Leali Lejn Kristu u l-​Ilsir Leali Tiegħu

“Sidu . . . jaħtru fuq kulma għandu.”​—MATTEW 24:​45-​47.

1, 2. (a) L-Iskrittura min tindika li hu l-​Mexxej tagħna? (b) X’juri li Kristu jinsab attiv imexxi lill-​kongregazzjoni Kristjana?

“TISSEJĦUX ‘mexxejja,’ għax wieħed hu l-​Mexxej tagħkom, il-​Kristu.” (Mattew 23:​10) Permezz taʼ dan il-​kliem, Ġesù għamilha ċara lis-​segwaċi tiegħu li ebda bniedem fuq l-​art ma kien se jkun il-​mexxej tagħhom. L-​uniku Mexxej tagħhom kien se jkun fis-​sema​—Ġesù Kristu nnifsu. Ġesù għandu din il-​pożizzjoni permezz taʼ ħatra divina. Ġeħova “qajjem lill-​Kristu mill-​imwiet u . . . għamlu kap fuq kollox għall-​kongregazzjoni, li hi l-​ġisem tiegħu.”​—Efesin 1:​20-​23.

² Ladarba Kristu “hu kap fuq kollox” fejn tidħol il-​kongregazzjoni Kristjana, hu jeżerċita l-​awtorità tiegħu fuq dak kollu li jsir fil-​kongregazzjoni. Xejn ma jaħrablu minn dak li jsir fil-​kongregazzjoni. Hu josserva mill-​qrib il-​kundizzjoni spiritwali taʼ kull grupp taʼ Kristjani, jew kongregazzjoni. Dan jidher ċar mir-​rivelazzjoni li ngħata l-​appostlu Ġwanni fi tmiem l-​ewwel seklu E.K. Lil sebaʼ kongregazzjonijiet, Ġesù ħames darbiet semmielhom li kien jaf l-​għemejjel tagħhom, il-​kwalitajiet pożittivi, u d-​dgħjufijiet tagħhom, u hu tahom pariri u inkuraġġiment skond il-​bżonn. (Rivelazzjoni 2:​2, 9, 13, 19; 3:​1, 8, 15) Għandna kull raġuni biex nemmnu li Ġesù kien daqstant ieħor jaf sew x’kienet il-​kundizzjoni spiritwali taʼ kongregazzjonijiet oħrajn fl-​Asja Minuri, fil-​Palestina, fis-​Sirja, f’Babilonja, fil-​Greċja, fl-​Italja, u f’postijiet oħrajn. (Atti 1:8) Xi ngħidu għal-​lum?

Ilsir Leali

3. Għala huwa xieraq li nqabblu lil Kristu maʼ ras u l-​kongregazzjoni maʼ ġisem?

³ Wara l-​irxoxt tiegħu u ftit qabel ma telaʼ għand Missieru fis-​sema, Ġesù qal lid-​dixxipli tiegħu: “Lili ngħatat kull awtorità fis-​sema u fuq l-​art.” Hu qal ukoll: “Ara, jien magħkom il-​jiem kollha sa tmiem is-​sistema.” (Mattew 28:​18-​20) Hu kien se jibqaʼ magħhom bħala l-​Kap attiv tagħhom. F’ittri lill-​Kristjani f’Efesu u Kolossi, l-​appostlu Pawlu xebbah il-​kongregazzjoni Kristjana maʼ “ġisem,” li Kristu hu r-​Ras, jew il-​Kap, tiegħu. (Efesin 1:​22, 23; Kolossin 1:​8) The Cambridge Bible for Schools and Colleges tgħid li din il-​metafora li tqabbel il-​ġisem mal-​kongregazzjoni tagħti l-​idea mhux biss li unjoni mal-​Kap hija essenzjali imma wkoll li l-​Kap jidderieġi lill-​membri. Huma l-​għodda Tiegħu. Kristu lil min uża bħala l-​għodda kollettiva tiegħu minn meta ngħata l-​qawwa tas-​Saltna fl-​1914?​—Danjel 7:​13, 14.

