Tistaʼ Int Taqdi Fejn il-​Bżonn Għal Proklamaturi tas-​Saltna Hu Akbar?

“Kellna ħajja komda fl-​Istati Uniti imma konna konċernati għax l-​ambjent materjalistiku t’hemmhekk eventwalment setaʼ jkollu influwenza negattiva fuqna u fuq iż-​żewġ subien tagħna. Jien u marti qabel konna naqdu bħala missjunarji, u xtaqna nerġgħu ngawdu dik il-​ħajja sempliċi imma ferħana.”

IMQANQLIN minn din ix-​xewqa, fl-​1991, Ralph u Pam iddeċidew li jiktbu lil diversi uffiċċji tal-​fergħa sabiex jesprimu x-​xewqa tagħhom li jaqdu fejn il-​bżonn għal proklamaturi tas-​Saltna hu akbar. L-​uffiċċju tal-​fergħa fil-​Messiku wiġibhom li kien hemm bżonn urġenti għal pubblikaturi tas-​Saltna li setgħu jippridkaw lill-​popolazzjoni li jitkellmu bl-​Ingliż f’dak il-​pajjiż. Fil-​fatt, il-​fergħa qalet li dak il-​qasam kien ‘abjad għall-​ħsad.’ (Ġw. 4:35) Ftit wara, Ralph u Pam, flimkien maż-​żewġ subien tagħhom, li dakinhar kellhom 8 snin u 12-il sena, aċċettaw l-​istedina u bdew iħejju biex jitilqu.

Territorju Vast

Ralph jirrakkonta: “Qabel ma tlaqna mill-​Istati Uniti, xi aħwa b’intenzjoni tajba qalulna: ‘Huwa perikoluż wisq li tmur tgħix barra!’ ‘X’jiġri jekk timirdu?’ ‘Għala se tmorru tippridkaw f’territorju fejn jitkellmu bl-​Ingliż? Dawk li jitkellmu bl-​Ingliż hemmhekk mhux se jkunu interessati fil-​verità!’ Madankollu, konna deċiżi li mmorru. Wara kollox, id-​deċiżjoni tagħna li mmorru noqogħdu hemmhekk ma kinitx waħda impulsiva. Konna ilna nippjanaw għaliha snin sħaħ. Konna evitajna li nidħlu f’dejn li jdum biex jitħallas, ġemmajna l-​flus, u kellna ħafna diskussjonijiet bħala familja dwar id-​diffikultajiet li stajna niltaqgħu magħhom.”

L-ewwel, Ralph u l-​familja tiegħu żaru l-​fergħa tal-​Messiku. Hemmhekk, l-​aħwa wrewhom mappa tal-​pajjiż kollu u qalu lil dawn li kienu għadhom kif waslu, “Dan huwa t-​territorju tagħkom!” Il-​familja ssetiljat f’San Miguel de Allende, belt żgħira li ħafna min-​nies fiha kienu barranin u li qiegħda 240 kilometru lejn il-​majjistral taʼ Mexico City. Tliet snin wara li waslu, f’dik il-​belt żgħira ġiet ifformata kongregazzjoni tal-​lingwa Ingliża li kien fiha 19-il pubblikatur. Din kienet l-​ewwel kongregazzjoni tal-​lingwa Ingliża fil-​Messiku—imma kien hemm iktar xogħol xi jsir.

Huwa stmat li hemm madwar miljun ċittadin mill-​Istati Uniti jgħixu l-​Messiku. Barra minn hekk, hemm ħafna professjonisti u studenti Messikani li jitkellmu bl-​Ingliż bħala t-​tieni lingwa tagħhom. Ralph jispjega: “Tlabna għal iktar ħaddiema. Dejjem konna nżommu kamra tas-​sodda żejda disponibbli fid-​dar tagħna għall-​aħwa li jiġu fl-​inħawi tagħna sabiex ‘jitkixxfu l-​art,’ biex ngħidu hekk.”—Num. 13:2.

