Alla Għala Jippermetti l-​Ħażen?

KULFEJN tħares tistaʼ tara li l-​ħażen u t-​tbatija qed jiżdiedu. Pajżani flimkien maʼ suldati jinqatlu minħabba l-​gwerra. Il-​kriminalità u l-​vjolenza huma komuni. Forsi dan l-​aħħar int kont vittma taʼ xi preġudizzju jew taʼ xi inġustizzja. Meta tqis dak li rajt u esperjenzajt, x’aktarx li staqsejt, ‘Alla għala jippermetti l-​ħażen?’

Ħafna nies staqsew din l-​istess mistoqsija. Xi 3,600 sena ilu, qaddej leali t’Alla jismu Ġob staqsa: “L-​għala l-​ħżiena ħajjithom twila?” (Ġob 21:7) Imnikket minħabba l-​għemejjel mill-​agħar taʼ dawk f’pajjiżu, il-​profeta Ġeremija li għex fis-​sebaʼ seklu Q.E.K. staqsa: “Għaliex il-​ħżiena jgawdu r-​riżq, u l-​ħatjin kollha jgħixu fis-​sliem?” (Ġeremija 12:1) Kemm Ġob u kemm Ġeremija kienu jafu li Alla hu ġust. Però, huma ħasbu dwar l-​għala kien hemm daqstant ħażen. Forsi int ukoll issibha diffiċli biex tifhem dan.

Xi wħud iwaħħlu f’Alla għall-​ħażen u t-​tbatija. Oħrajn jistaqsu lilhom infushom: ‘Jekk Alla huwa suprem, ġust, u kollu mħabba, għala ma jtemmx il-​ħażen u t-​tbatija? Għala ħalla l-​ħażen jibqaʼ għaddej sa żmienna?’ L-​artiklu li jmiss se jikkunsidra t-​tweġibiet għal dawn il-​mistoqsijiet u mistoqsijiet importanti oħrajn.

[Sors tal-Istampa f’paġna 3]

AP Photo/Adam Butler