Int Tistaʼ Tgħix għal Dejjem

IL-​MAĠĠURANZA vasta tan-​nies reliġjużi fid-​dinja jgħożżu l-​prospett taʼ ħajja taʼ dejjem f’xi forma jew oħra. Id-​dettalji jistgħu jvarjaw minn reliġjon għal oħra, però, it-​tama tibqaʼ bażikament l-​istess​—li jgħixu ferħanin f’kundizzjonijiet ideali mingħajr it-​theddida tal-​mewt. M’huwiex dan forsi dak li tixtieq int ukoll? Kif jistaʼ dan it-​tagħlim mifrux jiġi spjegat? U qatt se jiġi realizzat il-​prospett taʼ ħajja eterna?

L-Iskrittura turi li l-​Ħallieq nissel fil-​fond ix-​xewqa għall-​ħajja taʼ dejjem f’moħħ il-​bniedem sa mill-​bidu, miż-​żmien li hu ħalaq lill-​ewwel koppja umana. Il-​Bibbja tgħid: “[Alla] qiegħed ukoll f’qalb ulied il-​bniedem il-​ħsieb taʼ l-​eternità.”​—Ekkleżjasti 3:​11, Karm Żammit.

Madankollu, biex iwettqu dik ix-​xewqa li jgħixu għal dejjem, l-​ewwel koppja umana kellhom jaċċettaw l-​awtorità t’Alla li jiddeċiedi dak li hu tajjeb u dak li hu ħażin. Li kieku huma obdew, Ġeħova kien jiġġudikahom bħala li jistħoqqilhom jgħixu “għal dejjem” fid-​dar li hu pprepara għalihom, il-​ġnien taʼ l-​Għeden.​—Ġenesi 2:​8; 3:​22.

Il-​Ħajja taʼ Dejjem Mitlufa

Ir-​rakkont tal-​Bibbja juri li Alla nibbet fil-​ġnien “is-​siġra taʼ tagħrif it-​tajjeb u l-​ħażin.” Hu ma ħalliex lil Adam u Eva jieklu mill-​frott tagħha, inkella jmutu. (Ġenesi 2:​9, 17) Li kieku żammew lura milli jieklu l-​frotta, Adam u Eva kienu se juru lil Alla li huma qed jaċċettaw l-​awtorità tiegħu. Mill-​banda l-​oħra, il-​fatt li jieklu mis-​siġra kien jindika li huma qed jirrifjutaw l-​awtorità t’Alla. Adam u Eva m’obdewx l-​istruzzjonijiet taʼ Ġeħova, u b’hekk marru man-​naħa taʼ Satana, ħlejqa spirtu li rribella kontra l-​awtorità t’Alla. B’riżultat taʼ dan, Alla b’mod ġust iddetermina li Adam u Eva ma kienx jistħoqqilhom jgħixu għal dejjem.​—Ġenesi 3:​1-6.

Dak li offra Alla kien ħajja jew mewt, eżistenza jew ineżistenza. Ir-​riżultat tad-​diżubbidjenza kien il-​mewt u l-​eżistenza tagħhom kellha tintemm għalkollox. Ma kienx possibbli għal Adam u Eva jew għal nisilhom li jibqgħu jgħixu permezz taʼ xi taħlita maġika jew xi ruħ immortali.a

In-nisel kollu taʼ Adam sofra minħabba r-​ribelljoni tiegħu. Il-​konsegwenzi huma spjegati mill-​appostlu Pawlu. Hu kiteb: “Permezz taʼ bniedem wieħed id-​dnub daħal fid-​dinja, u permezz tad-​dnub il-​mewt, u b’hekk il-​mewt infirxet fuq il-​bnedmin kollha għax kollha dinbu.”—Rumani 5:​12.

