Hija l-​Bibbja Restrittiva Żżejjed?

“META kont żgħir, ma ġejtx mgħallem il-​livelli tal-​Bibbja. Alla lanqas qatt ma kien jissemma,” jirrakkonta żagħżugħ mill-​Finlandja. Trobbija bħal din hija komuni llum. Ħafna, speċjalment iż-​żgħażagħ, jikkunsidraw il-​Bibbja bħala li hi antikwata ħafna u li l-​pariri tagħha huma restrittivi żżejjed. Dawk li jridu jsegwu l-​Bibbja huma kunsidrati minn oħrajn bħala nies maħqurin li ħajjithom hija mtaqqla bi projbizzjonijiet u kmandamenti. B’hekk, ħafna jħossu li jkun aħjar jekk iħallu l-​Bibbja fuq l-​ixkaffa u jfittxu għall-​gwida xi mkien ieħor.

Waħda mill-​akbar raġunijiet għala ħafna waslu biex iqisu l-​Bibbja b’dan il-​mod hija minħabba l-​istorja twila taʼ moħqrija mill-​knejjes tal-​Kristjaneżmu. Per eżempju, matul il-​perijodu li xi studjużi jsejħulu ż-​Żminijiet tad-​Dlam, il-​Knisja Kattolika fl-​Ewropa ddominat kważi kull aspett tal-​ħajja tan-​nies. Kulmin kien jissogra ma jaqbilx mal-​knisja kien f’riskju li jiġi torturat jew saħansitra maqtul. Il-​knejjes Protestanti, li żviluppaw iktar tard, ukoll għamlu restrizzjonijiet fuq il-​libertà persunali. Illum, termini bħal “Kalvinista” jew “Puritan” ifakkru lil dak li jkun mhux biss fis-​segwaċi taʼ ċertu twemmin imma fid-​dixxiplina ħarxa assoċjata maʼ dawn il-​gruppi. Għalhekk, minħabba li l-​knejjes kienu oppressivi, in-​nies jaslu għall-​konklużjoni żbaljata li t-​tagħlim tal-​Bibbja bilfors hu oppressiv.

F’sekli reċenti, il-​knejjes tilfu ħafna mill-​influwenza li kellhom fuq il-​ħajjiet tan-​nies, almenu f’ċerti pajjiżi. Wara li ċaħdu d-​duttrina komuni tal-​knejjes, ħafna żviluppaw it-​twemmin li n-​nies għandhom id-​dritt jagħżlu huma stess x’inhu tajjeb u ħażin. B’liema riżultat? Ahti Laitinen, professur tal-​kriminoloġija u s-​soċjoloġija ġudizzjarja, jispjega: “Ir-​rispett għall-​awtorità naqas, u l-​fehma tan-​nies dwar dak li hu aċċettabbli u dak li m’huwiex qed issir iktar u iktar imċajpra.” Ironikament, anki xi mexxejja reliġjużi adottaw dan il-​mod taʼ ħsieb. Isqof Luteran li hu prominenti qal: “Ma naqbilx maʼ l-​opinjoni li mistoqsijiet morali għandhom jiġu mweġbin bl-​għajnuna tal-​Bibbja jew minn xi awtorità reliġjuża.”

Hija l-​Libertà Assoluta taʼ Min Jixtieqha?

