Kont Taf?

L-​astroloġi meta żaru lil Ġesù?

Fl-​Evanġelju taʼ Mattew jintqalilna li “astroloġi mill-​inħawi tal-​lvant” żaru lil Ġesù u ġabulu xi rigali. (Mattew 2:1-12) Ma jintqalx kemm kien hemm minn dawn l-​astroloġi, jew maġi, li żaru liċ-​ċkejken Ġesù, u m’hemm l-​ebda bażi soda għall-​idea tradizzjonali li kienu tlieta; lanqas ma jintqalilna x’jisimhom fir-​rakkont Bibliku.

In-New International Version Study Bible jagħmel dan il-​kumment dwar Mattew 2:11: “Għall-​kuntrarju tat-​tradizzjoni, il-​Maġi ma żarux lil Ġesù meta kien fil-​maxtura, f’dak il-​lejl stess li twieled, bħalma għamlu r-​rgħajja. Huma marru xi xhur wara u żaruh bħala ‘tifel’ ġo ‘daru.’” Dan hu konfermat mill-​fatt li Erodi, meta pprova joqtol lit-​tifel ċkejken, ordna li f’Betlehem u fid-​distretti tagħha jinqatlu s-​subien kollha li kellhom minn sentejn ’l isfel. Hu għażel din l-​età billi kkalkula “skond iż-​żmien li kien tkixxef bir-​reqqa mingħand l-​astroloġi.”—Mattew 2:16.

Kieku dawn l-​astroloġi żaru lil Ġesù f’dak il-​lejl stess li twieled u ħadulu deheb u rigali prezzjużi oħrajn, x’aktarx li Marija ma kinitx toffri biss żewġ għasafar meta ppreżentat lil Ġesù fit-​tempju f’Ġerusalemm 40 jum wara. (Luqa 2:22-24) Dan il-​provvediment fil-​Liġi kien għan-​nies foqra li ma kinux jifilħu joffru ħaruf. (Levitiku 12:6-8) Madankollu, dawn ir-​rigali prezzjużi setgħu kienu f’waqthom u siewja biex ikopru l-​ispejjeż marbutin maż-​żmien li l-​familja taʼ Ġesù qattgħet fl-​Eġittu.—Mattew 2:13-15.

Ġesù għala ħa erbat ijiem biex jasal ħdejn il-​qabar taʼ Lazzru?

Bażikament, mid-​dehra Ġesù apposta ppjanahom hekk l-​affarijiet. Għala nistgħu ngħidu dan? Ikkunsidra r-​rakkont imniżżel fi Ġwanni kapitlu 11.

Meta Lazzru, li kien joqgħod Betanja u li kien ħabib taʼ Ġesù, marad serjament, ħutu bagħtu jgħidu b’dan lil Ġesù. (Versi 1-3) Dakinhar Ġesù kien madwar vjaġġ taʼ jumejn ’il bogħod minn Betanja. (Ġwanni 10:40) Evidentement, bejn wieħed u ieħor, Lazzru miet fiż-​żmien meta l-​aħbar waslet għand Ġesù. X’għamel Ġesù? Hu “baqaʼ jumejn oħra fejn kien,” u mbagħad telaq lejn Betanja. (Versi 6, 7) Għaldaqstant, billi qagħad jistenna jumejn u mbagħad ivvjaġġa jumejn, hu wasal ħdejn il-​qabar erbat ijiem wara l-​mewt taʼ Lazzru.—Vers 17.

Iktar kmieni, Ġesù kien wettaq żewġ każijiet taʼ rxoxt—wieħed eżatt mal-​mewt tal-​persuna u l-​ieħor x’aktarx wettqu xi ftit tal-​ħin wara, dakinhar stess li miet l-​individwu. (Luqa 7:11-17; 8:49-55) Setaʼ hu jqajjem lil xi ħadd li kien ilu mejjet erbat ijiem u li ġismu kien diġà beda jitħassar? (Vers 39) Taʼ interess, xogħol taʼ referenza Biblika jgħid li fost il-​Lhud kien hemm it-​twemmin li “ma kien hemm ebda tama għall-​persuna li tkun ilha mejta erbat ijiem; sa dak il-​ħin il-​ġisem ikun qed juri biċ-​ċar li qed jitħassar, u r-​ruħ, li kien maħsub li kienet toqgħod titlajja fuq il-​ġisem għal tlett ijiem, tkun telqet.”

Jekk fost dawk miġburin ħdejn il-​qabar kien hemm xi ħadd li kellu xi dubju, hu kien se jara b’għajnejh stess il-​qawwa taʼ Ġesù fuq il-​mewt. Wieqaf ħdejn il-​qabar miftuħ, Ġesù għajjat: “Lazzru, oħroġ!” Imbagħad “dak li qabel kien mejjet ħareġ.” (Versi 43, 44) L-​irxoxt, u mhux l-​idea falza li r-​ruħ tibqaʼ ħajja wara l-​mewt, huwa t-​tama vera għall-​mejtin.—Eżekjel 18:4, Karm Żammit; Ġwanni 11:25.