4. Bħalma hu mbassar fil-​profezija taʼ Malakija, x’sabu Ġeħova u Ġesù Kristu meta ġew jispezzjonaw it-​tempju spiritwali?

⁴ Il-​profezija taʼ Malakija bassret li Ġeħova, is-​“Sid” il-​veru, akkumpanjat mill-​“anġlu tal-​patt,” Ġesù Kristu, Ibnu li kien għadu kif ġie maħtur, kien se jiġi biex jiġġudika u jispezzjona t-​“tempju,” jew id-​dar spiritwali tal-​qima Tiegħu. Jidher ċar li “ż-​żmien stabbilit” biex jibda l-​‘ġudizzju taʼ dar Alla’ wasal fl-​1918.a (Malakija 3:1; 1 Pietru 4:​17) Dawk li kienu qed jgħidu li jirrappreżentaw lil Alla u l-​qima vera tiegħu fuq l-​art ġew eżaminati kif jixraq. Il-​knejjes tal-​Kristjaneżmu, li għal sekli sħaħ għallmu duttrini li jiddiżonoraw lil Alla u li kienu involuti sew fil-​massakru taʼ l-​ewwel gwerra dinjija, ġew miċħudin. Fdal leali taʼ Kristjani midlukin bl-​ispirtu ġew imġarrbin, irfinuti bħallikieku bin-​nar, u approvati, u b’hekk saru għal Ġeħova “nies li jagħmlu l-​offerta bis-​sewwa.”​—Malakija 3:3.

5. Fi qbil mal-​profezija taʼ Ġesù dwar il-​“preżenza” tiegħu, min wera li hu l-​“ilsir” leali?

⁵ Fi qbil mal-​profezija taʼ Malakija, is-​sinjal b’ħafna aspetti differenti li ta Ġesù lid-​dixxipli tiegħu biex jgħinhom jagħrfu ż-​żmien tal-​“preżenza [tiegħu] u taʼ tmiem is-​sistema” kien jinkludi l-​identifikazzjoni taʼ “ilsir” kollettiv. Ġesù qal: “Min hu tassew l-​ilsir leali u għaqli li sidu ħatru fuq in-​nies taʼ daru, biex jagħtihom l-​ikel fiż-​żmien xieraq? Hieni hu dak l-​ilsir li sidu, meta jasal, isibu jagħmel hekk! Tassew ngħidilkom, Hu jaħtru fuq kulma għandu.” (Mattew 24:​3, 45-​47) ‘Meta wasal’ biex jeżamina lill-​“ilsir” fl-​1918, Kristu sab fdal taʼ dixxipli leali midlukin bl-​ispirtu li kienu ilhom mill-​1879 jużaw dan il-​ġurnal u pubblikazzjonijiet oħrajn ibbażati fuq il-​Bibbja biex jipprovdu “l-​ikel [spiritwali] fiż-​żmien xieraq.” Hu rrikonoxxiehom bħala l-​għodda kollettiva tiegħu, jew l-​“ilsir,” u fl-​1919 fdahom bl-​amministrazzjoni taʼ kulma għandu fuq l-​art.

Jieħu Ħsieb Kulma Għandu Kristu fuq l-​Art

6, 7. (a) Ġesù liema termini oħrajn uża meta tkellem dwar l-​“ilsir” leali tiegħu? (b) X’ried jimplika Ġesù meta uża l-​kelma “prokuratur”?

⁶ Ftit xhur qabel ma ta l-​profezija tiegħu dwar is-​sinjal tal-​preżenza tiegħu, inkluż l-​eżistenza taʼ “ilsir” li jirrappreżentah fuq l-​art, Ġesù tkellem dwar dan l-​“ilsir” b’termini kemxejn differenti li juruna x’inhuma r-​responsabbiltajiet taʼ l-​ilsir. Ġesù qal: “Min hu tassew il-​prokuratur leali, l-​għaqli, li sidu jaħtru fuq il-​ġemgħa taʼ qaddejja tiegħu biex jibqaʼ jagħtihom is-​sehem tagħhom taʼ l-​ikel fiż-​żmien xieraq? Ngħidilkom il-​verità, Hu jaħtru fuq kulma għandu.”​—Luqa 12:​42, 44.