Issimplifikaw Ħajjithom Sabiex Ikabbru l-​Ministeru Tagħhom

Ma damux ma waslu aħwa li xtaqu jkabbru l-​ministeru tagħhom. Fosthom kien hemm Bill u Kathy mill-​Istati Uniti. Huma kienu diġà qdew għal 25 sena f’territorji fejn il-​bżonn għal pubblikaturi kien kbir. Huma kienu qed jaħsbu biex jitgħallmu l-​Ispanjol, imma l-​pjanijiet tagħhom inbidlu wara li marru joqogħdu fil-​belt żgħira t’Ajijic max-​xtut taʼ Lake Chapala, li hija menqa għal dawk li jirtiraw mill-​Istati Uniti. Bill jispjega, “F’Ajijic sirna iktar u iktar involuti f’li nfittxu lil dawk li jitkellmu bl-​Ingliż u li riedu jitgħallmu l-​verità.” Fi żmien sentejn mindu waslu f’dik il-​belt żgħira, Bill u Kathy kellhom il-​ferħ li jaraw kongregazzjoni tifforma—it-​tieni kongregazzjoni tal-​lingwa Ingliża fil-​Messiku.

Ken u Joanne mill-​Kanada riedu jissimplifikaw ħajjithom u jiddedikaw iktar ħin għall-​attivitajiet tas-​Saltna. Huma wkoll marru joqogħdu l-​Messiku. Ken jirrakkonta, “Kien jirrikjedi ż-​żmien biex tidra tgħix fi nħawi fejn għal jiem sħaħ ma kienx ikollna misħun, elettriku, jew servizz tat-​telefon.” Madankollu, il-​fatt li kienu jieħdu sehem fix-​xogħol taʼ l-​ippridkar kien sors taʼ ferħ. Ken ma damx ma nħatar bħala qaddej ministerjali u sentejn wara bħala anzjan. Għall-​ewwel kienet taʼ sfida għal binthom Britanny biex tkun parti minn kongregazzjoni żgħira tal-​lingwa Ingliża fejn kien hemm biss ftit żgħażagħ. Madankollu, wara li bdiet tieħu sehem fil-​proġetti tal-​bini tas-​Swali tas-​Saltna, hi għamlet ħafna ħbieb tajbin minn madwar il-​pajjiż kollu.

Patrick u Roxanne, mill-​istat taʼ Texas fl-​Istati Uniti, kienu verament ferħanin meta semgħu dwar qasam missjunarju li ma kienx ’il bogħod minnhom u fejn in-​nies jitkellmu bl-​Ingliż. “Wara li żorna Monterrey, belt żgħira fil-​grigal tal-​Messiku, aħna ħassejna li Ġeħova kien qed jidderiġina biex ngħinu hemmhekk,” jgħid Patrick. Fi żmien ħamest ijiem irnexxielhom ibigħu d-​dar tagħhom f’Texas u bħallikieku ‘jgħaddu l-​Maċedonja.’ (Atti 16:9) Ma kienx faċli jaqilgħu l-​flus biex imantnu lilhom infushom fil-​Messiku, imma f’sentejn biss, huma kienu ferħanin jaraw il-​grupp żgħir taʼ 17-il Xhud jikber f’kongregazzjoni t’40 pubblikatur.

Jeff u Deb huma koppja oħra li ssimplifikaw ħajjithom biex ikabbru l-​ministeru tagħhom. Huma biegħu d-​dar kbira li kellhom fl-​Istati Uniti u marru joqogħdu f’appartament żgħir f’Cancún, belt mal-​kosta tal-​lvant tal-​Messiku. Fil-​passat, kellhom id-​drawwa jattendu assembleat bl-​arja kundizzjonata viċin id-​dar tagħhom. Issa kellhom jivvjaġġaw tmien sigħat biex jattendu l-​eqreb assemblea bl-​Ingliż, li kienet issir f’faċilità mingħajr saqaf. Imma huma kellhom sodisfazzjon kbir li jaraw kongregazzjoni taʼ madwar 50 pubblikatur tiġi fformata f’Cancún.

