Ejja Nżommu l-​Post taʼ Qima Tagħna f’Kundizzjoni Tajba

1. Għal liema skop isservi s-​Sala tas-​Saltna?

¹ Madwar id-​dinja hemm iktar minn 94,000 kongregazzjoni tax-​Xhieda taʼ Jehovah. Ħafna mill-​kongregazzjonijiet jinġabru biex jistudjaw il-​Bibbja u għas-​sħubija Kristjana f’Sala tas-​Saltna, li sservi bħala ċentru lokali taʼ qima vera.

2. Għala huwa importanti li nżommu s-​Sala tas-​Saltna nadifa u preżentabbli?

² Skeda Regulari għat-​Tindif: Ix-​xogħol involut biex inżommu s-​Sala tas-​Saltna f’kundizzjoni tajba huwa parti vitali tas-​servizz sagru tagħna. Il-​ktieb Our Ministry f’paġni 61-2 jgħid: “L-​aħwa għandhom jikkunsidrawh bħala privileġġ mhux biss li jappoġġaw is-​Sala tas-​Saltna finanzjarjament imma anki li joffru s-​servizzi tagħhom ħalli jżommuha nadifa, preżentabbli u f’kundizzjoni tajba. Kemm minn ġewwa u kemm minn barra, is-​Sala tas-​Saltna għandha tirrappreżenta l-​organizzazzjoni taʼ Jehovah b’mod xieraq.” Minħabba li s-​Sala tas-​Saltna tintuża bosta drabi fil-​ġimgħa, hemm bżonn li titnaddaf u li ssirilha manutenzjoni regolarment. Is-​soltu, volontieri mill-​kongregazzjonijiet li jiltaqgħu fis-​Sala tas-​Saltna jieħdu ħsieb dawn l-​affarijiet. Bħal fi żminijiet Bibliċi, il-​qaddejja taʼ Jehovah illum għandhom ikunu diliġenti meta ‘jsewwu u jsaħħu’ l-​post taʼ qima tagħhom.—2 Kron. 34:10.

3. Kif inhu organizzat it-​tindif tas-​Sala tas-​Saltna, u min jistaʼ jieħu sehem f’dan il-​privileġġ?

³ Skeda għat-​tindif taʼ kull ġimgħa għandha titwaħħal fuq in-​notice board. Il-​gruppi kollha taʼ l-​istudju tal-​ktieb għandhom darba kull wieħed inaddfu s-​sala kull ġimgħa, waqt li jsegwu lista t’affarijiet li għandhom isiru. Dawk kollha li jifilħu, għandhom jieħdu sehem fil-​privileġġ taʼ kull ġimgħa li jżommu s-​Sala tas-​Saltna nadifa u preżentabbli. Bil-​ħarsien tal-​ġenituri, it-​tfal ukoll jistgħu jieħdu sehem, u b’hekk jiġu mgħallma japprezzaw dan il-​privileġġ. Speċjalment meta iktar minn kongregazzjoni waħda tuża s-​Sala tas-​Saltna, huwa essenzjali li jkun hemm kooperazzjoni tajba sabiex dan l-​aspett importanti tal-​qima tagħna ma jkunx dejjem ir-​responsabbiltà t’erbgħa min-​nies biss.

4. X’għandu jsir sabiex il-​kongregazzjoni tkun taf x’għandha tagħmel meta tnaddaf is-​Sala tas-​Saltna?

⁴ Lista taʼ l-​affarijiet li jridu jsiru tistaʼ titwaħħal possibbilment fejn jinżammu l-​affarijiet tat-​tindif. Din il-​lista għandha tispjega x-​xogħol li għandu jsir kull ġimgħa, li jinkludi l-​knis jew il-​vacuuming, it-​tindif tat-​twieqi, it-​tfarfir taʼ l-​uċuħ, it-​tbattil tal-​bins, il-​ħasil taʼ l-​art, u t-​tindif tal-​mirja. Xi xogħlijiet jistgħu jsiru inqas regolarment, bħal li tintmesaħ l-​għamara u t-​tindif bir-​reqqa tas-​siġġijiet, il-​purtieri, u l-​bozoz imwaħħlin. Il-​kimiċi kollha li jintużaw għat-​tindif għandhom jinżammu f’post fejn ma jilħquhomx it-​tfal u għandu jkollhom tabelli ċari. Kollha għandu jkollhom spjegazzjoni qasira taʼ kif kull kimika għandha tintuża.

5. Kemm hija importanti s-​sigurtà, u liema affarijiet għandhom jiġu ċċekkjati kultant żmien? (Ara l-​kaxxa f’paġna 4.)

⁵ Is-​sigurtà fis-​Sala tas-​Saltna hija waħda mill-​iktar affarijiet importanti. (Dt. 22:8) F’dan ir-​rigward, il-​kaxxa f’paġna 4 tagħti lista taʼ xi affarijiet li għandhom jiġu ċċekkjati kultant żmien biex b’hekk jiġu evitati l-​inċidenti.