⁷ Hawnhekk l-​ilsir huwa msejjaħ prokuratur, kelma tradotta minn terminu Grieg li jfisser “wieħed li jieħu ħsieb lin-​nies tad-​dar jew lill-​proprjetà.” Il-​prokuratur kollettiv ma kienx se jkun sempliċi grupp taʼ studjużi li jispjegaw punti interessanti mill-​Bibbja. Minbarra li jipprovdi ikel spiritwali bnin “fiż-​żmien xieraq,” “il-​prokuratur leali” kien se jiġi maħtur fuq il-​ġemgħa kollha tal-​qaddejja taʼ Kristu u jiġi inkarigat biex jieħu ħsieb l-​interessi kollha taʼ Kristu fuq l-​art, “kulma għandu.” Dan x’kien jinkludi?

8, 9. L-​ilsir hu maħtur biex jieħu ħsieb liema affarijiet?

⁸ Ir-​responsabbiltajiet taʼ l-​ilsir jinkludu l-​amministrazzjoni tal-​faċilitajiet materjali li jintużaw mis-​segwaċi taʼ Kristu sabiex iwettqu l-​attivitajiet Kristjani tagħhom, bħall-​kwartieri ġenerali u l-​uffiċċji tal-​fergħa tax-​Xhieda taʼ Ġeħova, kif ukoll il-​postijiet tal-​qima tagħhom​—is-​Swali tas-​Saltna u s-​Swali taʼ l-​Assembleat​—madwar id-​dinja. Iktar importanti minn hekk, l-​ilsir jieħu ħsieb ukoll programmi taʼ studju tal-​Bibbja li jibnu spiritwalment u li jsiru fil-​laqgħat taʼ kull ġimgħa u f’assembleat u konvenzjonijiet regulari. F’dawn il-​laqgħat, tingħata informazzjoni dwar it-​twettiq tal-​profeziji tal-​Bibbja, u tingħata wkoll direzzjoni f’waqtha dwar kif jiġu applikati l-​prinċipji tal-​Bibbja fil-​ħajja taʼ kuljum.

⁹ Ir-​responsabbiltajiet tal-​prokuratur jinkludu wkoll l-​amministrazzjoni taʼ l-​iktar xogħol importanti, jiġifieri, l-​ippridkar taʼ “din l-​aħbar tajba tas-​saltna” u x-​xogħol taʼ li nagħmlu “dixxipli min-​nies tal-​ġnus kollha.” Dan jinvolvi li n-​nies jiġu mgħallmin josservaw dak kollu li Kristu, il-​Kap tal-​kongregazzjoni, jikkmandana nagħmlu matul dan iż-​żmien taʼ l-​aħħar. (Mattew 24:14; 28:​19, 20; Rivelazzjoni 12:17) Permezz tax-​xogħol taʼ l-​ippridkar u t-​tagħlim inġabret “folla kbira” taʼ mseħbin leali tal-​fdal midluk. Dan “il-​ġid kollu tal-​popli” żgur li hu magħdud fost l-​affarijiet prezzjużi li “għandu” Kristu u li qed jieħu ħsieb l-​ilsir leali.​—Rivelazzjoni 7:9; Ħaggaj 2:7.

Ġemgħa li Tiggverna li Tirrappreżenta l-​Klassi taʼ l-​Ilsir

10. Liema ġemgħa li tagħmel id-​deċiżjonijiet kienet teżisti fl-​ewwel seklu, u x’effett kellha fuq il-​kongregazzjonijiet?

