Għin lil sħabek fit-​twemmin li huma divorzjati—Kif?

X’aktarx li taf lil xi ħadd li hu divorzjat—forsi diversi wħud bħal dawn. Dan għaliex id-​divorzju hu komuni mhux ħażin. Pereżempju, riċerka fil-​Polonja wriet li nies li għandhom 30 sena u li ilhom miżżewġin bejn tliet u sitt snin x’aktarx li se jiddivorzjaw; u d-​divorzju mhuwiex limitat biss għal nies taʼ din l-​età.

Fil-​fatt, “statistiki juru li [fl-​Ewropa] nofs dawk li jiżżewġu se jiddivorzjaw,” jirrapporta istitut li jgħin lill-​familji fi Spanja. (Institute for Family Policy) F’pajjiżi żviluppati oħrajn, is-​sitwazzjoni hi simili.

IĦOSSU RUXXMATA T’EMOZZJONIJIET IMĦAWDIN

X’jinvolvi d-​divorzju? Mara li għandha l-​esperjenza f’li tagħti l-​pariri lill-​miżżewġin fl-​Ewropa tal-​Lvant osservat: “Id-​divorzju jagħmel uffiċjali dak li jkun diġà seħħ—it-​tkissir taʼ relazzjoni u s-​separazzjoni, xi ħaġa li hi taʼ wġigħ kbir emozzjonalment.” Hi żiedet tgħid li wara jħossu “ruxxmata t’emozzjonijiet qawwijin u estremi—bħal rabja, dispjaċir, diżappunt, disprament, u mistħija.” Kultant dan iġiegħel lil dak li jkun jaħseb dwar li jwettaq suwiċidju. “Meta d-​divorzju jiġi finalizzat mill-​qorti, tibda l-​fażi li jmiss. Minħabba li jħossu ċertu vojt, persuni divorzjati għandhom mnejn jaħsbu: ‘Issa li jien divorzjat, min jien verament? X’inhu l-​iskop tiegħi fil-​ħajja?’”

Meta tiftakar kif ħassitha ftit tas-​snin ilu, Ewa tgħid: “Tgħidx kemm ħassejtni imbarazzata meta, wara li d-​divorzju ġie finalizzat, il-​ġirien tiegħi u sħabi tax-​xogħol kienu jirreferu għalija bħala ‘dik li ddivorzjat.’ Ħassejtni mimlija rabja. Peress li spiċċajt waħdi b’żewġt itfal żgħar, kelli nagħmilha kemm t’omm u kemm taʼ missier għalihom.”a Adam, li qeda bħala anzjan rispettat għal 12-​il sena, jgħid: “Tant tlift ir-​rispett li kelli lejja nnifsi li kultant inħossni mimli rabja, u nitħajjar nitbiegħed minn kulħadd.”

JISSIELTU BIEX JERĠGĦU JIKSBU L-​BILANĊ

Mifnijin bl-​ansjetà minħabba l-​futur tagħhom, xi wħud jissieltu biex jerġgħu jiksbu l-​bilanċ—saħansitra snin wara d-​divorzju. Għandhom mnejn jikkonkludu li oħrajn ma jimpurtahomx minnhom. Barra minn hekk, waħda li tikteb fil-​gazzetti dwar dan is-​suġġett tgħid li issa jkollhom “ibiddlu d-​drawwiet tagħhom u jitgħallmu jkampaw mal-​problemi waħedhom.”

Stanisław jirrakkonta: “Meta ddivorzjajna, l-​eks mara tiegħi ma ħallitnix nara liż-​żewġt ibniet żgħar tiegħi. Dan ġegħelni nħossni li ħadd ma kien għadu jinteressah minni u li saħansitra Ġeħova kien abbandunani. Tlift ix-​xewqa li ngħix. Maż-​żmien irrealizzajt kemm kien żbaljat il-​ħsib tiegħi.” Wanda, li kienet divorzjata, ukoll ma ħassithiex ċerta dwar il-​futur tagħha, hi qalet: “Ħassejtni konvinta li wara xi żmien, in-​nies—inkluż sħabi fit-​twemmin—ma kinux se juru interess fija u fi wliedi. Però, issa nistaʼ nara kemm l-​aħwa ħadu ħsiebna u għenuni hekk kif stinkajt biex inrabbi lil uliedi biex isiru qaddejja taʼ Ġeħova.”

Tistaʼ tara minn kummenti bħal dawn li wara d-​divorzju xi wħud iħossuhom maħkumin minn emozzjonijiet negattivi. Għandhom mnejn jiżviluppaw ħarsa kerha tagħhom infushom, billi jaħsbu li ma tantx għandhom valur u li ma ħaqqhomx attenzjoni. Flimkien maʼ dan, forsi jibdew jikkritikaw lil dawk taʼ madwarhom. Minħabba f’hekk, jistgħu jibdew iqisu lill-​membri tal-​kongregazzjoni bħala wħud li ma jagħdruhomx. Iżda esperjenzi bħal dawk taʼ Stanisław u Wanda juru li wħud divorzjati maż-​żmien jistgħu jindunaw li ħuthom verament jimpurtahom minnhom. Fil-​fatt, sħabhom il-​Kristjani jkunu taw għajnuna eċċezzjonali, anki meta din ma tkunx ġiet rikonoxxuta mill-​ewwel.

META JĦOSSUHOM WAĦEDHOM U MWARRBIN

Żomm f’moħħok li minkejja l-​isforzi mill-​aħjar tagħna, sħabna fit-​twemmin li huma divorzjati, minn żmien għal żmien, forsi jħossuhom maħkumin mis-​solitudni. Aħwa nisa divorzjati b’mod partikulari għandhom mnejn iħossu li ma tantx hemm min jimpurtah minnhom. Alicja tammetti: “Għaddew tmien snin minn meta ddivorzjajt. Però, kultant għadni nħossni inferjuri. F’mumenti bħal dawn, inkun nixtieq ninqataʼ għalija waħdi, ninfexx nibki, u noqgħod nitħassar lili nnifsi.”

Huwa importanti li dawk li huma divorzjati ma jiħduhiex drawwa li jinqatgħu għalihom. (Prov. 18:1) Fl-​istess waqt, iridu jifhmu li ma jkunx għaqli li jiħduha drawwa jiftħu qalbhom maʼ xi ħadd tas-​sess oppost. Dan jistaʼ jwassal għal sentimenti romantiċi mhux xierqa.

Meta ħutna divorzjati jħossuhom waħedhom, imwarrbin, u ansjużi dwar il-​futur, aħna rridu nipprovaw nifhmu s-​sentimenti tagħhom u nagħmlu kulma nistgħu biex ngħinuhom, u b’hekk nimitaw lil Ġeħova. (Salm 55:22; 1 Pt. 5:6, 7) Nistgħu nkunu ċerti li se japprezzaw l-​għajnuna li nagħtuhom bħala ħbieb veri.—Prov. 17:17; 18:24.