6. Ix-​xogħol tal-​manutenzjoni tas-​Sala tas-​Saltna kif inhu koordinat?

⁶ Il-​Manutenzjoni tas-​Sala tas-​Saltna: Il-​ġemgħa taʼ l-​anzjani għandha r-​responsabbiltà li tieħu ħsieb il-​manutenzjoni tas-​Sala tas-​Saltna. Ġeneralment, jinħatar anzjan jew qaddej ministerjali biex jikkoordina x-​xogħol. Hu jorganizza t-​tmexxija minn jum għall-​ieħor tas-​Sala tas-​Saltna, jaċċerta ruħu li tinżamm nadifa u f’kundizzjoni tajba u li hemm biżżejjed affarijiet disponibbli għat-​tindif. Huwa importanti li ma jkun hemm ebda kundizzjonijiet taʼ periklu ġewwa s-​sala jew barra. Meta żewġ kongregazzjonijiet jew iktar jużaw l-​istess sala, il-​ġemgħat taʼ l-​anzjani jaħtru kumitat tas-​Sala tas-​Saltna biex jorganizza l-​arranġamenti għall-​manutenzjoni tal-​bini u l-​proprjetà. Dan il-​kumitat jaħdem taħt id-​direzzjoni tal-​ġemgħat taʼ l-​anzjani.

7. (a) Xi jsir kull sena sabiex is-​Sala tas-​Saltna żgur tinżamm f’kundizzjoni tajba? (b) Liema affarijiet għandhom bżonn l-​attenzjoni kultant żmien? (Ara l-​kaxxa f’paġna 5.)

⁷ Is-​Sala tas-​Saltna tiġi eżaminata bir-​reqqa kull sena. L-​anzjani huma responsabbli biex jagħmlu l-​arranġamenti ħalli jieħdu ħsieb dak kollu li jeħtieġ l-​attenzjoni. Il-​pubblikaturi jistgħu jiġu mistiedna biex jgħinu fit-​tiswijiet u l-​manutenzjoni li jkun hemm bżonn. Ilkoll iridu joqogħdu attenti għad-​dettalji u għandhom jirranġaw malajr l-​affarijiet li jeħtieġu l-​attenzjoni.

8. L-​anzjani meta forsi jistgħu jikkuntattjaw lill-​Kumitat tal-​Pajjiż dwar xi ħaġa tal-​manutenzjoni?

⁸ Jekk l-​anzjani jaraw li hemm bżonn taʼ parir jew assistenza għall-​manutenzjoni tas-​Sala tas-​Saltna, jistgħu l-​ewwel jitkellmu mal-​kumitat tas-​Sala tas-​Saltna. Jekk ikun hemm bżonn taʼ iktar għajnuna u assistenza jistgħu jitkellmu mal-​Kumitat tal-​Pajjiż. Dan jistaʼ jinkludi affarijiet bħal li jiġu ċċekkjati s-​sistema taʼ tisħin u l-​arja kundizzjonata, u li jitranġaw il-​problemi taʼ l-​umdità fil-​bini.

9. Xi proċedura għandha tiġi segwita jekk ikun hemm bżonn li jiġi mqabbad xi kuntrattur?

⁹ Nużaw il-​Fondi tal-​Kongregazzjoni bil-​Għaqal: Ħafna mix-​xogħol li jsir fis-​Sala tas-​Saltna u barra jsir mill-​volontieri. L-​isforzi tas-​sagrifiċċju tagħhom huma espressjoni mill-​aqwa taʼ l-​imħabba u jgħinu ħafna biex jitnaqqsu l-​ispejjeż. Jekk ikun hemm bżonn li jiġi mqabbad xi kuntrattur biex jieħu ħsieb ftit mix-​xogħol, per eżempju li titwaħħal il-​membrana tas-​saqaf jew l-​ippolixxjar taʼ l-​art, l-​anzjani jfittxu offerti kompetittivi għal dan ix-​xogħol. Dan jagħmluh billi l-​ewwel jippreparaw deskrizzjoni dettaljata bil-​miktub dwar ix-​xogħol li jrid isir u kwalunkwe materjal li jkun hemm bżonn. Għandha tingħata kopja taʼ din il-​lista lil xi kompetituri sabiex kollha jagħtu l-​istima tagħhom għall-​istess affarijiet li jkun hemm bżonn. Wara li jirċievu l-​istimi bil-​miktub mingħand diversi wħud li jistgħu jagħmlu x-​xogħol, imbagħad l-​anzjani jistgħu jagħżlu l-​aħjar offerta. Dan għandu jsir anki jekk ikun hemm ħu li offra li jagħmel ix-​xogħol jew li jipprovdi l-​materjal neċessarju bi prezz speċifiku.

10. X’għandu jsir biex il-​fondi tal-​kongregazzjoni żgur jintużaw sew?

¹⁰ Meta iktar minn kongregazzjoni waħda tuża s-​Sala tas-​Saltna, il-​kumitat tas-​Sala tas-​Saltna jżomm kont apparti fil-​bank u jqassam ir-​rapporti finanzjarji bil-​miktub kull xahar lil kull ġemgħa t’anzjani, u għalhekk javża lill-​anzjani dwar kif qed jintefqu l-​fondi. L-​anzjani huma responsabbli li jaraw li l-​fondi tal-​kongregazzjoni qed jintefqu bil-​għaqal.