Xi aħwa mill-​Messiku wkoll bdew jgħinu fix-​xogħol taʼ l-​ippridkar bil-​lingwa Ingliża. Per eżempju, meta Rubén u l-​familja tiegħu semgħu li kienet ġiet ifformata l-​ewwel kongregazzjoni bil-​lingwa Ingliża f’San Miguel de Allende u li t-​territorju taʼ dik il-​kongregazzjoni kien il-​Messiku kollu, mill-​ewwel iddeċidew li jmorru hemmhekk biex jgħinu. Dan kien ifisser li kellhom jitgħallmu l-​Ingliż, jidraw kultura differenti, u jivvjaġġaw distanzi twal—800 kilometru kull ġimgħa—sabiex jattendu l-​laqgħat. Rubén jirrakkonta: “Kellna l-​ferħ li nagħtu xiehda lil uħud barranin li kienu ilhom jgħixu l-​Messiku għal snin sħaħ imma li semgħu l-​messaġġ taʼ l-​aħbar tajba bil-​lingwa tagħhom għall-​ewwel darba. Xi wħud minnhom esprimew l-​apprezzament tagħhom bid-​dmugħ f’għajnejhom.” Wara li għenu lill-​kongregazzjoni taʼ San Miguel de Allende, Rubén u l-​familja tiegħu qdew bħala pijunieri fil-​belt żgħira taʼ Guanajuato, fiċ-​ċentru tal-​Messiku, fejn għenu biex tifforma kongregazzjoni tal-​lingwa Ingliża taʼ iktar minn 30 pubblikatur. Illum, huma qed jaqdu fi grupp taʼ l-​Ingliż f’Irapuato, belt żgħira viċin Guanajuato.

Jintlaħqu Dawk li Huma Diffiċli Biex Jintlaħqu

Minbarra l-​barranin, hemm ħafna Messikani li jitkellmu bl-​Ingliż. Ħafna drabi jkun diffiċli biex taqsam il-​messaġġ tas-​Saltna magħhom minħabba li jgħixu fi nħawi sinjuri fejn is-​sefturi jiġu jiftħu l-​bieb. Jew jekk l-​inkwilini jiġu jiftħu l-​bieb, għandhom mnejn ma jkunux iridu jisimgħu l-​messaġġ tagħna minħabba li jaħsbu li x-​Xhieda taʼ Ġeħova huma setta żgħira lokali. Madankollu, meta inkwilini bħal dawn jintlaħqu minn Xhieda barranin, xi wħud jirreaġixxu b’mod favorevoli.

Ikkunsidra l-​eżempju taʼ Gloria fil-​belt taʼ Querétaro, fiċ-​ċentru tal-​Messiku. Hi tispjega: “Kont ġejt kuntattjata qabel minn Xhieda li kienu jitkellmu bl-​Ispanjol imma ma kontx qgħadt nismagħhom. Madankollu, meta l-​familja tiegħi u l-​ħbieb beda jinqalgħalhom l-​inkwiet, qabduni dwejjaq kbar u bdejt nitlob lil Alla, nitolbu bil-​ħniena biex jgħinni nsib soluzzjoni. Ftit wara ġiet tħabbatli l-​bieb mara li kienet titkellem bl-​Ingliż. Hi staqsiet jekk kienx hemm xi ħadd li jitkellem bl-​Ingliż. Minħabba li kienet barranija qanqlitli l-​kurżità dwarha, u għedtilha li kont nitkellem bl-​Ingliż. Hekk kif kienet qed tagħmel il-​preżentazzjoni tagħha bdejt naħseb, ‘Din l-​Amerikana x’qed tagħmel hawn f’dawn l-​inħawi?’ Imma kont tlabt lil Alla għal sinjal. Allura forsi din il-​barranija kienet it-​tweġiba għat-​talba tiegħi.” Gloria aċċettat studju tal-​Bibbja u għamlet progress mgħaġġel lejn il-​magħmudija, minkejja l-​oppożizzjoni tal-​familja. Illum, Gloria taqdi bħala pijuniera regulari, u r-​raġel u t-​tifel tagħha wkoll jaqdu lil Ġeħova.

Premjijiet Għal Dawk li Jkabbru l-​Ministeru Tagħhom

Il-​fatt li taqdi fejn il-​bżonn għal proklamaturi hu akbar għandu l-​isfidi tiegħu, imma l-​premjijiet huma ħafna. Ralph, li ssemma fil-​bidu, jgħid: “Ikkonduċejna studji tal-​Bibbja maʼ nies mill-​Britannja, miċ-​Ċina, mill-​Ġamajka, mill-​Isvezja, u saħansitra maʼ membri tal-​familja rjali tal-​Gana. Xi wħud minn dawn l-​istudenti tal-​Bibbja daħlu fis-​servizz full-time huma stess. Matul is-​snin li għaddew, il-​familja tagħna rat sebaʼ kongregazzjonijiet tal-​lingwa Ingliża jiġu fformati. Iż-​żewġ subien tagħna bdew jaqdu magħna bħala pijunieri, u issa qed jaqdu fil-​Betel taʼ l-​Istati Uniti.”

