Ġeħova Se ‘Jġiegħel li Ssir Ġustizzja’

“Sejjer Alla ma jġagħalx li ssirilhom ġustizzja lill-​magħżulin tiegħu li jgħajtulu lejl u nhar?”​—LUQA 18:7.

1. Min hu sors taʼ inkuraġġiment għalik, u għala?

MADWAR id-​dinja, ix-​Xhieda taʼ Ġeħova jgawdu s-​sħubija t’aħwa Kristjani rġiel u nisa li ilhom jaqdu lil Ġeħova lealment għal ħafna snin. Taf lil xi wħud minn dawn l-​aħwa għeżież personalment? Forsi tiġik f’moħħok xi oħt anzjana li tgħammdet ħafna snin ilu u li rari titlef laqgħa fis-​Sala tas-​Saltna. Jew forsi taħseb f’xi ħu li lealment jappoġġa l-​attivitajiet tal-​kongregazzjoni fil-​ministeru taʼ l-​għalqa ġimgħa wara l-​oħra u ilu jagħmel dan għal għaxriet taʼ snin. Tabilħaqq, ħafna minn dawn l-​uħud leali ħasbu li s’issa Armageddon se tkun diġà għaddiet. Madankollu, il-​fatt li din id-​dinja inġusta għadha teżisti ma dgħajjifx il-​fiduċja tagħhom fil-​wegħdi taʼ Ġeħova u lanqas id-​determinazzjoni tagħhom li ‘jissaportu sat-​tmiem.’ (Mattew 24:13) Il-​fidi kbira li juru dawn il-​qaddejja leali taʼ Ġeħova tassew huwa sors taʼ inkuraġġiment għall-​kongregazzjoni kollha kemm hi.​—Salm 147:11.

2. Liema sitwazzjoni tnikkitna?

² Madankollu, xi drabi forsi naraw attitudni totalment differenti. Xi Xhieda ħadu sehem fil-​ministeru għal snin sħaħ, imma maż-​żmien il-​fidi tagħhom f’Ġeħova ddgħajfet, u ma baqgħux jissieħbu mal-​kongregazzjoni Kristjana. Jiddispjaċina li wħud li qabel kienu jaqdu lil Ġeħova telquh, u minn qalbna aħna nixtiequ nibqgħu ngħinu lil kull “nagħġa mitlufa” biex tirritorna lejn il-​merħla. (Salm 119:176; Rumani 15:1) Minkejja dan, dawn ir-​riżultati opposti​—xi wħud jibqgħu leali filwaqt li oħrajn jitilfu l-​fidi​—iqajmu xi mistoqsijiet. X’jgħin lil għadd taʼ Xhieda biex iżommu l-​fidi tagħhom fil-​wegħdi taʼ Ġeħova filwaqt li oħrajn jitilfuha? Aħna x’nistgħu nagħmlu personalment biex inkunu ċerti li l-​konvinzjoni tagħna li “l-​jum il-​kbir taʼ Ġeħova” qed joqrob tibqaʼ soda? (Sofonija 1:​14, NW) Ejja nikkunsidraw tixbiha li tinsab fl-​Evanġelju taʼ Luqa.

Twissija għal Dawk Ħajjin “Meta Jasal Bin il-​Bniedem”

3. Min speċjalment jistaʼ jibbenefika mit-​tixbiha taʼ l-​armla u l-​imħallef, u għala?

³ F’Luqa kapitlu 18 insibu t-​tixbiha taʼ Ġesù dwar armla u mħallef. Hija simili għat-​tixbiha dwar ir-​raġel persistenti, li ddiskutejna fl-​artiklu taʼ qabel. (Luqa 11:​5-​13) Madankollu, il-​kuntest tar-​rakkont Bibliku li fih hemm it-​tixbiha dwar l-​armla u l-​imħallef juri li dan japplika speċjalment għal dawk ħajjin “meta jasal Bin il-​bniedem” bil-​qawwa tas-​Saltna u dan il-​perijodu beda fl-​1914.​—Luqa 18:8.a

4. Ġesù xi ddiskuta qabel ma rrakkonta t-​tixbiha li nsibu f’Luqa kapitlu 18?

