Meta Se Tiġi s-​Saltna t’Alla?

“MULEJ, f’dan iż-​żmien se terġaʼ tistabbilixxi s-​saltna taʼ Iżrael?” (Atti 1:6) L-​appostli kienu ħerqanin li jkunu jafu meta’ Ġesù kellu jistabbilixxi s-​Saltna tiegħu. Illum, madwar 2,000 sena wara, il-​bnedmin għadhom ħerqanin li jkunu jafu: Meta se tiġi s-​Saltna t’Alla?

Ladarba s-​Saltna kienet it-​tema taʼ l-​ippridkar taʼ Ġesù, int x’aktarx qed tassumi li hu ddiskuta din il-​mistoqsija. U tabilħaqq hekk għamel! Hu tkellem diversi drabi dwar perijodu taʼ żmien speċifiku li sejjaħlu l-​“preżenza” tiegħu. (Mattew 24:37) Din il-​preżenza għandha x’taqsam ħafna mal-​fatt li s-​Saltna Messjanika ġiet stabbilita. X’inhi din il-​preżenza? Ejja nikkunsidraw erbaʼ veritajiet li l-​Bibbja tirrivela dwar il-​preżenza taʼ Kristu.

1. Il-​preżenza taʼ Kristu kellha tibda żmien twil wara l-​mewt tiegħu. Ġesù ta tixbiha li fiha qabbel lilu nnifsu maʼ raġel li “vvjaġġa lejn art imbiegħda biex jikseb poter bħala sultan.” (Luqa 19:12) Kif twettqet din it-​tixbiha profetika? Sewwa, Ġesù miet u ġie rxoxtat; imbagħad hu vvjaġġa lejn “art imbiegħda,” jiġifieri, is-​sema. Bħalma pprofetizza Ġesù f’tixbiha simili, ir-​ritorn tiegħu fil-​poter bħala sultan kellha tiġi “wara żmien twil.”—Mattew 25:19.

Xi snin wara li Ġesù telaʼ s-​sema, l-​appostlu Pawlu kiteb: “Dan ir-​raġel [Ġesù] offra sagrifiċċju wieħed għad-​dnubiet għal dejjem u qagħad bil-​qiegħda fuq il-​leminija t’Alla, jistenna, minn dak iż-​żmien ’il quddiem, sakemm l-​għedewwa tiegħu jitqiegħdu bħala banketta għal saqajh.” (Ebrej 10:12, 13) B’hekk, perijodu twil taʼ stennija kellu jgħaddi wara li Ġesù wasal fis-​sema. Dan iż-​żmien taʼ stennija finalment wasal fi tmiemu meta Alla Ġeħova għamel lil Ibnu s-​Sultan tas-​Saltna Messjanika li kienet imwiegħda żmien twil ilu. Kien dakinhar li bdiet il-​preżenza taʼ Kristu. Kellhom il-​bnedmin fuq l-​art jaraw dan l-​avveniment eċċitanti?

2. Il-​preżenza hija inviżibbli għal għajn il-​bniedem. Ftakar, Ġesù ddiskuta s-​sinjal tal-​preżenza tiegħu. (Mattew 24:3) Kieku l-​preżenza tiegħu kienet viżibbli għal għajn il-​bniedem, kien ikun hemm bżonn taʼ sinjal? Biex nagħtu eżempju: Immaġina li qiegħed tivvjaġġa biex tara l-​oċean. Għandek mnejn tara tabelli fit-​triq li juruk id-​direzzjoni, iżda ladarba tasal ix-​xatt u tieqaf f’xifer il-​baħar u tara dak l-​ilma kollu mifrux quddiemek sax-​xefaq, se tistenna int li tara xi tabella bi vleġġa kbira tipponta ’l quddiem bil-​kelma “Oċean” miktuba fuqha? Dażgur li le! Għala hemm bżonn sinjal għal dak li tistaʼ tara b’għajnejk faċilment?

Ġesù ddeskriva s-​sinjal tal-​preżenza tiegħu, mhux biex jipponta lejn xi ħaġa li l-​bnedmin jistgħu jarawha b’għajnejhom, imma biex jgħinhom jindunaw b’dak li kien se jseħħ fis-​sema. B’hekk, Ġesù qal: “Is-​saltna t’Alla mhix ġejja b’mod li jispikka.” (Luqa 17:20) Allura, is-​sinjal kif se juri lil dawk fuq l-​art li bdiet il-​preżenza taʼ Kristu?