Il-​Ħajja taʼ Dejjem Tinkiseb mill-​Ġdid

L-​appostlu Pawlu xebbah il-​kundizzjoni tan-​nisel taʼ Adam maʼ dik taʼ lsir taʼ l-​ewwel seklu. Minħabba d-​dnub li wirtu, ulied Adam u Eva twieldu bħala “lsiera tad-​dnub,” destinati biex imutu, mingħajr ma kellhom għażla oħra. (Rumani 5:​12; 6:​16, 17) Ulied Adam u Eva ma kienx ikollhom għażla oħra li kieku Ġeħova ma pprovdiex rimedju legali sabiex jixtri lura l-​ħelsien tagħhom. Pawlu spjega: “Bħalma b’nuqqas wieħed [dak taʼ Adam] ir-​riżultat għall-​bnedmin taʼ kull xorta kien il-​kundanna, hekk ukoll b’att wieħed taʼ ġustifikazzjoni r-​riżultat għall-​bnedmin taʼ kull xorta hu li jiġu dikjarati ġusti għall-​ħajja.” Dan l-​“att wieħed taʼ ġustifikazzjoni” wassal biex Ġesù ssagrifika l-​ħajja perfetta tiegħu “għal kulħadd bħala fidwa ekwivalenti.” Ġeħova approva l-​qawwa legali tal-​fidwa biex teħles lill-​umanità mill-​“ġudizzju” tal-​“kundanna.”​—Rumani 5:​16, 18, 19; 1 Timotju 2:​5, 6.

Dan hu għala x-​xjenzati qatt m’huma se jsibu ċ-​ċavetta għall-​ħajja bla tmiem fil-​ġenetika tal-​bniedem. Iċ-​ċavetta tinsab xi mkien ieħor. Skond ma tgħid il-​Bibbja, il-​kaġun tal-​mewt tal-​bnedmin huwa morali u legali, mhux bijoloġiku. Il-​mezz li bih tiġi restawrata l-​ħajja taʼ dejjem​—is-​sagrifiċċju tal-​fidwa taʼ Ġesù—huwa talba legali. Il-​fidwa hija wkoll manifestazzjoni tas-​sewwa t’Alla u l-​qalb tajba bl-​imħabba tiegħu. Min sejjer allura jibbenefika mill-​fidwa u jirċievi l-​ħajja taʼ dejjem?

L-​Għotja taʼ l-​Immortalità

Alla Ġeħova hu “minn dejjem taʼ dejjem.” Huwa immortali. (Salm 90:2) L-​ewwel individwu li Ġeħova tah l-​għotja taʼ l-​immortalità kien Ġesù Kristu. L-​appostlu Pawlu jispjega: “Issa li ġie mqajjem mill-​imwiet, Kristu ma jmutx iktar; il-​mewt m’għadhiex tiddominah.” (Rumani 6:9) Meta jagħmel dan il-​kuntrast bejn Ġesù u l-​ħakkiema dinjin, Pawlu jiddeskrivih bħala l-​unika wieħed fosthom li għandu l-​immortalità. Ġesù se “jibqaʼ jgħix għal dejjem.” Il-​ħajja tiegħu “ma tinqeridx.”​—Ebrej 7:​15-​17, 23-​25; 1 Timotju 6:​15, 16.

Ġesù m’huwiex l-​uniku wieħed li rċieva din l-​għotja. Kristjani midlukin bl-​ispirtu magħżulin biex jaħkmu bħala slaten fil-​glorja tas-​sema jirċievu l-​istess tip taʼ rxoxt li kellu Ġesù. (Rumani 6:5) L-​appostlu Ġwanni juri li dan il-​privileġġ huwa mogħti lil 144,000 individwu. (Rivelazzjoni 14:1) Huma wkoll irċivew l-​immortalità. Rigward l-​irxoxt tagħhom, l-​appostlu Pawlu qal: “Il-​laħam u d-​demm ma jistgħux jirtu s-​saltna t’Alla . . . Għad tinstemaʼ t-​trumbetta, u l-​mejtin jiġu mqajmin bla taħsir, u aħna nitbiddlu. Għax jeħtieġ li dan il-​ġisem li jitħassar jilbes in-​nuqqas taʼ taħsir, u dan il-​ġisem li jmut jilbes l-​immortalità.” Il-​mewt m’għandha l-​ebda setgħa fuq dawk li jirċievu dan l-​irxoxt.​—1 Korintin 15:​50-​53; Rivelazzjoni 20:6.

