Il-Mogħdrija f’Dinja Kiefra
RAĠEL fil-Burundi jimrad serjament bil-malarja. Jeħtieġ li jittieħed b’urġenza lejn l-isptar. Imma kif? M’hemm ebda karozza li tistaʼ twasslu. Tnejn minn ħbiebu tal-qalb jiġu jgħinuh. Huma jpoġġuh fuq rota u jimbottawh għal ħames sigħat bi tbatija kbira minn art muntanjuża. Iwassluh u jrikkbuh karozza tal-linja li tieħdu lejn l-eqreb sptar. Ftit tal-jiem wara, hu jibda jħossu ferm aħjar.
Fin-naħa l-oħra tal-globu, fid-diżastru li ħalla warajh l-Uragan Katrina li ħarbat l-inħawi tal-Golf taʼ l-Istati Uniti f’Awissu tas-sena 2005, grupp taʼ volontieri jsibu t-tifrik taʼ dar taħt xi siġar li waqgħu fuqha. Il-volontieri, li sidt id-dar ma kinitx tafhom, iqattgħu l-jum kollu jneħħu s-siġar u t-tifrik permezz taʼ srieraq taʼ l-elettriku. “Ma nistax nirringrazzjahom biżżejjed lil dawn [in-nies],” tgħid sidt id-dar.
Rapporti sensazzjonali mill-mezzi tax-xandir għandhom it-tendenza li jenfasizzaw l-atroċitajiet u l-krudeltajiet li jsiru. Spiss minħabba dawn ir-rakkonti, ftit li xejn tingħata importanza lill-atti taʼ mogħdrija u qalb tajba li jsiru kuljum. Madankollu, dan ma jbiddilx il-fatt li n-nies kullimkien huma ddisprati għall-imħabba, l-affezzjoni, u s-simpatija. Aħna nixxennqu għall-mogħdrija! Dawn is-sentimenti jinħassu iktar fl-istaġun tal-Milied, meta ħafna nies jitkellmu jew ikantaw dwar ‘is-sliem [u] r-rieda tajba lejn il-bnedmin.’—Luqa 2:14, Karm Żammit.
Jistaʼ ma jkunx faċli li turi l-mogħdrija f’dinja li hi tant nieqsa mill-imħabba u l-ospitalità. L-attitudni komuni fost in-nies hi li l-kefrija u l-egoiżmu jwasslu għas-suċċess u l-unur. Milli jidher, ħafna nies jemmnu li huwa iktar għaqli li tkun kiefer milli turi mogħdrija. Ir-regħba u l-egoiżmu faċilment iwaqqfuk milli turi mogħdrija.
B’hekk, ħafna jpoġġu lilhom infushom l-ewwel, saħansitra jinjoraw is-sentimenti jew l-interessi taʼ ħaddieħor. Eroj irġiel fid-dinja taʼ l-isports u tad-divertiment spiss jiġu preżentati bħala “rġiel veri” (uħud maskili b’mod aggressiv) li ma jurux affezzjoni b’ġentilezza. Xi ħakkiema politiċi jaġixxu bl-istess mod.
Għalhekk, nagħmlu tajjeb jekk nistaqsu: Għala għandna nuru s-simpatija? Tqanqlek il-mogħdrija biex tagħmel it-tajjeb? U x’jistaʼ jgħinna nuru l-mogħdrija? L-artiklu li jmiss se jiddiskuti dawn il-mistoqsijiet.
[Kaxxa f’paġna 3]
•Tkun dgħajjef jekk turi l-mogħdrija?
•X’qawwa għandha l-mogħdrija?
•B’liema modi prattiċi tistaʼ turi s-simpatija?