Ma Nittraskurawx id-​Dar t’Alla Tagħna

1 ‘Qis il-​pass li tagħmel inti u tersaq lejn id-​dar t’Alla, ersaq biex tismaʼ.’ (Koħ. 4:17 [Koħ. 5:​1, NW]) Iva, il-​post taʼ qima taʼ Jehovah huwa speċjali għalina, u għalhekk il-​mod kif nieħdu ħsieb is-​Sala tas-​Saltna kif ukoll il-​kondotta tagħna waqt li qegħdin hemm għandhom juru li nirrikonoxxu li dan huwa post li fih ‘inkunu mgħallma mill-​Mulej.’ (Is. 54:13) Tapprezzaha b’dan il-​mod int is-​Sala tas-​Saltna?

2 Hekk kif ix-​xogħol tas-​Saltna jkompli jagħti iktar frott, ħafna juru apprezzament billi jikkontribwixxu għall-​Fond tas-​Soċjetà għas-​Swali tas-​Saltna. Jehovah ibierek il-​ġenerożità mill-​qalb u d-​devozzjoni lejn il-​qima vera. Imma aħna x’qegħdin nagħmlu sabiex inżommu l-​post taʼ qima tagħna f’kundizzjoni tajba?

3 Il-Kondotta Hija Importanti: Meta nistiednu lil oħrajn biex jiġu għal-​laqgħat, għandna nagħmlu dan b’fiduċja li dak li se josservaw hemmhekk se jirrifletti tajjeb fuq isem Jehovah u s-​Saltna. Bħala l-​Alla veru, “id-​dinjità tiegħu hija ’l fuq mill-​art u mis-​sema,” u l-​kondotta tagħna fis-​Sala tas-​Saltna għandha tirrifletti din id-​dinjità. (Salm 148:​13, NW) Qatt ma rridu li l-​ilbies, id-​dehra, u l-​kondotta tagħna jdejqu lil ħutna jew ifixklu lil xi ħadd li jkun qed iżurna.

4 Ilkoll kemm aħna għandu jkollna mħabba għal għajrna u noqogħdu attenti li ma ntellfux. Jekk noqogħdu nfesfsu fil-​widnejn, nieklu, nomogħdu u nfaqqgħu ċ-​chewing gum, inħaxwxu l-​karti tal-​ħelu, immorru t-​toilet għalxejn, u niħduha drawwa naslu tard se ntellfu lil oħrajn milli jikkonċentraw u se nnaqqsu mid-​dinjità li jistħoqqlu l-​post taʼ qima taʼ Jehovah. “L-​imħabba . . . ma tagħmilx dak li m’hux xieraq,” u nuqqas taʼ manjieri bħal dawn m’għandhomx posthom fis-​Sala tas-​Saltna. (1 Kor. 13:​4, 5; Gal. 6:10) Postijiet fejn jiltaqgħu n-​nies tad-​dinja ħafna drabi jidhru żdingati u traskurati meta n-​nies jarmu ċ-​chewing gum, il-​ħelu, u l-​ikel bl-​addoċċ. Ilkoll kemm aħna, speċjalment il-​ġenituri li għandhom tfal żgħar, għandna noqogħdu attenti li ma nħassrux il-​bini taʼ Jehovah b’dan il-​mod.—Qabbel Dewteronomju 23:15 (23:​14, NW).

5 Arranġamenti għat-​Tindif. Il-​ġemgħa taʼ l-​anzjani (u l-​Kumitat li Jieħu Ħsieb il-​Manutenzjoni tas-​Sala tas-​Saltna, jekk hemm iktar minn kongregazzjoni li tuża s-​sala) għandha tagħmel skeda għat-​tindif u l-​manutenzjoni regulari tal-​bini. Ġeneralment, it-​tindif isir kull ġimgħa mill-​gruppi taʼ l-​istudju tal-​ktieb, u dawn isegwu lista t’affarijiet li jkun hemm bżonn li jsiru. Ilkoll kemm aħna rridu nkunu ċerti li nsegwu sew l-​iskeda provduta sabiex inkunu nistgħu nieħdu ħsieb is-​sala u jsir kollox “kif imur u bl-​ordni.” (1 Kor. 14:40) Barra minn hekk, għandha tiġi rranġata ġurnata speċjali għal tindifa ġenerali.

6 Meta s-​Sala tas-​Saltna tiġi użata minn iktar minn kongregazzjoni waħda, huwa importanti speċjalment li nkunu konxji tar-​responsabbiltà li għandna biex inżommu s-​sala nadifa. Meta l-​bini jintuża minn iktar nies se jitqagħbar iktar, imma fl-​istess ħin se jdum iktar ma jmissna biex innaddfuh. Irridu nimmarkaw id-​data fuq il-​kalendarju tagħna sabiex niftakru meta jkun imissna t-​tindif. L-​indokraturi taʼ l-​istudju tal-​ktieb u l-​assistenti tagħhom għandhom ifakkru lil gruppi tagħhom sew minn qabel għal kull inkarigu.—Ara Our Ministry, paġna 61, paragrafu 3.

7 Nagħtu s-​Sehem Tagħna. Ilkoll kemm aħna għandna nappoġġaw il-​grupp tagħna meta jkun imissna nnaddfu s-​Sala tas-​Saltna. Dan jiżgura li t-​tagħbija ma taqax fuq ftit biss, u aħna nibbenefikaw mill-​attività bnina u s-​sħubija tajba. Imma m’għandniex għalfejn nistennew li jkollna l-​inkarigu tat-​tindif biex innaddfu. Kemm bħala individwi u kemm bħala familji, nistgħu ngħinu biex inpoġġu kollox f’postu wara l-​laqgħat. Jekk naraw xi karti maʼ l-​art, nistgħu niġbruhom; jekk is-​siġġijiet ma jkunux f’posthom, nistgħu nirranġawhom. Kemm hu taʼ sodisfazzjon li naraw il-​post taʼ qima taʼ Jehovah nadif tazza bħala riżultat taʼ l-​isforzi tagħna!

8 Neħemija rrikonoxxa kemm huwa importanti li “ma nitilqux it-​tempju taʼ Alla tagħna.” (Neħ. 10:40 [Neħ. 10:​39, NW];Neħ. 13:11) Aħna nirrikonoxxu li s-​Sala tas-​Saltna tagħna hija ċ-​ċentru tal-​qima fil-​komunità tagħna, u minħabba f’hekk jixraq li nibżgħu għaliha u nieħdu ħsiebha b’qalbna kollha. Jalla lkoll kemm aħna nżommu d-​dinjità tal-​post tal-​qima taʼ Jehovah kemm bil-​kondotta u kemm billi nappoġġaw l-​arranġamenti tat-​tindif. (km-E 7/86)