Balzmu taʼ Gilegħad—L-​Ingwent li Jfejjaq

RAKKONT familjari fil-​ktieb Bibliku tal-​Ġenesi jgħid l-​istorja taʼ kif Ġużeppi ġie mibjugħ minn ħutu lil xi negozjanti Ismagħelin li kienu fi triqithom lejn l-​Eġittu. Il-​karavana tan-​negozjanti kienet ġejja minn Gilegħad, u l-​iġmla kienu qed iġorru balzmu u affarijiet oħrajn lejn l-​Eġittu. (Ġenesi 37:25) Dan ir-​rakkont qasir jagħti x’jifhem li l-​balzmu minn Gilegħad kien meqjus bħala prezzjuż ħafna fil-​Lvant Nofsani tal-​qedem għall-​valur mediċinali partikulari tiegħu.

Madankollu, fis-​sitt seklu Q.E.K., il-​profeta Ġeremija b’niket staqsa: “Jaqaw m’hemmx balzmu f’Gilegħad?” (Ġeremija 8:22) X’qanqal lil Ġeremija biex jistaqsi din il-​mistoqsija? X’inhu eżattament il-​balzmu? Hemm balzmu li hu utli għall-​fejqan illum?

Il-​Balzmu fiż-​Żminijiet Bibliċi

It-​terminu ġenerali balzmu jiddeskrivi sustanza tfuħ u ġeneralment żejtnija li twaħħal u li toħroġ minn diversi pjanti u siġar. Iż-​żejt tal-​balzmu, li spiss kien jintuża fl-​inċens u l-​fwejjaħ, kien wieħed mill-​affarijiet lussużi tal-​Lvant Nofsani tal-​qedem. Kien imsemmi fost l-​ingredjenti taż-​żejt tad-​dlik qaddis u tal-​inċens li kienu jintużaw fit-​tabernaklu ftit wara li l-​Iżraelin ħarġu mill-​Eġittu. (Eżodu 25:6; 35:8) Iż-​żejt tal-​balzmu kien ukoll fost l-​għotjiet prezzjużi li s-​sultana taʼ Xeba tat lis-​Sultan Salamun. (1 Slaten 10:2, 10) Ester ngħatat kura tas-​sbuħija u massaġġi għal “sitt xhur biż-​żejt tal-​balzmu” qabel ma ppreżentat lilha nfisha lis-​Sultan Persjan Aħasweru.—Ester 1:1; 2:12.

Waqt li ż-​żejt tal-​balzmu kien jiġi minn diversi partijiet tal-​Lvant Nofsani, il-​balzmu taʼ Gilegħad kien mill-​Art Imwiegħda, u Gilegħad kien ir-​reġjun lejn il-​Lvant tax-​Xmara Ġordan. Il-​patrijarka Ġakobb qies il-​balzmu bħala wieħed mill-​“aqwa prodotti taʼ l-​art,” u bagħtu bħala għotja lejn l-​Eġittu. (Ġenesi 43:11) U l-​profeta Eżekjel semma l-​balzmu fost il-​prodotti li Ġuda u Iżrael esportaw lejn Tir. (Eżekjel 27:17) Il-​balzmu kien magħruf sew għall-​valur mediċinali partikulari tiegħu. Il-​letteratura tal-​qedem spiss issemmi l-​abbiltajiet tal-​ingwent biex ifejjaq u jġedded, l-​iktar fejn jidħol il-​fejqan tal-​feriti.

Balzmu Għal Ġens Marid

Allura, Ġeremija għala qajjem il-​mistoqsija, “Jaqaw m’hemmx balzmu f’Gilegħad”? Biex nifhmu dan, irridu nagħtu ħarsa lejn il-​ġens t’Iżrael lura f’dak iż-​żmien. Iktar kmieni, il-​profeta Iżaija kien ta deskrizzjoni ħajja taʼ kemm kienet imħassra r-​relazzjoni tagħhom m’Alla: “Mill-​qiegħ tas-​saqajn sar-​ras m’hemmx parti waħda li hi f’saħħitha. Feriti u tbenġil u ġrieħi miftuħin—ma ġewx magħfusin jew marbutin.” (Isaija 1:6) Minflok m’għarfu l-​kundizzjoni tal-​biki tagħhom u fittxew il-​kura, il-​ġens baqgħu fit-​triq diżubbidjenti tagħhom. Sa żmienu, Ġeremija setaʼ biss jgħid b’niket: “Huma ċaħdu kelmet Ġeħova, u issa x’għerf għandhom? Li kieku biss kienu daru lura lejn Ġeħova, kien ifejjaqhom. “Jaqaw m’hemmx balzmu f’Gilegħad?” X’mistoqsija li tqanqal il-​ħsieb!—Ġeremija 8:9.

