġnus jitheżżu, jiġifieri l-ippridkar dwar is-Saltna stabbilita t’Alla li qed isir madwar id-dinja kollha. Id-dikjarazzjoni tal-‘bxara taʼ ferħ t’aħbar tajba taʼ dejjem’ se tiġbed lil dawk li għandhom attitudni xierqa lejn il-qima taʼ l-Alla l-veru.—Rivelazzjoni 14:6, 7.
Il-messaġġ tas-Saltna huwa wieħed taʼ ġudizzju u taʼ salvazzjoni. (Isaija 61:1, 2) Ir-riżultat taʼ l-ippridkar madwar id-dinja huwa doppju: it-theżżiż tal-ġnus u d-dħul tal-ġid tal-popli għall-glorja taʼ Ġeħova.