Tagħmel Differenza Liema Reliġjon Tagħżel?

ĦAFNA minna nħobbu jkollna varjetà tajba t’affarijiet minfejn nagħżlu meta mmorru nixtru. Meta suq joffri varjetà taʼ frott u ħxejjex, aħna nistgħu nagħżlu dak li nieħdu pjaċir nieklu l-​iktar u dak li hu tajjeb għall-​familja tagħna. Jekk ħanut tal-​ħwejjeġ joffri ħafna stili u kuluri taʼ ħwejjeġ bi prezzijiet raġunevoli, aħna nistgħu nagħżlu dak li jixirqilna l-​iktar. Xi wħud mill-​għażliet li nagħmlu fil-​ħajja huma sempliċement kwistjoni taʼ gosti persunali. Madankollu, għażliet oħrajn jeffettwaw il-​benesseri tagħna, bħal per eżempju, l-​għażla tagħna taʼ ikel sustanzjuż jew taʼ ħbieb għaqlin. Għalhekk, xi ngħidu għall-​għażla tagħna tar-​reliġjon? Għandu l-​mod taʼ qima tagħna jkun sempliċement kwistjoni taʼ gosti persunali? Jew huwa l-​mod taʼ qima xi ħaġa li teffettwa serjament il-​benesseri tagħna?

Hemm varjetà kbira taʼ reliġjonijiet minfejn wieħed jistaʼ jagħżel. Ħafna pajjiżi issa jiggarantixxu l-​libertà tar-​reliġjon, u n-​nies iħossuhom iktar u iktar liberi li jitilqu r-​reliġjon tal-​ġenituri tagħhom. Fi stħarriġ li sar fl-​Istati Uniti nstab li 80 fil-​mija mill-​Amerikani “jemmnu li iktar minn reliġjon waħda tistaʼ tkun triq għas-​salvazzjoni.” Skond dan l-​istess stħarriġ, “wieħed minn kull ħames parteċipanti qal li kien bidel ir-​reliġjon tiegħu meta sar adult.” Stħarriġ li sar fil-​Brażil irrivela li kważi 25 fil-​mija mill-​Brażiljani kollha bidlu r-​reliġjon tagħhom.

Fil-passat, in-​nies kienu jiddibattu b’rabja dwar id-​duttrini li jiddistingwu reliġjon minn oħra. Issa, il-​ħarsa popolari hija, ‘Mhux importanti liema reliġjon tagħżel.’ Iżda huwa importanti? Tistaʼ l-​għażla tar-​reliġjon tiegħek teffettwak?

Sewwasew bħalma konsumaturi għaqlin jistaqsu mistoqsijiet dwar l-​oriġini tal-​prodotti li qed jiġu offruti, hekk ukoll int, ikun għaqli li tistaqsi, ‘Dawn ir-​reliġjonijiet differenti kollha kif bdew, u għala?’ Il-​Bibbja tipprovdi t-​tweġibiet.

Ir-​Reliġjonijiet Kif Jibdew?

F’Iżrael tal-​qedem, is-​Sultan Ġerobogħam beda reliġjon ġdida kważi elf sena qabel ġie Ġesù fuq l-​art. Ġerobogħam kien l-​ewwel sultan mis-​saltna indipendenti taʼ Iżrael fit-​tramuntana. Hu kellu l-​inkarigu diffiċli li jiġbor in-​nies sabiex jimxu skond l-​iskopijiet tiegħu. “Wara li ħa parir, is-​sultan Ġerobogħam għamel żewġ għoġiela tad-​deheb, u lill-​poplu qallu: ‘Ilkom tmorru biżżejjed Ġerusalemm! Iżrael, dawn huma l-​allat tagħkom li tellgħukom mill-​art taʼ l-​Eġittu.’” (1 Slaten 12:28) B’mod ċar, is-​sultan ried juża r-​reliġjon biex ibiegħed il-​lealtà tan-​nies minn Ġerusalemm, fejn kienu jagħtu qima. Ir-​reliġjon li beda Ġerobogħam damet teżisti għal sekli sħaħ u minħabba fiha miljuni taʼ nies mietu jew ittieħdu fl-​eżilju meta Alla eventwalment talab kont mill-​ġens apostata taʼ Iżrael. Ir-​reliġjon taʼ Ġerobogħam kienet skema biex jikseb vantaġġ politiku. Xi reliġjonijiet taʼ l-​Istat li għadhom jeżistu sa llum kienu bdew b’mod simili bħala sforzi biex isaħħu l-​qawwa politika.