Illum il-​ġurnata hemm madwar 88 kongregazzjoni taʼ l-​Ingliż fil-​Messiku u għadd taʼ gruppi. X’kien dak li għen biex ikun hemm tkabbir mgħaġġel bħal dan? Ħafna nies li jitkellmu bl-​Ingliż fil-​Messiku qatt ma ġew kuntattjati qabel mix-​Xhieda. Oħrajn wieġbu b’mod favorevoli minħabba li ma kellhomx pressjoni minn dawk taʼ madwarhom li setgħet iżżommhom lura li kieku kienu għadhom f’pajjiżhom. Jerġaʼ oħrajn aċċettaw l-​offerta taʼ studju tal-​Bibbja minħabba li kienu rtiraw u kellhom iktar ħin biex ifittxu l-​interessi spiritwali. Barra minn hekk, iktar minn terz tal-​pubblikaturi fil-​kongregazzjonijiet tal-​lingwa Ingliża jaqdu bħala pijunieri, u dan jikkontribwixxi ħafna għaż-​żelu u t-​tkabbir f’dawk il-​kongregazzjonijiet.

Hemm Barkiet Jistennewk

Bla dubju iktar u iktar nies madwar id-​dinja se jwieġbu b’mod favorevoli hekk kif jisimgħu l-​messaġġ tas-​Saltna li jiġi pridkat lilhom bil-​lingwa tagħhom stess. Għalhekk, huwa inkuraġġanti li tinnota li ħafna aħwa spiritwali—żgħar u kbar, miżżewġin u m’humiex—huma lesti li jmorru jgħixu fi nħawi fejn il-​bżonn għal proklamaturi tas-​Saltna huwa kbir. Veru, huma forsi jkollhom ikampaw maʼ diffikultajiet, imma dawn m’huma xejn meta jiġu mqabblin mal-​ferħ li jħossu meta jsibu wħud taʼ qalb onesta li jaċċettaw il-​veritajiet tal-​Bibbja. Tistaʼ int tagħmel aġġustamenti li jistgħu jgħinuk tmur toqgħod f’territorju f’pajjiżek stess jew f’pajjiż barrani fejn il-​bżonn għal predikaturi tas-​Saltna huwa akbar?a (Lq. 14:28-30; 1 Kor. 16:9) Jekk inhu hekk, tistaʼ tibqaʼ ċert li hemm barkiet kbar jistennewk.

[Nota taʼ taħt]

[Kaxxa f’paġna 21]

Jispikka l-​Ferħ taʼ Wħud li Rtiraw

Beryl emigrat mill-​Britannja għall-​Kanada. Hemmhekk hi ħadmet bħala maniġer f’diversi kumpaniji internazzjonali. Ukoll, hi kienet rikkieba professjonali taż-​żwiemel li jaqbżu l-​ostakli u kienet saħansitra magħżula biex tirrappreżenta lill-​Kanada fl-​Olimpijadi taʼ l-​1980. Wara li rtiraw f’Chapala, il-​Messiku, Beryl u żewġha spiss kienu jmorru jieklu fir-​restoranti lokali. Meta kienet tinnota nies irtirati li kienu jitkellmu bl-​Ingliż u li kienu jidhru ferħanin, hi kienet tintroduċi ruħha u tistaqsihom x’kien li ġew il-​Messiku. L-​uħud li kienu jkunu qed jieklu hemmhekk u li kienu jidhru ferħanin ħafna drabi kienu jkunu Xhieda taʼ Ġeħova. Beryl u żewġha rraġunaw li jekk il-​ferħ u l-​iskop fil-​ħajja jiġu mill-​fatt li tkun taf lil Alla, allura huma wkoll riedu jkunu jafuh. Wara li attendew il-​laqgħat Kristjani għal diversi xhur, Beryl aċċettat studju tal-​Bibbja u saret Xhud. Għal diversi snin, Beryl setgħet taqdi bħala pijuniera regulari.