⁴ Qabel ma rrakkonta t-​tixbiha, Ġesù stqarr li l-​evidenza tal-​preżenza tiegħu bil-​qawwa tas-​Saltna kellha tkun evidenti daqs is-​‘sajjetti’ li ‘jiddu minn parti s’oħra tas-​sema.’ (Luqa 17:24; 21:​10, 29-​33) Minkejja dan, il-​maġġuranza min-​nies li jgħixu fiż-​“żmien taʼ l-​aħħar” ma kellhomx jagħtu kas din l-​evidenza ċara. (Danjel 12:4) Għala le? Għall-​istess raġuni li n-​nies fi żmien Noè u fi żmien Lot injoraw it-​twissijiet taʼ Ġeħova. Lura f’dawk iż-​żminijiet, in-​nies ‘kienu qed jieklu, jixorbu, jixtru, ibigħu, iħawlu, u jibnu sa dakinhar li nqerdu.’ (Luqa 17:​26-​29) Huma tilfu ħajjithom għax tant kienu mitlufin f’dawn l-​attivitajiet komuni li ma tawx kas ir-​rieda t’Alla. (Mattew 24:39) Bl-​istess mod illum, in-​nies in ġenerali huma tant medhijin fl-​affarijiet taʼ kuljum li jonqsu li jaraw l-​evidenza li t-​tmiem taʼ din id-​dinja li tiċħad lil Alla hu fil-​qrib.​—Luqa 17:30.

5. (a) Ġesù lil min ta twissija, u għala? (b) X’ġiegħel lil xi wħud jitilfu l-​fidi tagħhom?

⁵ B’mod ċar, Ġesù kien konċernat dwar li s-​segwaċi tiegħu wkoll setgħu jiġu żvijati mid-​dinja taʼ Satana, saħansitra sal-​punt li forsi jmorru ‘lura lejn l-​affarijiet li ħallew warajhom.’ (Luqa 17:​22, 31) U tabilħaqq, dan ġara lil xi Kristjani. Għal snin sħaħ dawn l-​uħud stennew il-​jum meta Ġeħova se jġib tmiem għal din id-​dinja mill-​agħar. Madankollu, meta Armageddon ma ġietx saż-​żmien li huma stennew, huma qatgħu qalbhom. Il-​fiduċja tagħhom li l-​jum taʼ ġudizzju taʼ Ġeħova kien qorob majnat. Huma naqqsu l-​ministeru tagħhom u maż-​żmien tant involvew ruħhom fl-​attivitajiet komuni tal-​ħajja li ftit li xejn ħallew ħin għall-​affarijiet spiritwali. (Luqa 8:​11, 13, 14) Maż-​żmien, huma marru ‘lura lejn l-​affarijiet li ħallew warajhom’​—x’ħasra!

Il-​Bżonn ‘li Dejjem Nitolbu’

6-8. (a) Irrakkonta t-​tixbiha taʼ l-​armla u l-​imħallef. (b) Ġesù kif applika din it-​tixbiha?

⁶ X’nistgħu nagħmlu biex inkunu ċerti li l-​fiduċja soda tagħna fit-​twettiq tal-​wegħdi taʼ Ġeħova ma tiddgħajjifx? (Ebrej 3:​14) Ġesù wieġeb din il-​mistoqsija eżatt wara li wissa lid-​dixxipli biex ma jmorrux lura lejn id-​dinja mill-​agħar taʼ Satana.

