Mistoqsijiet mill-​Qarrejja

Is-​Sultan Sawl għala staqsa lil David, “Bin min int, żagħżugħ?” wara li David qatel lil Gulija, minkejja li Sawl iktar qabel kien bagħat għal David biex ikun qaddej tiegħu?​—1 Samwel 16:22; 17:58.

Tweġiba sempliċi hi li Sawl nesa min kien David minħabba li l-​ewwel darba li ltaqgħu kien għal ftit ħin biss. Madankollu, dan jidher li m’huwiex il-​każ, ladarba r-​rakkont fl-​1 Samwel 16:​18-​23 juri li s-​Sultan Sawl kien bagħat speċifikament għal David u sar iħobbu ħafna tant li għamlu l-​iskudier tiegħu. Milli jidher Sawl kien jafu sew lil David.

Xi studjużi tal-​Bibbja jikkunsidraw il-​versi fl-​1 Samwel 17:​12-​31 u 17:55-​–18:5 bħala li ġew miżjuda iktar tard minħabba li dawn il-​versi ma jinstabux f’ċerti kopji tas-​Settanta Griega, traduzzjoni taʼ l-​Iskrittura Ebrajka li tlestiet fit-​tieni seklu Q.E.K. Madankollu, m’huwiex għaqli li tasal għal konklużjoni bħal din fuq il-​bażi taʼ dawn il-​kopji tas-​Settanta biss, ladarba dawn is-​siltiet jidhru f’manuskritti awtoritattivi oħrajn taʼ l-​Iskrittura Ebrajka.a

Milli jidher, billi staqsa l-​ewwel lil Abner imbagħad lil David innifsu, Sawl ma kienx biss interessat f’li jkun jaf x’jismu missier David. Wara li ra aspett ieħor tal-​personalità taʼ David, bħala raġel taʼ fidi u kuraġġ kbir li kien għadu kif għeleb lil Gulija, Sawl xtaq li jkun jaf x’tip taʼ raġel hu dak li kien rabba lil dan iż-​żagħżugħ. Sawl setaʼ kellu f’moħħu li jżid fl-​armata lil Ġesse, missier David, jew membri oħrajn mill-​familja tiegħu, ladarba l-​kuraġġ u l-​qlubija li dehru f’David setgħu jkunu wkoll fihom.

Għalkemm l-​1 Samwel 17:58 jinkludi biss tweġiba qasira minn David, “bin il-​qaddej tiegħek Ġesse, il-​Betlemita,” dak li jsegwi wara jissuġġerixxi li setaʼ kien hemm konversazzjoni itwal. Fuq dan il-​punt, innota xi kkummentaw C. F. Keil u F. Delitzsch: “Huwa evidenti ħafna mill-​espressjoni [fl-1 Samwel 18:1], ‘meta hu spiċċa jitkellem maʼ Sawl,’ li Sawl kompla jiddiskuti miegħu iktar fit-​tul dwar il-​familja tiegħu, ladarba din l-​espressjoni timplika konversazzjoni fit-​tul.”

Minn dan kollu nistgħu nikkonkludu li bil-​mistoqsija tiegħu, “Bin min int, żagħżugħ?” Sawl kellu l-​intenzjoni li jiskopri, mhux lidentità taʼ David, li hu diġà kien jafha, imma ried ikun jaf dwar l-​isfond tiegħu.

[Nota taʼ taħt]

[Stampa f’paġna 31]

Sawl għala staqsa lil David bin min kien?