[Kaxxa f’paġna 22]

“Hija Barka li Jkollna Lilhom Magħna”

Dawk li jmorru joqogħdu f’pajjiżi fejn il-​bżonn għal pubblikaturi tas-​Saltna huwa akbar huma apprezzati ħafna mill-​aħwa lokali. Uffiċċju tal-​fergħa fil-​Karibew kiteb: “Li kieku l-​mijiet taʼ barranin li jaqdu hawn kellhom jitilqu, l-​istabbilità tal-​kongregazzjonijiet tiġi effettwata. Hija barka li jkollna lilhom magħna.”

Il-​Kelma t’Alla tgħid li “n-​nisa li qed ixandru l-​aħbar tajba huma armata kbira.” (Salm 68:11) B’hekk, m’huwiex sorprendenti li hemm ħafna aħwa nisa mhux miżżewġin fost dawk li jaqdu barra pajjiżhom. Aħwa nisa bħal dawn li jagħmlu sagrifiċċju persunali huma t’għajnuna kbira. Uffiċċju tal-​fergħa fl-​Ewropa tal-​Lvant osserva: “F’ħafna mill-​kongregazzjonijiet tagħna, hemm persentaġġ għoli t’aħwa nisa, kultant sa 70 fil-​mija. Ħafna minnhom huma ġodda fil-​verità, imma l-​aħwa nisa pijunieri li m’humiex miżżewġin u li ġew minn pajjiżi oħrajn jipprovdu għajnuna imprezzabbli billi jħarrġu lil dawn l-​uħud ġodda. Dawn l-​aħwa nisa li jiġu minn barra huma verament rigal għalina!”

Aħwa nisa bħal dawn kif iħossuhom dwar li jaqdu f’pajjiżi barranin? “L-​isfidi huma ħafna,” tgħid Angelica, oħt li għandha madwar 35 sena u li qdiet għal diversi snin barra minn pajjiżha bħala pijuniera mhux miżżewġa. “F’inkarigu minnhom, ġurnata wara l-​oħra, kont ngħaddi b’diffikultà kbira minn toroq kollhom tajn u rajt ħafna nies li kienu qed ibatu, u dan kien taʼ dwejjaq. Imma kont inħoss sodisfazzjon meta ngħin lin-​nies fil-​ministeru. Kont imqanqla wkoll mill-​ħafna espressjonijiet taʼ gratitudni mill-​aħwa nisa lokali li kienu jirringrazzjawni talli kont mort ngħinhom. Waħda oħt qaltli li l-​eżempju tiegħi li ġejt minn tant ’il bogħod biex niġi f’pajjiżha ħalli naqdi bħala pijuniera qanqalha tibda taqdi fis-​servizz full-time.”

Sue, pijuniera li għandha ’l fuq minn 50 sena tgħid: “Tabilħaqq tiffaċċja sfidi, imma dawn ma jistgħux jitqabblu mal-​barkiet li tirċievi. Il-​ministeru huwa eċċitanti! Peress li nqattaʼ ħafna ħin fis-​servizz m’aħwa nisa iżgħar, naqsam magħhom dak li tgħallimt mill-​Bibbja u mill-​pubblikazzjonijiet tagħna dwar kif jiffaċċjaw l-​ostakli. Huma spiss jgħiduli li l-​eżempju tiegħi kif kampajt mal-​problemi waqt li qdejt bħala pijuniera mhux miżżewġa għal ħafna snin jgħinhom jaraw li huma wkoll jistgħu jegħlbu l-​isfidi fil-​ħajja tagħhom. Il-​fatt li ngħin lil dawn l-​aħwa nisa jġibli sodisfazzjon kbir.”

[Mappa f’paġna 20]

(Għall-formazzjoni sħiħa tat-​test, ara l-​pubblikazzjoni)

MESSIKU

Monterrey

Guanajuato

Irapuato

Ajijic

Chapala

Lake Chapala

San Miguel de Allende

Querétaro

MEXICO CITY

Cancún

[Stampa f’paġna 23]

Xi wħud għandhom il-​ferħ li jagħtu xiehda lil uħud barranin li qed jisimgħu l-​aħbar tajba għall-​ewwel darba