⁷ Luqa jirrapporta li Ġesù “qalilhom tixbiha dwar il-​bżonn li jitolbu dejjem bla ma jaqtgħu qalbhom.” Ġesù qal: “F’ċerta belt kien hemm imħallef li la kien jibżaʼ minn Alla u lanqas jirrispetta lill-​bniedem. U f’dik il-​belt kien hemm ukoll armla li kienet tmur għandu u tgħidlu, ‘Ara li ssir ġustizzja miegħi fil-​kawża maʼ l-​avversarju tiegħi.’ Għal xi żmien hu ma riedx, imma wara qal f’qalbu, ‘Għalkemm la nibżaʼ minn Alla u lanqas nirrispetta lill-​bniedem, minħabba l-​fatt li din l-​armla se tibqaʼ tħabbatni, nara li ssirilha ġustizzja, biex ma tibqax tiġi tiħodli rasi.’”

⁸ Wara li qal dan ir-​rakkont, Ġesù ħareġ l-​applikazzjoni: “Isimgħu x’qal l-​imħallef, għalkemm ma kienx raġel sewwa! Ċertament, mela, sejjer Alla ma jġagħalx li ssirilhom ġustizzja lill-​magħżulin tiegħu li jgħajtulu lejl u nhar, għalkemm idum juri sabar magħhom? Ngħidilkom, Iġiegħel li ssirilhom ġustizzja malajr. Madankollu, meta jasal Bin il-​bniedem, veru jsib il-​fidi fuq l-​art?”​—Luqa 18:​1-8.

“Ara li Ssir Ġustizzja Miegħi”

9. Liema tema tispikka fit-​tixbiha taʼ l-​armla u l-​imħallef?

⁹ It-​tema prinċipali taʼ din it-​tixbiha vivaċi tispikka b’mod ċar. Din tissemma miż-​żewġ karattri fit-​tixbiha kif ukoll minn Ġesù. L-​armla talbet: “Ara li ssir ġustizzja miegħi.” L-​imħallef qal: “Nara li ssirilha ġustizzja.” Ġesù staqsa: “Sejjer Alla ma jġagħalx li ssirilhom ġustizzja?” U dwar Ġeħova, Ġesù stqarr: “Iġiegħel li ssirilhom ġustizzja malajr.” (Luqa 18:​3, 5, 7, 8) Alla meta b’mod partikulari se ‘jġiegħel li ssir ġustizzja’?

10. (a) Il-ġustizzja meta saret fl-​ewwel seklu? (b) Il-​ġustizzja meta u kif se sseħħ għall-​qaddejja t’Alla llum?

¹⁰ Fl-​ewwel seklu, il-​“jiem biex issir ġustizzja” (jew, “jiem taʼ vendetta,” Kingdom Interlinear) bdew fis-​sena 70 E.K. meta Ġerusalemm u t-​tempju tagħha nqerdu. (Luqa 21:22) Għall-​poplu t’Alla llum, il-​ġustizzja se ssir fil-​“jum il-​kbir taʼ Ġeħova.” (Sofonija 1:​14, NW; Mattew 24:21) F’dak iż-​żmien, Ġeħova se ‘jpatti bi tribulazzjoni lil dawk li jaqilgħu t-​tribulazzjoni’ għall-​poplu tiegħu “hekk kif [Ġesù Kristu] iġib vendetta fuq dawk li ma jafux lil Alla u dawk li ma jobdux l-​aħbar tajba dwar il-​Mulej tagħna Ġesù.”​—2 Tessalonikin 1:​6-8; Rumani 12:19.