3. Il-​preżenza taʼ Ġesù kellha tiġi mmarkata minn żmien taʼ inkwiet kbir hawn fuq l-​art. Ġesù qal li l-​preżenza tiegħu bħala Sultan fis-​sema kellha tiġi mmarkata fuq l-​art minn gwerer, ġuħ, terremoti, mard, u ksur tal-​liġi. (Mattew 24:7-12; Luqa 21:10, 11) X’kellu jikkaġuna din il-​miżerja kollha? Il-​Bibbja tispjega li Satana, “il-​ħakkiem taʼ din id-​dinja,” għandu rabja kbira għax jaf li ż-​żmien tiegħu hu qasir ħafna issa li bdiet il-​preżenza taʼ Kristu bħala Sultan. (Ġwanni 12:31; Rivelazzjoni 12:9, 12) Din l-​evidenza viżibbli tar-​rabja taʼ Satana u tal-​preżenza taʼ Kristu hija abbundanti fi żmienna. Speċjalment mill-​1914, sena li l-​istorjografi jirrikonoxxu li fiha kien hemm bidla sinifikanti, dehret din l-​evidenza fuq skala globali li qatt ma kien hawn bħalha.

Dan kollu forsi jidher li hu aħbar kerha, iżda m’huwiex. Dan ifisser li s-​Saltna Messjanika qed taħkem issa fis-​sema. Dalwaqt, dan il-​gvern se jeżerċita l-​ħakma tiegħu għal fuq din l-​art kollha. Allura, in-​nies kif se jsiru jafu dwar din is-​Saltna sabiex huma jkunu jistgħu jaċċettawha biex taħkem fuqhom u jsiru sudditi tagħha?

4. Il-​preżenza taʼ Ġesù hija mmarkata minn xogħol taʼ l-​ippridkar madwar id-​dinja. Ġesù qal li l-​preżenza tiegħu se tkun bħalma kienu “jiem Noè.”a (Mattew 24:37-39) Noè ma kienx biss bennej taʼ l-​arka; hu kien ukoll “predikatur tal-​ġustizzja.” (2 Pietru 2:5) Noè wissa lin-​nies li l-​ġudizzju minn Alla kien imminenti. Ġesù qal li s-​segwaċi tiegħu fuq l-​art se jkunu qed jagħmlu xi ħaġa simili matul il-​preżenza tiegħu. Hu pprofetizza: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.”—Mattew 24:14.

Bħalma rajna fl-​artiklu taʼ qabel, is-​Saltna t’Alla se tfarrak il-​gvernijiet kollha taʼ din id-​dinja. Ix-​xogħol taʼ l-​ippridkar iġib lin-​nies konxji tal-​fatt li dan il-​gvern tas-​sema wasal biex jieħu azzjoni, u jagħti wkoll l-​opportunità lil kulħadd biex jiskansa l-​qerda li ġejja u jsir sudditu tas-​Saltna. Għalhekk, il-​mistoqsija importanti hi, Int kif se twieġeb?

Is-​Saltna t’Alla Se Tkun Aħbar Tajba Għalik?

Il-​messaġġ li ppriedka Ġesù kien wieħed taʼ tama li ma tistaʼ tqabbilha maʼ xejn. Wara r-​ribelljoni fl-​Għeden eluf taʼ snin ilu, Alla Ġeħova għamel arranġamenti biex jistabbilixxi gvern li kien se jirranġa l-​affarijiet, u jreġġaʼ lura lill-​umanità lejn il-​kundizzjoni li Alla kellu f’moħħu għalihom sa mill-​bidu—ħajja taʼ dejjem f’ġenna hawn fuq l-​art. X’jistaʼ jkun iktar eċċitanti mill-​għarfien li dan il-​gvern imwiegħed żmien twil ilu qed jaħkem issa mis-​sema? Din m’hijiex xi idea vaga jew astratta imma realtà ħajja!

Issa, is-​Sultan maħtur minn Alla qed jaħkem f’nofs l-​għedewwa tiegħu. (Salm 110:2) F’din id-​dinja korrotta u mbiegħda minn Alla, il-​Messija qed iwettaq ix-​xewqa taʼ Missieru biex ifittex lil dawk kollha li jixtiequ jsiru jafu lil Alla kif verament hu biex iqimuh “bl-​ispirtu u l-​verità.” (Ġwanni 4:24) It-​tama li jgħixu għal dejjem taħt il-​ħakma tas-​Saltna t’Alla hija disponibbli għan-​nies taʼ kull razza, età, u ambjent soċjali. (Atti 10:34, 35) Aħna nħeġġuk biex taħtaf din l-​opportunità meraviljuża li għandek quddiemek. Tgħallem dwar is-​Saltna t’Alla issa, sabiex tkun tistaʼ tgawdi l-​ħajja taħt il-​ħakma taʼ tjieba tagħha għal dejjem!—1 Ġwanni 2:17.

[Nota taʼ taħt]

[Stampi f’paġni 8, 9]

L-​aħbarijiet ħżiena li nisimgħu kuljum jagħtu prova li l-​affarijiet tajbin waslu biex jiġu

[Sors]

Antiaircraft gun: U.S. Army photo