¹⁰ Ir-​responsabbiltajiet kbar taʼ l-​ilsir leali żgur li jinvolvu li jittieħdu ħafna deċiżjonijiet. Fil-​kongregazzjoni Kristjana tal-​bidu, l-​appostli u l-​anzjani f’Ġerusalemm aġixxew taʼ rappreżentanti, billi ħadu deċiżjonijiet għan-​nom tal-​kongregazzjoni Kristjana kollha kemm hi. (Atti 15:​1, 2) Id-​deċiżjonijiet taʼ din il-​ġemgħa li tiggverna taʼ l-​ewwel seklu ġew mgħoddijin lill-​kongregazzjonijiet permezz taʼ ittri u rappreżentanti li jivvjaġġaw. Il-​Kristjani tal-​bidu ferħu meta rċivew din id-​direzzjoni ċara, u l-​kooperazzjoni tagħhom mill-​qalb mal-​ġemgħa li tiggverna inkuraġġiet il-​paċi u l-​unità.​—Atti 15:​22-​31; 16:​4, 5; Filippin 2:2.

11. Kristu lil min qed juża llum biex jidderieġi lill-​kongregazzjoni tiegħu, u kif għandna nqisu lil dan il-​grupp taʼ Kristjani midlukin?

¹¹ Bħal fi żmien il-​Kristjani tal-​bidu, grupp żgħir taʼ indokraturi midlukin bl-​ispirtu jifformaw il-​Ġemgħa li Tiggverna tas-​segwaċi taʼ Kristu fuq l-​art illum. Permezz tal-​qawwa li qed jeżerċita b’“idu l-​leminija,” Kristu, il-​Kap tal-​kongregazzjoni, qed jidderieġi lil dawn l-​irġiel leali hekk kif jindokraw ix-​xogħol tas-​Saltna. (Rivelazzjoni 1:​16, 20) Albert Schroeder, li qeda għal żmien twil bħala membru tal-​Ġemgħa li Tiggverna u li dan l-​aħħar temm il-​ħajja tiegħu fuq l-​art, kiteb fil-​bijografija tiegħu: “Il-​Ġemgħa li Tiggverna tiltaqaʼ kull nhar t’Erbgħa, tiftaħ il-​laqgħa bit-​talba u titlob għad-​direzzjoni taʼ l-​ispirtu taʼ Ġeħova. Isir sforz kbir biex kull kwistjoni li niddiskutu u kull deċiżjoni li ssir tkun fi qbil mal-​Kelma t’Alla l-​Bibbja.”b Jistaʼ jkollna fiduċja fi Kristjani midlukin bħal dawn li huma tant leali. Dwarhom, b’mod partikulari, aħna għandna nagħtu kas il-​kmand taʼ l-​appostlu Pawlu: “Kunu ubbidjenti lejn dawk li qed imexxu fostkom u kunu sottomessi lejhom, għax huma qed jgħassulkom ruħkom.”​—Ebrej 13:17.

Nuru Rispett Xieraq Lejn l-​Ilsir Leali

12, 13. Liema raġunijiet Skritturali għandna biex nuru rispett lejn il-​klassi taʼ l-​ilsir?

¹² Raġuni fundamentali għala għandna nuru rispett xieraq lejn il-​klassi taʼ l-​ilsir leali hi li jekk nagħmlu dan, fil-​fatt, inkunu qed nuru rispett lejn is-​Sid, Ġesù Kristu. Pawlu kiteb dwar il-​midlukin: “Min kien ħieles meta ssejjaħ, hu lsir taʼ Kristu. Kontu mixtrijin bi prezz.” (1 Korintin 7:​22, 23; Efesin 6:6) Għalhekk, meta nissottomettu ruħna lealment għad-​direzzjoni taʼ l-​ilsir leali u l-​Ġemgħa li Tiggverna tiegħu, aħna nkunu qed nissottomettu ruħna lejn Kristu, is-​Sid taʼ l-​ilsir. Il-​fatt li nuru rispett xieraq għall-​għodda li juża Kristu biex jieħu ħsieb kulma għandu fuq l-​art hu mod wieħed kif “[nistqarru] quddiem kulħadd li Ġesù Kristu hu Mulej għall-​glorja t’Alla l-​Missier.”​—Filippin 2:11.