L-​idea taʼ libertà assoluta forsi ddoqq għal widnejn in-​nies, speċjalment għaż-​żgħażagħ. Ma tantx hemm min jieħu pjaċir jiġi trattat bħallikieku m’huwiex intelliġenti biżżejjed jew jgħix fi qbil maʼ lista taʼ x’għandu jagħmel u ma jagħmilx. Madankollu, għandu kulħadd ikun ħieles biex jagħmel dak li jrid? Sabiex inwieġbu din il-​mistoqsija, ikkunsidra tixbiha. Immaġina belt mingħajr regoli tat-​traffiku, fejn m’hemmx bżonn taʼ liċenzji jew eżami tas-​sewqan. In-​nies jistgħu jsuqu kif iridu, anki meta jkunu fis-​sakra. M’għandhomx għalfejn jinkwetaw dwar il-​limiti tal-​veloċità, is-​sinjali biex jieqfu, it-​traffic lights, it-​toroq li tistaʼ ssuq fihom minn direzzjoni waħda biss, jew iż-​zebra crossings. Hija “libertà” bħal din taʼ min jixtieqha? Dażgur li le! Ir-​riżultat ikun kaos, konfużjoni, u diżastru. Għalkemm ir-​regoli tat-​traffiku jillimitaw il-​libertà tan-​nies, aħna nifhmu li dawn il-​liġijiet jipproteġu lis-​sewwieqa kif ukoll lil dawk li jkunu għaddejjin bil-​mixi.

B’mod simili, Ġeħova jagħti direzzjoni dwar kif għandna ngħixu. Dan hu taʼ benefiċċju għalina. Mingħajr din il-​gwida, aħna kieku jkollna nitgħallmu mill-​iżbalji, u minħabba dan, nistgħu nispiċċaw biex inweġġgħu lilna nfusna u lil oħrajn. Bħalma s-​sewqan f’belt mingħajr regoli tat-​traffiku m’huwiex taʼ min jixtiequ, u jistaʼ jkun taʼ periklu, l-​istess nistgħu ngħidu għal atmosfera taʼ taħwid morali. Il-​verità hi li aħna għandna bżonn ċerti regoli u liġijiet​—fatt li l-​maġġuranza min-​nies huma lesti li jammettu.

“It-​Tagħbija Tiegħi Ħafifa”

Ir-​regoli tat-​traffiku jistgħu jkunu lista twila u dettaljata taʼ regoli​—f’xi postijiet anki l-​lista tar-​regolamenti għall-​parkeġġ hija tassew kbira. B’kuntrast, il-​Bibbja ma tagħtix lista twila taʼ regoli. Minflok, din tagħti prinċipji bażiċi, u dawn m’humiex tqal jew oppressivi. Ġesù Kristu għamel stedina sabiħa lil dawk taʼ żmienu: “Ejjew għandi, intom ilkoll li mħabbtin u mgħobbijin, u jien inserraħkom. Għax il-​madmad tiegħi ħelu u t-​tagħbija tiegħi ħafifa.” (Mattew 11:​28, 30) F’ittra lill-​kongregazzjoni Kristjana f’Korintu, l-​appostlu Pawlu kiteb: “Fejn hemm l-​ispirtu taʼ Ġeħova, hemm il-​libertà.”—2 Korintin 3:17.

Madankollu, il-​libertà m’hijiex bla limiti. Ġesù wera b’mod ċar li dak li jirrikjedi Alla jinkludi xi kmandamenti sempliċi. Per eżempju, Ġesù qal lid-​dixxipli tiegħu: “Dan hu l-​kmandament tiegħi, li tħobbu lil xulxin bħalma ħabbejtkom jien.” (Ġwanni 15:12) Immaġina kif tkun il-​ħajja li kieku kulħadd japplika dan il-​kmandament! Għalhekk, il-​libertà li jgawdu l-​Kristjani m’hijiex bla limiti. L-​appostlu Pietru kiteb: “Kunu bħal nies ħelsin, iżda żżommux il-​libertà tagħkom bħala għata għall-​ħażen, imma bħala lsiera t’Alla.”—1 Pietru 2:16.

B’hekk, avolja l-​Kristjani m’humiex marbutin b’lista dettaljata taʼ liġijiet, huma ma jaġixxux fi qbil maʼ l-​ideat tagħhom stess dwar x’inhu tajjeb u ħażin. Il-​bnedmin għandhom bżonn il-​gwida li Alla biss jistaʼ jagħtihom. Il-​Bibbja b’mod ċar tgħid: “Anqas min jimxi ma jistaʼ jiddirieġi l-​passi tiegħu.” (Ġeremija 10:23) Jekk nobdu d-​direzzjoni t’Alla, se nibbenefikaw bil-​kbir.—Salm 19:12 (19:​11, NW).

