Għallem Lil Uliedek

Għala Ġesù M’Għaġġilx

ĠESÙ sar jaf li l-​ħabib tajjeb tiegħu, Lazzru, kien marid ħafna. Messaġġier mibgħut minn Marija u Marta, ħut Lazzru, ġab l-​aħbar lil Ġesù. Il-​messaġġier ġie minn Betanja, il-​post fejn Lazzru u ħutu kienu jgħixu. L-​aħwa nisa kienu jemmnu li Ġesù setaʼ jfejjaq lil ħuhom, avolja kienu jgħixu ’l bogħod fuq in-​naħa l-​oħra tax-​Xmara Ġordan. Kienu jafu li hu diġà kien fejjaq nies mill-​bogħod.—Mattew 8:5-​13; Ġwanni 11:1-​3.

Meta l-​messaġġier wasal ħdejn Ġesù u qallu bl-​aħbar taʼ niket, Ġesù m’għamel xejn. Il-​Bibbja tgħid: “Baqaʼ jumejn oħra fil-​post fejn kien.” (Ġwanni 11:6) Taf għala Ġesù m’għaġġilx biex jgħin lil Lazzru?—a Ejja nitkellmu dwar dan.

Ġesù kien jaf li Lazzru miet minħabba l-​marda li kellu. Għalhekk, hu qal lill-​appostli tiegħu: “Ejjew nerġgħu mmorru l-​Lhudija.” Huma argumentaw: “Il-​Lhud għadhom kif kienu qed jipprovaw iħaġġruk, u se terġaʼ tmur hemmhekk?” Ġesù spjega: “Il-​ħabib tagħna Lazzru mar jistrieħ, imma jien se mmur inqajmu mill-​irqad.”

L-​appostli wieġbu: “Mulej, jekk mar jistrieħ, jgħaddilu.” Issa Ġesù spjega: “Lazzru miet.” Imbagħad, qal xi ħaġa li żgur ħalliethom sorpriżi: “Nifraħ minħabba fikom li ma kontx hemmhekk . . . Imma ejjew immorru ħdejh.”

Tumas, b’kuraġġ qal: ‘Ejjew immorru aħna wkoll, biex immutu maʼ Ġesù.’ Tumas kien jaf li l-​għedewwa taʼ Ġesù kienu se jerġgħu jipprovaw joqtluh, u l-​appostli setgħu jinqatlu wkoll. Imma kollha marru xorta waħda. Wara jumejn jew iktar waslu Betanja, ir-​raħal taʼ Lazzru. Kien xi tliet kilometri ’l bogħod minn Ġerusalemm.—Ġwanni 11:7-​18.

Taf għala Ġesù kien ferħan li ma kienx wasal qabel?— Ġesù kien diġà rxoxta lil nies oħrajn, imma dawk in-​nies kienu ilhom mejtin għal ftit sigħat biss meta Ġesù reġaʼ qajjimhom għall-​ħajja. (Luqa 7:11-​17, 22; 8:49-​56) Iżda, ġisem Lazzru kien ilu fil-​qabar għal ġranet sħaħ. Ħadd ma setaʼ jiddubita li verament kien miet!

Meta Marta, oħt Lazzru, semgħet li Ġesù kien ħdejn Betanja ħarġet tiġri biex tiltaqaʼ miegħu. Hi qalet: “Mulej, kieku kont hawnhekk ħija ma kienx imut.” Ġesù aċċertaha: “Ħuk iqum.” Marta ġriet lura u bil-​moħbi qalet lil oħtha, Marija: “L-​Għalliem qiegħed preżenti hawnhekk u qed isejjaħlek.”

Marija telqet mill-​ewwel biex tmur ħdejn Ġesù. Iżda l-​folla ħasbet li kienet sejra sal-​qabar, u għalhekk marret warajha. Meta Ġesù ra lil Marija u l-​folla li kienet magħha jibku, hu wkoll “qabiżlu d-​dmugħ.” Malajr waslu ħdejn il-​qabar li kien magħluq sew b’ġebla kbira. Ġesù ta l-​kmand: “Neħħu l-​ġebla.” Imma Marta ma qablitx miegħu u qalet: “Mulej, s’issa żgur niten għax ilu erbat ijiem.”

In-​nies obdew lil Ġesù u neħħew il-​ġebla. Imbagħad talab u rringrazzja lil Alla bil-​quddiem għall-​qawwa li kien jaf li Alla kien se jagħtih biex iqajjem lil Lazzru. Ġesù għajjat “b’leħen qawwi: ‘Lazzru, oħroġ!’” U Lazzru ħareġ ‘infaxxat.’ Għalhekk, Ġesù ta l-​kmand: “Ħolluh u ħalluh imur.”—Ġwanni 11:19-​44.

Tistaʼ tifhem issa għala Ġesù m’għaġġilx?— Kien jaf li billi jistenna setaʼ jagħti xhieda aħjar dwar Missieru, Ġeħova. U minħabba li għażel l-​aħjar waqt, ħafna saru jemmnu f’Alla. (Ġwanni 11:45) Qed tara x’nistgħu nitgħallmu mill-​eżempju taʼ Ġesù?—

Forsi int ukoll tkun tistaʼ tagħżel waqt tajjeb biex tagħti xhieda dwar l-​affarijiet tal-​għaġeb li għamel Alla u li se jagħmel fil-​futur. Forsi tistaʼ titkellem dwar dawn l-​affarijiet mal-​istudenti sħabek jew mal-​għalliema tiegħek. Anki waqt xi lezzjoni, xi żgħażagħ ħadu l-​opportunità li jitkellmu dwar il-​barkiet mill-​isbaħ li s-​Saltna t’Alla se ġġib għall-​bnedmin. M’għandniex xi ngħidu, ma tistax tirxoxta lill-​mejtin, imma tistaʼ tgħin lil oħrajn biex isiru jafu lill-​Alla li jistaʼ jqajjem lill-​maħbubin tagħna għall-​ħajja u li se jagħmel dan.

[Nota taʼ taħt]

MISTOQSIJIET:

▪ Ġesù għala m’għaġġilx biex imur jgħin lil Lazzru?

▪ Tumas għala qal: ‘Ejjew immorru aħna wkoll, biex immutu maʼ Ġesù’?

▪ Ġesù kif kien kapaċi jirxoxta lil Lazzru?

▪ X’tistaʼ tagħmel biex turi li tgħallimt mill-​eżempju taʼ Ġesù?