¹³ Raġuni Skritturali oħra għala għandna nuru rispett lejn l-​ilsir leali hi li l-​Kristjani midlukin fuq l-​art jissemmew b’mod figurattiv bħala “tempju” li Ġeħova joqgħod fih “bl-​ispirtu.” Bħala tali, huma “qaddisin.” (1 Korintin 3:​16, 17; Efesin 2:​19-​22) Ġesù jafda lil dan il-​grupp deskritt bħala tempju qaddis b’kulma għandu fuq l-​art, u dan ifisser li ċerti drittijiet u responsabbiltajiet fil-​kongregazzjoni Kristjana jappartjenu biss lil dan l-​ilsir kollettiv. Għaldaqstant, kulmin hu fil-​kongregazzjoni jħares lejh bħala d-​dmir sagru tiegħu li jsegwi u jżomm mad-​direzzjoni li ġejja mill-​ilsir leali u mill-​Ġemgħa li Tiggverna tiegħu. Tabilħaqq, in-​“nagħaġ oħrajn” iħossuhom tassew privileġġati li jgħinu lill-​klassi taʼ l-​ilsir f’li tieħu ħsieb l-​interessi tas-​Sid.​—Ġwanni 10:16.

Nagħtu Appoġġ Leali

14. Bħalma pprofetizza Isaija, in-​nagħaġ oħrajn kif jimxu wara l-​klassi taʼ l-​ilsir midluk u jaqdu bħala “ħaddiema mhux imħallsin”?

¹⁴ Is-​sottomissjoni b’umiltà tan-​nagħaġ oħrajn lejn il-​membri midlukin taʼ Iżrael spiritwali ġiet imbassra fil-​profezija taʼ Isaija: “Dan jgħid il-​Mulej: ‘Il-​[“ħaddiema mhux imħallsin,” NW] taʼ l-​Eġittu u l-​qligħ taʼ Kus, u tas-​Sabajin, nies twal, jgħaddu għal għandek u jsiru tiegħek. Jimxu warajk u jgħaddu mxekkla, u quddiemek jinxteħtu fl-​art, u jitolbuk u jgħidulek: “Għandek biss hemm Alla, u m’hemmx ieħor għajru, m’hemmx Alla ħliefu.”’” (Isaija 45:14) B’mod simboliku, in-​nagħaġ oħrajn illum jimxu wara l-​klassi taʼ l-​ilsir midluk u l-​Ġemgħa li Tiggverna tagħha billi jsegwu d-​direzzjoni tagħhom. Bħala “ħaddiema mhux imħallsin,” in-​nagħaġ oħrajn minn jeddhom jagħtu mis-​saħħa fiżika u r-​riżorsi tagħhom biex jappoġġaw ix-​xogħol taʼ l-​ippridkar li qed isir madwar id-​dinja u li Kristu inkariga lis-​segwaċi midlukin tiegħu fuq l-​art biex jagħmlu.​—Atti 1:8; Rivelazzjoni 12:17.

15. Il-​profezija taʼ Isaija 61:​5, 6 (NW) kif tbassar ir-​relazzjoni li teżisti bejn in-​nagħaġ oħrajn u Iżrael spiritwali?