Wieħed mill-​benefiċċji hu l-​ferħ. Per eżempju, iż-​żagħżugħ li semmejna fil-​bidu kien ħalliel u giddieb. Kien ukoll jgħix ħajja immorali. Meta tgħallem il-​livelli għoljin tal-​Bibbja, hu biddel il-​mod taʼ ħajja tiegħu biex iġibha fi qbil magħhom. “Għalkemm ma stajtx insegwi l-​livelli Bibliċi kollha f’daqqa,” jgħid hu, “fhimt kemm huma taʼ valur. Il-​ħajja li kont ngħix qabel ma pproduċietx il-​ferħ li ngawdi issa. Ħajtek issir iktar sempliċi meta tgħix skond il-​livelli tal-​Bibbja. Tkun taf f’liema direzzjoni sejra ħajtek u dak li hu tajjeb u ħażin.”

Miljuni taʼ persuni kellhom esperjenza simili. Fost affarijiet oħra, il-​gwida li tinsab fil-​Bibbja għenithom igawdu relazzjonijiet aħjar m’oħrajn, jikkultivaw ħarsa bilanċjata lejn ix-​xogħol, iżommu lura minn drawwiet li huma taʼ ħsara, u b’hekk jgħixu ħajja iktar hienja. Markus,a żagħżugħ li għex kemm fi qbil mal-​livelli Bibliċi u kemm mingħajrhom, jgħid dan dwar ħajtu: “Minħabba li qed ngħix fi qbil mal-​Bibbja, irnexxieli nżid ir-​rispett tiegħi lejja nnifsi.”b

X’Inhi l-​Għażla Tiegħek?

Għalhekk, hija l-​Bibbja restrittiva? Ir-​risposta hija iva​—għall-​benefiċċju tagħna lkoll. Imma hija l-​Bibbja restrittiva żżejjed? Ir-​risposta hija le. Il-​libertà assoluta twassal biss għal diffikultajiet. Il-​livelli tal-​Bibbja huma bilanċjati, u jżommuna b’saħħitna u ferħanin. Markus jgħid: “Iż-​żmien wera kemm hu għaqli li napplika l-​Kelma t’Alla fil-​ħajja. Għalkemm f’ħafna modi ħajti hija differenti minn dik tan-​nies in ġenerali, qatt m’għaddieli minn moħħi li tlift xi ħaġa taʼ siwi fil-​ħajja.”

Meta tibda tesperjenza l-​barkiet li jiġu minn ħajja li hija fi qbil mal-​livelli Bibliċi, l-​apprezzament tiegħek għall-​Kelma t’Alla se jiżdied. Dan se jwassal għal barka saħansitra akbar​—se ssir tħobb lis-​Sors divin tagħha, Alla Ġeħova. “L-​imħabba t’Alla tfisser dan: li nosservaw il-​kmandamenti tiegħu; u madankollu l-​kmandamenti tiegħu m’humiex tqal.”​—1 Ġwanni 5:3.

Ġeħova hu kemm il-​Ħallieq tagħna u kemm Missierna tas-​sema. Hu jaf x’inhu l-​aħjar għalina. Minflok ma jagħmlilna ħafna restrizzjonijiet, hu jagħtina direzzjoni kollha mħabba għall-​benefiċċju tagħna. B’lingwa poetika Ġeħova jħeġġiġna: “Li kieku [tagħti] widen għall-​kmandamenti tiegħi, . . . ikun bħal xmara sliemek, u sedqek bħal mewġ tal-​baħar.”—Isaija 48:18.

[Noti taʼ taħt]

[Stampa f’paġna 9]

Ġesù qal li dak li Alla jirrikjedi minna jġib serħan

[Stampa f’paġna 10]

Ubbidjenza għad-​direzzjoni t’Alla ġġib il-​ferħ u tgħinna nirrispettaw lilna nfusna