M’Għadhomx Jibżgħu mit-​Tmiem

LEJN l-​aħħar tas-​snin 70, Gary u Karen saru konvinti li t-​tmiem tad-​dinja kien fil-​qrib. Għalhekk, telqu mill-​belt u marru jgħixu fil-​kampanja u ddeċidew li jibdew jipprovdu kollox għalihom infushom. Riedu jsalvaw.

Biex ikollhom is-​snajjaʼ meħtiġin huma xtraw kotba, attendew korsijiet u seminars, u tkellmu maʼ kemm jistaʼ jkun nies. Żergħu u ħawlu l-​ħxejjex fi ġnien u 50 siġra tal-​frott żgħira. Ħażnu ż-​żrieragħ u l-​għodod. Tgħallmu jkabbru l-​ħxejjex għall-​ikel u jippreservawhom. Ħabiba tagħhom għallmithom joqtlu l-​annimali u jippreservaw il-​laħam. Karen tgħallmet tagħraf il-​pjanti u l-​għeruq fil-​foresta ħalli jkunu jistgħu jieklu lilhom jekk jispiċċawlhom il-​provvisti. Gary tgħallem jagħmel il-​fuel mill-​qamħirrum, jibni forn tal-​metall biex jaħraq l-​injam, u jibni dar li ma tiddependix minn servizzi esterni.

Karen qalet: “Minħabba l-​kundizzjonijiet tassew koroh tad-​dinja f’dak iż-​żmien, ħassejt li ċ-​ċivilizzazzjoni dalwaqt kienet se tintemm.” Gary jispjega: “Bħal żgħażagħ oħrajn, kont naħdem ħafna biex nipprova nwaqqaf ir-​razziżmu, il-​Gwerra tal-​Vjetnam, u l-​korruzzjoni. Imma malajr ħassejtni diżappuntat. Deherli li l-​bnedmin kienu se jeqirdu lilhom infushom jekk jibqgħu sejrin hekk.”

Gary jgħid: “Lejl wieħed, kelli xi ħin liberu, u allura qbadt Bibbja u qrajt minn Mattew sa Rivelazzjoni. Fl-​erbat iljieli taʼ wara rġajt qrajthom. Fl-​għodwa tal-​ħames ġurnata għedt lil Karen: ‘Qed ngħixu fl-​aħħar jiem. Alla se jaġixxi dalwaqt biex inaddaf l-​art. Irridu nsibu lil dawk li se jsalvaw.’” Gary u Karen bdew iduru r-​reliġjonijiet biex ifittxu lil dawk li riedu jippreparaw għat-​tmiem.

Wara ftit, wieħed mix-​Xhieda taʼ Ġeħova ħabbtilhom il-​bieb, u nbeda studju tal-​Bibbja. Karen tiftakar: “Kont tassew ferħana għax l-​Iskrittura kienet verament qed tiġi spjegata lili. Il-​verità dwar iż-​żmien tat-​tmiem kienet dak li kont qed infittex u fl-​aħħar sibtha. Kien hemm tama ċerta għall-​futur. Imma aħjar minn hekk, bdejt nikkultiva ħbiberija maʼ Missieri tas-​sema, il-​Ħallieq u l-​Alla tal-​univers.”

Gary jgħid: “Ħajti beda jkollha tifsir taʼ veru. Ladarba bdejt nistudja l-​Bibbja ma stajtx nieqaf. Qrajt il-​profeziji tal-​Bibbja, eżaminajt il-​provi li dawn kienu qed iseħħu, u sirt konvint li Alla kien se jaġixxi dalwaqt. Għedt bejni u bejn ruħi, ‘In-​nies għandhom jippreparaw għall-​ħajja li Alla jridna ngħixu u mhux għal xi diżastru.’” Gary u Karen bdew iħarsu lejn il-​futur b’mod pożittiv. Minflok ma baqgħu jinkwetaw dwar it-​tmiem tad-​dinja, huma saru fiduċjużi fil-​fatt li Alla se jneħħi l-​problemi li qed jgħakksu lill-​bnedmin u se jġedded l-​art f’ġenna.

X’qed jagħmlu issa Gary u Karen, iktar minn 25 sena wara? Karen tgħid: “Jien għadni qed inkabbar l-​imħabba tiegħi għal Alla Ġeħova u l-​fidi tiegħi fih, u nipprova ngħin lil oħrajn jagħmlu l-​istess. Jien u Gary nappoġġaw lil xulxin aħna u nżommu l-​familja tagħna b’saħħitha u magħquda fil-​qima taʼ Ġeħova. Nipprovaw nibqgħu organizzati u nistinkaw biex inżommu ħajjitna sempliċi ħalli niffokaw fuq oħrajn u l-​bżonnijiet tagħhom.”

Gary iżid: “Nitlob regolarment biex tiġi s-​Saltna t’Alla u ġġib serħan għal miljuni taʼ nies. Kull meta naqsam l-​aħbar tajba tas-​Saltna t’Alla m’oħrajn, nitlob li nkun nistaʼ nagħti mill-​inqas lil persuna waħda tama mill-​Bibbja. Għal iktar minn 25 sena, Ġeħova wieġeb din it-​talba b’qalb tajba. Jien u Karen nemmnu li Ġeħova dalwaqt se jġib bidliet kbar fuq l-​art, imma m’għadniex nibżgħu mit-​tmiem.”—Mattew 6:9, 10; 2 Pietru 3:11, 12.

[Stampa f’paġna 9]

Gary u Karen issa jieħdu gost jgħinu lil oħrajn jiksbu tama mill-​messaġġ tal-​Bibbja