Din ir-​rivelazzjoni divina hija tabilħaqq straordinarja. Lanqas saħansitra l-​anġli ma huma maħluqin immortali, minkejja li huma ħlejjaq spirti. Dan hu muri mill-​fatt li dawk il-​ħlejjaq spirti li ngħaqdu fir-​ribelljoni taʼ Satana se jiġu meqruda. (Mattew 25:41) Mill-​banda l-​oħra, il-​ħakkiema sħab maʼ Ġesù rċivew l-​għotja taʼ l-​immortalità, li hi prova tal-​fiduċja li ma titħarrikx li Ġeħova għandu fil-​lealtà tagħhom.

Ifisser dan li 144,000 individwu biss, numru relattivament żgħir meta tqabblu mal-​biljuni taʼ bnedmin li għexu, se jgħixu għal dejjem? Le. Ejja ħalli naraw għala.

Il-​Ħajja taʼ Dejjem fuq Art Magħmula Ġenna

Il-​ktieb Bibliku taʼ Rivelazzjoni jippreżenta xena mill-​isbaħ taʼ folla li ma tistax tgħoddha li ġiet mogħtija l-​ħajja taʼ dejjem fuq art magħmula ġenna. Flimkien magħhom hemm dawk li kienu mietu imma li ġew irxoxtati u restawrati lura għas-​saħħa li kellhom f’żgħożithom. (Rivelazzjoni 7:9; 20:​12, 13; 21:​3, 4) Huma qed jittieħdu lejn “xmara taʼ ilma tal-​ħajja, ċar daqs il-​kristall, ħierġa mit-​tron t’Alla.” Fuq “kull naħa tax-​xmara kien hemm siġar tal-​ħajja . . . , u l-​weraq tas-​siġar kien għall-​fejqan tal-​ġnus.” B’qalb tajba, Alla Ġeħova jagħmel din l-​istedina: “Kulmin hu bil-​għatx ħa jiġi; u kulmin jixtieq ħa jieħu l-​ilma tal-​ħajja b’xejn.”​—Rivelazzjoni 22:​1, 2, 17.

Dawn is-​siġar u l-​ilmijiet m’humiex xi eliżir tal-​ħajja jew xi funtana taż-​żgħożija, bħalma fittxew għalihom l-​alkemisti u l-​esploraturi żmien twil ilu. Pjuttost, dawn jirrappreżentaw il-​provvediment t’Alla permezz taʼ Ġesù Kristu biex jirrestawra lill-​umanità fil-​kundizzjoni perfetta li eżistiet oriġinalment.

L-iskop t’Alla li jagħti l-​ħajja eterna fuq l-​art lill-​umanità ubbidjenti għadu ma nbidilx. Dan l-​iskop se jiġi mwettaq, għax Ġeħova hu leali. Salm 37:29 jgħid: “Il-​ġusti jirtu l-​art, u jgħammru fiha għal dejjem.” Din il-​wegħda tqanqalna, flimkien maʼ dawk li ġew mogħtijin l-​immortalità fis-​sema, biex niddikjaraw: “Kbar u taʼ l-​għaġeb l-​għemejjel tiegħek, Alla Ġeħova, li Tistaʼ Kollox. Ġusti u veri triqatek, Sultan taʼ l-​eternità. Min tassew ma jibżax minnek, Ġeħova, u ma jigglorifikax ismek, għax int biss leali?”​—Rivelazzjoni 15:​3, 4.

