Ir-​Raġel u l-​Mara—Maħluqin għal Xulxin

IR-​RAĠEL u l-​mara minn dejjem ixxennqu biex ikunu flimkien. Din ix-​xenqa oriġinat minn Alla. Ġeħova ra li ma kienx tajjeb għal Adam, l-​ewwel raġel, li jibqaʼ waħdu. Għalhekk, Alla għamillu “għajnuna [lir-raġel] li taqbel miegħu” (Saydon).

Ġeħova ġiegħel lil Adam jorqod fil-​fond, u mbagħad ħadlu waħda mill-​kustilji u “sawwar il-​kustilja . . . f’mara u ġiebha lill-​bniedem.” Adam tant kien ferħan meta ltaqaʼ maʼ din il-​ħlejqa sabiħa taʼ Ġeħova li hu ddikjara: “Din id-​darba din hi għadma minn għadmi, u laħam minn laħmi.” Bil-​kwalitajiet femminili tagħha, Eva, il-​mara perfetta, kienet tabilħaqq taʼ min iħobbha. U l-​perfett Adam bid-​dinjità maskili tiegħu kien jistħoqqlu rispett. Huma kienu maħluqin għal xulxin. Il-​Bibbja tgħid: “Għalhekk ir-​raġel iħalli lil missieru u lil ommu u jingħaqad maʼ martu u jsiru ġisem wieħed.”​—Ġenesi 2:​18-​24.

Madankollu, illum il-​familji qed jitkissru, u fir-​relazzjoni bejn ir-​raġel u l-​mara ħafna drabi jkun hemm abbuż fiżiku u verbali jew tkun karatterizzata mill-​egoiżmu. L-​ispirtu taʼ kompetizzjoni bejn is-​sessi wassal għal konflitti u nuqqas taʼ qbil. Dan kollu hu kuntrarju għall-​iskop t’Alla għar-​raġel u l-​mara. Ir-​raġel kien maħluq biex iwettaq irwol meraviljuż fuq l-​art. Il-​mara kellu jkollha post uniku u siewi bħala kumpliment għar-​raġel tagħha. Huma kellhom jaħdmu flimkien f’unità. Mill-​bidu taʼ l-​eżistenza tal-​bniedem, irġiel u nisa li kellhom il-​biżaʼ minn Alla pprovaw iwettqu lealment l-​irwoli li Ġeħova kellu għalihom, u dan żied maʼ l-​hena u s-​sodisfazzjon tagħhom. X’inhuma dawn l-​irwoli, u kif nistgħu nwettquhom?

[Stampa f’paġna 3]

Ir-​raġel u l-​mara huma maħluqin biex ikunu jistgħu jwettqu rwoli dinjitużi fl-​arranġament t’Alla