11. Il-​ġustizzja b’liema mod se ssir “malajr”?

¹¹ Però, kif għandna nifhmu l-​assiguranza taʼ Ġesù li Ġeħova se jġiegħel li ssir ġustizzja “malajr”? Il-​Kelma t’Alla turi li “għalkemm [Ġeħova] idum juri sabar,” hu se jġiegħel li ssir ġustizzja malajr meta jkun il-​waqt. (Luqa 18:​7, 8; 2 Pietru 3:​9, 10) Fi żmien Noè, meta wasal id-​Dilluvju, l-​uħud li kienu mill-​agħar inqerdu mingħajr dewmien. Bl-​istess mod, fi żmien Lot, meta niżel in-​nar mis-​smewwiet, l-​uħud mill-​agħar inqerdu. Ġesù qal: “L-​istess jiġri dakinhar li Bin il-​bniedem jiġi rivelat.” (Luqa 17:​27-​30) Għal darb’oħra, l-​uħud mill-​agħar se jesperjenzaw “qerda f’daqqa.” (1 Tessalonikin 5:​2, 3) Tabilħaqq, nistgħu nkunu fiduċjużi għall-​aħħar li Ġeħova mhux se jħalli lid-​dinja taʼ Satana teżisti ġurnata iktar milli teħtieġ il-​ġustizzja.

‘Iġiegħel li Ssir Ġustizzja’

12, 13. (a) It-tixbiha taʼ Ġesù dwar l-​armla u l-​imħallef kif tgħallimna lezzjoni? (b) Għala nistgħu nkunu ċerti li Ġeħova se jismaʼ t-​talb tagħna u jġiegħel li ssir ġustizzja?

¹² It-​tixbiha taʼ Ġesù dwar l-​armla u limħallef tenfasizza veritajiet importanti oħrajn. Meta ħareġ l-​applikazzjoni tat-​tixbiha, Ġesù qal: “Isimgħu x’qal l-​imħallef, għalkemm ma kienx raġel sewwa! Ċertament, mela, sejjer Alla ma jġagħalx li ssirilhom ġustizzja lill-​magħżulin tiegħu?” M’għandniex xi ngħidu, Ġesù ma kienx qed iqabbel lil Ġeħova maʼ l-​imħallef bħallikieku qed jgħid li Alla kien se jittratta lil dawk li jemmnu bl-​istess mod. Minflok, Ġesù għallem lis-​segwaċi tiegħu lezzjoni dwar Ġeħova billi enfasizza kuntrast li kien hemm bejn l-​imħallef u Alla. Liema huma xi modi li fihom huma differenti?

¹³ L-​imħallef fit-​tixbiha taʼ Ġesù “ma kienx raġel sewwa,” filwaqt li “Alla hu mħallef ġust.” (Salm 7:12 [7:​11, NW]; 33:5) L-​imħallef ma kellu l-​ebda interess fl-​armla bħala persuna, imma Ġeħova hu interessat f’kull individwu. (2 Kronaki 6:​29, 30) L-​imħallef ma kienx lest li jgħin lill-​armla, imma Ġeħova hu lest​—iva, ħerqan​—li jagħti l-​għajnuna lil dawk li jaqdu Lilu. (Isaija 30:​18, 19) X’inhi l-​lezzjoni? Jekk l-​imħallef li ma kienx raġel sewwa semaʼ t-​talb taʼ l-​armla u għamel ġustizzja magħha, kemm iktar Ġeħova se jismaʼ t-​talb tal-​poplu tiegħu u ċertament se jġiegħel li ssir ġustizzja magħhom!​—Proverbji 15:29.

14. Għala m’għandniex nitilfu l-​fidi fil-​miġja tal-​jum taʼ ġudizzju t’Alla?

¹⁴ Għalhekk, dawk li jitilfu l-​fidi fil-​miġja tal-​jum taʼ ġudizzju t’Alla jikkommettu żball serju. Għala? Billi ma jibqgħux jemmnu li “l-​jum il-​kbir taʼ Ġeħova” hu fil-​qrib, huma bl-​azzjonijiet tagħhom juru li jiddubitaw jekk jistgħux jafdaw lil Ġeħova bħala li jżomm il-​wegħdi tiegħu lealment. Imma ħadd m’għandu dritt jiddubita l-​lealtà t’Alla. (Ġob 9:​12) Mistoqsija valida hi, Sejrin aħna personalment nibqgħu leali? U dan hu s-​suġġett li Ġesù qajjem fl-​aħħar tat-​tixbiha dwar l-​armla u l-​imħallef.

“Veru Se Jsib Din il-​Fidi fuq l-​Art?”