11. X’għandu jsir jekk ikun hemm bżonn il-​manutenzjoni jew li jsir tiġdid estensiv?

¹¹ Il-​Manutenzjoni u t-​Tiġdid Estensiv: Meta l-​kumitat li jieħu ħsieb jara li hemm bżonn li ssir xi ħaġa kbira fil-​funzjoni jew il-​manutenzjoni tas-​Sala tas-​Saltna, il-​kumitat jieħu l-​kwistjoni quddiem il-​ġemgħat taʼ l-​anzjani għad-​direzzjoni tagħhom. Jekk jaslu biex jiddeċiedu li l-​manutenzjoni jew it-​tiġdid estensiv għandu jsir jew li se jkun hemm bżonn l-​għajnuna minbarra dik tal-​kongregazzjonijiet li jiltaqgħu fis-​Sala tas-​Saltna, l-​anzjani jikkuntattjaw lill-​Kumitat tal-​Pajjiż. Jekk hija involuta xi spiża kbira, se jkun neċessarju li jinkisbu stimi tajbin u titħejja riżoluzzjoni biex tiġi approvata mill-​kongregazzjoni.​—Ara l-​Our Kingdom Ministry taʼ Frar taʼ l-​1994, il-​Kaxxa għall-​Mistoqsija.

12. Kif nistgħu nuru l-​apprezzament tagħna għall-​privileġġ li nattendu l-​laqgħat fis-​Sala tas-​Saltna?

¹² Kemm napprezzaw il-​privileġġ tagħna li niltaqgħu flimkien fis-​Sala tas-​Saltna! Qatt ma rridu nittraskuraw il-​laqgħat tagħna jew ma nistmawhomx. Kulħadd jistaʼ jagħti sehmu biex dan il-​provvediment għall-​inkuraġġiment tagħna jirnexxi billi lkoll nieħdu sehem sħiħ fil-​manutenzjoni tas-​Sala tas-​Saltna tagħna. Dan jigglorifika l-​qima vera u jonora l-​isem taʼ Jehovah. Ejja nkunu determinati li nżommu l-​post taʼ qima tagħna f’kundizzjoni tajba.

[Kaxxa f’paġna 4]

X’Tiċċekkja għas-​Sigurtà

◻ L-​apparat li jitfi n-​nar għandu jkun f’post li jintlaħaq malajr u għandu jiġi ċċekkjat kull sena.

◻ Kwalunkwe sistema li tidentifika d-​duħħan għandha tiġi eżaminata fi qbil mal-​liġi lokali.

◻ Il-​ħruġ u t-​taraġ għandhom ikunu mmarkati b’mod ċar, ikollhom biżżejjed dawl, u faċli tilħaqhom, u l-​poġġaman għandu jkun sod.

◻ Il-​kmamar fejn jinżammu l-​affarijiet tat-​tindif, it-​tojlits, u fejn jitpoġġew il-​ġkieket għandhom jinżammu nodfa, fl-​ordni, u ma jkunx fihom affarijiet li jieħdu n-​nar, affarijiet persunali, u żibel.

◻ Il-​bejt għandu jiġi eżaminat u mnaddaf regolarment.

◻ Id-​dħul taʼ barra, il-​bankini, u fejn jipparkjaw il-​karozzi għandhom ikunu mdawlin biżżejjed u ma jkunux f’kundizzjoni li xi ħadd jistaʼ jiżloq jew jaqaʼ.

◻ Is-​sistemi taʼ tisħin, taʼ l-​elettriku, u l-​ventilazzjoni għandhom

jiġu eżaminati u miżmuma kif suppost.

◻ Jekk ikun hemm xi xaqq qed inixxi għandu jitranġa malajr sabiex jiġu evitati problemi serji taʼ l-​umdità.

◻ Il-​bini għandu jissakkar meta ma jkun hemm ħadd fih.

[Kaxxa f’paġna 5]

Manutenzjoni tal-​Bini u l-​Proprjetà

◻ Barra: Huma l-​bejt, il-​ġnub, iż-​żebgħa, it-​twieqi, u t-​tabella tas-​Sala tas-​Saltna f’kundizzjoni tajba?

◻ Ġewwa: Huma l-​madum, il-​purtieri, is-​siġġijiet, id-​dwal, iż-​żebgħa, il-​kabinett tal-​letteratura, u l-​post fejn jinżammu l-​ġkieket preżentabbli?

◻ It-​Tagħmir: Id-​dwal, is-​sistema taʼ tisħin, is-​sawnd, il-​ventilazzjoni, u l-​arja kundizzjonata qed jaħdmu kif suppost?

◻ It-​Tojlits: Huma dawn nodfa u qed jaħdmu sew?

◻ Dokumenti tal-​kongregazzjoni: Id-​dokumenti legali tal-​kongregazzjoni huma kollha aġġornati u eżatti?