Tixtieq int li jkollok l-​għotja prezzjuża taʼ ħajja eterna? Jekk iva, int għandek tagħti prova tal-​lealtà u taʼ l-​ubbidjenza tiegħek lis-​“Sultan taʼ l-​eternità.” Għandek bżonn titgħallem dwar Ġeħova u dwar dak il-​wieħed li permezz tiegħu dan it-​tip taʼ ħajja huwa possibbli, Ġesù Kristu. Dawk kollha li huma lesti li jaċċettaw il-​livelli għoljin t’Alla dwar dak li hu tajjeb u ħażin se jiġu mogħtijin l-​għotja taʼ “ħajja taʼ dejjem.”​—Ġwanni 17:3.

[Nota taʼ taħt]

[Kaxxa/Stampa f’paġna 5]

Xewqa Dejjiema

L-​Epika taʼ Gilgamex, leġġenda fil-​Mesopotamja li tmur lura sat-​tieni millennju Q.E.K., tiddeskrivi t-​tfittxija t’eroj għaż-​żgħożija taʼ dejjem. L-​Eġizzjani tal-​qedem kienu jibbalzmaw il-​mejtin, bil-​ħsieb li r-​ruħ, li kienu jemmnu li kienet immortali, kienet tistaʼ terġaʼ tuża l-​ġisem tagħha. Minħabba f’hekk, xi oqbra taʼ l-​Eġizzjani kienu jimtlew b’dak kollu li l-​mejjet setaʼ jiġi bżonn fl-​hekk imsejħa ħajja taʼ wara.

Fost l-​alkemisti Ċiniżi, it-​twemmin taʼ l-​immortalità tal-​ġisem imur lura mill-​inqas sat-​tmien seklu Q.E.K., u t-​twemmin fil-​possibbiltà li tinkiseb permezz taʼ taħlit maġiku jmur lura sar-​rabaʼ seklu Q.E.K. L-​Ewropej medjevali u l-​alkemisti Għarab fittxew u pprovaw iħalltu eliżir tal-​ħajja. Ftit mit-​taħlitiet tagħhom kienu jikkonsistu fi frak taʼ l-​arseniku, il-​merkurju, u l-​kubrit. Min jaf kemm kienu dawk l-​uħud li vvelenaw lilhom infushom meta pprovaw dan it-​taħlit!

Għal xi żmien, leġġendi dwar l-​hekk imsejħa Funtana taż-​Żgħożija kienu komuni wkoll. Hu maħsub li din kienet xi nixxiegħa li tirrestawra s-​saħħa lil dawk li jixorbu minnha.

[Kaxxa/Stampi f’paġna 7]

Ħajja taʼ Dejjem​—Taʼ Dwejjaq?

Xi wħud jargumentaw li l-​ħajja taʼ dejjem tkun taʼ dwejjaq, sempliċement ħela taʼ ħin f’passatempi bla sens ripetuti għal dejjem. Forsi l-​eternità li huma jimmaġinaw hija estensjoni bla tmiem tal-​mod tal-​ħajja u l-​kundizzjonijiet preżenti, li għal ħafna nies jistgħu jidhru taʼ dwejjaq u bla sens. Madankollu, fil-​ġenna li Alla se jirrestawra, hu jwiegħed li “bi sliem kotran jitgħaxxqu” l-​bnedmin. (Salm 37:11) Ħajja bħal din se tagħti lill-​umanità l-​opportunità biex tikseb għarfien dwar il-​ħolqien taʼ Ġeħova u tiddedika ħin biex tiżviluppa kull tip taʼ snajjaʼ, studji, jew xogħol affaxxinanti li issa nistgħu biss noħolmu bih.

It-​tabib Aubrey de Grey, ġenetista fl-​Università taʼ Cambridge li hu involut fir-​riċerka dwar l-​estensjoni tal-​ħajja, osserva: “Nies li għandhom edukazzjoni tajba u l-​ħin biex jużawha qatt ma jiddejqu llum u lanqas ma jistgħu jimmaġinaw li mhux se jkollhom iktar affarijiet ġodda li jixtiequ jagħmlu.” Minkejja dan, il-​Kelma ispirata t’Alla tgħid li ‘l-​bniedem qatt ma se jirnexxilu jikxef x’jagħmel Alla mill-​bidu sat-​tmiem.’​—Koħèlet 3:​11.