B’ħafna modi, id-​dinja tal-​lum hi mimlija “feriti u tbenġil u ġrieħi miftuħin.” In-​nies qed isofru minħabba l-​faqar, l-​inġustizzja, l-​egoiżmu, u n-​nuqqas taʼ qalb tajba, għax l-​imħabba għal Alla u għall-​proxxmu birdet. (Mattew 24:12; 2 Timotju 3:1-​5) Ħafna jħossuhom imwarrbin minħabba r-​razza, l-​isfond etniku, jew l-​età tagħhom. Minbarra dan, il-​ġuħ, il-​mard, il-​gwerer, u l-​mewt iżidu mal-​uġigħ tagħhom. Bħal Ġeremija, ħafna nies li sinċerament jemmnu, jiddubitaw jekk hemmx “balzmu f’Gilegħad” li bih jistgħu jorbtu l-​ġrieħi emozzjonali u spiritwali taʼ dawk li qed isofru.

L-​Aħbar Tajba li Tfejjaq

Fi żmien Ġesù, l-​istess mistoqsija kienet fuq moħħ l-​umli. Imma ma baqgħux bla tweġiba. Fis-​sinagoga f’Nazaret fil-​bidu tas-​sena 30 E.K., Ġesù qara dan il-​kliem mir-​romblu t’Iżaija: “Ġeħova dilikni biex ngħid aħbar tajba lill-​ġwejdin. Bagħatni biex ninfaxxa lil dawk b’qalbhom maqsuma.” (Isaija 61:1) Imbagħad Ġesù applika dan il-​kliem għalih u ppreżenta lilu nnifsu bħala l-​Messija bl-​inkarigu li jagħmel magħruf messaġġ taʼ faraġ.—Luqa 4:16-​21.

Matul il-​ministeru tiegħu, Ġesù b’żelu pprietka l-​aħbar tajba tas-​Saltna t’Alla. (Mattew 4:17) Fil-​Prietka taʼ fuq il-​Muntanja, hu wiegħed lill-​magħkusin li s-​sitwazzjoni tagħhom kienet se tinbidel: “Henjin intom li bħalissa tibku, għax għad tidħqu.” (Luqa 6:21) Billi ħabbar li s-​Saltna t’Alla kienet ġejja—messaġġ taʼ tama—Ġesù “nfaxxa lil dawk b’qalbhom maqsuma.”

Bl-​istess mod, fi żmienna “l-​aħbar tajba tas-​saltna” tibqaʼ tkun sors taʼ faraġ. (Mattew 6:10; 9:35) Ejja nieħdu l-​eżempju taʼ Roger u Liliane. F’Jannar tal-​1961 tgħallmu għall-​ewwel darba dwar il-​wegħda t’Alla taʼ ħajja taʼ dejjem, u din kienet għalihom bħal balzmu li jserraħ. Liliane tiftakar: “Bdejt niżfen madwar il-​kċina minħabba dak li kont qed nitgħallem. Vera kont ferħana.” Roger, li dakinhar kien ilu paralizzat parzjalment għal għaxar snin, iżid, “Sibt ferħ kbir, il-​ferħ tal-​ħajja, grazzi għal tama meraviljuża—dik tal-​irxoxt u t-​tmiem tal-​uġigħ u l-​mard kollu.”—Rivelazzjoni 21:4.

Fl-​1970 ġarrbu t-​telfa fil-​mewt tat-​tifel tagħhom li kellu 11-​il sena. Imma ma ħallewx id-​disprament jifnihom. Huma personalment ħassew li Ġeħova kien “qed ifejjaq lil dawk taʼ qalbhom maqsuma, u qed jinfaxxalhom il-​ġrieħi li juġgħuhom.” (Salm 147:3) It-​tama tagħhom farrġithom. Għal kważi 50 sena, l-​aħbar tajba dwar is-​Saltna t’Alla li ġejja ġabitilhom paċi u kuntentizza.

Fejqan li Għad Irid Jiġi

Allura, hemm “balzmu f’Gilegħad” illum? Iva, illum għadu jeżisti l-​balzmu spiritwali. Il-​faraġ u t-​tama provduti mill-​aħbar tajba tas-​Saltna jistgħu jinfaxxaw lil dawk b’qalbhom maqsuma. Tixtieq int tesperjenza fejqan bħal dan? Kulma trid tagħmel hu li tiftaħ qalbek beraħ għall-​messaġġ taʼ faraġ mill-​Kelma t’Alla u tħallih jimla ’l ħajtek. Miljuni taʼ nies diġà għamlu dan.

Il-​fejqan permezz taʼ dan il-​balzmu jipprovdi ħarsa bil-​quddiem tas-​serħan akbar li għad irid jiġi. Iż-​żmien riesaq bil-​ħeffa meta Alla Ġeħova se jġib “fejqan tal-​ġnus,” li se jwassal għall-​ħajja taʼ dejjem. F’dak iż-​żmien, “ħadd minn min jgħammar hemmhekk ma jgħid: ‘Jien marid.’” Iva, għad hemm “balzmu f’Gilegħad”!—Rivelazzjoni 22:2; Isaija 33:24.

[Stampa f’paġna 23]

L-​abbiltà tal-​aħbar tajba tas-​Saltna t’Alla biex tfejjaq tibqaʼ ttaffi l-​uġigħ taʼ dawk b’qalbhom maqsuma llum