15. (a) Liema mistoqsija qajjem Ġesù, u għala? (b) X’għandna nistaqsu lilna nfusna?

¹⁵ Ġesù qajjem din il-​mistoqsija interessanti: “Meta jasal Bin il-​bniedem, veru se jsib din il-​fidi fuq l-​art?” (Luqa 18:​8, nota taʼ taħt, NW) L-​espressjoni “din il-​fidi” tindika li Ġesù rrefera, mhux għall-​fidi b’mod ġenerali, imma għal tip taʼ fidi partikulari​—fidi bħal dik li kellha l-​armla. Ġesù ma wiġibx il-​mistoqsija tiegħu. Hu qajjimha biex id-​dixxipli tiegħu jaħsbu dwar il-​kwalità tal-​fidi tagħhom stess. Kienet qed tiddgħajjef bil-​mod il-​mod, sal-​punt li kienu fil-​periklu li jirritornaw għall-​affarijiet li ħallew warajhom? Jew kellhom it-​tip taʼ fidi li wriet l-​armla? Illum, aħna għandna bl-​istess mod nistaqsu lilna nfusna, ‘Liema tip taʼ fidi jsib f’qalbi “Bin il-​bniedem”?’

16. Liema tip taʼ fidi kellha l-​armla?

¹⁶ Sabiex aħna nkunu fost dawk li se jirċievu l-​ġustizzja taʼ Ġeħova, irridu nsegwu l-​eżempju taʼ dik l-​armla. Liema tip taʼ fidi kellha? Hi wriet il-​fidi tagħha billi b’mod persistenti baqgħet “tmur [għand l-​imħallef] u tgħidlu, ‘Ara li ssir ġustizzja miegħi.’” Dik l-​armla baqgħet tippersisti sabiex tirċievi ġustizzja mingħand raġel li ma kienx sewwa. B’mod simili, il-​qaddejja t’Alla llum jistgħu jkunu fiduċjużi li se jirċievu l-​ġustizzja taʼ Ġeħova​—anki jekk tieħu iktar żmien milli stennew. Iżjed minn hekk, huma juru l-​fiduċja tagħhom fil-​wegħdi t’Alla billi jitolbu b’mod persistenti​—iva, billi ‘jgħajtu lil Ġeħova lejl u nhar.’ (Luqa 18:7) Tabilħaqq, kieku Kristjan kellu jieqaf jitlob biex issir ġustizzja, ikun qed juri li tilef il-​fiduċja li Ġeħova se jaġixxi għan-​nom tal-​qaddejja tiegħu.

17. Liema raġunijiet għandna biex nipperseveraw fit-​talb u biex inżommu l-​fidi tagħna fil-​miġja tal-​jum taʼ ġudizzju taʼ Ġeħova li ġej żgur?

¹⁷ Iċ-​ċirkustanzi partikulari taʼ din l-​armla juruna li għandna raġunijiet oħrajn biex nipperseveraw fit-​talb. Ikkunsidra ftit mid-​differenzi bejn is-​sitwazzjoni tagħha u tagħna. L-​armla baqgħet tavviċina l-​imħallef avolja ħadd ma inkuraġġieha biex tagħmel dan, imma l-​Kelma t’Alla tagħtina ħafna inkuraġġiment biex ‘nipperseveraw fit-​talb.’ (Rumani 12:12) L-​armla ma kellha l-​ebda assiguranza li t-​talb tagħha kien se jiġi mismugħ, imma Ġeħova assigurana li l-​ġustizzja se ssir. Permezz tal-​profeta tiegħu, Ġeħova qal: “Jekk hija ddum ma tasal, int stennieha, għax tiġi żgur, ma tiddawwarx ma tasal!” (Ħabakkuk 2:3; Salm 97:10) L-​armla ma kellha l-​ebda ajjutant biex jgħinha fit-​talba tagħha. Imma aħna għandna ajjutant setgħan, Ġesù, “li qiegħed fuq il-​lemin t’Alla, u li wkoll jitlob bil-​ħniena għalina.” (Rumani 8:​34; Ebrej 7:​25) Għalhekk, jekk l-​armla, minkejja s-​sitwazzjoni diffiċli tagħha, baqgħet titlob bil-​ħrara lill-​imħallef bit-​tama li ssirilha ġustizzja, kemm iktar għandna nżommu l-​fidi tagħna aħna fil-​miġja tal-​jum taʼ ġudizzju taʼ Ġeħova li ġej żgur!