¹⁵ In-​nagħaġ oħrajn jinsabu ferħanin u grati li jaqdu lil Ġeħova taħt il-​ħarsien tal-​klassi taʼ l-​ilsir u l-​Ġemgħa li Tiggverna tagħha. Huma jirrikonoxxu li l-​midlukin huma membri taʼ “l-​Iżrael t’Alla.” (Galatin 6:​16) Bħala “stranġieri” jew “barranin” figurattivi li jissieħbu maʼ Iżrael spiritwali, huma jaqdu bil-​ferħ bħala “bdiewa” u ‘dawk li jiżbru d-​dwieli’ taħt id-​direzzjoni tal-​midlukin, “il-​qassisin taʼ Ġeħova” u “l-​ministri t’Alla.” (Isaija 61:​5, 6, NW) Huma jieħdu sehem b’mod żeluż fl-​ippridkar taʼ din l-​aħbar tajba tas-​Saltna u f’li jagħmlu dixxipli min-​nies tal-​ġnus kollha. Huma jagħtu appoġġ b’qalbhom kollha lill-​klassi taʼ l-​lsir f’li jirgħu u jieħdu ħsieb lil uħud ġodda li huma bħal nagħaġ.

16. Xi jqanqal lin-​nagħaġ oħrajn biex jagħtu appoġġ leali lill-​ilsir leali u għaqli?

¹⁶ In-​nagħaġ oħrajn jirrikonoxxu li huma jibbenefikaw ħafna mill-​isforzi ħabrieka taʼ l-​ilsir leali biex jipprovdilhom l-​ikel spiritwali f’waqtu. Bl-​umiltà huma jirrikonoxxu li kieku ma kienx għall-​ilsir leali u għaqli, huma ftit li xejn kien se jkollhom għarfien dwar il-​veritajiet prezzjużi tal-​Bibbja, bħal per eżempju dwar is-​sovranità taʼ Ġeħova, it-​taqdis taʼ ismu, is-​Saltna, is-​smewwiet ġodda u l-​art ġdida, ir-​ruħ, il-​kundizzjoni tal-​mejtin, u l-​identità vera taʼ Ġeħova, Ibnu, u l-​ispirtu qaddis. Bi gratitudni u lealtà kbira, in-​nagħaġ oħrajn jappoġġaw bl-​imħabba lil ‘ħut’ Kristu li huma midlukin fuq l-​art matul dan iż-​żmien taʼ l-​aħħar.​—Mattew 25:​40.

17. Il-​Ġemgħa li Tiggverna x’ħasset li hu neċessarju li tagħmel, u x’se nikkunsidraw fl-​artiklu li jmiss?

¹⁷ Minħabba li qed jonqsu fl-​għadd, il-​midlukin ma jistgħux ikunu preżenti fil-​kongregazzjonijiet kollha biex jiżguraw li jieħdu ħsieb kulma għandu Kristu. Minħabba f’hekk, il-​Ġemgħa li Tiggverna taħtar irġiel minn fost in-​nagħaġ oħrajn f’pożizzjonijiet taʼ indokrar fl-​uffiċċji tal-​fergħa, fid-​distretti, fis-​circuits, u fil-​kongregazzjonijiet tax-​Xhieda taʼ Ġeħova. Il-​lealtà tagħna lejn Kristu u l-​ilsir leali tiġi effettwata b’xi mod mill-​attitudni tagħna lejn dawk ir-​rgħajja li jaqdu taħt id-​direzzjoni taʼ Kristu? Dan se jiġi kunsidrat fl-​artiklu li jmiss.

[Noti taʼ taħt]

Bħala Reviżjoni

• Min hu l-​Mexxej tagħna, u liema ħaġa turina li hu jaf x’inhu jiġri fil-​kongregazzjonijiet?

• Fl-​ispezzjoni tat-​“tempju,” min instab qed jaġixxi bħala ilsir leali, u x’ġie fdat f’idejh?

• Liema raġunijiet Skritturali għandna biex nappoġġaw lealment lill-​ilsir leali?

[Stampi f’paġna 23]

Dak li Ġesù “għandu” amministrat mill-​“prokuratur” jinkludi l-​affarijiet materjali, il-​programmi spiritwali, u l-​attività taʼ l-​ippridkar

[Stampa f’paġna 25]

Membri tan-​nagħaġ oħrajn jappoġġaw lill-​klassi taʼ l-​ilsir leali billi jippridkaw b’mod żeluż