Ibnu lil Xulxin
1 Peress li qed ngħixu fi “żmien iebes,” ilkoll kemm aħna għandna bżonn l-inkuraġġiment. (2 Tim. 3:1) Minħabba li kien jaf sew dwar il-bżonn taʼ dan fi żmienu, Pawlu kien ħerqan biex juża l-kuntatt li kellu maʼ ħutu bħala opportunità biex ‘iqawwu lil xulxin.’ Hu ħeġġeġ lil ħutu biex ‘ifittxu . . . dak li jservi għall-edifikazzjoni taʼ xulxin.’ (Rum. 1:11, 12; 14:19) Dawn l-isforzi rnexxew f’li “jagħmlu l-qalb lid-dixxipli u jħeġġuhom biex jibqgħu fil-fidi.” (Atti 14:22) Aħna neħtieġu ħafna dan l-inkuraġġiment illum.
2 Nistgħu nibnu lil oħrajn b’dak li ngħidu. Kliemna jistaʼ jkun “bħal tuffieħ tad-deheb fuq platt tal-fidda” meta jintuża kif jixraq. (Prov. 25:11) Billi nieħdu sehem fil-laqgħat, aħna nkunu qed ‘nagħmlu l-qalb lil xulxin.’ (Lhud 10:25) Ilsienna nistgħu nużawh b’mod pożittiv meta nirrakkontaw xi esperjenzi, ngħidu prosit lil xi ħadd, jew nitkellmu fuq affarijiet spiritwali. Meta nużaw ilsienna b’mod daqshekk tajjeb se jkun “jedifika . . . , kliem li jagħmel il-ġid lil min jisimgħu.”—Efes. 4:29.
3 Tkellem fuq Affarijiet li Jibnu: Fl-iskrittura taʼ Filippin 4:8, Pawlu pprovdielna gwida li turina kif għandna nitkellmu. Hu qal li għandna naħsbu f’kulma hu veru, f’kulma hu xieraq, f’kulma hu ġust, f’kulma hu safi, f’kulma jiġbed l-imħabba, f’kulma jistħoqqlu l-ġieħ, f’kulma hu virtù, f’kulma ħaqqu t-tifħir. Nistgħu nkunu ċerti li kulma ngħidu se jkun veru u taʼ benefiċċju għal oħrajn jekk dan ikun ibbażat fuq il-Kelma t’Alla. (Ġw. 17:17) Id-dedikazzjoni Kristjana tagħna, dak li nitgħallmu fil-laqgħat tal-kongregazzjoni, il-mod kif aħna nwettqu bis-sħiħ il-ministeru tagħna, u affarijiet bħal dawn huma xierqa jew taʼ tħassib serju. Konversazzjonijiet pożittivi dwar il-livelli u l-prinċipji tal-Kelma t’Alla żgur se jgħinuna nsiru wħud li jkollna “l-għerf li jwassal għas-salvazzjoni.” (2 Tim. 3:15) Nistgħu nesprimu l-apprezzament tagħna lejn il-kondotta safja taʼ dawk li qegħdin ġo l-organizzazzjoni nadifa taʼ Jehovah. Nistgħu nfaħħru l-atti taʼ qalb tajba mimlijin imħabba li jagħmlu ħutna. (Ġw. 13:34, 35) Affarijiet li jistħoqqilhom il-ġieħ jinkludu l-kwalitajiet tajbin Kristjani tal-fidi, l-hena, is-sliem, u s-sabar fit-tul li naraw f’ħutna. Li nitkellmu fuq affarijiet taʼ virtù u li ħaqqhom tifħir huwa ‘għall-ġid’ t’oħrajn.—Rum. 15:2.
4 Kuljum inħabbtu wiċċna maʼ ħafna ansjetajiet taʼ din id-dinja li jaqtgħulna qalbna. Kemm huwa taʼ serħan li nwarrbu dawn l-affarijiet fil-ġenb u naqsmu sħubija mimlija mħabba maʼ ħutna! Il-ħin prezzjuż li nistgħu nqattgħu flimkien huwa teżor li għandna ngħożżu. Jekk aħna dejjem lesti biex nibnu u ninkuraġġixxu lil oħrajn, huma se jkunu verament jistgħu jgħidu dwarna: “Serrħuli l-ispirtu tiegħi.”—1 Kor. 16:18, Karm Żammit.