L-appostlu Pawlu rrivela motiv ieħor li n-​nies għandhom biex jibdew reliġjon ġdida meta qal: “Jien naf li wara t-​tluq tiegħi jidħlu fostkom ilpup ħorox li ma jittrattawx lill-​merħla b’tenerezza, u minn fostkom stess iqumu rġiel li jitkellmu affarijiet mgħawġin biex jiġbdu lid-​dixxipli għal warajhom.” (Atti 20:​29, 30) Mexxejja mkabbrin spiss jibdew movimenti reliġjużi biex jiġbdu l-​attenzjoni lejhom infushom. Xi reliġjonijiet li b’mod falz jistqarru li huma Kristjani nqasmu f’bosta denominazzjonijiet.

Ir-​Reliġjonijiet lil Min Iridu Jogħġbu?

Xi wħud jistgħu jitqanqlu biex jibdew reliġjon ġdida minħabba dak li jkunu jixtiequ n-​nies in ġenerali. Per eżempju, ir-​rivista Economist għamlet rapport dwar dawk li huma magħrufin bħala reliġjonijiet kbar fl-​Istati Uniti. L-​artiklu jgħid li dawn ir-​reliġjonijiet qed jikbru minħabba li huma “bbażati fuq l-​istess prinċipju tan-​negozji li jkollhom suċċess: li l-​klijent jiġi l-​ewwel.” Xi wħud għandhom “ċerimonji mimlijin divertiment bil-​vidjos, drama u mużika kontemporanja.” Ċerti mexxejja reliġjużi taʼ dawn ir-​reliġjonijiet jistqarru li jgħallmu lill-​membri tagħhom biex ikunu “sinjuri, f’saħħithom u mingħajr problemi.” Għalkemm reliġjonijiet bħal dawn jiġu kritikati għax qegħdin fl-​industrija tad-​divertiment jew tal-​“kummerċ biex wieħed jgħin lilu nnifsu,” jgħid l-​istess sors, “huma sempliċement qed iwieġbu għad-​domanda tan-​nies.” Ir-​rapport jikkonkludi: “Ir-​rabta bejn in-​negozju u r-​reliġjon kienet taʼ suċċess kbir ferm.”

Avolja reliġjonijiet oħrajn ma jkollhomx xejra taʼ negozju b’mod daqshekk ovvju, ir-​reliġjonijiet li qed “iwieġbu għad-​domanda” jfakkruna fi twissija li ta Pawlu. Hu kiteb: “Ikun hemm perijodu taʼ żmien meta ma jittollerawx it-​tagħlim mimli saħħa, imma, fi qbil max-​xewqat tagħhom, jiġbru għalliema madwarhom biex jgħarrxulhom widnejhom; u jbiegħdu widnejhom mill-​verità, u jduru lejn stejjer foloz.”​—2 Timotju 4:​3, 4.

Ladarba ħafna reliġjonijiet nibtu minn xewqa għall-​qawwa politika, il-​prestiġju, u l-​popolarità minflok minn xewqa li jogħġbu lil Alla, ma nistagħġbux li r-​reliġjon hija involuta f’ħażen bħalma hu l-​abbuż tat-​tfal, il-​frodi, il-​gwerer, jew it-​terroriżmu. Ħafna drabi, ir-​reliġjon hija ingann. Kif tistaʼ tevita li tiġi mqarraq?

[Kumment f’paġna 4]

Ħafna reliġjonijiet nibtu minn xewqa għall-​qawwa politika, il-​prestiġju, u l-​popolarità minflok minn xewqa li jogħġbu lil Alla