18. It-​talb kif se jsaħħaħ il-​fidi tagħna u jgħinna nirċievu l-​ġustizzja?

¹⁸ It-​tixbiha taʼ l-​armla tgħallimna li hemm rabta qawwija bejn it-​talb u l-​fidi u li ttalb persistenti tagħna jistaʼ jġib fix-​xejn l-​influwenzi li jistgħu jdgħajfu l-​fidi tagħna. M’għandniex xi ngħidu, dan ma jfissirx li sempliċi turija t’offerti taʼ talb hija r-​rimedju għan-​nuqqas taʼ fidi. (Mattew 6:​7, 8) Meta niġu mqanqlin biex nitolbu għaliex nirrealizzaw li aħna niddependu totalment minn Alla, imbagħad it-​talb iressaqna eqreb lejn Alla u jsaħħaħ il-​fidi tagħna. U ladarba għandna bżonn il-​fidi biex insalvaw, mhux taʼ b’xejn li Ġesù ħass il-​bżonn li jinkuraġġixxi lid-​dixxipli tiegħu biex “jitolbu dejjem bla ma jaqtgħu qalbhom”! (Luqa 18:1; 2 Tessalonikin 3:​13) Tabilħaqq, il-​miġja tal-​“jum il-​kbir taʼ Ġeħova” ma tiddependix mit-​talb tagħna​—se tiġi kemm jekk nitolbu għaliha u kemm jekk le. Imma jekk nirċivux il-​ġustizzja u nsalvawx mill-​gwerra t’Alla jew le ċertament li jiddependi mill-​fidi li għandna u l-​ħajja ġusta li ngħixu waqt li nkomplu nitolbu.

19. Kif nagħtu prova li aħna nemmnu b’mod sod li Alla se ‘jġiegħel li ssir ġustizzja’?

¹⁹ Bħalma rajna, Ġesù staqsa: “Meta jasal Bin il-​bniedem, veru se jsib din il-​fidi fuq l-​art?” X’inhi t-​tweġiba għal din il-​mistoqsija interessanti? Kemm aħna ferħanin li miljuni taʼ qaddejja leali taʼ Ġeħova madwar id-​dinja llum jagħtu prova bit-​talb, il-​paċenzja, u l-​perseveranza tagħhom li għandhom din il-​fidi! B’hekk, il-​mistoqsija taʼ Ġesù tistaʼ titwieġeb fl-​affermattiv. Iva, minkejja l-​inġustizzji li d-​dinja taʼ Satana ġġib fuqna bħalissa, aħna nemmnu b’mod sod li Alla se ‘jġiegħel li ssirilhom ġustizzja lill-​magħżulin tiegħu.’

[Nota taʼ taħt]

Tiftakar Int?

• X’ġiegħel lil xi Kristjani jitilfu l-​fidi tagħhom?

• Għala jistaʼ jkollna fidi soda fil-​ miġja tal-​jum taʼ ġudizzju taʼ Ġeħova?

• Liema raġunijiet għandna biex nipperseveraw fit-​talb?

• Talb persistenti kif se jgħinna biex ma nitilfux il-​fidi tagħna?

[Stampa f’paġna 26]

X’inhu enfasizzat fit-​tixbiha taʼ l-​armla u l-​imħallef?

[Stampi f’paġna 29]

Miljuni llum jemmnu b’mod sod li Alla se ‘jġiegħel li ssir ġustizzja’